གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། བཅུ་བདུན།

མོ་རང་གིས་རླངས་འཁོར་གཏོང་ཞོར་དུ། མིག་གིས་མདུན་ཕྱོགས་ཀྱི་སྣུམ་ནག་གི་གཞུང་ལམ་དུ་བལྟ་བཞིན། ངའི་ཨ་ཅེ་ཡིས་དེ་རིང་ང་ལ་ཨ་མའི་ནང་དུ་བསྡད་པའི་སྒང་ལ། མ་རྒན་གྱི་འགྲོ་གྲོན་གཏོང་དུ་བཅུགས། ད་དུང་མ་རྒན་ལ་རྣམ་འགྱུར་མི་ལེགས་པ་བསྟན། རང་གིས་ཁང་གླ་བཏང་ནས་བསྡོད་ཐུབ་ཀྱི་མེད་པ་མི་དྲན་པར། ཨ་མ་ལ་དཀའ་ངལ་འཕར་མ་བཟོས་ནས། ཁྱེད་རང་དངོས་ནས་ཕྱི་ལ་ཐོན་རན་རེད། འདི་ནས་ཨ་མ་ལ་དཀའ་ངལ་ཐོལ་བ་མ་བཟོས་ན་ཡག་གི་རེད། འདུག་ཡུན་མང་མེད་ན་ཉུང་ཡོད་པ་མ་རེད་སོགས་ཀྱི་སྐད་ཆ་གང་མང་ཞིག་བཤད་སོང་།

སྐད་ཆ་དེ་ཡིས་འབྱུང་རྐྱེན་ཇི་ལྟར་བྱུང་མིན་སྐོར་དྲིས་དུས། མོ་རང་གི་ཨ་མས་མོ་རང་གི་ཨ་ཅེ་ལ་ཉེ་སྔོན་གྱི་གནས་ཚུལ་བྱུང་བའི་སྐོར་བཤད་པ་དང་། མོ་རང་ནི་དངོས་ནས་དཀའ་ལས་ཁག་པོའི་ནང་དུ་གནས་ཡོད་པ་སོགས་མོ་རང་གི་ཨ་ཅེ་ལ་བཤད་འདུག་པ་དེ་ཡི་འབྱུང་རྐྱེན་ལ་བརྟེན་ནས་དོན་དག་དེ་ཡི་འགོ་བཙུགས་པ་རེད་འདུག་ལ། མོ་རང་གི་ཨ་ཅེ་ཡིས་སྐད་ཆ་དེ་མོ་རང་གི་བུ་མོ་དང་ཁྱོ་ག་ཚང་མིའི་སྔོན་ནས་བཤད་པ་དེ་ཡིས་དམིགས་སུ་བཀར་ནས་མོ་རང་གི་སེམས་སུ་འཕོག་སོང་ཟེར། དེ་དུས་སེམས་དགྲ་ཡིས་གསད་ན་བཅོས་ཐབས་སླ། སེམས་གཉེན་གྱིས་གསད་ན་བཅོས་ཐབས་ཁག་ཟེར་བའི་གཏམ་དཔེ་དེ་ང་རང་ལ་དྲན་དུ་བཅུགས་སོང་།

ངས་མོ་རང་ལ། ཁྱེད་རང་གིས་བསམ་བློ་ག་ལེར་གཏོང་། སེམས་མ་ཕམ། དངོས་ནས་བཤད་ན། འུ་གཉིས་ཀྱིས་ཁྱེད་རང་གི་ཨ་མ་ལ་དཀའ་ལས་བཟོས་པ་མང་མེད་ན་ཉུང་མེད་པ་རེད། མོ་རང་གི་ནང་དུ་བསྡད། མོ་རང་གི་ཟ་མ་ཟས། མོ་རང་གི་ང་ཚོའི་ཆེད་དུ་བྱས་པ་དངོས་ནས་ཉུང་ནི་མ་རེད། མོ་རང་ང་ཚོ་ལ་དཀའ་དྲིན་ཆེན་པོ་ཡིན། ལྷག་པར་ང་ཚོ་མོ་རང་གི་ཁང་བའི་ནང་ལོ་གཅིག་ལྷག་བསྡད་འདུག དེ་ཡི་རིང་དུ་ཁང་གླ་ཞིག་སྤྲོད་དགོས་བྱུང་ན་དངོས་ནས་ཁག་པོ་རེད། འདི་ནས་བོད་པའི་གོམ་གཤིས་དང་མི་འདྲ་བ་ཡིན་དུས། ཁྱེད་ཅག་གི་གོམ་གཤིས་ལྟར་ན། བྱིས་པ་འཚར་ལོངས་བྱུང་བ་དང་རང་རང་གི་ས་ནས་བསྡོད་པ་ལས། ཕ་མའི་མཉམ་དུ་བསྡོད་ཀྱི་མེད་པ་རེད། དངོས་ནས་འུ་ཐུག་པའི་སྐབས་འདྲ་མ་བྱུང་ཚེ། འུ་གཉིས་ནི་གནས་སྐབས་རིང་ཐར་མ་མཚོ་སྐྱེ་ནས་ཅུང་ཆེ་རུ་འགྲོ་རེག་བར་དུ་བསམ་ནས་ཡོང་བ་རེད།

བུ་མོ་ཆེ་རུ་ཕྱིན་པ་དང་། སླར་ཡང་བྱིས་པ་ཞིག་འཁོར་བ་རེད། ད་དུང་འུ་གཉིས་ཀྱིས་དེ་སྐྱེ་རེག་བར་དུ་ཡང་བསྡོད་འདོད་བྱས་པ་རེད། དེ་དག་ནི་འུ་གཉིས་ཀྱིས་ནར་འགྱངས་བྱས་པའི་ནོར་འཁྲུལ་རེད། སྔ་རུང་འཕྱི་རུང་འུ་གཉིས་རང་འགོ་ཁེར་ཐོན་བྱེད་དགོས་པ་ཡིན་དུས། ད་ནི་དངོས་ནས་དུས་ཚོད་ཏག་ཏག་འཁེལ་ཡོད། ང་རང་གིས་ཁྱེད་རང་རང་གི་ཕ་མ་དང་སྤུན་མཆེད་ཚང་མ་ལ་ཁ་གྲགས་རེས་མེད་པའི་ངང་ཚུལ་དེ་དག་མུ་མཐུད་དུ་བྱུང་བཞིན་པའི་གནས་ཚུལ་འདི་རིགས་དངོས་ནས་མཐོང་ན་མི་སྐྱིད་ཀི བོད་ནས་ཡིན་ན། ཕ་མ་ཚོ་ཡོད་ན་བུ་ཕྲུག་དག་ལ་དབང་བ་ཡིན་ལ། བུ་ཕྲུག་དག་ལ་དབང་མིན་གྱི་དྲི་བ་གང་ཡང་མེད། འདི་ནས་དེ་འདྲ་ཞིག་མིན་པ་ངས་ཀྱང་ཤེས་ཡོད་ལ། ཁྱེད་རང་གིས་ཤེས་གསལ་ཡིན་ངེས་རེད་ལ། ཤེས་ཀྱང་དགོས་པ་རེད།

དེ་དུས་མོ་རང་གིས་སླར་ཡང་མིག་ཆུ་ལྡོག་པོ་གཅིག་འཁུར་ཚེས་ལས་ལྷུང་ཞོར་དུ། རེད་རེད། ངས་ཀྱང་སྔོན་ཆད་རང་གི་ཕ་མ་དག་ལ་ཡོད་པ་ནི་རང་གིས་ལོང་སྤྱོད་བྱེད་ཆོག་པ་ཞིག་དུ་འདོད་མྱོང་། རེད་དེ། དེ་རིང་གཞི་ནས་ང་རང་གཉིད་ལས་སད་དུ་བཅུགས་སོང་། དེ་འདྲ་ཞིག་གཏན་ནས་རེད་མི་འདུག ང་རང་གི་དྲིན་ཆེན་མ་ཡིས་ང་ལ་དེ་འདྲ་ཞིག་བྱེད་ཀྱི་རེད་སེམས་སུ་ཡང་དྲན་མྱོང་མེད། ད་ནི་ང་རང་ལ་ཁྱིམ་མེད་པའི་ཚོར་བ་ཞིག་སླེབས་ཀྱི་འདུག་ཟེར་བས། ངས་དེ་ལྟར་བསམ་བློ་གཏོང་མི་ཉན་པ་དང་། རང་གི་དྲིན་ཆེན་ཕ་མ་དག་བཟང་རུང་ངན་རུང་དྲིན་ཆེན་ཕ་མ་ཡིན་དུས། གནས་སྐབས་ཀྱི་ཁོང་ཁྲོ་ཞིག་གི་དབང་གིས་བཟང་བྱས་པ་ཚང་མ་བརྗེད་ན་འགྲིག་གི་མེད་ཚུལ། ཕྱི་འདང་རྒྱགས་དགོས་པ་སོགས་སྐད་ཆ་ཡར་མར་མང་བོ་ཞིག་བཤད་པ་ཡིན།

