རྒྱ་ནག་གི་དབུལ་ཕོངས་ཉམ་ཐག་དང་འགྲོ་བ་མིའི་ཐོབ་ཐང་བར་འབྲེལ་བ་ཡོད་དམ།

མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་གི་སྐུ་ཚབ་རྒྱ་ནག་ནང་སྐོར་སྐྱོད་སྐབས། རྒྱ་ནག་གཞུང་གི་བདེ་འཇགས་མི་སྣས་རྗེས་འདེད་བཏང་ཡོད་པ་མ་ཟད། ཁོ་ལ་ཐུག་འཕྲད་བྱེད་མཁན་ཚོ་བཀག་བསྐྱིལ་མནར་གཅོད་སོགས་བཏང་ཡོད་འདུག

ཁ་སང་ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། སྐུ་ཞབས་ཧྥེ་ལེབ་ཨལ་སི་ཊོན་ (Philip Alston) ལགས་ནི། མཉམ་འབྲེལ་རྒྱལ་ཚོགས་ཀྱི་ཉམ་ཐག་དབུལ་ཕོངས་དང་འགྲོ་བ་མིའི་ཐོབ་ཐང་ཚན་པའི་དམིགས་བསལ་རྟོག་ཞིབ་པ་ཡིན་པ་དང་། ཁོང་སྔ་ཕྱི་ཐེངས་གཉིས་ལ་རྒྱ་ནག་ནང་ཕྱིན་པའི་གནས་ཚུལ་སྐོར་མཉམ་འབྲེལ་རྒྱལ་ཚོགས་ཀྱི་ཆེད་མཁས་པ་ཚོར་སྙན་སེང་ཞུས་སྐབས། རྒྱ་ནག་ནང་གི་གནད་དོན་མང་པོ་ཞིག་གི་ཐོག་རང་དབང་གི་ཐོག་ནས་ཞིབ་འཇུག་བྱེད་དགོས་པ་དང་། རྒྱ་ནག་གཞུང་གིས་ཁོ་ལ་ལ་རྗེས་འདེད་བཏང་བའི་བྱ་སྤྱོད་དེ་མཉམ་འབྲེལ་རྒྱལ་ཚོགས་ཀྱི་དགོས་འདུན་དང་རྒྱབ་འགལ་ཆགས་ཡོད་སྐོར་སོགས་བརྗོད་འདུག

ཁོང་སྔར་ལོའི་ཕྱི་ཟླ་ ༨ པའི་ནང་རྒྱ་ནག་ནང་ཐེངས་གཅིག་ཕྱིན་ཡོད་པ་དང་། ཉེ་ཆར་སླར་ཡང་རྒྱ་ནག་ནང་སྐོར་སྐྱོད་བྱེད་སྐབས་དཀའ་ངལ་འཕྲད་པའི་གནས་ཚུལ་རྣམས་ཟླ་འདིའི་ཚེས་ ༢ ཉིན་གློག་འཕྲིན་བརྒྱུད་ཨེ་ཕེ་གསར་ཁང་ལ་སྤྲད་ཡོད་འདུག་ལ། འབྱུང་འགྱུར་ཕྱི་ ༦ པའི་ནང་གནས་ཚུལ་དེ་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་ལ་སྙན་སེང་ཞུ་རྒྱུ་ཡིན་འདུག

ཁོང་ལ་རྒྱ་ནག་ནང་འཕྲད་པའི་དཀའ་ངལ་གཙོ་བོ་ཁག་ནི། རྒྱ་ནག་གཞུང་གིས་ཁོ་རང་རྒྱ་ནག་གི་མི་སྒེར་བ་སུ་གང་ལའང་ཐུག་འཕྲད་བྱེད་དུ་བཅུག་མེད་པ་མ་ཟད། ཚོགས་པ་སྒྲིག་འཛུགས་ཁག་ལའང་དུས་བཅད་མ་བཟོས་པར་ཐད་ཀར་ཐུག་འཕྲད་བྱེད་བཅུག་མེད་པ་དང་། དུས་རྒྱུན་དུ་བདེ་འཇགས་མི་སྣས་ཁོ་རང་གི་རྗེས་འདེད་བཏང་སྟེ་གང་དུ་འགྲོ་བ་དང་སུ་ལ་ཐུག་འཕྲད་བྱེད་པ་སོགས་ལ་ལྟ་རྟོག་ནན་མོ་བྱེད་པ་སོགས་འཁོད་འདུག

