༣།༡༠ཞོགས་པ་མི་མང་གི་མིག་ཆུ་དང་ཁ་གཡང་།ཁ་བཏགས་དང་ཞལ་འདེབས་སོགས་ཀྱི་བསྐྱེལ་མའི་ཁྲོད།
གཙུག་ལག་ཁང་གི་མདུན་ནས་རྡ་ཤོད་ཀ་ཅ་རའི་བར་དུ་མི་དམངས་མཉམ་ཞུགས་བྱས།མི་དམངས་ཀྱིས་མིག་ཆུ་དང་ཞལ་འདེབས་དུས་མཉམ་དུ་ང་ཚོའི་ལུས་སྟེང་དུ་སྤུངས།རྡ་ས་མདོ་སྨད་ས་གནས་རྒྱུན་ལས་ཀྱིས་ཉིན་གུང་ཟ་མ་སྤྲད་དེ་ཁ་བཏགས་མཐེན་པ་དང་ཞལ་འདེབས་གནང།གྲོགས་པོ་ཁ་ཤས་ཀྱིས་བསྐྱེལ་མ་ལེ་བར་ཁ་ཤས་རིང་བྱས་རྗེས་གཞི་ནས་ངེད་མ་སྨད་གསུམ་ཞི་བའི་འཐབ་རྩོད་འདིའི་ཞི་བའི་གོམ་བགྲོད་ཀྱི་རྐང་ལམ་ལ་ཞུགས།
མཚན་དང་པོར་ཧིན་དྷིའི་ལྷ་ཁང་ཀོག་པོ་ཞིག་གི་འགྲམ་དུ་ཁང་ཆུང་བཤིག་ལ་ཉེ་བ་ཞིག་གི་ཁྱམས་རར་མལ་ས་བཟོས།ཅུང་ཙམ་རྗེས་སུ།ང་ཚོ་ལ་ཐུག་འཕྲད་དུ་ཡོང་མཁན་ནི་གཞོན་ནུའི་ཚོགས་གཞོན་དོན་འགྲུབ་ལྷ་དར་ལགས་དང་ལས་རོགས་ས་གཞོན་དྲུང་ཆེ་བཟོད་པ་དང་རྡི་ལི་སློབ་ཕྲུག་ས་གཞོན་ཚོགས་གཙོ་ཟུར་པ་་་་་བཅས་དགོང་མོའི་ཟ་མ་ཁུར་ནས་ང་ཚོ་ལ་གདུང་སེམས་མཉམ་སྐྱེད་བྱེད་དུ་ཡོང།མཚན་གཉིས་པའི་ངལ་གསོ་སྐབས་སུ་ཨེ་ཤ་ཡ་རང་དབང་རླུང་འཕྲིན་ཁང་གི་ས་གནས་གསར་འགོད་པ་བློ་བྷེ་ལགས་ཀྱིས་ཟ་མ་ཞིག་ཁུར་ནས་ཁོ་རང་སྒེར་གྱི་དྭང་བླང་འོག་ང་ཚོ་ལ་ལྟ་རུ་འོང།
ཚེས་༡༣ཉིན་རྡ་ས་ནས་ཚོགས་སྐྱིད་མཉམ་འབྲེལ་མཐུན་ཚོགས་ཀྱི་འཐུས་མི་བཞིས་ཚོགས་པ་བཅུ་གཅིག་གི་ཚབ་བྱས་ཏེ་ང་ཚོའི་སྐྱིད་སྡུག་ལེགས་ཉེས་ལ་འཚམས་འདྲི་ཞུ་རུ་འབྱོར་བ་མ་ཟད་ང་ཚོ་ལ་མཐུན་རྐྱེན་གང་དགོས་སྦྱོར་ངེས་ཡིན་ཞེས་ཁས་ལེན་གནང་ནའང་།ངས་ཁོང་ཚོ་ལ་ཤིང་རྟ་ཆུང་ཆུང་ཞིག་དགོས་པའི་རེ་སྐུལ་ཞུས་པ་ལྟར་ཁོང་ཚོས་དང་དུ་བླངས་པ་མ་ཟད་ཁ་པར་གསར་པ་ཞིག་ཀྱང་ཉོས་ཏེ་སྤྲད།ད་དུང་ཞལ་འདེབས་ཀྱང་ཧིན་སྒོར་སྟོང་ཕྲག་གསུམ་སྤྲད་དེ་ང་ཚོ་ལ་ག་དུས་རྒྱུ་དངོས་གང་ཅིའི་ཐད་རོགས་རམ་དགོས་གལ་བྱུང་ཚེ་དུས་ལྟར་དང་ལེན་བྱ་ངེས་ཡིན་བྱས་ཁས་ལེན་གནང་བས་ཡི་གེ་ཞིག་ང་ལ་སྤྲད།
རྡ་ས་ས་གནས་གཞོན་ནུའི་དྲུང་ཆེ་བཟོད་པ་ལགས་ཁོ་རང་སྒེར་ངོས་ནས་ཉིན་དེའི་ཕྱི་དྲོར་དཔར་ཆས་ཤིག་དང་ལག་ཁྱེར་གློག་ཀླད་ཅིག་ཁུར་ནས་དྭང་བླང་འོག་ཉིན་མ་དེ་ནས་དྭང་བླང་གསར་འགོད་པ་གནང་སྟེ་ང་ཚོ་དང་མཉམ་དུ་ཉིན་ལྔའི་རིང་དུ་དཀའ་སྡུག་ཚད་མེད་མྱངས།
