གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཞེ་དགུ

ཁ་སང་ཕྱི་དྲོ་ང་དང་གངས་མཚོ་གཉིས་མོ་རང་གི་གྲོགས་མོ་སྒྲ་ཝས་ཀྱི་སྐྱེ་སྐར་དུས་སྟོན་ལ་སྐད་བཏང་བ་ལྟར། ངས་ལམ་སྐབས་ནས་ཟ་བའི་ཟ་མ་ཁ་ཤས་ཤིག་བཟོས་པ་དང་། ང་ཚོ་རྗོ་སུ་ལམ་ནས་རྒྱལ་ཁབ་འདིའི་ལྷོ་ཕྱོགས་མེས་རྩེ་ཕེས་ར་མོན་ཟེར་བའི་ས་ཆ་འདིར་ཡོང་བ་ཡིན། ས་ཁུལ་འདི་ཡི་ཡུལ་ལྗོངས་ནི་རྩྭ་མེད་པའི་ཐལ་འདོག་གི་གྲོང་ཞིག་རེད། ཕར་བལྟས་ན་རི་བོ་མཐོང་ཚད་ལ་རི་བྲག་རེད་ལ། རི་བོ་དེ་དག་གིས་མཐོང་དུས་དམིགས་སུ་བཀར་ནས་རང་ཡུལ་གྱི་ཡུལ་ལྗོངས་མཛེས་ཤིང་ལྟ་ན་སྡུག་པ་དེ་དག་དྲན་དུ་འཇུག དངོས་ནས་ཐལ་འདོག་གི་ཡུལ་ལྗོངས་འདིས་སེམས་ཁོང་དུ་སྐྱོ་སྣང་ཞིག་ལྷོད་ཀྱིས་དྲངས་དེ་འོང་གི

ང་ཚོ་བསྡོད་སའི་མགྲོན་ཁང་ཡང་བོད་ཡུལ་ན་ས་འདམ་གྱི་བརྩིགས་པའི་ས་ཁང་དེ་དག་དང་འདྲ་བོ་ཡོད་ཀི ནང་གི་བཀོད་པ་ནི་མཛེས་ཤིང་ཡིད་དུ་འོང་བ་ཞིག་མིན་ན་ཡང་། དཀྲུས་ཁང་དང་གཙང་སྤྱོད་སོགས་ཡུལ་སྐོར་བའི་ཆེད་དུ་བཟོས་པ་ཡིན་དུས། མགྲོན་ཁང་ཞིག་གི་རྣམ་པ་རེད། མ་འདྲ་ས་ཞིག་ཡོད་པ་ནི། མགྲོན་ཁང་གི་བཀོད་པ་ནི་གནའ་བོའི་ཁང་བ་བཟོ་ལུགས་ཤིག་ཡིན་མོད། ནང་གི་ཆ་རྐྱེན་ནི་དེང་རབས་ཀྱི་ཕྱོགས་སུ་འདུག གློག་ཡོད་ཀྱང་། གློག་ཀླད་དང་བརྙན་འཕྲིན། རླུང་འཕྲིན་སོགས་གང་ཡང་མི་འདུག དངོས་ནས་ཁ་ཁུ་སིམ་པོ་ཞིག་རེད།

ཕྱི་དྲོར་ཐལ་འདོག་གི་རི་ལུང་ཡོད་ཚད་ལ་བལྟ་ཞོར་དུ། རྒྱང་རིང་གི་ཡུལ་ཞིག་ན་ཡོད་པའི་རྩ་བའི་བླ་མ་གང་དུ་ཆིབས་སྒྱུར་གནང་གི་ཡོད་མེད། བྱེས་ཀྱི་ཚོགས་འདུ་ཆེན་མོའི་སྐོར་སོགས་ལ་འདང་ཞིག་བརྒྱབས། མིའི་གཟུགས་རུས་ཤིག་རྒྱུས་མེད་ཀྱི་རི་སྒང་དུ་ཡོད་ཀྱང་། སེམས་པའི་ནང་གི་བསམ་ཕྱོགས་ནི་རྒྱུས་ཡོད་པའི་ཆུང་དུས་ཀྱི་འཚར་ལོངས་བྱུང་ཡུལ་གྱི་མཛེས་སྡུག་དག་ལ་ཕྱིར་དྲན་བྱེད་ཞོར་དུ་གཞན་ཡུལ་གྱི་ཉི་མ་ལ་ཁར་དེད། ༢༡།༡༡།༠༨

