བཙན་བྱོལ་ནང་གི་ཉམས་ཞིབ་པ་ཚོས་རྒྱ་ནག་གི་དབང་སྒྱུར་སྲིད་ཇུས་ཡག་པོ་ཞིག་ཧ་གོ་བ་བྱོས།

སྲིད་སྐྱོང་མཆོག་གིས་བཙན་བྱོལ་ནང་ཅི་གང་མི་ཤེས་མཁན་ཚོ་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་འདུར་འགྲོ་བཞིན་ཡོད་པ་དང་། ཕྱི་རྒྱལ་གྱི་ཉམས་ཞིབ་པ་ཚོས་བོད་ཀྱི་རིག་གཞུང་དཔྱད་གླེང་གཏིང་ཟབ་གནང་དུས། དེ་ལ་ཨ་མཚར་མཚར་གྱིས་ཉན་རྒྱུ་མ་གཏོགས། ང་ཚོ་རང་ངོས་ནས་དཔྱད་རྩོམ་འབྲི་བ་དང་དཔྱད་གླེང་གནང་ཐུབ་ཀྱི་མེད་སྐོར་བརྗོད་སོང་།

དེ་རིང་སྔ་དྲོའི་ཆུ་ཚོད་ ༩ སྟེང་། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ཚོགས་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག ཉིན་གསུམ་རིང་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་གསུམ་པ་དབུ་འཛུགས་གནང་སོང་།

སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། དམིགས་བསལ་སྐུ་མགྲོན་དུ་ཝེ་ཝི་ཀ་ནན་དྷ་རྒྱལ་སྤྱིའི་ཐེབས་རྩ་ (Vivekananda International Foundation) ཁང་གི་ཉམས་ཞིབ་པ་རྒན་པ་སྐུ་ཞབས་ཝེ་ནོ་ཌ་ཨ་ནན་ཌ་ (Vinod Anand) ལགས་གཉིས་ཀྱིས་དབུས། བོད་དང་རྒྱ་གར་མཐོ་རིམ་སློབ་གྲྭ་ཁག་གི་ན་གཞོན་ཉམས་ཞིབ་པ་དགེ་སློབ་གཉིས་དང་ཟུར་ཞུགས་གནང་མཁན་བཅས་ཁྱོན་མི་གྲངས་ ༦༠ ལྷག་དང་། དེ་བཞིན་འབྲེལ་ཡོད་ཚོགས་པ་ཁག་གི་སྐུ་ཚབ་སོགས་འཛོམས་འདུག

ཚོགས་འདུའི་ཐོག་མར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ནས་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་རིམ་པ་ངོ་སྤྲོད་གནང་རྗེས། དམིགས་བསལ་སྐུ་མགྲོན་སྐུ་ཞབས་ཝེ་ནོ་ཌ་ཨ་ནན་ཌ་ལགས་ཀྱིས། ཁོང་དེ་རིང་ཚོགས་འདུར་ཡོང་ནས་བོད་པ་ཚོ་དང་མཉམ་དུ་སྐད་ཆ་ཤོད་རྒྱུ་བྱུང་བར་དགའ་བོ་བྱུང་། སྤྱིར་བོད་དང་རྒྱ་གར་གཉིས་སྔ་མོ་ནས་རིག་གཞུང་གི་འབྲེལ་བ་ཤུགས་ཆེར་ཡོད་བསྡད་པ་ཞིག་དང་། དཔལ་ཡོན་ཀྱི་ཆ་ནས་ལོ་རྒྱུས་དང་གོམས་སྲོལ་སོགས་ཀྱི་འབྲེལ་བ་ཡོད་པ་རེད། ནང་བསྟན་ཆོས་ལུགས་དང་ཧུན་རྡི་ཆོས་ལུགས་གཉིས་ལ་མཚོན་ན་ཁྱད་འཕགས་རང་བཞིན་གྱི་འབྲེལ་བ་ཡོད་པ་ནི། ཆོས་ལུགས་གཉིས་ཀྱི་ནང་འཚེ་བ་མེད་པའི་ལྟ་གྲུབ་ཉམས་སུ་ལེན་གྱི་ཡོད་པ་དང་། བོད་དང་རྒྱ་གར་གཉིས་ལ་སྤྱིའི་ཆ་ནས་མི་འདྲ་བ་ཞིག་ཡོད་པ་ནི། བོད་པས་གནའ་བོའི་རྒྱ་གར་གྱི་ནང་པའི་ལྟ་གྲུབ་དང་རྒྱ་ནག་གི་རིག་གཞུང་གཉིས་མཉམ་བསྲེས་བྱས་ཡོད་པ་རེད། ངེས་དགོས་པ་ཞིག་ལ་གནས་སྟངས་དེའི་འོག རྒྱ་ནག་གིས་བོད་ནི་མི་རིགས་དང་རིག་གཞུང་གང་ཐད་ནས་རྒྱ་ནག་གི་ཆ་ཤས་ཡིན་ཞེས་ཤོད་ཀྱི་ཡོད་པ་རེད། ༧གོང་ས་ཏཱ་ལའི་བླ་མ་མཆོག་གིས་ཀྱང་བོད་དང་རྒྱ་གར་གཉིས་ལ་དགེ་སློབ་ཀྱི་འབྲེལ་བ་ཡོད་པ་རེད་ཅེས་ཡང་ཡང་གསུངས་ཡོད་པ་དང་། འབྲེལ་བ་དེ་སྤྱིར་བཏང་ཞིག་མ་ཡིན་པར་རིག་གནས་དང་ལྟ་གྲུབ་བརྒྱུད་སྤེལ་གྱི་འབྲེལ་ལམ་ཞིག་ཆགས་བསྡད་ཡོད་པ་རེད། བོད་དང་རྒྱ་གར་གཉིས་ཀྱིས་བོད་དོན་སྐོར་གཅིག་པུ་ཙམ་མིན་པར་དུས་ཡུན་རིང་བོར་ཞི་བདེ་དང་འཚེ་བ་མེད་པ་སོགས་རྒྱལ་སྤྱིའི་གནད་དོན་ཁག་ལའང་བགྲོ་གླེང་བྱེད་ཀྱི་ཡོད་པ་དང་། ནང་པ་དང་ཧུན་རྡི་ཆོས་ལུགས་ཀྱི་དབུ་ཁྲིད་མང་པོ་ཞིག་བགྲོ་གླེང་དེའི་ནང་ཉམས་ཞུགས་གནང་གི་ཡོད་སྐོར། བོད་ཀྱི་གནད་དོན་དེ་ད་དུང་ཐག་གཅོད་མ་ཐུབ་པ་དང་ངེས་གཏན་མེད་པར་ལྷག་བསྡད་ཡོད་པ་དང་། འདས་པའི་དུས་རབས་མང་ཆེ་བར་བོད་ནི་རང་བཙན་རྒྱལ་ཁབ་བྱས་བསྡད་པ་དང་། ༡༩༡༡ ལོར་རྒྱལ་དབང་སྐུ་ཕྲེང་བཅུ་གསུམ་པས། རྒྱ་ནག་གི་དམག་མི་ཚང་མ་བོད་ནས་ཕྱིར་ཕུད་བཏང་ཡོད་པ་རེད།  ༡༩༥༠ ལོ་ནས་བོད་དེ་རྒྱ་ནག་གི་སྟངས་འཛིན་འོག་ཤོར་བ་དང་། གནད་དོན་དེའི་ཐད་རྒྱལ་སྤྱིའི་ཁྲིམས་ཞིབ་ལྷན་ཚོགས་ (International Commission of Jurists) ཀྱི་ངོས་ནས་ཚོགས་འདུ་ཐེངས་མང་ཚོགས་ཏེ་སྙན་ཐོ་ཞིག་བཏོན་ཡོད་པ་རེད། དེ་ནི་འབྱུང་འགྱུར་བོད་ཀྱི་ལོ་རྒྱུས་རང་བཞིན་གྱི་དངོས་ཡོད་གནས་སྟངས་ཤིག་ཆགས་ཀྱི་ཡོད་པ་མ་ཟད། ཐ་ན་རྒྱ་གར་གྱི་ངོས་ནས་བལྟས་ནའང་། བོད་དེ་རང་བཙན་རྒྱལ་ཁབ་ལ་ངོས་འཛིན་མ་བྱས་པ་ཡིན་ན། རྒྱ་དཀར་ནག་གཉིས་བར་གྱི་མེག་མོ་ཧན་ས་ཐིག་རྩོད་གླེང་ལ་གཞི་འཇོག་ས་ཞིག་ཧ་ལམ་ཁག་པོ་ཆགས་ཀྱི་ཡོད་སྐོར་སོགས་བརྗོད་སོང་།

སྲིད་སྐྱོང་བློ་བཟང་སེང་གེ་མཆོག་གིས། བཀའ་ཤག་གི་ངོས་ནས་བོད་ཀྱི་སྲིད་ཞུས་ཉམས་ཞིབ་ཁང་གཙོས་པའི་ན་གཞོན་ཉམས་ཞིབ་པ་ཚོ་གལ་ཆེན་པོར་བརྩི་ཡི་ཡོད་པ་དང་། འདས་པའི་ལོ་ངོ་གསུམ་ཙམ་རིང་བོད་རིག་པའི་ཞིབ་འཇུག་ཚོགས་འདུར་བཅར་སྐབས། གནད་དོན་ཆེ་ཤོས་གཅིག་དེ། ཚོགས་བཅར་བའི་ནང་བོད་སྐད་ཡིག་གི་ཐོག་ནས་བོད་ཀྱི་ཆོས་དང་རིག་གཞུང་། བོད་ཀྱི་རྒྱལ་རབ་ལོ་རྒྱུས་སོགས་གང་ཅིའི་ཐད་ནས་ཞིབ་འཇུག་བཀའ་བསྡུར་གནང་མཁན་ཉམས་ཞིབ་པ་བརྒྱ་ཆ་ ༨༠ བོད་རིགས་མ་ཡིན་པར་ཕྱི་རྒྱལ་བ་རྐྱང་རྐྱང་ཡིན་པ་དང་། ཁོ་རང་ཚོ་བོད་ཀྱི་ཆོས་དང་རིག་གཞུང་། བོད་ཀྱི་ཆབ་སྲིད་དང་ལེགས་བྱང་། བོད་ཀྱི་ཆོ་ག་ཕྱག་ལེན་དང་གཏོར་མ་བཞེངས་སྟངས་ཡན་ཆད། ཐ་ན་ང་ཚོས་མ་མཐོང་བ་དེ་འདྲ་ཚང་མར་ཞིབ་འཇུག་གནང་ཚར་ཡོད་པའི་སྐོར་གསུང་ཡོང་དུས། ཁོ་ཚོ་བོད་པ་རང་གི་མི་རིགས་མིན་པས་སེམས་སུ་མི་བདེ་བ་ཞེ་དྲགས་ཡོང་གི་འདུག