ཚེས་༡༥ཉིན་རྒྱབ་ཏུ་མདོ་སྨད་དབུས་རྒྱུན་ལས་ཀྱི་ལས་བྱེད་གསར་རྙིང་གཉིས་ཀྱི་ཐུན་མོང་འོག་ང་ཚོ་ལ་གདུང་སེམས་མཉམ་སྐྱེད་བྱེད་དུ་འོང་བ་མ་ཟད་ཞལ་འདེབས་ཆེད་ཧིན་སྒོར་ཆིག་ཁྲི་ལྔ་སྟོང་གནང་སྟེ་རྗེས་སུ་ཁོང་ཚོས་གང་བྱེད་ཐུབ་པའི་རིགས་ལ་རོགས་རམ་བྱེད་རྒྱུའི་ཆོད་སེམས་ཡོད་ཅེས་གསུངས་སོང།
ཚེས་༡༦ཉིན་གྱི་ཞོགས་པར་སུ་ཇ་བོད་ཁྱིམ་སློབ་གྲྭའི་འགན་འཛིན་དང་སློབ་སྤྱི་གཉིས་ཀྱིས་གཙོ་བས་མི་སྣ་དྲུག་སྤྱི་ལེ་གཉིས་གསུམ་ཙམ་གྱི་རིང་གདུང་སེམས་མཉམ་སྐྱེད་ཀྱི་གོམ་བགྲོད་ལ་མཉམ་ཞུགས་གནང་བ་དང་སློབ་སྤྱི་ལགས་ཀྱིས་ངའི་ནུ་མོ་ལ་འཐམས་ནས་གཟུགས་གཞིར་འཕྲོད་རྟེན་ལ་གཟབ་རྒྱུ་དང་ཁྱེད་ཚོའི་རྒྱབ་ལ་ང་ཚོ་ཡོད་ཅེས་གསུངས།
ཉིན་དེའི་ཉིན་གུང་ཙམ་ལ་ནོར་གླིང་དུ་གནས་སྡོད་བྱས་པའི་ཨ་མདོ་བུ་མོ་པད་མ་འཚོ་དང་རྨ་ཆུ་མགོན་པོ་དོན་འགྲུབ་ཀྱི་ཆུང་མ་གཉིས་ཀྱིས་ཉིན་གུང་གི་ཟ་མ་རྣམ་གྲངས་ཆེས་མི་ཉུང་བ་ཞིག་བཟོས་ཏེ་ང་ཚོ་ཐུག་འཕྲད་བྱེད་དུ་འོང།འགྲོ་ཁར་གཉིས་ཀ་བདག་ལ་འཐམས་ནས་མཆི་མ་ཤམ་ཤམ་དུ་བཞུར་ཞོར་ང་ཚོ་བོད་མི་ས་ཡ་དྲུག་གི་བདེན་དོན་ཆེད་དུ་ཁྱེད་མ་བུ་གསུམ་ལས་འགྲོ་ཕོད་མཁན་མེད་པ་དེ་བསམ་ནས་ལྷག་ཏུ་སེམས་པ་སྐྱོ་ཞེས་བཤད།
ཚེས་༡༧ཉིན་གྱི་དགོང་མོར་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་གཞོན་པ་ཨ་ཚོགས་ཀླུ་དཀར་བྱམས་དང་དེ་གའི་སློབ་སྤྱི་ལྷ་ཆབ་སྤྱིན་པ།ད་དུང་ཚོགས་མི་ཞིག་དང་བཅས་མི་གསུམ་ཚོགས་པའི་ཚབ་བྱས་ཏེ་ང་ཚོ་ལ་འཚམས་འདྲི་བྱེད་དུ་འབྱོར་ནས་ཧིན་སྒོར་སྟོང་ཕྲག་ལྔའི་ཞལ་འདེབས་དང་ཀླུ་དཀར་བྱམས་མཚན་གཅིག་རིང་ང་ཚོ་དང་མཉམ་དུ་བསྡད་པ་མ་ཟད་ཞོགས་པར་སྤྱི་ལེ་འགར་ང་ཚོ་དང་མཉམ་དུ་གོམ་བགྲོད་ལ་ཞུགས།