དེ་རིང་ནམ་རྒྱུན་ལྟར་གློག་འཕྲིན་ཁ་ཕྱེ་དུས། རྒྱ་གར་དུ་ཡོད་པའི་ནུ་མོ་ལྷ་མོ་སྐྱིད་ཀྱིས་ང་ལ་འཕྲིན་ཡིག་ཞིག་སླེབས་འདུག འཕྲིན་ཡིག་ཐུང་ཐུང་དང་ནང་དོན་མདོར་བསྡུས་ཤིག་བྲིས་འདུག དེ་ཡང་དབྱིན་ཡིག་གི་ལམ་ནས་བྲིས་འདུག ཕུ་བོ་ལགས། ཁྱེད་རང་བདེ་མོ་ཡིན་ནམ། ང་རང་བདེ་མོ་ཡིན། ཡིག་རྒྱུགས་ཀྱི་གྲུབ་འབྲས་ཀྱང་བཟང་བོ་བྱུང་སོང་། ངའི་ཕྱོགས་སུ་སེམས་ཁྲལ་མ་བྱེད། ངས་སློབ་སྤྱོང་ལ་འབད་བརྩོད་བྱེད་ཀྱི་ཡོད། རྗེས་སུ་མཇལ་ཡོང་ཞེས་པ་དེ་ཙམ་རེད། རྒྱང་རིང་གི་ནུ་མོ་ལྷ་མོ་སྐྱིད་ཀྱི་འཕྲིན་ཡིག་ཐུང་ཐུང་དེ་ལན་ཞིག་ཕུལ། ༡།༡༢།༠༨

ང་རང་རྒྱལ་ཁབ་འདིར་སླེབས་ནས་ཐོངས་ཆེན་ཞུ་སྟངས་གཉིས་པ་དེ་ཡིན། ཟླ་ངོ་གསུམ་གྱི་ཐོངས་ཆེན་དེ་འདྲའི་མགྱོགས་པོ་ཞིག་རྫོགས་པ་རེད། ད་ནི་ངེད་གཉིས་ལ་དགོས་པའི་ཡིག་ཆ་དག་བསྡུ་རབས་བྱས་ཡོད་པ་འཁུར་ནས་ཐོངས་ཆེན་ཞུ་སའི་ལས་ཁུངས་དུ་སོང་། ཡིག་ཆ་མང་བོ་ཞིག་རྒྱ་གར་ནས་མཉམ་དུ་ཡོད་པ་དེ་དག་ཡིན་ལ། གསར་དུ་ཁ་སྣོན་ཁ་ཤས་ཤིག་དགོས་པ་དེ་ནི། ཁོ་མོའི་ཉེ་འབྲེལ་དང་ངོ་ཤེས། ཕ་མ་གཉིས་ཀྱིས་ང་ལ་རྒྱབ་སྐྱོར་གྱི་ཡི་གེ་འབྲི་དགོས་པ་དེ་དག་དང་། ངེད་གཉིས་མཉམ་དུ་སྒྲོན་པའི་འདྲ་དཔར་བཅས་རེད། ཡིག་ཆ་གང་དགོས་པ་དེ་དག་བསྡུ་རབས་བྱས་ཡོད་སྟབས། ལས་ཁུངས་ནས་ང་ལ་ཟླ་ངོ་དྲུག་གི་ཐོངས་ཆེན་ལས་ཀ་བྱེད་ཆོག་ཞེས་པ་ཞིག་སྤྲད་པ་དང་། ཁོ་མོའི་ཕ་མ་གཉིས་ཀྱི་ང་རང་རྒྱ་གར་ནས་མགྲོན་འབོད་བྱེད་དུས་སུ་ངའི་མིང་ཐོག་ལ་ཨ་སྒོར་བདུན་སྟོང་ལྷག་གི་དངུལ་འཛིན་ཞིག་ལ་མིང་བཏགས་བསྐྱོན་ཡོད་པའི་དངུལ་འཛིན་དེ་ཁོ་མོར་སྤྲད་སོང་།