གྲོགས་པོ་རྡོར་རྒྱལ་དང་ཁོ་རང་གི་བཟའ་ཐོར་ཕྱིན་པའི་བུད་མེད། ད་དུང་བུ་མོ་གསུམ་ཡོད་སའི་གྲོང་གསེབ་ཀྱི་འགྲམ་དུ་སླེབས་དུས། དེ་ཁུལ་ན་རླངས་འཁོར་ནང་གི་ཟ་མ་ཚོང་མཁན་གྱི་མ་བུ་གཉིས་ཡོད་པ་དེ་ནས་ང་ཚོ་གསུམ་གྱིས་ཞོགས་ཟས་ཤིག་ཟས་པ་ཡིན། ཞོགས་ཟས་ནི་དངོས་ནས་སྟབས་བདེ་བོ་རེད་ལ། ཟ་ཁང་གི་གོང་ཚད་དང་བསྡུར་ན་དངོས་ནས་གོང་ཆུང་ཆུང་རེད། ཞིམ་པོ་ཡང་བྱུང་། མཛའ་མོས་ང་ལ་རྒྱ་གར་གྱི་སྲང་ལམ་གྱི་ཟ་མ་ཚོང་མཁན་དག་དྲན་དུ་བཅུགས་སོང་ངམ་ཟེར།

ངེད་གསུམ་གྲོགས་པོ་རྡོར་རྒྱལ་གྱི་བུ་མོ་དང་ཁོང་གསུམ་ཡོད་སའི་ཁང་བའི་ནང་དུ་འབྱོར་དུས། ང་ཚོ་ལག་པ་སྟོང་བ་བྱས་ནས་སྐུ་མགྲོན་དང་བོ་ཆགས་འདུག དངོས་ནས་བཤད་ན་བུ་མོའི་སྐྱེ་སྐར་གྱི་ལག་རྟགས་ཤིག་ངའི་མཛའ་མོ་ཡིས་གྲོགས་པོ་བུ་ཆུང་གི་རྒན་མོ་ཐོར་ཟིན་པ་དེ་དང་མཉམ་དུ་ཉོས་ཡོད་འདུག་མོད། མོ་རང་ད་དུང་འབྱོར་མེད་པ་ཡིན་དུས། ང་ཚོ་ལག་པ་སྟོང་བར་སྔོན་དུ་འབྱོར་བ་དེ་ནི་དངོས་ནས་སྟབས་བདེ་མོ་ཞིག་མ་བྱུང་། གྲོགས་པོ་རྡོར་རྒྱལ་གྱི་བུ་མོས་ང་ཚོའི་ལག་ནང་དུ་ཏན་ཏན་བལྟས་ཡོད་ངེས་ཡིན།

རིམ་གྱིས་བཟའ་མི་མི་ཉུང་བ་ཞིག་རང་རང་གི་ལག་རྟགས་འཁུར་ནས་སླེབས་སོང་བ་དང་། མི་ཇེ་མང་ཇེ་མང་དུ་སོང་བ་དང་བསྟུན། བྱིས་པ་ཇེ་མང་དུ་སོང་དུས། བྱིས་པ་ཚང་མ་ཆུ་རྐྱལ་སའི་འགྱིག་གི་སྣོད་ཆེན་པོ་ཞིག་ཕྱི་ལ་བཞག་ནས་དེ་ཡི་ནང་དུ་བྱིས་པ་ཚང་མ་མཉམ་དུ་རྩེད་མོ་རྩེད་འགོ་བཙུགས་སོང་། དེ་དུས་མཛའ་མོས་བུ་མོ་ཐར་མ་མཚོ་ཡང་དེ་ཡི་ནང་དུ་བཞག་ནས་རྩེད་མོ་ལ་གཡེང་སོང་། ངས་གྲོགས་པོ་རྡོར་རྒྱལ་དང་ལྷན་དུ་ཐ་མག་ཞིག་འཐེན་ཞོར་དུ། ཁོ་རང་གི་ཁྲིམས་རྩོད་པའི་སྐོར་དང་། ཁྲིམས་རྩོད་པ་དེ་ཤོར་ན། ཁོ་རང་གི་ག་རེ་བྱེད་མིན་སོགས་ཞིབ་དུ་གླེང་དུས། ཁོ་རང་ནི་སྔར་བཞིན་བསམ་བློ་མ་འགྱུར་བར་བསྡད་འདུག ཁྲིམས་ཐོག་ནས་བསྡད་ཆོག་པའི་ཆོག་མཆན་རེག་སོང་བ་ཡིན་ན་སྔར་བཞིན་ལས་ལ་བྲེལ་ནས་བསྡོད་རྒྱུ་རེད་འདུག མིན་ཚེ། ལོ་ངོ་བཅུ་གསུམ་ཙམ་ལ་ངོ་མ་ཐུག་པའི་ཕ་མ་གཉིས་ལ་ཐུག་འཕྲད་བྱེད་པར་བསྐྱོད་འཆར་ཡོད་པ་དེ་རེད།