ཚེས་༡༩ཉིན་གྱི་ཉིན་རྒྱབ་ཚོུད་གསུམ་པའི་སྟེང་ཅན་དྷི་སྒར་མཐོ་སློབ་འགྲིམ་བཞིན་པའི་སློབ་མ་སུམ་བཅུ་ལྷག་ལ་གཏམ་བཤད་དང་བསམ་ཚུལ་བགྲོ་གླེང་བྱ་རྒྱུའི་གོ་སྐབས་གནང་བ་དང་སློབ་མ་ཚོའི་ངོས་ནས་རྒྱབ་སྐྱོར་གྱི་ཡི་གེ་ཞིག་དང་ཞལ་འདེབས་ཕུལ་ན་ཡང་ཞལ་འདེབས་ཕྱིར་སློབ་མ་དག་གི་བགྲོ་གླེང་འདུ་འཛོམས་སྐབས་སུ་བེད་སྤྱོད་གཏང་རོགས་གནང་ཞེས་ཕྱིར་སྤྲད་པ་ཡིན།
ཚེས་༢༠ཉིན་གྱི་ཞོགས་པ་ནས་ཅན་དྷི་སྒར་མཐོ་སློབ་འགྲིམས་བཞིན་པའི་རྡེ་ར་ལྡུན་གཞིས་ཆགས་གླིང་ཚང་ནས་ཡིན་པའི་སློབ་མ་ཕུན་ཚོགས་རྡོ་རྗེ་རང་ལོ་༢༠་སོན་པ་ཁོང་དང་ཆུང་དུས་སུ་བོད་ནས་བཙན་བྱོལ་ལ་ཡོང་བའི་བཀྲ་ཤིས་ཚེ་རིང་རང་ལོ་༢༣སོན་པ་གཉིས་ཀྱིས་མ་སྐུལ་དྭང་བླང་གིས་ཅན་དྷི་སྒར་ནས་རྡི་ལི་བར་གོམ་བགྲོད་ལ་མཉམ་ཞུགས་བྱས།
ཚེས་༢༢ཉིན་རྡི་ལི་མདོ་སྨད་ས་གནས་རྒྱུན་ལས་ཀྱི་གོ་སྒྲིག་འོག་གོམ་བགྲོད་ལ་མཉམ་ཞུགས་བྱེད་མཁན་དུ་རྣམ་གྲོལ་གླིང་དུ་བཞུགས་པའི་གྲྭ་ཡོན་ཏན་རྒྱ་མཚོས་ཉིན་གཉིས་རིང་གོམ་བགྲོད་དང་ཀུན་བཟང་རྒྱལ་ཉིན་གཅིག་རིང་གོམ་བགྲོད་ལ་ཞུགས། ཉི་མ་འདི་ནས་བཟུང་རྡི་ལི་བར་གྱི་ཟས་སོང་གི་འགྲོ་གྲོན་ཚང་མ་རྡི་ལི་མདོ་སྨད་ས་གནས་རྒྱུན་ལས་ཁང་ནས་གཏོང་གནང་རྒྱུའི་ཞལ་བཞེས་གནང།
ཚེས་༢༣་ཉིན་མ་སུ་རིའི་འཛིན་གྲྭ་བཅུ་གཉིས་ཐར་ཕྱིན་པའི་སློབ་མ་འགྱུར་མེད་བསྟན་འཛིན་རང་ལོ་༢༠སོན་ཁོང་དང་ངག་དབང་ལེགས་སྨོན་རང་ལོ་༢༠སོན་པ་གཉིས།གཞན་བོད་ནས་བཙན་བྱོལ་དུ་འབྱོར་ཞིང་ད་ལྟར་མ་སུ་རིའི་སློབ་གྲྭའི་ཟ་ཁང་ཆུང་ཆུང་གཉེར་བཞིན་པའི་བསོད་ནམས་ཉི་མ་རང་ལོ་༣༠་སོན་པ་གསུམ་གྱིས་རྡི་ལི་བར་གོམ་བགྲོད་ལ་མཉམ་ཞུགས་བྱས།
ཚེས་༢༤ཉིན་རྡི་ལི་མདོ་སྨད་ས་གནས་རྒྱུན་ལས་ཁང་གི་ཚོགས་གཙོ་རིག་འཛིན་རང་ལོ་སོ་དགུ་ཡིན་པ་ཁོང་དང་ཚོགས་གཞོན་རྟ་མགྲིན་རང་ལོ་སོ་དྲུག་ཡིན་པ་གཉིས།གཞན་རྡི་ལི་ཟ་ཁང་ཞིག་གི་སྤྱིན་བདག་ཚེ་རིང་རྡོ་རྗེ་རང་ལོ་༤༨ ཡིན་པ། ས་རྒྱུན་འབྲེལ་མཐུད་པ་རིན་ཆེན་སྒྲོལ་མ་རང་ལོ་༥༠ སོན་པ། ་་་་་ ངག་དབང་བདེ་སྐྱིད་རང་ལོ་༣༥་སོན་ཡོད་པ་བཅས་ཐུག་འཕྲད་དུ་འབྱོར་བ་མ་ཟད།དྭང་བླང་གོམ་བགྲོད་པ་མདོ་སྨད་རེབ་གོང་ནས་ཡིན་པའི་དཀའ་ཐུབ་རྒྱལ་རང་ལོ་༢༥སོན་པ་དང་མདོ་སྨད་རེབ་གོང་ནས་ཡིན་པའི་བཀྲ་ཤིས་ཀླུ་བྱམས་རང་ལོ་༢༧ སོན་པ་གཉིས་རྡི་ལི་བར་གོམ་བགྲོད་ནང་མཉམ་ཞུགས་གནང།
