གཟའ་ལྷག་པའི་ཉིན་གྱི་གཞུང་འབྲེལ་མཆོད་འབུལ་སྐབས་སྲིད་སྐྱོང་མཆོག་གིས། ༢༠༡༦ ལོར་བོད་མིའི་སྒྲིག་འཛུཊ་ཀྱིས་གོ་སྒྲིག་འོག་རྡོར་གདན་དུ་དུས་དབང་ཐེངས་ ༣༤ གོ་སྒྲིག་གནང་རྒྱུ་ཡིན་སྐོར་བསྒྲགས་འདུག
ཟླ་འདིའི་ཚེས་ ༢༤ ཉིན་གྱི་ཕྱི་དྲོ་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱིས་གོ་སྒྲིག་འོག དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་བཀའ་ཟུར་ཀིརྟི་རིན་པོ་ཆེ་མཆོག་དབུ་བཞུགས་ཐོག བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་མང་གཙོ་ཀ་བ་གསུམ་གྱི་མཛད་གཙོ་རྣམ་པ་དང་། སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་ཆུང་གཙོས་པའི་སྲི་ཞུ་ལས་བྱེད། བཞུགས་སྒར་ཁུལ་གྱི་མི་མང་དང་སློབ་ཕྲུག་བཅས་འདུ་འཛོམས་ཀྱིས། ཟླ་འདིའི་ཚེས་ ༡༧ ཉིན་བོད་ནང་གི་ཀན་ལྷོ་གཙོད་གྲོང་ཁྱེར་དུ་རང་ལུས་མེར་བསྲེཊ་གནང་མཁན། རང་ལོ་ ༢༢ ཡིན་པ་སློབ་མ་ལྷ་མོ་བཀྲ་ཤིས་ལགས་གཙོས། བོད་བསྟན་སྲིད་དང་མི་རིགས་ཀྱི་ཆེད་རང་ལུས་མེར་བསྲེཊ་གནང་མཁན་འདས་གསོན་ཡོངས་ལ་གདུང་སེམས་མཉམ་སྐྱེད་དང་མྱ་ངན་རྗེས་དྲན་ཆེད་གཞུང་འབྲེལ་མཆོད་འབུལ་སྨོན་ལམ་གནང་ཡོད།
ཉིན་དེར་སྲིད་སྐྱོང་བློ་བཟང་སེང་གེ་མཆོག་གིས་མཆོད་འབུལ་སྨོན་ལམ་དང་འབྲེལ་བའི་གསུང་བཤད་གནང་སྐབས། བོད་མིའི་སྒྲིག་འཛུགས་འཛིན་སྐྱོང་བཀའ་ཤག་གིས་༸གོང་ས་མཆོག་ལ་ཟླ་བ་དགུའི་སྔོན་ཙམ་ནས་གསོལ་འདེབས་ཞུས་པ་ལྟར། ༢༠༡༦ ལོའི་ཟླ་ ༡ ཚེས་ ༡༤ ནས་ ༢༥ བར་༧གོང་ས་མཆོག་གིས་གནས་མཆོག་རྡོ་རྗེ་གདན་དུ་དད་ལྡན་སེར་སྐྱ་མང་ཚོགས་ལ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ སྩལ་རྒྱུའི་བཀའ་བཞེས་བཟང་པོ་ཐོབ་ཡོད་པ་དང་། དེ་ང་ཚོ་ཚང་མས་སྐལ་བ་བཟང་པོ་ཞིག་ཏུ་བརྩི་བཞིན་ཡོད་སྟབས། ད་རེས་བརྒྱུད་ལམ་འདི་བརྒྱུད་ནས་བོད་མི་ཡོངས་དང་ནང་པ་སངས་རྒྱས་པའི་ཆོས་ལ་དད་པ་དང་བརྩི་བཀུར་ཞུ་མཁན་ཡོངས་ཀྱི་མཁྱེན་རྟོག་ཆེད་གསལ་བསྒྲགས་གནང་བ་ཡིན་སྐོར་དང་། དུས་དབང་ཐེངས་ ༣༤ པ་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱིས་གོ་སྒྲིག་གཙོ་འགན་ཞུ་རྒྱུ་དང་། བདེ་སྲུང་བཀའ་བློན་མཆོག་གིས་དབུས་ཚོགས་ཆུང་ཞིག་དམིགས་འཛུགས་ཀྱིས་ལས་གཞི་སྤེལ་རྒྱུ་ཡིན་སྐོར། དད་ལྡན་སྦྱིན་བདག་ཁག་ནས་མཐུན་འགྱུར་གནང་རྒྱུ་ཡིན་སྐོར་བསྒྲགས་ཡོད་པ་མ་ཟད། ༢༠༡༢ ལོའི་ཟླ་ ༡ ནང་༸གོང་ས་མཆོག་གིས་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་བཀའ་དབང་གནང་སྐབས་དད་ལྡན་སེར་སྐྱ་འབུམ་ ༢ ལྷག་ཕེབས་ཡོད་པ་དང་། བོད་ནས་བོད་མི་༨༠༠༠ ནས་ ༡༠༠༠༠ བར་བཅར་ཡོད་ཅེས་སོགས་གསུང་ཡོད་འདུག
ཕྱི་ལོ་ ༢༠༠༩ ལོའི་ཟླ་ ༢ ཚེས་ ༢༧ ཉིན་གྲྭ་བཀྲ་བྷེ་ལགས་ཀྱིས་རང་ལུས་མེར་བསྲེཊ་གནང་བ་ནས་ད་བར་བོད་ནང་བོད་མི་སྐྱ་སེར་ ༡༣༡ རང་ལུས་མེར་བསྲེཊ་ཀྱིས་རྒྱ་གཞུང་གི་དྲག་གནོན་དབང་བསྒྱུར་སྲིད་ཇུས་ལ་ངོ་རྒོལ་གནང་སྟེ། བོད་མི་ ༡༡༣ འདས་གྲོངས་སུ་གྱུར་ཡོད།
གསར་འགོད་པ། དོན་གོ
མཆན། 1