སྲིད་འཛིན་ཞི་ཅིན་ཕིན་གྱི་འཛིན་སྐྱོང་འོག རྒྱ་ནག་ནང་དམ་དྲག་ཆེ་རུ་ཕྱིན་ཡོད་པ་དང་། ཞི་ཅིན་ཕིན་གཞུང་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་དོན་གཉེར་བ་དང་ཁྲིམས་རྩོད་པ། སྒེར་གྱི་དྲ་ཚིགས་གཉེར་མཁན། ཕྱི་ཕྱོགས་ལ་གནས་ཚུལ་གཏོང་མཁན། ཕྱི་རྒྱལ་དུ་འབྲེལ་བ་བྱེད་མཁན་ཚོགས་སྒེར་མང་པོ་ཞིག་ལ་དཀའ་ངལ་སྤྲོད་བཞིན་ཡོད།

གནད་དོན་དེའི་སྐོར་གཟའ་ལྷག་པའི་ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཀིང་ཧྲང་ (Geng Shuang)ལ་དྲི་བ་བཏོན་པའི་ལན་དུ་ཁོས། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པས་སྙན་ཐོ་དེ་འདྲ་ཞིག་བཏོན་པ་མ་མཐོང་བས་དེའི་སྐོར་ལ་གསལ་བཤད་བྱེད་རྒྱུ་མེད་ལུགས་བཤད་འདུག

སྐུ་ཞབས་ཨལ་སི་ཊོན་ལགས་ཀྱིས། ན་ནིང་རྒྱ་ནག་གི་དཔོན་རིགས་ཚོས་ཁོ་རང་རྒྱ་ནག་ནང་སྐྱོད་རྒྱུ་ངོས་ལེན་བྱས་ཏེ། རྒྱ་ནག་ནང་འགྲོ་བ་མིའི་ཐོབ་ཐང་གི་གནད་དོན་གང་ཡང་མེད་པའི་རྣམ་འགྱུར་བསྟན་ཏེ། ཁོ་རང་རྒྱ་རིགས་སུ་ལ་ཐུག་འདོད་ན་དེ་ལ་ཐུག་པ་ཡིན་ཞེས་དང་། ཕྱི་ཟླ་ ༦ པའི་ནང་ཁོང་གིས་ཐེངས་འདིའི་སྙན་ཐོ་མ་བཏོན་སྔོན་ལ། རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་གི་རྒྱ་ནག་སྐུ་ཚབ་ཚོས་རྒྱ་ནག་ནང་གི་ད་ལྟའི་དངོས་ཡོད་གནས་སྟངས་གསལ་འདོན་བྱེད་དགོས་སྐོར་སོགས་བརྗོད།

ཕྱི་ལོ་ ༢༠༡༦ ལོའི་ཟླ་ ༨ པའི་ནང་སྐུ་ཞབས་ཨལ་སི་ཊོན་ལགས་རྒྱ་ནག་ནང་ཉིན་ ༩ རིང་གཟིགས་སྐོར་བྱས་སྐབས། ཁོང་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་དཀའ་ངལ་དང་མི་མང་ཉམ་ཐག་དབུལ་ཕོངས་ཀྱི་དཀའ་ངལ་བར་ལ་འབྲེལ་བ་ཡོད་མེད་ཞིབ་འཇུག་བྱས་ཡོད། རྒྱལ་སྤྱིའི་ཉེས་ཡངས་ཚོགས་པའི་རྒྱ་ནག་ཉམས་ཞིབ་པ་སྐུ་ཞབས་ཝེ་ལེམ་ནི་ (William Nee) ལགས་ཀྱིས། རྒྱ་ནག་གཞུང་ལ་རང་རྒྱལ་གྱི་ཉམ་ཐག་དབུལ་ཕོངས་ཀྱི་གནད་དོན་སྐོར་ལ་གསལ་བཤད་བྱེད་རྒྱུ་མང་པོ་འདུག་ཀྱང་། གསལ་བཤད་བྱེད་ཐུབ་ཀྱི་མེད་པ་དེ་རྒྱ་ནག་ནང་འཕྲད་བཞིན་པའི་དངོས་ཡོད་དཀའ་རྙོག་མང་པོ་གསང་རྒྱ་བྱེད་ཐབས་ཤིག་རེད་ཅེས་བརྗོད།