ཚེས་༢༥ཞོགས་པར་སླར་ཡང་དྭང་བླང་གསར་འགོད་པའི་མིང་ཐོག་ནས་སྒེར་གྱི་དྭང་བླང་བྱས་ཏེ་རྡ་ས་ས་གཞོན་གྱི་དྲུང་ཆེ་བཟོད་པ་ལགས་རྡི་ལི་བར་དུ་དྭང་བླང་གསར་འགོད་པའི་འགན་ཁུར་ནས་གོམ་བགྲོད་ལ་ཞུགས།
ལམ་བར་དུ་མིང་མི་ཤེས་པ་དང་དྲན་ངོགས་སུ་མ་འཁོར་བ་མཆིས་ཚེ་རྗེས་སུ་ཁ་གསབ་བྱ་ཆོག་ལ། མི་དམངས་དང་རྒྱ་གར་གསར་འགོད་པ།ད་ལྟའི་བར་དུ་གནས་ཚང་གཡར་མཁན་གྱི་རྒྱ་གར་ཡུལ་མི་དག་ལ་སྙིང་ཐག་པ་ནས་བཀའ་དྲིན་ཆེ་ཞུ།
གླིང་ཚ་ཚེ་བརྟན་རྡོ་རྗེ་ནས་ཕྱི་ལོ་༢༠༡༢ ལོའི་ཟླ་བ་༣ པའི་ཚེས་༢༥ ཉིན་བྲིས།
ཨ་ཁ་ཁ། ང་རྒད་པོ་ཧོན་ལོག་གིས་མཆན་འདེབས་དགོས་སར་མ་བཏབ་པར་ཁྱེད་ཀྱི་རྩོམ་འོག་ལ་ཤོར་འདུག ངའི་མཆན་འདི་གསུབ་རོགས།
འགྱུར་མེད་བསྟན་འཛིན་མིང་ཅན་ལགས། དྲ་ཐོག་ནས་ཁྱེད་ལ་ཁ་ཡ་བྱེད་མཁན་ཚང་མ་བླུན་པོར་རྩིས་བཞིན་ཡོད། ཁྱེད་རང་དྲ་ཐོག་ལ་ཡོང་ནས་ཆོས་རྒྱུད་ནང་དཀྲིགས་དང་ཆོལ་ཁ་ནང་དཀྲིགས་བྱས་པ་བགྲངས་ཀྱིས་མི་ལངས། དེ་ཚང་མས་ཤེས་ཀྱི་ཡོད། དུས་ཡུན་ཆ་ནས་ཀྱང་ཧ་ཅང་རིང་པོ་རེད། ཁྱེད་རང་གི་བྱེད་སྟངས་འདི་ཚོ་མཐོང་དུས་མཚམས་མཚམས་ལ་རྒྱ་མིའི་རྒྱུགས་ཁྱི་བོད་མི་མགོ་འཁྱོག་ཕ་བསད་པ་ལ་རྒྱལ་རྔ་རྡུང་མཁན་དེ་འདྲ་མིན་ནམ་སྙམ། མཚམས་མཚམས་ལ་རྒྱལ་འགོངས་སྙིང་ལ་ཞུགས་པའི་སྨོན་ལམ་ལོག་པའི་བསྟན་དགྲ་དེ་འདྲ་མིན་ནམ་སྙམ། མཚམས་མཚམས་ལ་ཆོལ་ཁ་དང་ཆོས་རྒྱུད་ཀྱི་ཞེན་ཁོག་གིས་རུལ་བའི་རང་གིས་མ་འཇོན་གཞན་ལ་སྡང་བའི་བླུན་པོ་རང་མཐོང་ཅན་དེ་འདྲ་མིན་ནམ་སྙམ། གང་ལྟར་ཁྱེད་རང་བོད་མི་ཞིག་ཡིན་ན། དངོས་ནས་སྙིང་རྗེ་དགོས་པ་ཞིག་རེད། སོང་ཙང་ངེད་ཁྱེད་ལ་བོད་མི་ཞིག་གི་འདུ་ཤེས་ཁོ་ནས་སྐད་ཆ་ཚིག་འགའ་བཤད། བོད་གངས་ཅན་གྱི་གྲུབ་མཐའ་ཁག་དང་ཆོས་རྒྱུད་ཁག་གི་བསྟན་འཛིན་གྱི་སྐྱེས་ཆེན་ཕལ་མོ་ཆེ་བོད་མཐའ་འཁོབ་མུན་པའི་གླིང་གི་ཉམ་ཐག་པའི་སེམས་ཅན་རྣམས། གང་ལ་གང་འདུལ་བར་ཁམས་དང་བསམ་པ་མོས་པའི་ཚུལ་དུ་ཆོས་རྒྱུད་གྲུབ་མཐའ་ཁག་བྱུང་བ་ལས་དེ་དག་མེ་ཆུ་ལྟ་བུའི་འགལ་བ་ཞིག་མིན་ཞིང་། ཆོས་དབྱིངས་རྒྱ་མཚོའི་མཇིངས་ལས་རོ་གཅིག་ཡིན་པ་ས་དགེ་བཀའ་རྙིང་གི་མཁས་གྲུབ་མང་པོས་བཞེད་ཡོད། དེ་བཞིན་བསྟན་འཛིན་གྱི་སྐྱེས་ཆེན་དེ་ཚོའང་སྤྲུལ་གཞི་གཅིག་ལ་སྦྲུལ་བ་དུ་མའི་ཚུལ་གྱིས་སངས་རྒྱས་ཀྱི་བསྟན་པ་གསལ་བར་བྱས་པ་ལས། ཁྱེད་ལྟ་བུའི་རྟག་འཛིན་ཅན་ཚོའི་ཤ་ཡི་མིག་ལ་སྣང་བ་ལྟར་གང་ཟག་ཁ་ཁ་ལྟ་བུ་ཞིག་ག་ལ་ཡིན། སློབ་དཔོན་པདྨའི་ཞལ་ཆེམས་སུ། མདོ་སྔགས་བསྟན་འཛིན་བློ་བཟང་གྲགས་པ་ཞེས་སོགས་ཀྱི་ལུང་བསྟན་ན། རྗེ་ཙོང་ཁ་བ་དེ་ཉིད་ཁོང་གི་ཐུགས་སྤྲུལ་ཡིན་པར་བསྟན་པ་ཡོད་པ་སོགས་ནི་དཔེ་མཚོན་ཙམ་ཡིན། དེ་བཞིན་ལྷར་བཅས་སྐྱབས་མགོན་༸གོང་ས་ལྷ་མིའི་རྣམ་འདྲེན་དེ་ཉིད་རྒྱལ་བའི་བཀའ་འགྱུར་རོ་ཅོག་གི་ཨ་དུམ་པར་དགེ་འདུན་དཀོན་མཆོག་འབངས་ཀྱི་མདོ་ན། བོད་ཀྱི་སྲིད་པ་མ་ཆགས་སྔོན་དུ་བོད་ལ་ཐུགས་སྐྱེད་སྨོན་ལམ་གྱིས་ཟིན་པར་ལུང་བསྟན་ཡོད་པ་དང་། བཀའ་ཐང་སོགས་སུ་ཆོས་རྒྱལ་གཉའ་ཁྲི་དང་། མེས་དབོན་རྣམ་གསུམ། འགྲོ་མགོན་འཕགས་པ་སོགས་ས་དགེ་བཀའ་རྙིང་གི་བསྟན་འཛིན་དུ་མའི་སྐུ་སྐྱེ་བཞེས་མཐར་རྒྱལ་བ་སྐུ་ཕྲེང་དང་པོ་ནས་ད་ལྟ་ལ་ཐུག་གི་བར་དུ་བོད་མགོ་ནག་འདིའི་སྣ་འདྲེན་མཛད་པའི་སངས་རྒྱས་གསོན་པོ་འདིའི་དྲིན་ཏིལ་འབྲུ་ཙམ་ཡང་མི་ཚོར་བའི་དད་ལོག་འདི་ནི། ཁྱེད་ལ་རིགས་ཀྱང་ཁྱེད་ཀྱི་ཕ་མེས་ཡང་དང་བུ་རབས་ཚ་བརྒྱུད་རྣམས་ལ་རིགས་སམ། རང་མགོ་རྡོ་ལོག་གི་ལས་འདི་འདྲ་དེང་ཕྱིན་མི་བྱེད་པར། བོད་བསྟན་སྲིད་སྤྱི་དང་བོད་མི་རིགས་སྤྱི་ལ་ཕན་པའི་ལས་རེ་བྱེད་རོགས་ཞེས་ནན་གྱིས་སྐུལ་ལོ།།
དཔའ་བོ་ཐུབ་བསྟན་དངོས་གྲུབ་དང་འཇམ་དཔལ་ཡེ་ཤེས་ལགས་རྣམ་གཉིས་ཀྱིས་ཞལ་ཆེམས་ཕྱག་བསྟར་གནང་སྟེ་༧གོང་ས་མཆོག་གི་བཀའ་དགོངས་ཚུལ་བཞིན་སྒྲུབ་པ་དང་། ༧གོང་ས་མཆོག་བོད་དུ་གདན་འདྲེན་ཞུ་ཆེད། མང་བཀུར་རང་གཞུང་གི་ལངས་ཕྱོགས་རྩ་དོན་དུ་བཟུང་སྟེ་ཚེ་སྲོག་ཀྱང་བློས་བཏང་སོང་ནའང་། གཞོན་ནུའི་ཚོགས་གཞོན་དོན་གྲུབ་ལྷ་དར་གྱིས་གཞོན་ནུའི་རང་བཙན་འཐབ་རྩོད་ཀྱི་ལོ་རྒྱུས་ནང་གསེར་ཡིག་གིས་འབྲི་འོས་པ་ཞིག་ཡིན་ལབ་ན་དོན་དག་ག་རེ་རེད་དམ། སྐུ་མཁྱེན་རང་བཙན་ཁ་ལ་ཁྱེར་པའི་ཚོང་པ་ཁ་ཤས་ལགས། དཔའ་བོ་དེ་དག་གི་ཆོད་སེམས་དང་སྙིང་སྟོབས་བྱས་རྗེས་ཐད་ནག་ཚོང་མགོ་བདེ་མ་བྱེད་རོགས། དངོས་གནས་སྐྱུག་བྲོ་ཡི་འདུག