བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༡༥༥ པའི་སྟེང་གི་རྩོམ་སྒྲིག་པའི་གཏམ།
གནའ་བོའི་དར་ལམ་རིང་མོ་ནས་བརྒྱབས་པའི་མེ་མདའི་གྲག་སྐད་རྣམས་གནས་སྐབས་རིང་ཞི་འཇགས་སུ་ཕྱིན་ཞིང་། མངའ་ཁུལ་དེའི་བརྙན་འཕྲིན་གྱི་ནང་དུ་གདོང་ལ་འཛུམ་གྱིས་ཁེངས་པའི་ཡུ་གུར་བ་དང་རྒྱ་མི་འགས་ཚོས་གཞི་སེར་པོ་ཅན་གྱི་གྱོན་ཆས་གྱོན་ཏེ། ང་ཚོ་ཚང་མ་ཁྱིམ་ཚང་གཅིག་གི་མི་ཡིན། ཞེས་གླུ་དབྱངས་མཉམ་ལེན་བྱེད་ཀྱིན་འདུག འོན་ཀྱང་། ཁྱིམ་ཚང་འདིར་སྔར་ལས་ཀྱང་གྲི་དང་མེ་མདའི་དགོས་མཁོ་ཇེ་ཆེ་ཡིན་ལ། སྲང་ལམ་དུ་འགྲོ་མཁན་སུ་ཡིན་རུང་བདེ་འཇགས་ཀྱི་གོམ་པ་ཞིག་རྒྱག་ཐུབ་གིན་མེད།
ད་སྐབས་ཞིན་ཅང་གི་རྒྱ་མི་རྣམས་ཀྱིས་སོ་སོའི་ཅ་དངོས་རྣམས་བསྡུ་གསོག་རྒྱག་བཞིན་རང་རང་གི་ལུང་པར་ཕྱིར་ལོག་རྒྱུར་བྲེལ་བ་བྱེད་ཀྱིན་པའི་སྒང་ཡིན་ལ། ཁོང་ཚོ་ནི་ཡུ་གུར་བ་རྣམས་ཀྱི་དགྲ་ཤའམ་རོ་སྐྱིན་དུ་འགྲོ་འདོད་མེད་པ་དང་། ཡུལ་འདི་ནི་འཚོ་བ་ལྷོད་པོ་ཞིག་རོལ་ས་མིན་པར་ཤེས་ནས་ཕྱིར་ལོག་གིན་ཡོད། འདི་ནི་ཕྱོགས་གཅིག་ནས་བཤད་ན། རྒྱ་ནག་གིས་གྲངས་ཉུང་མི་རིགས་ལ་བཟུང་བའི་སྲིད་བྱུས་ཀྱི་ནོར་འཁྲུལ་ཁོ་ན་མིན་པར། ཁོང་ཚོས་རྒྱ་རིགས་ཆེན་པོ་རྒྱ་བསྐྱེད་ཀྱིས་མི་སེར་སྤེལ་བའི་སྲིད་བྱུས་དེ་ལམ་ལྷོང་འགྲོ་གིན་མེད་པའི་རྟགས་མཚན་ཞིག་ཀྱང་ཡིན།
རྒྱ་ནག་གཞུང་གིས་ད་ནས་བཟུང་མི་རིགས་ཀྱི་བར་དུ་འགལ་བ་འཕེན་རྒྱུའི་བྱེད་ཐབས་འདི་ཕྱིར་བསྡུ་བྱེད་འོས་ལ། ལྷག་པར་དུ། སྔར་ལོ་དང་ད་ལོའི་ཞི་རྒོལ་དང་ཟིང་ཆར་ཉན་རྗེས་མི་རིགས་ཀྱི་གནད་དོན་ལ་བསྐྱར་ཞིབ་བྱས་ཏེ། བོད་དང་ཡུ་གུར་མི་རིགས་ཀྱིས་གཙོས་པའི་གྲངས་ཉུང་མི་རིགས་རྣམས་ལ་ཡང་དག་པའི་སྲིད་བྱུས་ཤིག་གཏན་འབེབས་བྱེད་པའི་དུས་ལ་བབ་ཡོད།
ཉེ་ཆར་ཡུ་གུར་གྱི་དོན་རྐྱེན་བྱུང་བ་དང་གསར་ལམ་ཁག་ནས་ཞིན་ཅང་དང་བོད་གཉིས་བསྡུར་ནས་གླེང་སྐབས། ཁག་ཅིག་གིས་བོད་དང་ཞིན་ཅང་གཉིས་མཉམ་དུ་གླེང་ན་རྒྱ་ནག་གིས་བོད་པ་ཚོ་ཡང་ཨེལ་ཁེ་ཌ་ལ་འབྲེལ་བ་ཡོད་པར་བཟོ་སྲིད་པ་དང་། ནུབ་ཕྱོགས་པ་ཚོས་བོད་ལ་དགའ་ཞེན་དང་རྒྱབ་སྐྱོར་ཡོད་པ་དེ་ལའང་གནོད་སྲིད་ཅེས་སོགས་རི་བོང་གནམ་རྡིབ་ཀྱི་སེམས་ཁྲལ་བྱེད་མཁན་འདུག བཙན་བྱོལ་བོད་གཞུང་གིས་ཡུ་གུར་བ་ཚོར་གདུང་སེམས་མཉམ་སྐྱེད་ཀྱི་གསུང་འཕྲིན་ཡང་བསྐུར་མེད། ལངས་ཕྱོགས་འདི་དག་ནི་རང་ཉིད་ལ་གདེང་ཚོད་མེད་པའི་མངོན་རྟགས་ཤིག་ཏུ་མཐོང་།
དེ་བས་བཙན་བྱོལ་བོད་གཞུང་དང་རྒྱལ་སྤྱིའི་སྤྱི་ཚོགས་ཀྱིས་ཀྱང་སྐབས་འདི་དང་བསྟུན་ནས་སླར་ཡང་པེ་ཅིན་ལ་གྲངས་ཉུང་མི་རིགས་ལ་བཟུང་བའི་སྲིད་བྱུས་ལེགས་བཅོས་བྱ་རྒྱུའི་ཐད་དྲན་བསྐུལ་བྱེད་འོས་ལ། འདི་ལྟར་མུ་མཐུད་ཕྱིན་ཚེ་མ་འོངས་པར་གྲངས་ཉུང་མི་རིགས་རྣམས་སྡེབ་ལངས་བྱེད་སྲིད་པའི་ཉེན་བརྡ་ཡང་གཏོང་མི་ཆོག་པ་མི་འདུག་སྙམ་མོ།།
ཤིན་ཅང་དང་བོད་གཉིས་འདྲ་མི་འདྲ་བཤད་ནས་དོན་མེད་པ་ཤེས་དགོས་པ་ཞིག་རེད།ང་ཚོ་ལ་མཁོ་བ་ནི་རང་ཉིད་ཀྱི་ལས་དོན་ཐལ་དོན་དངོས་ལྡན་པའི་ཐབས་ལམ་ལག་ལྟར་གནང་རྒྱུ་དེ་རེད།རང་གི་མི་རིགས་རང་ཉིད་ཀྱི་རྐང་བས་ཁ་ལ་ལང་ཐུབ་པ་ཇི་ལྟར་བྱེད་དགོས་མིན་དེའི་ཕྱོགས་ལ་བསམ་བློ་གཏོང་དགོས་པ་ཞིག་ཆགས་ཡོད།རང་རང་གི་ངོས་ནས་ནས་པ་གང་ཡོད་སྤྱི་ཚོགས་ཐོག་འདོན་ཐུབ་བྱེད་ཀྱི་དེ་གལ་ཆེ་པོ་ཆགa་འདུག་བསམ་བྱུང་།གཞན་རྒྱལ་ཁབ་འགའ་རེ་ལ་སྐྱབས་བཅོལ་ཡང་རེ་བ་ཁོང་ཚོའི་བསྒྲུབ་མི་ཐུབ་པ་གསལ་པོ་ཡིན་པ་བོད་མི་རེ་རེར་ནས་ངོ་ཤེས་དགོས་པ་ཞིག་ཆགས་འདུག་བསམ་གི་ཡོད།
ངས་བསམ་ན་བོད་དང་ཤིན་ཅང་གཉིས་བསྡུར་ཐབས་མེད་པ་འདྲ།
འུ་ཚོའི་སྔར་ལོའི་ཞི་རྒོལ་ཆེན་མོ་ནི་ཐད་ཀར་ཏང་གི་དམར་པོའི་སྲིད་གཞུང་ལ་ཁ་ཕྱོགས་ནས་དོན་རྐྱེན་དེ་བྱུང་བ་ཞིག་ཀྱང་ཡིན།
དངོས་ནས་མི་ཤེས་ཀི བལྟ་བཞིན་ཉན་བཞིན་སོང་དུས་སེམས་པ་ནི་དངོས་ནས་སྐྱོ་ནི་ཞིག་རེད། སྲིད་གཞུང་ངན་པ་འདིས་ལག་འོག་གི་རྩེད་མོ་རྩེད་བྱེད་གྱུར་བཞིན་པ་དེ་རེད། མི་ལ་མི་རྩིས་བྱེད་མི་ཆོག་པའི་དཀའ་ངལ་འདིས་བོད་དང་ཞིན་ཅང་གཉིས་ཀྱི་གཙོ་བའི་གྲངས་ཉུང་བ་དག་ལ་སྙིང་རེ་རྗེ།
རྩོམ་སྒྲིག་པས་གསུང་བ་བདེན་པ་རེད།