དངུལ་འཛིན་དེ་ཁོ་མོས་ང་ལ་དེ་རིང་བར་དུ་བཤད་མྱོང་མེད། གང་ལྟར། ང་རང་རྒྱལ་ཁབ་འདིར་ཡོང་བ་ལ་ཁོ་མོའི་ཕ་མ་གཉིས་ཀྱིས་ཁས་ལེན་ཁག་འཁུར་བྱས་ཡོད་པ་གཞི་ནས་ཤེས་དུས། སེམས་ནང་དུ་ཚོར་བ་གཞན་ཞིག་སྐྱེ་སུ་བཅུགས། ད་ནི་ང་རང་གིས་ལས་ཀ་བྱེད་ཆོག་ལ། ལས་ཀ་ག་རེ་ཡིན་ཡང་བྱེད་ཆོག་གི་རེད། ང་རང་ལས་ཀ་བྱེད་རྒྱུར་སྐྲག་སྣང་མི་འདུག གང་ལྟར། ད་ནས་བཟུང་། ལས་ཀ་ཞིག་བྱེད་དགོས་པ་ཡིན། མ་བྱན་གྱི་ལས་ཀ་རེག་མིན་བཤད་མི་ཤེས་ཀྱང་། ང་རང་ལ་དགོས་པ་ནི་ལས་ཀ་རེད། ལས་ཀ་གང་ཞིག་རེག་ཡང་ཁྱད་མི་འདུག སྒོར་མོ་ཡོང་ས་ཞིག་ང་ལ་དགོས་ཀྱི་ཡོད་པ་དེ་ཡིན། དེ་མིན་ད་ལྟའི་བར་དུ་ངས་ཁོ་མོའི་བསགས་དངུལ་རྐྱང་རྐྱང་བཟོས་དེ་བསྡད་པའི་གསལ་ལེ་རྒྱལ་གྱི་ལུས་བླངས་པ་རེད། ད་ནི་དེ་ཡི་མཇུག་བསྡུ་རན་ཡིན་སྙམ་ནས་ཅུང་དགའ་སོང་། ༢།༡༢།༠༨

དེ་རིང་གི་ཞོགས་པ་འདི་ནི་ང་རང་ལ་མཚོན་ན་དུས་ཚོད་ཡག་པོ་ཞིག་གཏན་ནས་མ་རེད། ཉལ་སའི་ནང་དུ་གངས་མཚོས་ང་རང་ལ་སྐད་ཆ་འདི་ལྟར་དྲིས། ཁྱེད་རང་གིས་ང་ལ་ཚོར་བ་ག་རེ་འདུག་ཟེར་ནས་ཐེངས་ཁ་ཤས་ཤིག་ལ་བཤད་དུས། ངས་ཁོ་མོ་ལ་དེའི་ལན་དུ་སྐད་ཆ་ཅི་ཞིག་བཤད་དགོས་མིན་མ་ཤེས་པར་ཉལ་ནས་བསྡད་པ་ཡིན། གང་ཡིན་ཟེར་ན་དྲི་བ་དེ་ནི་ཁོ་མོའི་སྐད་ཆ་གསར་བ་གང་ཡང་མིན་ལ། ང་རང་གི་ཐོག་མར་གོ་བ་ཞིག་ཀྱང་གང་ཡང་མ་རེད། ཐེངས་མང་བོ་དྲིས་མྱོང་བ་ཞིག་རེད། དངོས་ནས་བཤད་ན། ངས་ཁོ་མོ་ལ་ཚོར་བ་གང་ཞིག་བཅིངས་ཀྱི་ཡོད་པ་རེད་དམ་ཟེར་ནས་རང་གི་སེམས་ལ་དྲིས་ཐེངས་རེར། དེ་ནི་བཤད་མི་ཤེས་པ་ཞིག་རེད། བཤད་ཤེས་ཀྱང་ཁོ་མོའི་གདོང་ལ་བལྟས་དེ་བཤད་ཤེས་པ་ཞིག་མ་རེད།

