ང་རང་ནི་དུས་རྟག་ཏུ་སྐད་ཆ་གཅིག་ལས་གཉིས་བཤད་མཁན་དེ་འདྲ་ཞིག་རྩ་ནས་མིན། བོད་ཟེར་བ་ནི་གཅིག་ལས་གཉིས་མེད་པ་དང་ཆོལ་ཁ་དང་ཆོས་ལུགས་ཁ་ལ་འཁྱེར་ནས་ཡོང་མཁན་གྱི་བོད་པ་ཚང་གི་ཞབས་འདྲེན་གང་ན་སུ་ཡོད་པ་དག་ལ་ངས་ནམ་ཡང་དགའ་བསུ་ཞུ་འདོད་མེད་ལ། ང་རང་ཆོལ་ཁ་དང་ཆོས་ལུགས་ཀྱི་ཕྱོགས་བྱེད་མཁན་དེ་དག་ལ་ནམ་ཡང་རྒྱབ་སྐྱོར་ལས་ངོ་རྒོལ་ཤུགས་ཆེན་ཡོད། དེ་རང་ངེད་ཅག་གི་གླེང་བཞིན་པ་ནི་རིག་གནས་ནང་བསྒྱུར་བྱེད་པོ་བསྟན་འཛིན་རིག་བཟང་ཟེར་བ་ལས་འཕྲོས་པའི་གཏམ་ཞིག་གླེང་བཞིན་ཡོད་པ་རེད། ང་རང་གི་དངོས་ནས་བཤད་པ་ཡིན་ན། མི་སུ་ཡིན་ཡང་འགྲིག མཐོ་དམན་དང་མིང་དང་སྙན་གྲགས་ཡོད་མེད་ལ་ཁྱད་པར་དེ་བས་ཀྱང་མེད། བོད་ཀྱི་ཞབས་འདེགས་སུས་ཞུས་པ་དང་ཞུ་མཁན་གང་ན་ཡོད་པ་དེ་དག་ལ་སེམས་གཏིང་ནས་རྒྱབ་སྐྱོར་དང་རྗེས་སུ་ཡི་རུང་ཡོད་པ་ལས་དམའ་འབེབས་བྱེད་འདོད་ཀྱི་ཀུན་སློང་དེ་འདྲ་རྩ་ནས་མེད། ཡིན་ཡང་། དེང་སང་མི་མང་བོ་ཞིག་གིས་རང་རང་གི་གང་ཞིག་ཕར་རོལ་དང་ཕྱི་ནང་གསང་གསུམ་རྟོགས་ཡོད་འདོག་གི་མི་རིག་ཚད་ལ་དམའ་འབེབས་དང་མཐོང་ཆུང་བྱེད་པ་ལས་ཕན་ཚུན་གྱི་བསམ་ཚུལ་ལ་གྲོས་མོལ་དང་གླེང་གཞི་འཛུགས་རྒྱུ་དེ་སེམས་གཏིང་ནས་འབོར་བཞིན་འདུག་པ་འདི་ནི་སེམས་སྐྱོ་བ་ནས་གོ་ན་མི་འདོད་པ་ཤ་སྟག་ཞིག་ལས་མཁས་པ་དང་ཤེས་ཡོན་པ་ཡིན་ཟེར་མཁན་གྱི་ལས་ཀ་ཞིག་ལ་ངས་གཏན་ནས་ངོས་འཛིན་མི་བྱེད་ཁོ་ཐག་ཡིན། ངེད་ཅག་ལ་དགོས་པ་ནི་རིག་གནས་ནང་འདྲེན་བྱེད་དང་སྒེར་དང་ཚོགས་པ་སོགས་ཅི་ཙམ་མང་ན་དེ་བས་བཟང་མོད། འོན་ཀྱང་། ཞབས་དྲུང་ཚང་གི་བཤད་སྲོལ་ཡིན་ན་བསྟན་འཛིན་རིག་བཟང་གི་གཞན་གྱི་བསྒྱུར་བརྐུ་བཤུ་བྱས་པ་ལྟ་བུ་གསུང་གི་འདུག དེ་ནི་ཁུངས་ལུང་གསལ་བོ་ཡོད་ན་ཕྱིར་བཏོན་ན་ཡག་པོ་ཡོད་པ་རེད། དེ་མིན་ཁུངས་ལུང་གསལ་བོ་དག་པོ་མེད་པར་མི་ཞིག་གི་རང་གི་དཀའ་ལས་བརྒྱབ་ནས་གྲུབ་པའི་ལས་ཀ་དེའི་རིགས་ལ་གཞི་མེད་སྐྱོན་འཛུགས་བྱེད་མཁན་དག་ནི་དངོས་ནས་བོད་པ་ཚང་གི་ཞབས་འདྲེན་དང་ནང་ཁུལ་ལ་གཏོར་བཤིག་གཏོང་མཁན་ལས་གང་ཡང་མ་རེད་དོ།
གཞུག་འདིར་ངས་༧གོང་ས་མཆོག་གི་བཀའ་སློབ་ཞིག་ཚོགས་ཐོག་ནས་གསུང་བ་དྲ་གྲོགས་ཚོ་སྤྱན་འབུལ་ཞུ་རྒྱུ་ཡིན་ན། མི་ཆེན་བླ་ཆེན་གྱི་བཀའ་སློབ་ལ་མོས་པ་དང་དགའ་བསུ་མེད་མཁན་དག་གིས་བཀའ་སློབ་ནང་དུ་ལེན་རྒྱུ་རེད་ཡོད་མེད་བརྟག་ནས་རྗེས་སུ་ང་རང་ལ་ཁ་རྡུང་བཏང་ན་འགྲིག་གི་ཡོད།