རང་བཙན་པར་བསྒྲགས་པ་རྣམས་ཀྱིས་ཀྱང་ད་ནི་ཆིག་སྒྲིལ་བྱ་རོགས། དངོས་གནས་ཆིག་སྒྲིལ་བྱ་བའི་དུས་ཚོད་སླེབས་འདུག བོད་གཞུང་མང་དང་ཆིག་སྒྲིལ་བྱ་རོགས། དཔའ་བོ་དཔའ་བོ་ ༣༢ ཀྱི་དགོངས་དོན་དང་ཆིག་སྒྲིལ་ཅི་ནས་ཀྱང་བྱ་རོགས།
རྒྱལ་ཞེན་ལྷག་བསམ་དང་སྙིང་སྟོབས་ཀྱིས་ཕྱུག་པའི་རྩོམ་གྲོགས་ཚེ་བརྟན་རྡོ་རྗེ་ལགས། ཁྱེད་མ་སྨད་གསུམ་རྒྱལ་ས་གཉིས་པ་རྡ་ས་ནས་སྤུན་ཟླ་བརྒྱ་ཕྲག་མང་པོའི་མིག་ཆུ་དང་། འཁྲེང་སེམས་ཀྱི་བར་ནས་ཐོན་པ་ནས་བཟུང་སྟེ། ང་དང་ང་འདྲ་བའི་སྐྱེ་བོ་ཁྲི་ཕྲག་གིས་ཁྱོད་ཚོའི་གོམ་པ་རེ་རེ་བཞིན་འཚོས་ནས་ཡོད་ལ། གོམ་སྟབས་རེ་རེ་དང་བསྡོངས་ནས་འཕར་བཞིན་པའི་རྒྱལ་ཞེན་སྙིང་སྟོབས་ལ་ཉན་ནས་ཡོད་ནའང་། ཆེས་ཡིད་ཕངས་ཤིང་། ངོ་གནོང་བ་ཞིག་ལ། ནམ་ཡང་ཁ་ཙམ་ལས་མི་འཇོན་པའི་ང་དང་ངའི་རིགས་སུ་གྱུར་བ་འདི་ཚོ། ཁྱོད་མ་སྨད་དང་གསུམ་དང་ལྷན་དུ་རང་དབང་རྩོད་ལེན་གྱི་འགྲུལ་བཞུད་ལ་ཞུགས་མ་ཐུབ་པ་དེ་རེད། གྲོགས་པོ་ལགས། ངོ་མ་ཡིན། ཁྱོད་ཚོའི་ལྷག་བསམ་དང་། ཁྱོད་ཚོའི་སྙིང་སྟོབས་དེས། ངའི་ད་ལྟའི་གནས་བབ་ལ་ངོ་ཚ་བྱིན་སོང་། ཁྱོད་ཚོའི་ཕུགས་རྒྱང་དང་། ཁྱོད་ཚོའི་ལྟ་བ་དེས། ངའི་གཤིས་ཀ་ལ་ཁྲེལ་དགོད་བྱས་སོང་། འོན་ང་ནི་ནམ་ཡང་ང་སྟེ། ཡི་རངས་དང་། སྨོན་འདུན་ཙམ་ལས་ཅི་ཡང་མི་འཇོན་པའི་གྲྭ་རྐྱང་དཀྱུས་མ་དེ་ཡིན་པས་སོ། །མཐའ་དོན་ཁྱོད་ཚོའི་རང་གི་བདེ་འཇགས་ལ་གཟོབ་དང་། མི་རིང་བར་འོད་སྟོང་འཕྲོ་བའི་ལམ་ཆེན་དེ་ནས་ང་ཚོ་མཉམ་འཛོམ་བྱ་ཐུབ་པར་སྨོན། བོད་རྒྱལ་ལོ། །བལ་ཡུལ་ནས་ཨ་མདོའི་གྲྭ་རྐྱང་ཁྱུ་ཞིག་གི་ཚབ་བྱས་ཏེ་ཕུལ་བ་ལགས།