ངེད་གཉིས་ཀྱིས་འདོད་པའི་བདེ་བ་ཐེངས་གཉིས་ལ་བསྐྱལ་ནས་ངལ་གསོ་བཞིན་པའི་སྐབས་ཤིག་ལ་ཁོ་མོས་སླར་ཡང་དྲི་བ་དེ་ང་ལ་དྲིས་སོང་། ངས་འདི་ལྟར་བཤད་དགོས་ཐུག སྙིང་རྗེ་བོ་འདུག་ཞེས་བཤད་པ་ཡིན་མོད། ཁོ་མོས་དེ་ནི་ཚོར་བ་མ་རེད། ང་ལ་ཚོར་བ་གང་འདུག་ཟེར། ངས་སྐད་ཆ་དེར་ལན་མ་སྤྲད་པར་རེ་ཞིག་བསྡད་དུས་སུ། ཁོ་མོས་དེ་ཡི་ལན་མ་སྤྲད་པ་ཡིན་ན་ང་རང་གི་ཉལ་སའི་ནང་དུ་འདུག་མི་དགོས་ཟེར་ནས། ང་རང་ལ་རྐང་བས་བརྒྱབས་ནས་ཉལ་ཁྲིའི་སྒང་ནས་སར་གཡུགས་དུས། ངའི་སེམས་ནང་དུ་བཤད་མི་ཤེས་པའི་སྐྱོ་སྣང་གི་ཚོར་བ་དྲགས་པོ་ཞིག་བྱུང་ན་ཡང་། ཁོ་མོའི་གདོང་ལ་བལྟས་དུས། དེ་ནི་ཁྲོ་བའི་ཉམས་མིན་པར་དགོད་པའི་ཉམས་ཤིག་འདུག དེ་དུས་ང་རང་དགད་མོ་དགོད་ཀྱིན་དུ་དངོས་ནས་ཡིན་ནམ་ཞེས་དྲིས་པ་ན། ཁོས་མོས་དངོས་ནས་ཡིན། ང་རང་ལ་མཚོན་ན་དེ་ཤེས་རྒྱུ་གལ་ཆེན་པོ་རེད་ཟེར། སྐབས་དེར་ང་རང་ཡང་ཁོང་ཁྲོ་ཞིག་གང་ནས་སྐྱེ་མིན་མ་ཤེས་པར་ཁྲོ་ཞོར་དུ། ཁྱེད་རང་གིས་དངོས་ནས་གལ་ཆེན་དུ་བསམ་བཞིན་ཡོད་ན། སྔོན་ཆད་རྒྱ་གར་ནས་ངས་ཁྱེད་ལ་ང་རང་གི་འདས་པའི་ལོ་རྒྱུས་བཤད་དུས་མི་འདྲི་དོན་ཅི་ཡིན་ཞེས་བཤད་ནས་ང་རང་ཡར་བླངས་དེ་དཀྲུས་ཁུང་དུ་སོང་།

དཀྲུས་ཁང་ནས་དཀྲུས་རྒྱགས་ཞོར་དུ། དངོས་ནས་བཤད་ན་ཁོ་མོའི་བྱེད་སྟངས་ནི་སྙིང་རྗེ་བ་ཞིག་དང་ཁ་ཤས་ཤིག་ནི་ཁོང་ཁྲོ་སྐྱེ་བ་ཞིག་རེད། གང་ལྟར། མཇུག་འབྲས་ཅི་བྱུང་ག་ལེར་བལྟས་དེ་འགྲོ་རྒྱུ་རང་ལས། ང་རང་ལ་གདམས་ཀ་གང་ཡང་མེད་པ་རེད། ༧།༡༢།༠༨

མུ་འགོད།