མེ་དམར་པོ་ལགས། ངའི་སྤུན་ཟླ་དེ་དག་ཁྱེད་ཀྱིས་གཅིག་རྗེས་གཉིས་མཐུད་དུ་འཁྲིད་ནས་འགྲོ་བཞིན་འདུག ང་ཚོ་སྟེ། ཁ་བ་གངས་ཅན་པའི་མི་རབས་ལ་ཡང་། འགྲོ་བ་གཞན་དག་ལྟར་ཚེ་སྲོག་ཡོད་ལ། ཚེ་སྲོག་ལ་ཡང་རིན་ཐང་ཡོད་པ་འགྲོ་བ་གཞན་དག་དང་སྤྱི་མཚུངས་ཡིན། ད་ནི་ང་ཡི་སྤུན་ཟླ་དག སྙིང་རྗེ་མེད་པའི་དམར་པོ་མེ། ཁྱེད་ཀྱི་ཟ་མཚམས་འཇོག་རོགས། ཁྱེད་ལ་ཁ་ཟས་ཤིག་འཁོ་ཡང་། ང་ལ་བདག་གི་ཤ་ཁྲག་གཅིག་ལས་མཆེད་པའི་སྤུན་ཟླ་དེ་དག་གི་ཚེ་སྲོག་གལ་ཆེན་ཡིན་ལ། ཚེ་སྲོག་དེ་དག་ཡང་དོན་སྙིང་ལྡན་པའི་ངང་དུ་གནས་པར་ང་ཚོའི་འབད་འབུངས་ཤུགསཀྱིས་ལོས་བྱེད། དེ་ཡི་ཆེད་དུ་་་་ ང་ཚོ་སྟེ། ཁ་བ་གངས་ཅན་པའི་མི་རབས་ཤིག་ད་ལྟ་གསོན་གནས་ཡོད། གསོན་སྙིང་ལྡན་པར་ང་ཚོས་ཀྱང་ལོས་བྱེད། བྱེད་ཏན་ཏན་ཡིན།
མེ་དམར་པོ་ལགས། ཁྱེད་ལ་དོན་དངོས་དག་ཁག་མེད། ཁྱེད་ལ་ཚ་ཞིང་བསྲེག་པའི་ནུས་པ་ཡོད་པ་དེ་ནི་ཁྱེད་ཀྱི་ལྷན་གཤིས་ཤིག་ལས། ཆེད་དུ་ཁ་བ་གངས་ཅན་པའི་གཞོན་རབས་པ་ཁྱུ་ཞིག་གི་ཚེ་སྲོག་ལ་རྒོལ་བའི་ཆེད་དུ་ག་ལ་ཡིན། དེ་ཡིན་དུས་ཁྱེད་ཀྱི་མེ་ཁ་ཡོད་ཚད་ངའི་སྤུན་ཟླ་གཞན་དག་གི་ལུས་ཐོག་དུ་མི་ཡོང་བར་རེ་བ་དང་འབོད་སྐུལ་ཤུགས་ཀྱིས་བྱེད། སྐུ་མཁྱེན། གནམ་འོག་འདི་ནི་འཛམ་གླིང་མི་མང་ལ་དབང་བ་ཡིན་ལ། ས་སྒང་དེ་ཡང་གངས་ཅན་བོད་པ་ཚང་ལ་དབང་བ་བདེན་པ་ཡིན་ལ། ལོ་རྒྱུས་ཀྱང་ཡིན། འོན་ཀྱང་། ངེད་ཅག་གིས་དེ་དག་གི་བདག་དབང་ཡོད་ཚད་རྩོད་ཀྱི་མེད། ང་ཚོ་ལ་དགོས་པ་ནི་རང་དབང་ཞིག་དང་བསྐལ་བའི་གནང་བའི་སྐྱེ་བའི་ལྷ་སྐལ་དེ་ཉིད་རང་ཡུལ་ནས་བཞུགས་ཆོག་པའི་བདག་དབང་དེ་ཙམ་ཡིན།
མེ་དམར་པོ་ལགས། དངོས་ནས་ངའི་སྤུན་ཟླ་ཅི་ཙམ་ཞིག་ཁྱེད་ཀྱི་ཁ་ཟས་སུ་གྱུར་ན། གཟོད་ནས་སྲིད་གཞུང་དེ་ཡི་ལྐོག་གཡོ་དང་ཧམ་སེམས་ལས་ཐར་ནས་རང་དབང་གི་ཉི་ཟླ། ཁ་བ་གངས་ཅན་པའི་ལྗོངས་སུ་ཤར་ངེས་ཡིན་ནམ།