གྲོགས་པོ་གླིང་ཚ་ཚེ་བརྟེན་རྡོ་རྗེ་ལགས། ཁྱེད་མ་བུ་གསུམ་གྱི་བློ་གཏོང་དང་སྙིང་སྟོབས། འགན་ཁུར་དང་ལེན་གྱི་བསམ་བློ་དང་རང་ཚུགས་དང་དམ་བཅའ་ལ་སྙིང་ཁོང་རུས་བའི་གཏིང་ནས་གུས་ཞབས་དང་ཡི་རང་ཞུ། ང་ཚོས་ཚིག་འདི་ཙམ་གྱིས་ཁྱེད་ལ་སྐྱེལ་མ་བྱེད་ན་སེམས་ནས་མི་བཟོད་པ་ཞིག་རེད། དངོས་གནས་བཤད་ན་ང་ཚོ་ཚང་མའི་འགན་ཁུར་དང་འོས་འགན་གཅིག་མཚུངས་ཡིན་པས་ཁྱེད་ལྟར་གོམས་པ་མདུན་སྤོས་དང་དཔུང་བ་མཉམ་གཤིབ་བྱས་དགོས་པ་བྱེད་ཅི་དགོས། ཡིན་ན་ཡང། ཁྱེད་མ་བུ་གསུམ་ལྟར་བློ་གཏོང་དང་སྙིང་སྟོབས་ཧུར་སྐྱིད་བྱེད་མ་ཐུབ་པར་རང་གིས་རང་ལ་ལེ་བདའ་དང་ཁེངས་ར་བྱེད་ཀྱིན་ཡོད། ང་ནི་གོས་སེར་གྱོན་པའི་དགེ་སློང་ཞིག་ཡིན་ཆ་ནས་རྒྱུན་དུ་ནས་ཁྱེད་མ་བུ་གསུམ་ཁྱེད་ཀྱི་ཕྱོགས་སྐྱབས་ཟུང་དང་གསོལ་འདེབས་ཀྱི་མིག་མདའ་བསྲིངས་ནས་ཡོད། དེར་བརྟེན་ཁྱེད་མ་བུ་གསུམ་ཀྱི་བྱ་བ་དང་དམ་བཅའ་ལམ་འགྲོ་ཡོང་བར་ང་ཡི་ཆེས་ཡོད།
མི་རིགས་འདིར་ཤ་དང་ཁྲག་ཡོད་ལ། རུས་པའང་གཙང་མ་གཙང་རྐྱང་དུ་ཡོད། དེས་ཕྱིར། ཁྱེད་ཚོ་རང་གི་འདོད་པ་ནང་བཞིན་ཕེབས་དང་། ང་ཚོས་མིག་གིས་ཁྱེད་ཚོ་མཐོང་གི་རེད་ལ། ང་ཚོའི་རྣ་བས་ཀྱང་རྟག་ཏུ་ཁྱེད་ཚོར་ཉན་གྱིན་ཡོད། དེ་ལས་ཀྱང་ང་ཚོའི་སེམས་འདུན་དྲོན་མོས་ནམ་ཡང་ཁྱེད་ཚོ་འཚོས་ནས་ཡོད། ཐུགས་རྗེ་ཆེ།
དྲ་གྲོགས་ལགས། ཁྱེད་ལ་སྐད་ཆ་མགོ་གང་ནས་འཛུགས་དགོས་མིན་མ་ཤེས་བསྡད་ཡོད། དེ་རིང་ཡང་བཤད་རྒྱུ་ཞིག་མི་རེག་གི་ཁྱེད་མ་བུ་གསུམ་གྱི་སྙིང་སྟོབས་དང་ལྷག་བསམ་ལ་རྗེས་སུ་ཡི་རང་བྱེད་ཀྱིན་ཡོད། དེ་ཙམ་མ་གཏོགས་ཅང་བཤད་མི་ཤེས་ཀི ཁྱེད་མ་བུ་གསུམ་གྱི་འདོད་དོན་འགྲུབ་པར་ཤོག
གནས་ཚུལ་འདི་གོ་བས་ངོ་མ་དགའ་ཡོད། ཁྱེད་ཚོར་མཉམ་ཞུགས་དང་ཐུག་མཁན་ཚང་མར་ཁ་དྲོ།།
བོད་ཤ་ཁྲག་རུས་གསུམ་ལགས། ངོ་མ་མིང་དོན་མཚུངས་པའི་མིང་ཞིག་རེད། སྐུ་ཉིད་ཀྱི་བྱེད་སྟངས་དང་ཟིན་བྲིས་ཀྱི་མིང་བྱང་གཉིས་ཀ་དུས་དང་དུས་སུ་ངོ་བོ་དབྱེར་མེད་དུ་གྱུར་འགྲོ་ཀི གཞན་ཁྱོད་མ་བུ་གསུམ་ལ་ལམ་བར་དུ་བར་ཆད་མེད་པའི་སྨོན་ལམ་ཞིག་ཀྱང་བརྒྱབ་ཆོག་་་་་བུ་རྒོད་པོ་་་་་་་་འགྲམ་ལ་ཐོན་དུས་ཕྱིར་བལྟས་མ་བྱེད།