གནད་དོན་དེས། ཕྱི་རྒྱལ་གྱི་ཉམས་ཞིབ་པ་ཚོས་རྒྱལ་སྤྱིའི་སྟེང་གནད་དོན་གཅིག་གི་སྒང་ལ་ཉམས་ཞིབ་བྱས། འབུམ་རམས་པའི་ཕྱག་འཁྱེར་ཐོབ། ལྗགས་རྩོམ་གནང་། རྩོམ་དེབ་པར་སྐྲུན་གནང་བར་བརྟེན་ནས། ཁོ་ཚོར་རྒྱལ་སྤྱི་རང་བཞིན་གྱི་ཉམས་ཞིབ་པའི་ངོས་འཛིན་འཐོབ་ཀྱི་ཡོད་པ་དང་། ང་ཚོས་དེ་ལྟར་བྱེད་ཐུབ་ཀྱི་མེད་པ་དང་། གནད་དོན་གཉིས་པ་དེ། བོད་ནང་དང་བཙན་བྱོལ་གཉིས་ལ་ཁྱད་པར་ཆེན་པོ་ཡོད་པ་དང་། བོད་ནས་ཡོང་མཁན་མཁས་པ་ཚོའི་གྲས་སུ་བོད་ཀྱི་རྩོམ་རིག་དང་ལོ་རྒྱུས་ཐོག་དཔྱད་གླེང་གནང་མཁན་མང་པོ་ཡོད་པ་དང་། གཞན་རྒྱ་རིགས་ཁག་ཅིག་ཡོང་བ་དེ་ཚོ་རྒྱ་ནག་དང་འབྲེལ་བ་ཆགས་ཡོད་དུས་ཟུར་དུ་ཕུད་ཡོད་པ་དང་། བཙན་བྱོལ་ནས་བོད་རིག་པའི་ཞིག་འཇུག་ཚོགས་ཆེན་ཐོག་བཅར་མཁན་མཁས་དབང་ཁ་ཤས་མ་གཏོགས་མེད་པ་དང་། དེ་མིན་བཙན་བྱོལ་སྤྱི་ཚོགས་ནང་དོ་སྣང་གང་ལ་གང་འཚམ་ཡོད་སྟབས། ཅི་གང་མི་ཤེས་མཁན་དེ་ཚོར་ལག་འཁྱེར་སྤྲད་ནས་འགྲོ་བསྡད་ཡོད་པ་རེད། རྒྱལ་སྤྱིའི་བོད་རིག་པའི་ཞིབ་འཇུག་ཚོགས་འདུར་འགྲོ་མཁན་ཚོར་ནད་ཚ་ལྟ་བུ་ཞིག་ཡོད་པ་ནི། ཕྱི་རྒྱལ་གྱི་ཉམས་ཞིབ་པ་ཚོས་བོད་དོན་དང་འབྲེལ་བའི་གནས་ཚུལ་གཏིང་ཟབ་མོ་ཤོད་ཡོང་དུས། དེས་ཞེ་དྲགས་ཕན་གྱི་ཡོད་ཀྱང་། ང་ཚོ་བོད་རང་ངོས་ནས་ཕ་རོལ་བོས་བོད་དོན་དང་འབྲེལ་བའི་གནས་ཚུལ་གཏིང་ཟབ་མོ་བཤད་པ་དེ་ལ་ཨ་འཚར་འཚར་གྱིས་ཉན་རྒྱུ་མ་གཏོགས། ང་ཚོ་རང་ངོས་ནས་ཉམས་ཞིབ་དཔྱད་རྩོམ་དང་དཔྱད་གླེང་གནང་མཁན་མེད་པ་དང་། དེ་འདྲའི་གནས་སྟངས་ཤིག་གི་འོག བོད་དོན་ཐོག་ཉམས་ཞིབ་གཏིང་ཟབ་མོ་གནང་མཁན་དགོས་ཀྱི་ཡོད་སྟབས།  བོད་ཀྱི་སྲིད་བྱུས་ཉམས་ཞིབ་ཁང་བཙུགས་པ་རེད། ཡིན་ནའང་ད་ལྟ་ད་དུང་བོད་དོན་སྐོར་ལ་དཔྱད་རྩོམ་འབྲི་མཁན་དང་དཔྱད་གླེང་གནང་མཁན་མེད་པ་དཔེར་ན། ཉེ་ཆར་བོད་ཀྱི་མཐའ་ཁུལ་འབྲོག་ལམ་གྱི་བདག་དབང་རྩོད་གླེང་བྱུང་སྐབས། སྤྱི་ཚོགས་བརྒྱུད་ལམ་ཁག་ནང་འབྲོག་ལམ་མཐའ་ཁུལ་རྩོད་གླེང་སྐོར་ལ་དཔྱད་རྩོམ་འབྲི་མཁན་ཧ་ལམ་རྒྱ་གར་དང་ཕྱི་རྒྱལ་རྐྱང་རྐྱང་ཡིན་པ་དང་། རྒྱ་ནག་གིས་ཧམ་སེམས་བཅངས་ཏེ་དམིགས་ཡུལ་དང་འཆར་གཞི་ལྡན་པའི་ཐོག་ནས་འབྲོག་ལམ་མཐའ་ཁུལ་རྒྱ་ནག་གི་ཡིན་ལུགས་གླེང་བཞིན་ཡོད་ཀྱང་། བཙན་བྱོལ་སྤྱི་ཚོགས་ནང་གནད་དོན་དེའི་ཐོག་དཔྱད་རྩོམ་འབྲི་ཐུབ་མཁན་དང་དཔྱད་གླེང་གནང་ཐུབ་མཁན་མེད་པ་དང་། སྤྱིར་བོད་ས་ནི་ལག་མཐིལ་ལྟ་བུ་ཡིན་པ་དང་། འབྲོག་ལམ་དང་ཨ་རུ་ན་ཅལ་སོགས་བོད་ཀྱི་ས་མཚམས་ཁག་ནི་ལག་པའི་མཛུམ་མོ་ལྔ་ལྟ་བུ་ཆགས་ཡོད་པ་དང་། དེ་ག་ནང་བཞིན། རྒྱ་ནག་གི་དབང་སྒྱུར་སྲིད་ཇུས་ཁག་ཡག་པོ་ཞིག་ཧ་མ་གོ་ཚེ། རྒྱ་ནག་གཞུང་ཧ་གོ་ཐབས་མེད་པས། ཉམས་ཞིབ་པ་ཚོས་རྒྱ་ནག་ལ་དོ་སྣང་བྱེད་རྒྱུ་ཧ་ཅང་གལ་ཆེན་པོ་ཡིན་སྐོར་གསུངས་སོང་།

སྲིད་སྐྱོང་མཆོག་གིས་ད་དུང་། སྤྱི་ཡོངས་ནས་བོད་གཞིས་བྱེས་གཉིས་ཀྱི་སྤྱི་ཚོགས་ནང་ཉམས་ཞིབ་པ་ཚོར་འགན་ཆེན་པོ་ཞིག་ཡོད་པ་དང་། དེ་ནི་ངོ་དེབ་དང་སྐད་འཕྲིན་སོགས་སྤྱི་ཚོགས་བརྒྱུད་ལམ་ཁག་ཏུ་བགྲོ་གླེང་བྱེད་སྐབས། བགྲོ་གླེང་གནང་སྟངས་དེ་ཧ་ལས་པའི་སྐྱོ་བོ་ཡིན་པ་དང་། མི་མང་གི་གོ་རྟོག་ཞན་པར་བརྟེན་ནས། གནད་དོན་ག་རེ་ཐོག་ལ་བགྲོ་གླེང་བྱས་པ་ཡིན་ནའང་། གནས་སྟངས་ཧ་ཅང་སྐྱོ་བོ་ཡིན་པས། ཉམས་ཞིབ་པ་ཚོས་ཉམས་ཞིབ་གཏིང་ཟབ་གནང་བ་ཡིན་ན། དེ་ལ་འབབ་པའི་གནས་སྟངས་ཡག་པོ་ཆགས་ཀྱི་ཡོད་སྐོར་དང་། ད་ཆར་བོད་ནང་དང་བཙན་བྱོལ་ནང་གི་བརྒྱུད་ལམ་ཁག་ཏུ་བགྲོ་གླེང་གནང་སྟངས་དང་མཆན་རྒྱག་སྟངས་སོགས་ལ་བལྟས་ཡོང་དུས། ཆོག་ཤེས་མེད་པ། དྲང་བདེན་མེད་པ། ཡ་རབས་བཟང་སྤྱོད་མེད་པ། གུས་ཞབས་མེད་པ་སོགས་སེམས་སྐྱོ་བའི་གནས་སྟངས་ཤིག་ཆགས་ཀྱི་ཡོད་སྟབས། ཕྱོགས་ཞེན་གྱི་དབང་དུ་མ་སོང་བར། ཕར་ཕྱོགས་ཚུར་ཕྱོགས་གཉིས་ཀྱི་དངོས་ཡོད་གནས་ཚུལ་ཟིན་པའི་ཐོག་ནས་ཉམས་ཞིབ་དང་བཀའ་མོལ་གནང་རྒྱུ་ཧ་ཅང་གལ་ཆེན་པོ་ཡིན་སྟབས། གནས་སྟངས་དེ་ཡར་རྒྱས་གཏོང་བར་ཉམས་ཞིབ་པ་ཚོར་དམིགས་བསལ་གྱི་འགན་ཡོད་སྐོར། བོད་མིའི་སྒྲིག་འཛུགས་ཀྱི་ངོས་ནས་བོད་ཀྱི་སྲིད་བྱུས་ཉམས་ཞིབ་ཁང་བརྒྱུད་ནས་ན་གཞོན་ཉམས་ཞིབ་པ་ཚོས་འབྲོག་ལམ་གྱིས་མཚོན་པའི་བོད་དོན་སྐོར་ནས་རྒྱལ་སྤྱིའི་སྡིངས་ཆའི་སྒང་དཔྱད་རྩོམ་འབྲི་བ་དང་དཔྱད་གླེང་གནང་ཐུབ་པའི་དམིགས་བསལ་རེ་བ་ཆེན་པོ་རྒྱག་གི་ཡོད་སྐོར་སོགས་གསུངས་སོང་།

གསར་འགོད་པའི་དྲི་བ་དྲིས་ལན་སྐབས། འབུམ་རམས་པ་རྡོ་རྗེ་ཚེ་རིང་ལགས་ཀྱིས། ད་རེས་ཀྱི་ན་གཞོན་ཞིབ་འཇུག་ཚོགས་འདུ་དེ་ཚོགས་ཐེངས་གསུམ་པ་ཆགས་ཀྱི་ཡོད་པ་དང་། བོད་མིའི་སྒྲིག་འཛུགས་ནས་བོད་དོན་ཉམས་ཞིབ་བྱེད་ཕྱོགས་ཀྱི་ལམ་སྟོན་དང་གོ་སྐབས་སྤྲད་པ་ཐེངས་དང་པོ་ཡིན་པ་དང་། ཞིབ་འཇུག་པ་ཕན་ཚུན་བར་ཞིབ་འཇུག་གི་བགྲོ་གླེང་བརྒྱུད་བོད་དོན་འབྲེལ་བའི་གནས་ཚུལ་དང་ཞིབ་འཇུག་གི་ཁ་ཕྱོགས་བཅས་ལ་ཕན་ཐོགས་ཆེན་པོ་ཡོང་གི་ཡོད་སྐོར་དང་། བོད་ནང་གི་ཉམས་ཞིབ་པའི་བོད་ཀྱི་རིག་གཞུང་ཞིབ་འཇུག་གི་ཚད་གཞི་མཐོན་པོ་ཡོད་པ་དང་། རྒྱ་གར་ནང་གི་གཞོན་སྐྱེས་ཞིབ་འཇུག་པ་ཚོར་མཚོན་ན། བོད་རང་གི་རིག་གཞུང་ཞིབ་འཇུག་གི་གོ་རྟོག་ད་ལྟ་གཞི་ནས་ཡོང་གི་ཡོད་པས། བཙན་བྱོལ་ནང་གི་ཉམས་ཞིབ་པ་ཚོས་བོད་དོན་གཙོས་པའི་བོད་ཀྱི་རིག་གཞུང་ཞིབ་འཇུག་གི་གནས་བབ་དེ་རྒྱལ་སྤྱིའི་སྟེང་སླེབ་ཐུབ་པར་ཤུགས་རྒྱག་དགོས་པའི་མཐོང་སྣང་བྱུང་སྐོར་བརྗོད་སོང་།

