སྟོད་རྒྱ་གར་ཡུལ་ལ་འགྲོ་ནི་ཚོ།།
ལྷ་ཕྱག་ན་བདྨོར་མཇལ་དུ་འགྲོ།
བོད་ཁ་བའི་སྐྱིད་སྡུག་ཞུ་རུ་འགྲོ།
ད་མི་འདུག་ཞི་བའི་ལམ་ལ་འགྲོ།
ཡུལ་གངས་རིའི་ཁྲོད་ཀྱི་བོད་མི་ཚོ།།
བོད་ཚང་མ་ཁ་ཕྱོགས་མཐུན་ནས་འགྲོ།
ལུས་ལ་རྒྱའི་དར་ཆ་བསྒྲེང་ནས་འགྲོ།
ད་མི་འདུག་ལ་རྒྱ་གླེང་ནས་འགྲོ།
རེམ་ཡ་བོད་ཀྱི་དཔོན་པོ་ཚོ།།
ཐོབ་དང་རྒྱུ་ནོར་གོ་སའི་ཆེད།།
གོང་མའི་རྒྱ་ལ་མགོ་མ་བསྒུར།།
ཁྱེད་ཚོ་བཙན་པོའི་གདུང་རྒྱུད་ཡིན།།
རེམ་ཡ་བོད་རིགས་གླུ་བ་ཚོ།།
བོད་མིའི་བདེ་སྡུག་གླུ་རུ་ལོངས།།
གདོང་དམར་བོད་པའི་ལ་རྒྱ་དེ།།
ཡ་ཆུང་གངས་དཀར་སེམས་ན་ཡོད།།
དྲ་གྲོགས་ཚོ། བོད་ནང་གི་བོད་མི་འདི་དག་གི་སྙིང་སྟོབས་དང་སེམས་ཤུགས་ཀྱི་བསླེང་བས་གླུ་འདི་ལ་ཉོན་དང་། ཁྱེད་རང་ལ་བོད་པ་ཚང་གི་ལ་རྒྱ་ཞིག་དབང་མེད་དུ་འཕར་ངེས་ཡིན་ལ་འདི་དག་གི་སེམས་ཤུགས་ལ་རྗེས་སུ་ཡི་རུང་ཡང་བྱེད་ངེས་པ་མ་ཟད། མི་འདི་དག་གི་སྙིང་སྟོབས་དེ་འདྲ་བོད་མི་ཡོངས་ལ་ཡོད་ན་ཅི་མ་རུང་ཡང་སྙམ་ངེས་ཡིན། ལྷག་པར་དུ་གླུ་ཚིག་རྩོམ་པ་པོ་དང་གླུ་ལེན་མཁན། དབྱངས་རྩོམ་པ་པོ་འདི་གསུམ་གྱིས་མཐུན་སྒྲིལ་གྱི་ནུས་པ་ཡང་གཞན་ལས་ཁྱད་དུ་འཕགས་པ་ཞིག་དང་བོད་སེམས་གཅིག་སྒྲིལ་གྱི་ནུས་པ་ཡང་ར་སྤྲོད་བྱེད་ངེས་ཡིན།
ཁོང་ཚོས་རང་ཉིད་ཀྱི་མདུན་ལམ་ལ་སེམས་འཁུར་བྱེད་པ་ལས་བོད་མི་དམངས་ཀྱི་མདུན་ལམ་ལ་གལ་ཆེན་དུ་བཟུང་ནས་རྒྱ་ནག་སྲིད་གཞུང་གི་གནོན་ཤུགས་ལ་མ་འཛེམ་པར་ངེད་ཅག་བོད་པ་ཚང་གི་བདེ་སྡུག་གླུ་རུ་བླངས་དེ་བདེན་དབུང་བྱེད་ཀྱི་འདུག་པ་འདིས་དབྱངས་རྟ་ལ་ག་ལེར་གསོན་དང་ཁྱེད་རང་ལ་སྐྱོ་སྣང་ཞིག་སྤྲོད་ངེས་ཡིན། སྐྱོ་སྣང་དེ་ནི་རང་དབང་དང་ཐོབ་ཐབ་མེད་པའི་མི་རིགས་ཤིག་གི་སེམས་ཁམས་ཀྱི་དབྱངས་རྟ་ལས་གང་ཡང་མ་རེད།
