ཕྱི་རོལ་ནི་ཇི་འདྲའི་སྐྱིད་སྣང་དང་མཛེས་སྡུག་ལྡན་པར་རློམ་མཁན་གྱི་རང་རིགས་ཀྱི་སྐྱ་སེར་ཕོ་མོ་ཚོའི་སེམས་ཁམས་དེ་ནི་དོན་དངོས་ཐོག་ག་འདྲ་ཞིག་ཡིན་མིན་དེ་ནི་བདག་གིས་གཏན་ནས་མི་ཤེས། ངས་དེ་རིང་ཞུ་བཞིན་པ་དེ་ནི་རང་ཉིད་ཀྱི་མྱོང་ཚོར་དང་སེམས་གཤིས་ཡིན།
ཕྱི་རྒྱལ་ན་བདེ་སྐྱིད་དང་ལོང་སྤྱོད། ཐོབ་ཐང་སོགས་མང་བོ་ཞིག་ཡོད་རབས་འདོད་མཁན་དག་གིས་ནམ་རྒྱུན་རང་ཉིད་རྒྱ་གར་དུ་བསྡད་ཡོད་པ་དེ་ནི་མནར་སྡུག་གི་མི་ཚེ་ཞིག་གི་ཁྲོད་དུ་འཚོ་བ་བསྐྱེལ་བ་བཞིན་ཡོད་པ་དང་། འཚོ་བ་བསྐྱེལ་སྟངས་དེ་ཡང་རྒྱུ་མཚན་མེད་པ་དང་སྙིང་བོ་མེད་པ་ཞིག་བསྐྱེལ་བཞིན་ཡོད་པར་ངེས་འཛིན་བྱེད་ཀྱི་ཡོད་པ་རེད།
དོན་དངོས་ཐོག ང་ཚོས་རང་གི་ཕ་ཡུལ་གངས་ཅན་དང་བསྡུར་ནས་བཤད་ན་དེ་འདྲ་ཞིག་ལོས་ཡིན། རང་ས་ཅི་འདྲ་སྡུག་ཡང་སྐྱིད་སྣང་ཞིག་ཡོད་པ་ནི། ཕ་འཛོམ་མ་འཛོམ་དང་། ཕུ་ནུ་མིང་སྲིང་ལྷན་འདུས། སྐྱིད་པའི་བྲོ་འཁྲབ། དགའ་བའི་གླུ་བླངས། རང་སྐད་ཀྱི་སྟེང་ནས། རང་ཡུལ་གྱི་གྲོང་ནས། རང་ཁྱིམ་དང་ཉེ་དུ་ཚོའི་འགྲམ་དུ། སྐད་ཆ་ལྷོད་ལྷོད་ཅིག་བཤད་ཆོག་པར་བསམ་ན། རྒྱ་གར་ནི་ང་ཚོ་ལ་གཏན་ནས་འཚམ་པོ་ཞིག་ག་ལ་ཡིན།
སྐྱབས་བཅོལ་ལུང་བ་བཙན་བྱོལ་སྤྱི་ཚོགས་སམ། རྒྱ་གར་དུ་གནས་བསྡོད་ཀྱི་རིང་དེར་བོད་མི་ཆེས་མི་ཉུང་བ་ཞིག་གིས་རང་དབང་དང་ཁོར་ཡུག་གི་དཀའ་ངལ་ཆེས་ཉུང་བ་དང་། རང་མི་མང་བ། རང་ཡུལ་ནས་སླེབས་པའི་ཉེ་གྲོགས་མང་བ། སྐྱིད་སྡུག་མཉམ་གླེང་གི་གོ་སྐབས་ཡོད་པ། ཕན་ཚུན་ཐུག་འཕྲད་ཀྱི་གོ་སྐབས་མང་བ། བོད་མིའི་སྐྱིད་སྡུག་མཉམ་མྱོང་གི་སྐོར་ལ་ལས་ཀ་གང་བྱེད་ཐམས་ཅད་ལ་གཞུང་འབྲེལ་དང་སྒེར་གྱི་ཚོགས་པ་བཅས་ལ་འབྲེལ་ཐུག་བྱེད་ཡུལ་ཡོད་པ་རེད།