འབུམ་རམས་པ་བསྟན་འཛིན་བདེ་གསལ་ལགས་ཀྱིས། ན་གཞོན་ཉམས་ཞིབ་པའི་ཚོགས་འདུ་ཐེངས་གསུམ་པའི་དམིགས་ཡུལ་གཙོ་བོ་ད་ལྟ་བོད་དོན་དང་བོད་ཀྱི་རིག་གཞུང་སྐོར་ལ་ཉམས་ཞིབ་གནང་བཞིན་པའི་ཉམས་ཉིབ་པ་ཚོའི་ཆུ་ཚོད་མཐོར་འདེགས་དང་འཐུས་ཚང་གཏོང་རྒྱུ་དང་། བཙན་བྱོལ་སྤྱི་ཚོགས་ནང་ཁ་འཐོར་དུ་འགྲོ་བཞིན་པའི་ན་གཞོན་ཉམས་ཞིབ་པ་ཚོའི་བར་འབྲེལ་ལམ་འཛུགས་རྒྱུ་དེ་ཡིན་པ་དང་། ཉམས་ཞིབ་པ་ཕན་ཚུན་བར་འབྲེལ་བ་འཛུགས་ཐུབ་པ་ཡིན་ན། མ་འོངས་པར་ཉམས་ཞིབ་ཀྱི་སྦྱོང་བརྡར་དང་གོ་སྐབས། ཉམས་ཞིབ་ཀྱི་སྤུས་ཚད་ཇེ་ལེགས་སུ་གཏང་ཐུབ་སྐོར་དང་། བོད་ཀྱི་སྲིད་བྱུས་ཉམས་ཞིབ་ཁང་གི་ངོས་ནས། ཉམས་ཞིབ་པ་ཚོའི་ཉམས་ཞིབ་དཔྱད་གླེང་དང་དཔྱད་རྩོམ་བསྡུ་སྒྲིག་བྱས་ཏེ་འབུམ་རམས་ཉམས་ཞིབ་པ་གསུམ་གྱིས་དཔྱད་ཞིབ་བྱས་པ་བརྒྱུད་ལོ་རེར་བོད་དབྱིན་སྐད་ཡིག་གཉིས་ནང་དུས་དེབ་དཔར་སྐྲུན་བྱེད་ཀྱི་ཡོད་པ་དང་། མ་འོངས་པར་ན་གཞོན་ཉམས་ཞིབ་པ་ཚོའི་དཔྱད་རྩོམ་ཁག་རྒྱལ་སྤྱིའི་སྡིངས་ཆའི་ཐོག་སླེབ་ཐུབ་པར་བོད་ཀྱི་སྲིད་བྱུས་ཉམས་ཞིབ་ཁང་གིས་འབད་བརྩོན་བྱེད་ཀྱི་ཡོད་སྐོར་སོགས་བརྗོད་སོང་།

འབུམ་རམས་པ་གཡང་མཚོ་ལགས་ཀྱིས། ད་ལན་གྱི་ཁོ་མོའི་ཞིབ་འཇུག་ཆེད་རྩོམ་ནི་<<རྒྱ་ནག་གིས། བོད་གྱི་མཐའ་མཚམས་སུ་རྒྱུ་བཞིན་པའི་རྫ་ཆུ་དང་ཡར་ཀླུང་གཙང་པོ་གཉིས་བར་འཛིན་པའི་སྲིད་བྱུས།>>ཞེས་པ་དེ་ཡིན་པ་དང་། དེའི་ནང་རྒྱ་ནག་གི་སྲིད་ཇུས་མ་འདྲ་བ་དེ་དག་ག་རེ་བྱས་ནས་འཛིན་གྱི་ཡོད་པའི་གནད་དོན་དང་། དེས་རྒྱལ་སྤྱིའི་ཆབ་སྲིད་ལ་ཁྱད་པར་ག་རེ་འགྲོ་བཞིན་ཡོད་པ། རྒྱ་ནག་ནང་གི་ཆབ་སྲིད་གནད་དོན་ལ་ཁྱད་པར་ག་རེ་འགྲོ་ཡི་ཡོད་མེད། རྒྱ་ནག་གིས་བོད་ཀྱི་གཙང་བོ་ཁག་ལ་ཆུ་རག་རྒྱག་བཞིན་པ་འགོག་ཐབས་སྐོར་བྲིས་ཡོད་པ་དང་། མོ་རང་གི་ཉམས་ཞིབ་ལྟར་ན། རྒྱ་ནག་གིས་བོད་ཀྱི་རྫ་ཆུ་དང་ཡར་ཀླུང་གཙང་པོ་སོགས་ལ་ཆུ་རགས་རྒྱག་བཞིན་པའི་སྲིད་ཇུས་དེ་ནི། བོད་ཀྱི་གཙང་པོ་དེ་དག་རྒྱུ་ཡུལ་རྒྱལ་ཁབ་ཁག་ནང་འཛིན་པའི་སྲིད་ཇུས་དང་གཅིག་པ་མིན་སྐོར་བརྗོད་སོང་།