ཁོང་ཚོ་ལྟ་བུ་བོད་མི་དམངས་ཀྱི་བརྗེད་དུ་མི་རུང་བའི་བོད་ཀྱི་གཞོན་སྐྱེས་དག་རེད་ལ། སེམས་ཤུགས་དང་ལ་རྒྱའི་འཁང་བས་བོད་པ་ཚང་གི་སྣེ་ཁྲིད་པ་དང་ལམ་སྟོན་པའི་ཕྱོགས་ཁག་ཆུང་ཆུང་ཞིག་དང་། བོད་མི་དམངས་ཀྱི་བདེ་སྡུག་གླུ་རུ་ལེན་མཁན་གྱི་འགྲིན་ཚབ་པ་བཟང་བོ་ཏག་ཏག་རེད། ཁོང་ཚོ་ལ་ཐོབ་པ་ཉུང་ལ་ཤོར་བ་མང་བས་ལམ་ཁ་དེ་ནས་རང་རང་གི་ཕུགས་བསམ་བརྟན་པོར་གཉར་ནས་བོད་ཀྱི་གླུ་ལེན་པ་དང་བོད་ཀྱི་གླུ་ཚིག་འབྲི་བ། བོད་ཀྱི་སེམས་ཁོང་གི་དབྱངས་རྟ་རྩོམ་མཁན་རེད།
འདི་ལྟར་བོད་ནང་གི་གཞོན་སྐྱེས་མི་ཉུང་བ་ཞིག་གིས་བསྟུད་མར་བོད་ཀྱི་བདེ་སྡུག་གླུ་རུ་བླངས་དེ་བོད་པ་ཚང་གཉིད་ལས་སློང་བཞིན་ཡོད་ལ། ཡིག་རྨོངས་དེ་དག་གི་རྣ་ལམ་དུ་དབྱངས་རྟ་འདི་དག་གི་འབྱོེར་དུས་སུ། ཁོང་ཚོས་ཀྱང་རང་ཉིད་ལ་བོད་པ་ཚང་གི་འགན་འཁུར་ཡོད་པ་ཤེས་སུ་འཇུག་བཞིན་ཡོད། འདི་ནི་ཁོང་ཚོས་བྱེད་བཞིན་པ་དང་ཁོང་ཚོས་བྱེད་རུང་བར་འདོད་པ་ནས་ཉེན་ཁ་དང་ཚེ་སྲོག་གི་ཆགས་འཇིག་ལ་ཚེར་སྣང་མེད་པར་འགྲོ་བཞིན་ཡོད།
ད་དུང་ཁོང་ཚོ་མུ་མཐུད་དུ་འགྲོ་ངེས་ཡིན་ལ། ཁོང་ཚོས་རང་ཉིད་ནས་མགོ་བཙུགས་དེ་བོད་མི་དམངས་ཀྱང་འདི་ལྟར་འགྲོ་བར་སྐུལ་མ་བྱེད་ཀྱི་ཡོད། དཔེར་ན་བོད་ཀྱི་གླུ་བ་གྲགས་ཅན། གངས་ཅན་པ་ལེན་མཁན་སྒྲོལ་མ་སྐྱབས་ལྟ་བུ་གཙོ་བའི་ལ་རྒྱའི་གླུ་བ་འདི་དག་བོད་གངས་ཅན་པ་ཚང་གཉིད་ལས་དཀྲོགས་བཞིན་ཡོད། གླུ་བ་འདི་དག་ངོ་གསོ་ཡར་ལ་བསྟོད། གླུ་ཚིག་རྩོམ་པ་པོ་འདི་དག་ངོ་གསོ་ཡར་ལ་བསྟོད། དབྱངས་རྩོམ་པ་པོ་དེ་དག་ངོ་གསོ་ཡར་ལ་བསྟོད། མདོར་ན་བོད་དོན་དུ་རྐ་ལག་འགུལ་མཁན་ཚང་མ་ངོ་གསོ་ཡར་ལ་བསྟོད། བོད་ཀྱི་ངོ་གསོ་ཡར་ལ་བསྟོད། གངས་ཅན་པ་ཚང་གི་ངོ་གསོ་ཡར་ལ་བསྟོད།
