གསར་སྙིང་།

དེ་རིང་ཕྱི་དྲོར་ཁམས་ཉག་རོང་ཕྱ་ཡུལ་གྲོང་པའི་རང་ལོ་ ༢༤ ཡིིན་པ་པདྨ་རྒྱལ་མཚན་ལགས་ཀྱིས་རྒྱ་ནག་གཞུང་ལ་ངོ་རྒོལ་བྱས་ཏེ་རང་ལུས་མེར་བསྲེགས་གནང་ཡོད་པའི་གནས་ཚུལ་འདུག་་་

ཟླ་འདིའི་ཕྱི་ཚེས་ ༡༦ ཉིན་རྔ་བ་ཀིརྟི་དགོན་གྱི་དགེ་འདུན་པ་བློ་བཟང་དར་རྒྱས་ལགས་ཀྱིས་ཞི་རྒོལ་སྐད་འབོད་གནང་སྟེ་ཉེན་རྟོག་པས་བཙན་འཁྲིད་ཀྱིས་གར་ཡོད་ཅི་བྱུང་མེད་པར་གྱུར་ཡོད་འདུག་་་

བཙན་བྱོལ་བོད་མིའི་འོས་བསྡུའི་སྔོན་འགྲོ་དང་དངོས་གཞི་གཉིས་དགོས་མིན་ཐད་འོས་བསྡུའི་སྒྲིག་གཞི་བསྐྱར་བཅོས་འཆར་ཟིན་ཚོགས་ཆུང་དང་འཛིན་སྐྱོང་བཀའ་ཤག་གཉིས་དགོངས་ཚུལ་མ་མཐུན་པར་བརྟེན་བཀའ་ཤག་གྲོས་ཚོགས་ནས་ཕྱིར་ཐོན་སོང་།་་་

ཐའེ་ལན་ཌིའི་རྒྱལ་སྤྱིའི་ཐའེ་དྲག་རྩལ་འགྲན་བསྡུར་སྐབས་གཉིས་པའི་ཐོག་བོད་རིགས་བུ་མོ་ཁུ་ཚུར་དྲག་རྩལ་བ་བསྟན་འཛིན་པདྨ་ལགས་ལ་ཟངས་ཀྱི་རྟགས་མ་ཐོབ་ཡོད་འདུག་་་

རྒྱ་ནག་གི་ཚོགས་ཆེན་གཉིས་གྲོལ་བའི་ཉིན་མོ་དང་བསྟུན་ཁུལ་དང་ཞིང་ཆེན་ཁག་དྲུག་ཙམ་གྱི་དཔོན་རིགས་ ༩ ལ་ཁྲིམས་འགལ་གྱི་ཉེས་མིང་འོག་ཞིབ་བཤེར་གནས་དབྱུང་བཏང་ཡོད་འདུག་་་

རྒྱ་ནག་གཞུང་གིས་དམག་ཤུགས་སྤུངས་ཏེ་ཐའེ་ཝན་གྱི་རྒྱལ་སྲུང་བདེ་འཇགས་ཐད་འཇིགས་སྐུལ་བྱེད་བཞིན་པའི་སྙན་ཐོ་བཏོན་འདུག་་་

གཟའ་ལྷག་པའི་ཉིན་རྒྱ་ནག་གི་སྲིད་བློན་ལེ་ཁི་ཆིང་གིས་པེ་ཅིན་གཞུང་ཕྱོགས་ནས་ཚོང་ལས་ཐད་ཨ་རྒྱ་གཉིས་བར་ཟིང་འཁྲུག་ལང་བ་མཐོང་འདོད་མེད་པས་འབྲེལ་ལམ་ཡར་རྒྱས་ཡོང་ཐབས་སུ་གྲོས་མོལ་བྱེད་དགོས་ལུགས་བཤད་འདུག་་་

བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། དབྱིན་ཇུ་ཡུ་རོབ་མཉམ་འབྲེལ་མཐུན་ཚོགས་ནས་ཕྱིར་ཐོན་པའི་གོ་སྐབས་དང་བསྟུན་ཏེ། སི་ཁཱོ་ཊི་གཞུང་གིས་ཀྱང་མང་མོས་འོས་བསྡུའི་ལམ་ནས་རང་བཙན་དགོས་མིན་ཐག་གཅོད་བྱ་རྒྱུ་ཡིན་ཚུལ་བསྒྲགས་་་