གཅིག་སྒྲིལ། རང་དབང་། མཐོ་དམན་དབྱེར་མེད། ཕོ་མོ་འདྲ་མཉམ། ཆོལ་ཁ་ཆོས་ལུགས་ཀྱི་འཐེན་འཁྱེར་མེད་པ། འདི་དག་གི་གླེང་གཞི་འདི་འཛིན་དགོས་པ་ནས་ལམ་ཁ་དེ་ལ་ཤར་བསྐྱོད་བྱེད་ཐུབ་མི་ཐུབ་དེ་ནི་མི་མང་དེ་རྨོངས་གཉིད་ལས་སངས་མིན་དང་། མི་དམངས་དེ་ལ་སྣེ་ཁྲིད་བྱེད་མཁན་གྱི་ལས་ཀྱི་སྣེ་མོ་བ་དང་མི་དམངས་ལ་གཏམ་གླེང་བྱེད་མཁན་གྱི་མགོ་ཁྲིད་དེ་དག་ལ་འཁྲི་བའི་འོས་འགན་གཙོ་བོ་ཞིག་ཆགས་ཡོད་པ་རེད། དེས་ན་ངེད་ཅག་ལ་ལམ་སྟོན་དང་སྐད་ཆ་བཤད་མཁན་དག་གི་ལས་ཀྱི་སྣེ་མོ་བ་དེ་དག་གིས་ཚོགས་ཐོག་གི་གཏམ་བཤད་གཅིག་དང་ཡུལ་ཕྱོགས་ཚོ་འཛོམ་དུས་ཀྱི་གཏམ་བཤད་གཅིག་བཅས་གཏམ་བཤད་དེ་གཉིས་ཀྱི་ནང་དོན་མི་འདྲ་ལ་གཏམ་བཤད་དེ་གཉིས་སྤེལ་སྐབས་ཀྱི་སྙིང་སྟོབས་དང་མདུན་པ་ལ་ཡང་ལྕི་ཁོག་མི་འདྲ་བ་ཡོང་གི་ཡོད།
ངེད་ཅག་གིས་མི་སྣ་དེ་དག་གི་ནད་སྙིང་དེ་དག་མ་དྲག་ན། གཅིག་སྒྲིལ། རང་དབང་། མཐོ་དམན་དབྱེར་མེད། ཕོ་མོ་འདྲ་མཉམ། ཆོལ་ཁ་ཆོས་ལུགས་ཀྱི་འཐེན་འཁྱེར་མེད་པ་སོགས་ཀྱི་མིང་ཚིགས་དེ་དག་སྙན་མོ་ཇི་འདྲ་ཡོད་ཀྱང་ལག་ལེན་དུ་མི་ཡོང་ཁོ་ཐག་ཡིན། ལྷག་པར་དུ་སྐུ་ངོ་ཟེར་དུས་གནས་ལུགས་བཤད་ས་མེད་པ་ཞིག་དང་ལས་བྱེད་ཟེར་དུས་ཁོང་ཁྲོ་རྐྱང་རྐྱང་ཅན་ཞིག བོད་ཀྱི་མཁས་བ་དང་རྩོམ་པ་པོ་ཟེར་དུས་ང་རྒྱལ་རྐྱང་རྐྱང་གི་འཚོ་མཁན་ཞིག འདི་དག་ལ་འགྱུར་བ་གང་ཙམ་ཞིག་མ་ཐེབས་བར་དུ་བོད་པ་ཚང་ལ་འགུལ་བསྐྱོད་མི་ཐེབས་པ་ཁོ་ཐག་ཡིན་ལ། གལ་ཏེ་འགུལ་བསྐྱོད་རྒྱག་དུ་འཇུག་དགོས་ཟེར་ན་རྨི་ལམ་ཡིན།
ཚོ་ཁག་དེ་དག་གིས་རང་རང་གི་ནོར་འཁྲུལ་ལ་ངོས་ཟིན་ཐོབ་ནས་ཚུར་བོད་པ་ཚང་གི་བདེ་སྡུག་གཅིག་དང་བོད་པ་ཚང་གི་ཤ་ཁྲག་གཅིག་ཞེས་ཁ་ཞེ་དོན་གནས་ཤིག་བཤད་པ་ནས་སྒྲུབ་ཉིན་དེ་ནི་བོད་པ་ཚང་གི་འགྱུར་བ་བཟང་ཤོས་དང་གྲུབ་འབྲུས་ཆེ་ཤོས་ཐོབ་ཉིན་ཡིན།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།