ཨ་མའི་མིང་ལས་བཙལ་བའི་རང་ཉིད།

ཅི་ཐུབ་ལས་ལ་ཞུགས་པའི་འཚོ་བ་དེའི་ཆེད་དུ
ཆུབ་པའི་རིག་ལམ་ཟབ་མོ་ཞིག་མེད་ཀྱང་
ཇི་ལྟར་བགྲོད་ཟིན་པའི་མྱོང་བྱང་དེ་དག་གིས
ཉམ་ཆུང་བའི་རྐང་རྗེས་ནི་དེ་བས་ཆུང་

ཏན་ཏན་ཏིག་ཏིག་གིས་ལས་ཤིག་ལ་འབད་ཀྱང་
ཐལ་འགྱུར་བའི་རྟོགས་བློ་འདི་ནི
དལ་མོར་རྒྱུ་བ་ནི་རུས་སྤལ་བགྲོད་པའི་ཚུལ་དང་བཅས
ནུར་མ་བཀོག་པའི་མི་ཚེ་ནི་འདི་འདྲ་རང་རེད

པང་ལེབ་སྟེང་ནས་ཡི་གེ་རེ་གཉིས་སྨྱུག་རྩེ་རུ་བླངས་དེ
ཕུང་བོ་གསར་བའི་མི་གཤིས་ལ་རྟོགས་སད་ཀྱི་རུ་སྣ་དྲངས་ཀྱང་
བང་ཆེན་ལྟ་བའི་བྱས་རྗེས་ཤིག་མེད་པར
མ་དང་བརྩེ་བའི་དྲིན་ལན་ཙམ་ཡང་མ་ཞོག

ཙུ་གུ་ཆུང་ཆུང་ཞིག་གི་ལུས་ཕུང་ལས་མེད་དུས
ཚང་མར་ཐུགས་འཁུར་དང་བྱམས་བརྩེ་སྤྱིན་མཁན་ནི་ཨ་མ་ཡིན་ཡང་
ཛ་དྲག་དང་རྒས་འཁོ་བྱུང་དུས་ཀྱི་ཉིན་མོ་དེར
ཝ་མ་ཝོལ་གྱི་ངང་དུ་བརྩེ་བའི་མ་མ་རྒྱང་རིང་ཡུལ་ནས་སྐྱུར

ཞོ་དང་འོ་མར་གྱི་བསོས་པའི་དྲིན་མོ་ཆེ་ནི
ཟུངས་ཁྲག་བཙག་ནས་སྤྲད་ཀྱང་དྲིན་ལན་བསོས་དཀའ་ན་ཡང་
འུ་ཐུག་ཐབས་སད་ཀྱི་བུ་སྡུག་ང་ནི
ཡ་རབ་དམ་པའི་ལུགས་ཙམ་མེད་པར་རང་ཉིད་བདེ་བའི་མལ་དུ་གཉིད

རལ་ཟིན་པའི་སེམས་པ་རླུང་གི་ཟོས
ལབ་གླེང་མེད་པའི་སྐད་ཆ་མེ་ཡི་གཞུས
ཤ་དང་མཆིན་པའི་ཚོར་བ་མྱི་ཁའི་འཐག
སད་ཀྱི་འཁྱེར་ཟིན་པའི་ལུས་པོ་འདི་ལ་རིན་ཐང་བྲལ

ཧྲུ་ཡིག་ཞིག་མིག་ལམ་ནས་མངོན
ཨང་གྲངས་དེ་ནི་ཀླད་ཀོར་མིན་པར་བསམ་ན་ཡང་
ཧ་ལས་པའི་བྱ་བཞག་གང་ཡང་མེད་པར
ཨ་མ་དྲིན་མོ་ཆེ་དང་འཇལ་བར་སེམས་པ་གཏིང་ནས་སྐྱོ