སྐུ་ཞབས་ཨལ་སི་ཊོན་གྱི་སྙན་ཐོའི་ནང་། ཁོ་རང་རྒྱ་ནག་ནང་བསྐྱོད་པའི་སྔ་རྗེས་སུ་རྒྱ་ནག་གཞུང་གིས་ཁོང་ལ་ཐུག་འཕྲད་བྱེད་མཁན་ཚོར་འཇིགས་སྐུལ་དང་འཁོན་ལན་བསློགས་ཡོད་ཅེས་བརྗོད། རྒྱ་རིགས་འགྲོ་བ་མིའི་ཐོབ་ཐང་དོན་གཉེར་བ་ཅིང་ཐེན་ཡཱོང་ (Jiang Tianyong)ལགས་སྐབས་དེར་ཁོང་ལ་ཐུག་འཕྲད་བྱས་པར་བརྟེན་ཏེ། ཕྱི་ ༡༡ པའི་ཚེས་ ༢༡ ཉིན་གློ་བུར་གར་སོང་ཆ་མེད་ཆགས་པ་དང་། ཕྱི་ཟླ་ ༣ ནང་རྒྱ་ནག་གཞུང་འབྲེལ་གསར་ཤོག་ཅིག་གི་ནང་ཅིང་ཐེན་ཡཱོང་གིས་ཕྱིའི་གསར་ལམ་ཐོག་གནས་ཚུལ་རྫུན་བསྒྲགས་བྱས་ཡོད་སྐོར་བཀོད་འདུག

ཨལ་སི་ཊོན་ལགས་ཀྱིས་ན་ནིང་ཕྱི་ཟླ་ ༡༠ པའི་ནང་། རྒྱ་ནག་གཞུང་གིས་ཁྲིམས་རྩོད་པ་གཉིས་ལ་བསྙོན་འཛུགས་བཀག་བསྐྱིལ་བྱས་ཏེ། མནར་གཅོད་བཏང་ཡོད་པའི་གནས་ཚུལ་ཁྲིམས་རྩོད་པ་དེ་གཉིས་ཀྱི་བཟའ་ཟླ་གཉིས་ཀྱིས་ཁོང་ལ་བཤད་ཡོད་པ་དང་། ཁྲིམས་རྩོད་པ་གཅིག་ཁོ་རང་གཟིགས་སྐོར་སྐབས་ཐུག་འཕྲད་བྱས་པའི་ཉེས་འཛུགས་འོག་འཛིན་བཟུང་བྱས་ཡོད་འདུག འོན་ཀྱང་རྒྱ་ནག་གཞུང་གིས་ཝང་ཆའོ་ལིན་ (Wang Qiaoling)དང་ལའེ་ཝིང་ཙི་ (Li Wenzu) གཉིས་བཀག་བསྐྱོལ་མནར་གཅོད་རིགས་གང་ཡང་བཏང་མེད་ལུགས་བཤད་ཡོད་འདུག

སྐུ་ཞབས་ཨལ་སི་ཊོན་ལགས་ཀྱི་སྙན་ཐོའི་ནང་། རྒྱ་ནག་གཞུང་གི་ཆབ་སྲིད་ཤན་ཤུགས་འོག་རྒྱ་ནག་ནང་ཉམ་ཐག་དབུལ་ཕོངས་ཀྱི་དཀའ་ངལ་འབྱུང་སྲིད་པ་དང་། རྒྱ་ནག་གིས་སྲིད་ཇུས་གཏན་འབེབས་བྱེད་སྐབས། ངེས་པར་དུ་སྤྱི་མང་གི་དངོས་ཡོད་གནས་སྟངས་ལ་དཔྱད་ཞིབ་བྱེད་དགོས་སྐོར། ད་དུང་ཁོང་གིས་རྒྱ་ནག་གིས་སྤྱི་ཚོགས་དང་དཔལ་འབྱོར་འཚོལ་སྒྲུབ་ཀྱི་ཐོབ་ཐང་དེ་འགྲོ་བ་མིའི་ཐོབ་ཐང་ལྟར་འགན་སྲུང་དང་གཅེས་འཛིན་བྱེད་དགོས་སྐོར་སོགས་བརྗོད་ཡོད།

གསར་འགོད་པ། པདྨ་རྒྱལ།