ཕྱི་རྒྱལ་དུ་འབོད་པའི་ཡུལ་གྲུ་ཆེས་མི་ཉུང་བ་ཞིག་ན། བོད་རིགས་དག་དུས་རབས་གསར་བའི་བྲན་གཡོག་པ་ཤ་སྟག་ཆགས་ཡོད་ལ། ལས་ཀའི་ཐོབ་ཐང་དམའ་བ། གནས་ཡུལ་གྱི་ཡུལ་མིའི་གནས་བས་ཁོ་ནའི་དབང་ཤུགས་ལ་མགོ་སྒུར་བ། བོད་མི་རིགས་ཀྱི་ཐོབ་ཐབ་རྩོད་ས་ཕར་ཞོག སྐད་ཆ་བཤད་སའི་སྟེགས་པུ་ཉུང་བ། ཐུག་འཕྲད་ཀྱི་གོ་སྐབས་བྲལ་བ། བོད་མི་ཕན་ཚུན་མཉམ་རུབ་དཀའ་བ་ནས་མེད་པ་ལྟ་བུ་ཆགས་ཡོད། ཐ་ན་སྐྱེས་པོ་སྒེར་གྱི་ཐོབ་ཐང་བཤད་ས་ཡང་མེད་པ། གནས་ཡུལ་དེ་ནས་གང་བཤད་ལ་ཉན་དགོས་པ། འདི་དག་ལ་རང་གི་མྱོང་བ་དང་ཐོས་པ། བྱས་པ་བཅས་ལ་ཞིབ་དུ་བསམ་ནས་ཉལ་ས་དྲོ་ཡང་སེམས་མི་དྲོ་བའི་ལས་འདི་རིགས་མི་རབས་རྗེས་མ་དག་གི་མི་མྱོང་ཆེད་དུ། བསམ་བློ་གཏོང་རན་རེད།
ད་ལྟ་ནས་མགོ་བརྩམས་དེ་ཕྱི་རྒྱལ་ཡུལ་གྲུ་ཁག་དུ་གནས་པའི་བོད་མི་དག་གིས་རང་་རང་གི་ཉིན་རེའི་སྐྱིད་སྡུག་ལེགས་ཉེས་གང་བྱུང་སོགས་ཉིན་ཐོ་རུ་བྲིས་དེ་བོད་ཀྱི་མི་རབས་རྗེས་མ་དག་ལ་ལམ་སྟོན་བྱེད་ཐུབ་པ་ཡིན་ན་ཡག་པོ་འདུག ཕྱི་རྒྱལ་ཁག་གི་སྐོར་མ་ཤེས་པ་དག་ཤེས་འདོད་ཡོད་ན། དྲི་བ་བྱེད་པ། འདྲི་མཁན་གྱིས་དྲང་མོར་འདྲི་བ། ལན་འདེབས་མཁན་གྱིས་ཀྱང་དྲང་མོར་ལན་འདེབས་བྱེད་པ། དེ་ནི་ང་ཚོའི་རང་གི་མི་རིགས་འདི་མུ་མཐུད་དུ་དུས་རབས་གསར་བའི་བྲན་གཡོག་མི་ཆོག་པའི་ཐབས་ཤེས་ཡིན།
ཉི་ཟླའི་མགྲོན་བདག་ལགས། ཉིད་རང་ངའི་བསམ་ཚུལ་ལ་རྒྱབ་སྐྱོར་བྱེད་དུ་ཡོང་བ་དེར་དགའ་ཡོད། ང་ཚོ་དངོས་ནས་ཤུགས་ཤིག་མ་བརྒྱབས་པ་ཡིན་ན། མི་རབས་རྗེས་མ་ལ་ཅི་ཞིག་འཇོག་དགོས་མིན་དེ་ཡང་བཤད་ཚོད་ཐུག་ས་མ་རེད།
དྲ་གྲོགས་ལགས་ཁྱེད་ཀྱིས་མི་རབས་ལ་ལམ་སྟོན་དང་སློབ་གསོ་བྱས་ཡོད་པ་ལ་དགའ་འོས་བ་ཞིག་རེད།
མུ་མཐུད་དུ་རེ་བ་ཤུན་ཏུ་ཆེའོ།