ན་ནིང་དོ་ཚིགས་འདི་གཉིས་བོད་ཡུལ་ན།།
མགོ་ནས་རྒྱ་དམར་གཞུང་གིས་བོད་མི་དག།
ཤེས་ཡོན་ཅན་དག་འཁྲིད་དེ་བཙོན་དུ་བཅུགས།།
ཉེས་པ་ཡོད་མེད་བོད་རིགས་སྐྱ་སེར་ཀུན།།
ཁྲིམས་ཀྱི་ཕྱི་ནང་གཉིས་སུ་མནར་བཞིན་འདུག།
ན་ནིང་དོ་ཚིགས་འདི་གཉིས་བོད་ཡུལ་ན།།
འབྱུང་བཞིའི་རྐྱེན་ངན་རབ་དང་རིམ་པ་ཡིས།།
ཡུལ་ཤུལ་འགུལ་ནས་དྭ་ཕྲུག་གྲངས་མེད་བཟོས།།
འབྲུག་ཆུ་རྙིད་དེ་མི་ཤི་ཁྱིམ་སྟོང་གྱུར།།
ཤི་གསོན་གྲངས་མེད་ཅིག་ལ་མྱ་ངན་བཞག།
ན་ནིང་དོ་ཚིགས་འདི་གཉིས་བོད་ཡུལ་ན།།
སེར་མོ་དགོན་སྡེ་ཁྲོད་དུ་འདུག་དབང་མེད།།
སྐྱ་བོ་རི་བོའི་གྲོང་ན་ངལ་གསོ་མེད།།
སྐྱ་སེར་གཉིས་ཀ་རིགས་ཀྱི་ན་ཟུག་གིས།།
དགྱ་ནག་གཞུང་གི་མེ་མདའི་ར་བར་ལུས།།
ན་ནིང་དོ་ཚིགས་འདི་གཉིས་བོད་ཡུལ་ན།།
བྱིས་པའི་ཀ་ཁའི་དབྱངས་རྟར་སེར་ཁ་ཞུགས།།
གཞོན་པའི་གནའ་བོའི་གླུ་དབྱངས་རླུང་ལ་འཐིམ།།
གནས་འགྲོ་བུ་མོའི་སེམས་པ་སྒོར་གྱིས་བསླུས།།
ཡོད་ཚད་ཡིད་ཆེས་མེད་པའི་ཚང་དུ་བརྫངས།།
ན་ནིང་དོ་ཚིགས་འདི་གཉིས་བོད་ཡུལ་ན།།
གསོན་པའི་ཆེད་དུ་རང་དབང་བརྩོན་ལེན་བྱེད།།
ཤི་བོའི་དོན་ལ་མ་ཎི་ཡིག་དྲུག་འདྲེན།།
གཞིས་བྱེས་ཆེད་དུ་མཐུན་སྒྲིལ་གསེར་ཟམ་བསྐྲུན།།
མ་བསམ་ས་ནས་འབྱུང་བཞིའི་གོད་ཆག་རྒོད།།
གནམ་ལྕགས་ལགས། ཁྱེད་ནས་འདྲེན་བཀོད་བྱས་པའི་འདྲ་པར་དེ་དག་ལ་བལྟས་ཚར་བ་ཡིན། དངོས་ནས་སེམས་པ་གྲང་ཤུར་ཤུར་བྱེད་པ་ལས་ཐབས་གཞན་ལུས་མ་སོང་།
བདག་གི་ཟིན་བྲིས་སུ་སོང་དང་གནོད་ཐེབས་ས་ཁུལ་གྱི་པར་འགའ་ཡོད།
ན་ནིང་དོ་ཚིགས་འདི་གཉིས་བོད་ཡུལ་ན།།
ང་དང་ཁྱེད་འདྲའི་བོད་མི་ཉམ་ཐག་ཚོར།།
སེམས་ཀྱི་ངལ་གསོ་མེད་པའི་གནས་ཤིག་བསྐྲུན།།
ལུས་ཀྱི་ཐེགས་པ་མེད་པའི་སྐྱོ་གནས་དག།
དྲ་ཐོག་འདི་ནས་མི་གླེང་ཐབས་མེད་གྱུར།།
མི་རྐང་གླིང་བུ་ལགས། སྐུ་ཉིད་དངོས་ནས་མགྱོགས་པོ་འདུག མྱ་ངན་ཞུ་སར་དང་པོ་བྱས་དེ་འབྱོར་འདུག་པ་དེར་བཀའ་དྲིན་ཆེ་ཞུ།
ན་ནིང་དོ་ཚིགས་འདི་གཉིས་བོད་ཡུལ་ན།།
ས་གཞི་རྣམས་ནི་མཆི་གུ་བཞིན་དུ་འཁོར།།
མི་རྒྱུ་ཟོག་གསུམ་ཤོ་ཕོར་བཞིན་དུ་སྦུབས།།
རི་བོ་རྣམས་ནི་འབབ་ཆུ་བཞིན་དུ་ལུད།།
མི་རྒྱུ་ཟོག་གསུམ་གད་སྙིགས་བཞིན་དུ་དེད།།
ཨོཾམཎིཔདྨེཧྰུཾ