བཀུར་འོས་པའི་དྲ་གྲོགས་ཤ་ཁྲག་རུས་གསུམ་ལགས།བོད་མི་ཚང་མས་ཁྱེད་མ་བུ་གསུམ་གྱི་གནས་སྟངས་སེམས་ཁུར་བྱེད་བཞིན་ཡོད་ལ།རྨ་དུག་ལྕེས་བཤད་པ་དེར་རྒྱབ་སྐྱོར་ཡོད།འགྲུལ་བཞུད་དུས་ཚོད་ཉུང་རུ་གཏོང་རོགས་ཞུ་བཞིན་ཡོད།ལམ་བར་གཟབ་གཟབ་གནང་རོགས།བཀའ་དྲིན་ཆེ་ཚེ་རིང་ལོ་བརྒྱ།བོད་རྒྱལ་ལོ།
དྲ་གྲོགས་ལགས། སྐུ་འཁམས་བཟང་། ཉིན་བཞིན་ཁྱེད་ཀྱི་གནས་ཚུལ་ནམ་ཐོན་ལ་བསྒུག་ནས་བསྡད་ཡོད་དེ་རིང་ཅིག་གོ་པ་ཧ་ཅང་དགའ་སོང་། མ་ཟད་ཚོགས་པ་ཚོས་ངོས་ནས་རོགས་རམ་དེ་འདྲ་གནང་པ་གོ་པས་སེམས་པ་སྐྱིད་པོ་ཞིག་འདུག
དེ་རིང་གནས་ཚུལ་ཆ་ཚང་ཞིག་གོ་བས་དགའ་བ་འཕེལ། བོད་མི་གཞུང་སྒེར་ཚང་མས་རོགས་རམ་བྱས་པ་ཤིན་ཏུ་ཡག་པོ་འདུག ཐུགས་རྗེ་ཆེ།
ཡིན་ནའང་། གསར་འགོད་པ་ཟེར་བ་དེ་ཡོད་ནའང་ང་ཚོ་གནས་ཚུལ་ཞིག་ད་བར་སྤྲད་མ་སོང་། རྗེས་ཕྱོགས་གསར་འགོད་པ་ཡི་གེ་འབྲི་ཤེས་མཁན་དེ་འདྲ་འགྲོ་ཐུབ་པ་ཡིན་ན་ཞེ་དྲག་ཡག་གི་རེད།
སྙིང་ཉེ་བའི་བདག་གི་དྲྭ་གྲོགས་དམ་པ་བོད་ཤ་ཁྲག་རུས་གསུམ་ཁྱེད་མ་སྨད་གསུམ་འདི་ལྟར་ཆས་ཚེ་ཡིག་ངག་གི་རྒྱབ་སྐྱོར་ཙམ་ལས་བདག་གི་མི་ནུས་དུས་རང་ཉིད་ཀྱི་རང་ཉིད་ལ་འཁང་ར་སྡུག་ཡུས་ཤོར་གྱི་འདུག འདི་ཁ་ཙམ་མ་ཡིན་པའི་མིག་ཆུ་དང་འདྲེས་པའི་བདག་གི་སྐད་ཆ་ཞིག་ཡིན།
འོན་ཀྱང་ཁོ་བོ་གཙོས་སྙིང་ཉེ་བའི་སྤུན་ཟླ་གང་མང་ཞིག་གི་སེམས་པ་ཁྱེད་དང་ལྷན་ཆས་བཞིན་ཡོད། ཁྱེད་མ་བུ་གསུམ་ལ་བར་ཆད་མེད་པར་སྨོན།
ང་ཚོས་ཁྱེད་མ་སྨད་གསུམ་གྱི་སྐྱིད་སྡུག་ལ་ཉན་ནས་ཡོད་ལ་བར་ཆད་མེད་པའི་སྨོན་ལམ་རྒྱབ་ཀྱིན་ཡོད།
དྲ་གྲོགས་ཤ་ཁྲག་རུས་གསུམ་ལགས། ཁྱེད་མ་བུ་གསུམ་གྱི་གནས་ཚུལ་ལ་ཉན་བཞིན་ཡོད་ལ། ཁྱེད་མ་བུ་གསུམ་གྱི་བདེ་ཐང་ལ་སེམས་ཁྲལ་བྱེད་བཞིན་ཡོད། རླབས་ཆེ་བའི་མ་བུ་གསུམ་གནམ་གྱིས་སྲུངས་ཤིག། ལམ་བར་དུ་ངེས་པར་དུ་སེམས་ཆུང་བྱེད་རོགས།
ཉིན་རེའི་འགྲུལ་བཞུད་ཀྱི་ཆུ་ཚོད་མང་དྲགས་འདུག་པས་གཟབ་གཟབ་གནང་རོགས།
དྲ་གྲོགས་ཤ་ཁྲག་རུས་གསུམ་ལགས། ཁྱེད་མ་བུ་གསུམ་གྱི་གནས་ཚུལ་ལ་ཉན་བཞིན་ཡོད་ལ། ཁྱེད་མ་བུ་གསུམ་གྱི་བདེ་ཐང་ལ། རླབས་ཆེ་བའི་མ་བུ་གསུམ་གནམ་གྱིས་སྲུངས་ཤིག།