དེ་གངས་ཅན་པ་སྤྱིའི་ལས་འགན་ཞིག་རེད་མ་གཏོགས་ང་མི་གཅིག་གི་དོན་དག་དང་ང་གཅིག་གི་བྱེད་དགོས་པ་དེ་འདྲ་མ་རེད། འགྲུབ་གི་མ་རེད། ང་ཚོ་ཚང་མའི་དོན་དག་རེད། གཡས་ཕྱོགས་གཡོན་འདེགས་བྱས་ནས་ཚང་མའི་ཐུན་མོང་གི་ཐོག་ནས་ནུས་པ་བཏོན་ནས་འབད་བརྩོན་བྱེད་དགོས་པ་ཞིག་ཆགས་ཀྱི་ཡོད་པ་རེད།
གཉིས་པ།
ཞབས་དྲུང་ལགས། ཁྱེད་ཀྱི་འགག་བཞག་སྤང་གསུམ་བྱེད་འདོད་ཀྱང་། ངེད་ཅག་གི་ཁྱེད་རང་ལ་བཤད་དུ་མ་བཅུགས་པ་ལྟ་བུ་བཤད་ཀྱི་འདུག དེ་ནི་ཁྱེད་རང་གི་སྐད་ཆ་དྲང་མོ་བཤད་མ་སོང་། ཁྱེད་རང་གི་གང་བཤད་འདོད་པ་འདི་ལས་ལྷག་ཞིག་ཡོད་ན་ནི། དོན་མེད་དུ་མི་ལ་སྡུག་དམོད་བྱེད་འདོད་པ་ལས་ད་གང་ཡང་ལུས་ཡོད་ས་མེད། མི་ལ་ནག་ཉེས་འཛུགས་མཁན་གྱི་དང་བོ་ཁྱེད་རང་གི་མགོ་བརྩམས་པ་ཡིན་མོད། ཡིན་ཡང་ཁྱེད་རང་གི་མི་དེའི་ནག་ཉེས་ཇི་ལྟར་བསགས་མིན་ད་དུང་ཁ་གསལ་བཀོད་མི་ཐུབ་དོན་ཅི་ཡིན་ནམ། ངེད་ཅག་གི་མི་ལ་ནག་ཉེས་འཛུགས་པ་ལས་སླ་བོ་གཏན་ནས་མིན། མི་དེ་དག་གི་རང་རང་གི་དཀའ་ལས་མང་བོ་ཞིག་བརྒྱབ་ཡོད་པ་ལ་ཁྱེད་རང་ཡིད་ཆེས་མེད་སྟངས་ཀྱི་ལོ་རྒྱུས་གསལ་བོ་ཞིག་ཁྱེད་རང་ལ་ཡང་བཤད་རྒྱུ་མི་འདུག་དོན་གང་རེད། ང་ཚོ་བོད་པ་ཟེར་བ་འདི་ལ་སྐྱོན་ཆེ་ཤོས་ཤིག་ཡོད་པ་ནི་རང་གི་གང་བྱས་རང་གི་མི་དྲན་ལ་གཞན་གྱི་གང་བྱེད་ནམ་ཡང་མཐོང་ནས་ཡོད་པ་དེ་རེད། འོན་ཀྱང་། མཐོང་བ་དེ་ཡང་རྒྱུ་མཚན་ཡོད་པ་དང་གོ་རིམ་ཡོད་པ་ཞིག་ཡིན་ན་ནི་དངོས་ནས་དགའ་བསུ་ལོས་བྱེད། དེ་ཡང་མིན་པར་དེ་འདྲ་ཞིག་བྱས་རབས་འདུག་ལ་དེ་འདྲ་ཞིག་གོ་སོང་ཟེར་བ་སོགས་གཅིག་བུ་རེད། ཁྱེད་རང་གི་བཤད་བཞིན་པ་དེ་དག་གནས་ལུགས་ཡིན་པ་ལས་མི་གཞན་གྱི་བཤད་པ་ཆལ་གཏམ་དང་རྙོག་གཏམ་རྐྱང་རྐྱང་ཡིན་པར་སྨྲ་བ་ནི། དངོས་ནས་བཤད་ན་དེ་ནི་དྲང་མོ་ཞིག་མ་རེད་དོ། རྗེས་སུ་སྐད་ཆ་གང་ཞིག་བཤད་འདོད་ཡོད་ན་བསམ་བློ་བཏང་ནས་དྲ་གྲོགས་ཚོ་ལ་བཤད་རོགས་གནོང་། དེ་ང་རང་གི་མཐའ་མའི་རེ་སྐུལ་ཡིན། ང་རང་ནམ་ཡང་ཚིགས་ཐོག་ན་འགྱུར་མེད་ཡིན། བོད་ཟེར་བ་ནི་གཅིག་ལས་གཉིས་མེད་ལ། རིག་གནས་སུས་ནང་འདྲེན་བྱེད་པ་ཡིན་ན་དེ་ལ་སེམས་གཏིང་ནས་དགའ་བསུ་དང་རྒྱབ་སྐྱོར་ཡོད་ལ། སུས་རིག་གནས་ཕྱི་འདྲེན་བྱས་པ་ཡིན་ན་དེ་ལ་དགའ་བསུ་ཞུ་ཐུབ་ཀྱི་མེད་དོ།
