ཤུགས་རིང་ཞིག་གི་སྣེ།

མི་ལོ་སུམ་བཅུའི་ཐེམ་སྐས་བརྒལ་ཟིན་བགྲང་བྱ་སུམ་བཅུའི་ཟས་རིན་མ་ཞོག་ཐལ།།
གཞན་ཡུལ་འདི་རུ་སླེབས་ནས་མི་ཚེ་ཞིག་གི་དོན་གོ་མ་ཆོད་ལུས་དེ་ཡོད།།
རང་ས་གཡུགས་དེ་ཡུལ་དུ་གྱར་བའི་ལོ་ཟླའི་ཁ་གྲངས་བརྩི་དགོས་བྱུང་གྱུར་ཚེ།།
བསྟུད་མར་ཉིན་མཚན་འགའ་ལ་བརྩིས་ཀྱང་བློ་ངོར་མི་ངེས་ཐག་གིས་ང་ཡིས་ཆོད།།

ད་ནི་གང་དུ་འགྲོ་མིན་ང་ཡི་མི་ཤེས་གང་དུ་སླེབས་མིན་དེ་བས་ཤེས་འདོད་མེད།།
ད་ནི་སུ་དང་འགྲོག་ན་དེ་ཡིས་འཁྲིད་ཅིག་ང་རང་དེ་ཡི་དབང་དུ་འགྲོ།
གཞན་གཅེས་ཟེར་བ་རང་དབང་ཞིག་དུ་ཡོད་རེ་མེད་པའི་བརྡ་རྟགས་ད་གཟོད་རྙེད།།
རྙེད་དུ་དཀའ་བ་འདོར་དུ་མེད་པ་མི་ཡི་གཤིས་ལ་ད་ལྟ་འཇུག་ནས་ཡོད།།

རེག་ན་འདོད་ཀྱང་སེམས་ཀྱི་དུག་འདི་རྩ་ནས་མ་གཅོད་མི་གཤིས་ཚོས་ཀྱི་བསྒྱུར་བ་འདི།།
རས་གཞི་གང་དུ་འོས་མིན་ག་ལེར་བལྟས་ཀྱང་བློ་ངོར་མི་འཐད་འདོད་རྔམ་གཤིས་སྤྱོད་ཅིག།
འདྲིས་ཀྱང་ཟབ་པའི་བུད་མེད་དཀའ་བ་སྙིང་དུ་སྡུག་ལ་ཡིད་ཆེས་བྱེད་ས་དེ་བས་ཕྲ།།
དོན་དངོས་རང་འདི་ཆགས་ལ་ཞེན་པའི་སྲིད་པའི་གྲོང་གི་ཆགས་པའི་རྒྱལ་སྲས་འཁྲུལ་མེད་ཅིག།

སྐྱ་ཐིགས་མེད་པའི་མི་གཞི་ཞིག་ལ་སྔ་ནས་འཐིམ་ཟིན་རི་མོའི་ཟོལ་གྱི་འཚོ་བ་ཞིག།
རྒས་དང་ན་བའི་ཚོར་བ་མེད་འདི་སྐད་ཅིག་གྲོང་གི་ལྷ་ཡུལ་ཁམས་ཀྱི་བུ་མོ་བཞིན།།
ཁྲག་དང་བརྣག་གི་གཤིན་ས་དེ་ལ་ཞེན་པའི་འཕར་རྩ་ལྷོག་ལྷོག་འཁོལ་བའི་དུར་ས་ན།།
ལུས་པའི་བེམ་པོ་སྲུང་བའི་ཕོ་ཉྭ་བདག་འདྲའི་འཁོར་བ་བསམ་ཞིང་བསམ་ན་དོན་སྙིང་བྲལ།།