གཟུགས་གཞི་འདི་ལ་འཐམ་པའི་མགོ་སྐམ་ནང་།།
མགོ་སྐམ་ནང་ལ་འཐིམ་པ་བསམ་སྟོང་ཞིག།
བསམ་སྟོང་འདི་ལ་གནས་པ་ཚོར་སྨྱོན་ཞིག།
ཚོར་སྨྱོན་འདི་ཡིས་བསླུས་པ་གྲངས་ཀ་མེད།།
སྒྱུ་མའི་ལུས་ལ་འཁྲུལ་བ་རྣམ་ཤེས་ཀྱིས།།
ངེས་བརྟན་མེད་པའི་སྲེད་པའི་གཡབ་མོ་ཞིག།
གཡབ་མོའི་འོག་དུ་བླངས་པའི་སྐྱེ་བ་འདི།།
ཕོ་གསར་ཚུགས་མེད་ཅིག་གི་རོ་ཐོ་རེད།།
ཤི་འདས་ལན་ཆགས་གོར་མོ་བརྗེད་དུ་གྱུར།།
ནང་གི་བསམ་བྱ་སྐད་ཅིག་ཉིད་དུ་བོར།།
སྟོང་བའི་མྱོང་བ་སྐྱུར་མོའི་འཁྲབ་གཞུང་གིས།།
སྙི་མོའི་སེམས་འདི་འཐག་པ་རྩིས་ལོངས་མེད།།
མེ་ལ་སྒྲོན་པའི་སེམས་པ་དམར་པོ་ཞིག།
ཆུ་ལ་དཔྱངས་པའི་དན་རྟགས་མེད་པོ་ཡིས།།
ཟོལ་དུ་གྱུར་བའི་སྔ་གཞུག་འཚོ་བ་དངོས།།
དགོས་མེད་དོན་མེད་ཅིག་གི་གཏམ་རྒྱུད་རེད།།
བསེ་རུ་ལྷོད་ལ་བབས་སོང་།།
ཡིག་ནོར་འཚོལ་བར་སླེབས་ཡོད།།
དྲ་གྲོགས་གཟུར་གནས་རྣམས་ཀྱིས།།
ལན་ཅིག་དཔྱོད་པར་མཛོད་དང་།།
གོང་གི་མཆན་བུའི་ནང་གི་ཡིག་ནོར་ཡོད་པ་ཁག་ཅིག
གསལ་རིག་རྣམ་ཤེས་གྲོང་པོས་ལུས་འདི་སྐྱོར།།
གསལ་རིག་རྣམ་ཤེས་གྲུང་པོས་ལུས་འདི་སྐྱོར།།
གནམ་མཁའི་སྐར་ཚོགས་སྔར་བཞིན་བཀྲ་བ་དང་།།
ནམ་མཁའི་སྐར་ཚོགས་སྔར་བཞིན་བཀྲ་བ་དང་།།
བཟོད་བསྲན་གོ་ཆ་ཐོག་པའི་དབའ་ངར་ཅན།།
བཟོད་བསྲན་གོ་ཆ་ཐོགས་པའི་དཔའ་ངར་ཅན།།
དྲི་མེད་སྔོ་ཞིང་དྭངས་པའི་རྒྱམ་མཚོ་བཞིན།།
དྲི་མེད་སྔོ་ཞིང་དྭངས་པའི་རྒྱ་མཚོ་བཞིན།།
ལོ་ཟླའི་ཁ་འཚུབ་ཇི་འདྲ་རྒོད་ཀྱང་རང་།།
གནམ་མཁའི་སྐར་ཚོགས་སྔར་བཞིན་བཀྲ་བ་དང་།།
ཁྲི་རལ་ཅན་གྱི་རྒྱུན་འཛིན་བཙན་པོའི་བུ།།
ནམ་ཡང་འགྱུར་བ་མེད་པར་ཕེབས་འདི་སྤྲོ།།
གཅན་གཟན་གཏུམ་དྲག་འདྲ་བའི་རང་གཤིས་མེད།།
བཟོད་བསྲན་གོ་ཆ་ཐོག་པའི་དབའ་ངར་ཅན།།
དྲི་མེད་སྔོ་ཞིང་དྭངས་པའི་རྒྱམ་མཚོ་བཞིན།།
རླབས་ཀྱིས་བཞུར་རྒྱུན་འགྱུར་མེད་གནས་འདི་དགའ།།
གསལ་རིག་རྣམ་ཤེས་གྲོང་པོས་ལུས་འདི་སྐྱོར།།
ཡག་བཙོག་ལུས་འདིས་རང་གཞན་དོན་ཀུན་བསྒྲུབ།།
ལུས་སེམས་ཟུང་དུ་སྦྲེལ་བའི་དམ་ཚིག་འདི།།
བསམ་ཞིང་བསམ་བཞིན་དང་བའི་ཡིད་དེ་འཕྲོག།
སྒྱུ་མའི་བུ་དེས་སྒྱུ་མ་སྒྱུ་མར་རྟོགས།།
སྒྱུ་མའི་དངོས་ལ་སྒྱུ་མ་བཞིན་དུ་འཛིན།།
སྒྱུ་མའི་འཁོར་བར་འཁྱམས་པའི་བས་མཐའ་ན།།
སྒྱུ་མ་དངོས་དེ་ད་དུང་བསྐལ་བར་གནས།།
ཆག་འཇིག་ཆེན་པོའི་ལོ་ཟླ་ནས་བཟུང་།།
གངས་དཀར་རི་བོར་ཐལ་རྡུལ་ཆགས་སོང་།།
དཔའ་བོའི་གཅེས་སྲོག་རེ་རེ་ཤོར་དུས།།
སེམས་ཀྱི་ན་ཚ་ཡང་ཡང་འཕར་གྱི།།