འབུམ་རམས་པ་གཉན་ཐར་ལགས་ཀྱིས། སྤྱིར་ཁོ་རང་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་རིམ་པར་ཞུགས་པའི་བརྒྱུད་རིམ་ཁྲོད་དུ། གཅིག་ནས་ན་གཞོན་ཉམས་ཞིབ་པ་མང་པོ་ཞིག་ལ་འབྲེལ་འདྲིས་བྱུང་བ་བརྒྱུད་རིག་གཞུང་ཞིབ་འཇུག་གི་ཁ་ཕྱོགས་སོགས་ཉམས་མྱོང་མང་པོ་རག་པ་དང་། གཉིས་ནས་བོད་ཀྱི་སྲིད་བྱུས་ཉམས་ཞིབ་ཁང་དང་བོད་མིའི་སྒྲིག་འཛུགས་ཀྱི་ལངས་ཕྱོགས་ལ་རྒྱུས་ལོན་དང་ངེས་ཤེས་གསལ་བོ་ཐོབ་བྱུང་། སྤྱིར་བཙན་བྱོལ་ནང་བོད་ཀྱི་རིག་གཞུང་ཞིབ་འཇུག་གི་རྒྱ་ཆུང་བ་དང་ཞིབ་འཇུག་བྱེད་མཁན་ཉུང་སྟབས། ཞིབ་འཇུག་པ་རྒན་གཞོན་གཉིས་བར་སྟོང་ཆ་ཞིག་ལྷག་ཡོད་པ་དང་། དེ་བཞིན། བོད་ཕྱི་ནང་གཉིས་ཀྱི་རིག་གཞུང་ཞིབ་འཇུག་ལ་ཁྱད་པར་ཆེན་པོ་ཡོད་པ་དང་། བོད་ནང་གི་ཞིབ་འཇུག་པ་ཚོ་རྒྱ་ནག་གི་བཀག་རྒྱའི་འོག་ཡོད་པ་དང་། བཙན་བྱོལ་ནང་ཞིབ་འཇུག་པ་ཉུང་ཉུང་ཡིན་པ་གང་ཞིག་ལ་ཞིབ་འཇུག་གི་སྐད་ཡིག་ཁྱབ་ཁོངས་ནས་ཕྱོགས་གཉིས་སུ་ཕྱེས་ཡོད་པ་རེད། དེ་ནི་ཕྱོགས་གཅིག་གིས་བོད་ཡིག་གི་སྒང་ནས་ཞིབ་འཇུག་བྱེད་ཀྱི་ཡོད་སྟབས། རྒྱལ་སྤྱིའི་གནས་སྟངས་དང་རྒྱལ་སྤྱིའི་འབྲེལ་ལམ་སོགས་ལ་ཁ་ཕྱོགས་མ་ཐུབ་པའི་ཞན་ཆ་ཡོད་པ་དང་། ཕྱོགས་གཅིག་གིས་དབྱིན་ཡིག་སྒང་ནས་ཞིབ་འཇུག་བྱེད་ཀྱི་ཡོད་དུས། བོད་རང་གི་གནས་སྟངས་དང་བོད་རང་གི་སྐད་ཡིག་དང་འབྲེལ་བའི་ཞིབ་འཇུག་ཁྱབ་ཁོངས་ཀྱི་རྒྱུ་ཆ་དེ་དག་ལ་རྒྱུས་ལོན་མ་བྱུང་བ་དང་མ་འདང་བའི་ཞན་ཆ་ཞིག་མཐོང་གི་ཡོད་སྐོར་བརྗོད་སོང་།

སངས་རྒྱས་དཀོན་མཆོག་དང་པདྨ་རྒྱལ།