ལྷོ་ཨབ་རི་ཁར་ག་དུས་ཕེབས་ན་ཕེབས་རོགས།

ཟླ་བ་གཉིས་ལྷག་གི་རྗེས་ནས་ལྷོ་ཨབ་རི་ཁའི་གཞུང་གིས་༧གོང་ས་མཆོག་རྒྱལ་ཁབ་དེར་ག་དུས་ཆིབས་བསྒྱུར་གནང་འདོད་ཡོད་ན་གནང་རོགས་ཞུ་ཟེར།

བྷེ་བྷེ་སིས་གནས་ཚུལ་བསྒྲགས་པ་ལྟར་ན། རྒྱ་ནག་གཞུང་གི་གནོན་ཤུགས་འོག་ལྷོ་ཨབ་ཀའི་གཞུང་གིས་ལོ་འདིའི་ཕྱི་ཟླ་ ༣ པའི་ནང་༧གོང་ས་མཆོག་ལྷོ་ཨབ་རི་ཁར་འཚོགས་རྒྱུའི་ནོ་སྦེལ་ཞི་བདེའི་གཟེངས་རྟགས་བཞེས་མཁན་རྣམས་ཀྱི་ཞི་བདེའི་ཚོགས་འདུ་དེར་ཞུགས་པར་ཐོངས་མཆན་ཕྱག་འཁྱེར་གནང་མེད། ཞི་བདེའི་ཚོགས་འདུ་དེ་ནི་ ༢༠༡༠ ལོར་འཚོགས་རྒྱུའི་འཛམ་གླིང་རྐང་སྤོལ་གྱི་འགྲན་བསྡུར་དེ་ལ་འབྲེལ་ཡོད། ༧གོང་ས་མཆོག་ལ་ཐོངས་མཆན་ཕྱག་འཁྱེར་མ་ཕུལ་བར་བརྟེན་ལྷོ་ཨབ་རི་ཁའི་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་མཁན་པོ་ ཌེ་སུ་མོན་ཌུ་ ཊུ་ཊུ་མཆོག་ Archbishop Desmond Tutu དང་། ལྷོ་ཨབ་རི་ཁའི་སྲིད་འཛིན་ཟུར་པ་སྐུ་ཞབས་ FW de Klerk མཆོག་གཉིས་ཞི་བདེའི་ཚོགས་འདུ་དེར་ཞུགས་རྒྱུ་ཕྱིར་འཐེན་དང་བཅས་ཞི་བདེའི་ཚོགས་འདུ་དེ་དུས་ཚོད་ངེས་མེད་རིང་ཕྱིར་འཐེན་གནང་ཡོད།

སྐབས་དེར་མང་ཚོགས་ཀྱི་ཁོང་ཁྲོ་དང་ཚོར་ཤུགས་ཅི་ཙམ་ཆེ་བར་མ་ལྟོས་པར་ལྷོ་ཨབ་རི་ཁའི་མགྲིན་ཚབ་པ་ Thabo Masebe ཞུ་བས་ད་ནས་འཛམ་གླིང་རྐང་སྤོལ་འགྲན་བསྡུར་གྱི་བར་དེར་༧ཏཱ་ལའི་བླ་མར་ཐོངས་མཆན་ཕྱག་འཁྱེར་འབུལ་རྒྱུ་མིན་ཚུལ་ཡོངས་བསྒྲགས་བྱས་ཡོད།

དེ་ལྟར་ཡང་། གསར་དུ་འོས་བསྡུའི་རྒྱལ་ཁ་ཐོབ་མཁན་སྲིད་འཛིན་ཇཱ་ཁོབ་ ཛུ་མཱ་མཆོག་གིས་བདུན་ཕྲག་འདིའི་ནང་བློན་ཆེན་ལྷན་ཚོགས་ནང་གསར་དུ་བསྐོས་པའི་ལྕམ་ Nkoana-Mashabane མཆོག་གིས་གསར་འགོད་པར། འཛམ་གླིང་གི་མི་སེར་གཞན་དང་འདྲ་བར་༧ཏཱ་ལའི་བླ་མ་མཆོག་ང་ཚོའི་རྒྱལ་ཁབ་ནང་ཕེབས་འདོད་ཡོད་ན་ཁོང་རིགས་ག་དུས་ཕེབས་ནའང་རང་དབང་ཡིན་ཅེས་་གསུངས་ཡོད་པ་རེད།