༧གོང་ས་མཆོག་སུད་སིའི་ནང་ཆིབས་བསྒྱུར་བསྐྱངས་ཏེ་བོད་མི་ཚོར་སྤྱོད་ལམ་ཡག་པོ་བྱེད་དགོས་སྐོར་དང་། ནང་པ་སངས་རྒྱས་པའི་ལྟ་གྲུབ་ཐོག་ལ་སློབ་སྦྱོང་བྱེད་དགོས་སྐོར་སོགས་ནན་གསུང་གནང་འདུག
སུད་སི་དང་ལིག་ཏན་སི་ཊཡན་བོད་རིགས་མི་མང་གིས་གསོལ་འདེབས་ཞུས་པ་ལྟར། ཟླ་འདིའི་ ༡༢ ཉིན་གྱི་ཉིན་གུང་ཆུ་ཚོད་ ༡༢ ཙམ་ལ་སུད་སིའི་གྲོང་ཁྱེར་བྷེན་ནང་ཆིབས་བསྒྱུར་བསྐྱངས་ཡོད་པ་དང་། ཉིན་དེའི་མཛད་འཕྲིན་ཐོག་མར་ HOUSE OF RELIGION ཞེས་པའི་ནང་ཆིབས་བསྒྱུར་བསྐྱངས་ཏེ། ཆོས་ལུགས་འདྲ་མིན་གྱི་ཆོས་དཔོན་ཁག་ཅིག་དང་ལྷན་ཉིན་གུང་ཚིགས་ལ་རོལ་བ་དང་། དེའི་རྗེས་འཛམ་གླིང་གི་ཆོས་ལུགས་མཐུན་སྒྲིལ་དང་ཆོས་ལུགས་མཉམ་གནས་ཐོག་འགྲོ་བ་མིའི་བཟང་སྤྱོད་གོང་མཐོར་གཏོང་ཐབས་ཞེས་པའི་བརྗོད་གཞིའི་ཐོག་བགྲོ་གླེང་གནང་ཡོད།
ཕྱི་ཚེས་ ༡༤ ཉིན་སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱིས་ངོས་ནས་༧གོང་ས་མཆོག་ལ་མདོ་ལུགས་ཀྱི་བརྟན་བཞུགས་བསྟར་འབུལ་དང་། བརྟན་བཞུགས་རྗེས་བོད་རིགས་གཙོས་པའི་ཕྱི་རྒྱལ་མི་རིགས་མང་པོ་ཞིག་དང་། རྒྱ་རིགས་སོགས་འདུས་པའི་མིང་མང་སུམ་སྟོང་ལྷག་ལ་དབུ་མ་རིན་ཆེན་ཕྲེང་བ་དང་། སྒོམ་རིམ་བར་མ། རྒྱལ་སྲས་ལག་ལེན་སོ་བདུན་མའི་དབང་སོགས་ཀྱི་བཀའ་ཆོས། དེ་བཞིན། བོད་རིགས་ཚོར་དམིགས་བསལ་བཀའ་སློབ་སོགས་གནང་ཡོད་འདུག
༧གོང་ས་མཆོག་གིས་སུད་སི་བོད་རིགས་ཚོར་བཀའ་སློབ་ཕེབས་པའི་ནང་། སུད་སི་ནི་བོད་པ་ཚོར་བཀའ་དྲིན་ཤིན་ཏུ་ཆེན་པོ་ཡིན། ང་ཚོ་ཐོག་མར་དཀའ་ངལ་ཆེན་པོའི་སྐབས་ཨ་ཤི་མན་ནས་བོད་ཕྲུག་མང་པོ་བླངས་པ་དང་། དེ་རྗེས་རྒྱ་གྲམ་དམར་པོའི་རོགས་སྐྱོར་དང་སུད་སི་གཞུང་གི་རྒྱབ་སྐྱོར་ཡོད་པའི་ཐོག་ནས་བོད་པ་སྟོང་ཕྲག་ལྷག་ཅིག་སུད་སི་ནང་བླངས་པ་སོགས་དཀའ་དྲིན་ཆེན་པོ་ཡིན། ད་ལྟ་བོད་མི་ཚོའི་གནས་སྟངས་ཧ་ཅང་ཡག་པོ་འདུག རྩ་བའི་ཞབས་འདྲེན་ཞུ་མཁན་རེ་ཟུང་ཡོད་ཀྱང་བོད་པ་སྤྱིའི་ལས་འགན་འཁུར་སྟངས་ཡག་པོ་འདུག དང་ཐོག་རྒྱ་གར་ནང་དུའང་བོད་པ་ལ་བསྟོད་སྔགས་བྱེད་མཁན་མ་གཏོགས་མེད་ཀྱང་། ག་ལེར་གནས་ཚུལ་འདྲ་མིན་ཐོག་བཤད་རྒྱུ་མང་པོ་ཡོང་གི་ཡོད་པ་རེད། ང་ཚོས་དོ་སྣང་གནང་དགོས་ཀྱི་འདུག ང་ཚོའི་ནང་པ་སངས་རྒྱས་ཆོས་ལུགས་ཀྱི་ལྟ་གྲུབ་ཐོག་ལ་སློབ་སྦྱོང་དང་། བོད་མི་ཚོས་ཡ་རབས་བཟང་སྤྱོད་ཐོག་ལ་ཤུགས་རྒྱག་དགོས་པ་རེད། ལས་བསྡོམས་ནང་ཁྱོད་རང་ཚོས་སེམས་ཅན་སྲོག་སླུ་གཏོང་བ་སོགས་གནང་འདུག དེ་ཞེ་དྲགས་ཡག་པོ་བྱུང་འདུག དེ་ལ་བསྟོད་བསྔགས་ཡོད། ཅེས་དང་། བོད་པ་ཚོས་ནང་ཆོས་སློབ་སྦྱོང་ཡག་པོ་གནང་དགོས་ཀྱིན་འདུག་ལ། དབུ་མ་རིན་ཆེན་ཕྲེང་བ་སོགས་ནང་ཆོས་ཀྱི་དཔེ་ཆ་དེ་དག་སློབ་དེབ་གྱི་ངོ་བོའི་ཐོག་ནས་སློབ་སྦྱོང་གནང་དགོས་པ་དེ་གལ་ཆེན་པོ་རེད། ཅེས་སོགས་གནང་ཡོད་འདུག
གསར་འགྱུར་གཏོང་མཁན། ཙ་ཡུས་ཕུན་ཚོགས།
རྒྱ་ཆེ་བའི་བརྩེ་ལྡན་རང་རིགས་བོད་རིགས་སྤུན་ཟླ་ཡོངས་ལ་ཞུ་རྒྱུར།
རྣམ་པ་ཚོས་མཁྱེན་གསལ་ལྟར། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་འཛམ་གླིང་ས་ཕྱོགས་གང་སར་བསྟན་འགྲོའི་བདེ་དོན་ཆེད་ཆིབས་བསྒྱུར་གནང་དང་གནང་བཞིན་པ་དང་། ལྷག་པར་དུ་ཕྱི་རྒྱལ་ཡུལ་ཁག་ལ་ཕེབས་སྐབས་བོད་ཀྱི་སྐད་ཡིག་དང་ནང་ཆོས་ལ་སློབ་སྦྱོང་བྱེད་དགོས་པ་ཡང་ཡང་བཀའ་ནན་ཕེབས་བཞིན་འདུག ད་ལྟ་བཀའ་སློབ་ཕེབས་སྐབས་ང་ཚོས་བཀའ་གསུང་ཅི་བསྒྲུབ་ཞུ་དགོས་པ་དང་། རྗེས་སུ་ཐུགས་ཕམ་གྱིས་བཀའ་སློབ་ཕེབས་མི་དགོས་པ་བཟོ་རྒྱུ་ང་ཚོའི་ལས་འགན་གཙོ་བོའི་ནང་གི་གཙོ་བོ་ཆགས་ཡོད།
བོད་ཀྱི་སྐད་ཡིག་ཡག་པོ་བདག་གཅེས་བྱེད་དགོས་ན། དཔལ་ལྡན་སྲིད་སྐྱོང་ནང་མི་གཙོས་བོད་རིགས་ནང་མི་ཡོངས་ནས་སོ་སོའི་ཁྱིམ་ཚང་ནང་ལ་བོད་སྐད་གཙང་མ་ཤོད་རྒྱུ་སོགས་ནས་འགོ་བརྩམས་དགོས་པ་ལས། ཕྱི་ལ་གཏམ་བཤད་བྱེད་སྐབས་འདྲ་ཆགས་པོ་བཤད་པ་ཙམ་གྱིས་ཅི་ལ་ཕན།
བསམ་བློ་གཏོང་རན་འདུག འདྲ་ཆགས་པོ་བྱས་ནས་འགྲོ་རྒྱུའི་དུས་ཚོད་མ་རེད།
༅༅། བཀའ་དྲན་ཆེ་། ངོ་མཚར་ཆེ།
སྙིང་རྗེའི་རང་གཟུགས་བསྟན་འཛིན་རྒྱ་མཚོར་བསྟོད།