གླིང་ཚའི་ཆུང་མ་སྲིད་སྐྱོང་དང་སྤྱི་འཐུས་ཚོགས་གཙོར་མཇལ།

དེ་རིང་ཉིན་རྒྱབ་བོད་དོན་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་ཀྱི་སྐྱེས་དམན་དང་ཕྲུ་གུ་གཉིས། དེ་བཞིན། གླིང་ཚའི་སྲིང་མོ་ལྷ་མོ་སྐྱིད་གསུམ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དེ་བཞིན། བདེ་སྲུང་བཀའ་བློན་འཕགས་པ་ཚེ་རིང་མཆོག་བཅས་ལ་མཇལ་འཕྲད་གནང་ཡོད།

ལྕམ་སྐུ་ཡཱེལ་ཕཱཧྥིརེ་ལགས་སྲིད་སྐྱོང་མཆོག་དང་སྐར་མ་ ༣ ༠ ཙམ་རིང་བཀའ་མོལ་གནང་སྟེ། ཁོང་མོས་སྲིད་སྐྱོང་མཆོག་ལ་གླིང་ཚ་ཚེ་བརྟན་རྡོ་རྗེའི་སྐོར་གོ་ཐོས་ཡོད་མེད་དང་། བོད་མིའི་སྒྲིག་འཛུགས་ངོས་ནས་དགོངས་པ་བཞེས་ཕྱོགས་གང་ཡིན་པ་སོགས་བཀའ་འདྲི་ཞུས་པའི་ལན་དུ་སྲིད་སྐྱོང་མཆོག་གིས་ང་ཚོས་གླིང་ཚ་ཁོང་རྒྱ་གར་ནང་ཧ་ལམ་མེད་པ་ཞིག་ལ་ངོས་འཛིན་ཞུ་བཞིན་ཡོད་སྐོར་དང་། ཁོང་མ་བུ་གསུམ་ལ་དཀའ་ངལ་ག་རེ་ཡོད་ཀྱང་ང་ཚོར་གསུང་དགོས་པ་དང་། ད་སྔ་བདེ་སྲུང་ལས་ཁུངས་ངོས་ནས་ཨ་མ་སྡོམ་པོ་སྐྱིད་ལགས་སུ་རོགས་རམ་ཕྲན་བུ་རེ་གནང་གི་ཡོད་པ་དང་། མ་འོངས་པར་ཡང་གང་ཐུབ་གནང་ངེས་ཡིན་སྐོར་སོགས་གསུངས་སོང་།

དེའི་རྗེས་ཁོང་མ་སྨད་གསུམ་བོད་མི་མང་སྤྱི་འཐུས་ཚོགས་གཙོ་མཆོག་ལ་མཇལ་ཏེ། གོང་ལྟར་དྲི་བ་དྲིས་ལན་དང་དགོངས་ཚུལ་གསུང་རེས་གནང་ཡོད་པ་དང་། སྐབས་དེར་ཚོགས་གཙོ་མཆོག་གིས་གླིང་ཚ་ཚེ་བརྟན་རྡོ་རྗེ་ལགས་ཀྱི་སེམས་ཤུགས་ལ་རྒྱ་དང་ཆོད་སེམས་སོགས་ཧ་ཅང་ཚད་མཐོན་པོ་ཞིག་ལ་ངོས་འཛིན་ཞུ་བཞིན་པ་དང་། ལྕམ་ཡཱེལ་ཕཱཧྥིརེ་ལགས་ཀྱིས་ཐུགས་ཁྲལ་ཆེན་པོ་མི་གནང་བར། ཤུལ་དུ་ཕྲུ་གུ་གཉིས་ཀྱི་སློབ་སྦྱོང་ཐོག་ཤུགས་བསྐྱོན་ཏེ་བཞུགས་པ་ཡིན་ན། ནམ་ཞིག་ནང་མི་ལྷན་འཛོམས་ཡོང་བར་ཡིད་ཆེས་བྱེད་བཞིན་ཡོད་སྐོར་སོགས་གསུངས་སོང་།

ཕྱི་དྲོའི་ཆུ་ཚོད་ ༤།༣ ༠ སྟེང་བོད་མིའི་སྒྲིག་འཛུགས་བདེ་སྲུང་བཀའ་བློན་འཕགས་པ་ཚེ་རིང་མཆོག་ལ་མཇལ་ཏེ་གོང་ལྟར་བཀའ་མོལ་གནང་ཡོད་ཅིང་། ཐེངས་འདིར་སྲིད་སྐྱོང་དང་སྤྱི་འཐུས་ཚོགས་གཙོ། བདེ་སྲུང་བཀའ་བློན་བཅས་ཐུན་མོང་གིས་བོད་མིའི་སྒྲིག་འཛུགས་ངོས་ནས་གླིང་ཚའི་སྐོར་རྒྱ་གར་གཞུང་དང་མཉམ་འབྲེལ་ཐོག་ད་སྔ་གང་ཐུབ་ཅི་ཐུབ་ཀྱིས་རྩད་གཅོད་གནང་ཡོད་སྐོར་དང་། མ་འོངས་པར་ཡང་མུ་མཐུད་དུ་རྩད་གཅོད་གནང་ངེས་ཡིན་སྐོར་སོགས་གསུངས་སོང་།

གླིང་ཚའི་ཆུང་མ་ལྕམ་ཡཱེལ་ཕཱཧྥིརེ་ལགས་ཟླ་འདིའི་ཚེས་ ༦ ