སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} ཉེར་གསུམ།

ནོར་བུ་བཟང་མོས། བློ་བཟང་ཁྱེད་རང་གི་གླུ་དབྱངས་དེ་ཆ་ཚང་ཤེས་ཀྱི་ཡོད་དམ། ཡོད་ན་ང་རང་ལ་ཡིག་ཐོག་དུ་ཕབ་ན་འགྲིག་གི་རེད་དམ། ང་དངོས་ནས་གླུ་དབྱངས་དེར་ཧ་ཅང་དགའ་བོ་ཡོད་ཅེས་བཤད་དུས། བློ་བཟང་གིས་ངའི་སྐད་ངག་ནི་སྙན་པོ་མེད་པ་ང་རང་གི་ཤེས་གསལ་རེད། དངོས་ནས་གླུ་དབྱངས་འདིས་ཚིག་ལ་དགའ་བ་ཡིན་ངེས་རེད་སྙམ་ཞོར་དུ། འགྲིག་དང་འགྲིག ངས་ནོ་ནུབ་སོང་དེ་བྲིས་ནས་ཉིན་ཁ་ཤས་ཀྱི་རྗེས་སུ་ང་རང་ཁྱེད་ཚང་དུ་ཡོང་དུས་འཁྱེར་ནས་ཡོང་ཆོག་ཟེར་ནས་ལན་བཏབ།

མེག་ལོར་གྱི་སུམ་མདོ་ནས་བློ་བཟང་ཁོ་རང་གི་འདུག་སའི་ཕྱོགས་སུ་ཕྱིན་པ་དང་། ལྷ་མོ་དང་ནོར་བུ་བཟང་མོ་གཉིས་གཙུག་ལག་ཁང་གི་ཕྱོགས་སུ་ཆས། བློ་བཟང་གིས་ད་ནི་མི་རིང་བར་རྡ་ས་ནས་ཁ་གྱེས་ན་ཡག་ས་རེད། ལས་ཀ་མེད་པའི་སྒང་ལ་དོན་དག་གང་ཞིག་མགོ་ལ་ཡོང་མིན་མི་ཤེས་ཟེར་ནས་སྟོང་འདང་ཞིག་རྒྱག་ཞོར་དུ་ཙོང་ཁ་ཟ་ཁང་འོག་གི་བོད་དྲན་ཟ་ཁང་འགྲམ་དུ་སླེབས་མ་ཐག གློ་བུར་དུ་མི་ཞིག་གིས་ཕྱི་ལོག་ནས་བློ་བཟང་ཟེར་ནས་བོས་པ་ཐོས།

བློ་བཟང་། ཁྱེད་རང་གི་འདུག་རོགས་ཀྱིས་བཤད་ན། ཁ་སང་དེ་རིང་ཁྱེད་ལ་ལས་ཀ་མེད་པར་བསྡད་ཡོད་པ་རེད་ཟེར། དེས་ན་རབ་ན་ང་རང་གི་ཟ་ཁང་ནང་དུ་མུ་མཐུད་དུ་ལས་ཀ་བྱེད་རོགས་ཞུ། མ་བྱུང་རང་ཟླ་གཅིག་གི་རིང་དུ་ང་རང་ལ་རོགས་ཤིག་གི་ཚུལ་དུ་བསྡད་པ་ཡིན་ན་ག་འདྲ་འདུག་ཟེར་ནས་བཤད་མཁན་དེ་ནི་བློ་བཟང་གི་གྲོགས་པོ་ཞིག་གི་རང་ཉིད་ཀྱི་ཟ་ཁང་གསར་དུ་འཛིན་བཞིན་ཡོད་ཀྱང་། ཉམ་མྱོང་ཡོད་མཁན་གྱི་གྲོགས་པོ་ཟ་ཁང་དུ་ལས་ཀ་བྱེད་མྱོང་མཁན་མེད་སྟབས་བློ་བཟང་ལ་རེ་བ་ཞུས་པ་དེར་བློ་བཟང་གིས་དང་ལེན་མི་བྱེད་ཐབས་མེད་དུ་གྱུར།

བློ་བཟང་གིས་གྲོགས་པོ་དེའི་ཟ་ཁང་གསར་དུ་སྒོ་ཕྱེ་བ་དེའི་ནང་དུ་ལས་ཀ་རེ་བྱེད་བཞིན་ཡོད་ལ། ཟ་ཁང་དེའི་ནང་གི་མ་བྱན་ལྟེ་བ་དེ་ཡང་བོད་པའི་ཕོ་གསར་ཞིག་ཡིན་པ་མ་ཟད། ཁོ་གཉིས་ཀྱང་འདྲིས་པར་ལས་སླ་བ་ནས་ཕན་ཚུན་ནང་ཚག་ལྟ་བུ་ཞིག་དུ་ཉིན་ཁ་ཤས་ཀྱི་རྗེས་སུ་ཆགས་པ་རེད། དེ་ནི་ས་མཐའི་སྐྱིད་སྡུག་གཅིག་གི་འོག་གི་མི་སྤྱི་མཚུངས་ཀྱི་གོམ་གཤིས་ཤིག་ཀྱང་ཡིན་སྲིད་པ་རེད། ཡིན་ཡང་། བློ་བཟང་གི་ལས་རོགས་མ་བྱན་ལྟེ་བ་དེ་ནི་རྩྭ་རུ་འབོད་པའམ་དུ་ནག་འཐེན་རྒྱུར་དགའ་མཁན་ཞིག་ཆགས་ཡོད་པ་རེད།

བློ་བཟང་། ཁྱེད་རང་གིས་སྔོན་ཆད་འདིའི་རིགས་འཐེན་མྱོང་ཡོད་དམ་ཟེར་ནས་ཁོ་རང་གི་ལག་ནང་གི་རྩྭ་དང་བསྲེས་སྤྱོར་བྱེད་པའི་ཐ་མག་ནག་པོ་ཕུར་ཞོར་དུ་བློ་བཟང་ལ་དྲིས།

བློ་བཟང་གིས་གཏན་ནས་འཐེན་མྱོང་མེད། དེ་ནི་དངོས་ནས་གོམ་སོང་བ་ཡིན་ན་གཏན་ནས་གཏོང་ཐབས་མེད་པ་ཞིག་ཡིན་ཚོད་འདུག་ལ། དེས་མི་མང་བོ་ཞིག་གི་ཚེ་སྲོག་ལ་ཡང་གནོད་བསྐྱེལ་བཞིན་ཡོད་ཚུལ་མང་བོ་ཞིག་ཐོས་མྱོང་ཡོད་ཟེར་ནས་བཤད།

མ་བྱན་ཕོ་གསར་དེ་དགོད་ཞོར་དུ། རེད་ཡ། ང་ལྟ་བུ་ཡུན་རིང་ལ་གསོན་འདོད་མེད་པ་དང་རང་གི་མི་ཚེ་ལ་སྐྱིད་པོ་བྱེད་འདོད་ཡོད་མཁན་དག་གིས་འདི་ལོང་སྤྱོད་བྱེད་བཞིན་ཡོད་པ་རེད་ལ། འདིས་སྤྲད་པའི་ཚོར་བ་དེ་ནི་སུས་ཀྱང་ཚབ་བྱེད་མི་ཐུབ་པའི་ཚོར་སྣང་བདེ་ཚོར་བ་ཞིག་ཡིན་ནི་རེད། གཅིག་གཉིས་ཤིག་འཐེན་པ་ཙམ་གྱིས་སྐྱག་བླངས་དུ་ཤོར་མི་སྲིད་པ་ཡིན། ངས་ཀྱང་མཚམས་རེར་སྒོར་མོ་ཡོད་དུས་རེ་ཉུང་ཉུང་རེ་འཐེན་པ་ཡིན། ག་དུས་ཡིན་ན་འཐེན་ཐུབ་ནི་མ་རེད་ལ། ལག་དུ་རེག་རྒྱུ་དེ་ཡང་ལས་སླ་བོ་མ་རེད། ཁྱེད་རང་གི་ཚོད་ལྟ་ཞིག་བྱས་ཀྱང་སྐྱོན་ནི་མ་རེད། འདི་ཟེར་ནས་བློ་བཟང་གི་ཕྱོགས་སུ་ལག་པ་བསྲིངས་དེ། མེ་ལ་བསྒོས་ཟིན་པའི་ཐ་མག་ནག་པོ་དེ་བློ་བཟང་ལ་སྤྲད།

བློ་བཟང་གིས་དེ་མ་ཐག བཟང་ངན་ཡག་བཙོག་གི་ཚིག་ལན་ཡང་འདེབས་དབང་མེད་པར་ལག་དུ་བླངས་དེ་ཁ་ནང་དུ་བཙུགས་དེ་ཧུབ་གཅིག་གཉིས་ཤིག་འཐེན་ནས་ཚོད་ལྟ་ཙམ་བྱས་དེ་ཁོ་རང་ལ་ཕར་ལོག

མ་བྱན་དེས་དེ་འདྲ་ཉུང་ངུ་ཞིག་གིས་ཚོར་བ་གང་ཡང་སྤྲོད་ཐུབ་ནི་མ་རེད། སེམས་པ་སྐྱིད་པོའི་ཕྱོགས་སུ་བསམ་བློ་བཏང་ནས་ག་ལེར་འཐེན་དང་། བར་སྐབས་ཤིག་ལ་མགོ་བོ་ན་བ་ལྟ་བུའི་ཚོར་བ་ཞིག་སླེབས་ངེས་ཡིན། དེ་དུས་མཚམས་བཞག་ནས་བསམ་བློ་སྐྱིད་པོ་བཏང་ན་དངོས་ནས་སྐྱིད་པོ་ཡོང་ངེས་ཡིན་ཟེར་ནས་བློ་བཟང་གི་ལག་གི་ཐ་མག་ནག་པོ་ཁོ་རང་གིས་ཕྱིར་མ་བླངས།

བློ་བཟང་གིས་ཀྱང་བདེན་པར་བསམ་བཞིན་དུ། ག་ལེར་འཐེན། དངོས་ནས་འཐེན་བཞིན་འཐེན་བཞིན། བར་སྐབས་ཤིག་ལ་མགོ་བོ་ན་བ་ལྟ་བུའི་ཚོར་བ་ཞིག་སླེབས་སྟབས། རོགས་པ་དེར་དངོས་ནས་ད་ལྟ་ང་རང་མགོ་བོ་ན་གྲབས་བྱེད་ཀྱི་འདུག་ཟེར་ནས་བཤད།

རོགས་པ་མ་བྱན་དེས། ཨོ་་་ ད་དེས་ན་ཁྱེད་རང་ག་ལེར་ནང་དུ་སོང་དེ་གཉིད་ན་ཡག་གི་རེད། དོ་ནུབ་མི་ཡང་མང་བོ་མེད་པས་ཁྱེད་རང་ད་ལྟ་རང་ནང་དུ་ལོག་ན་འགྲིག་གི་རེད།

བློ་བཟང་གིས་སྐད་ཆ་དེར་བདེན་ཁ་སྤྲད་དེ། ཡོངས་གླིང་གི་སྒེའུ་འཛེག་རིང་མོ་དེ་བརྒྱུད་དེ་མར་འབབ་བཞིན་སྐབས་སུ་ཁོ་རང་གིས་རང་གི་རྐང་བ་དེ་གཉིས་ནི་བར་སྣང་ཞིག་ནས་བསྐྱོད་བཞིན་པའི་སྣང་བ་ལྟ་བུ་ཞིག་སླེབས་ཞོར་དུ་རང་གི་བསྡོད་གནས་སུ་སྙེགས།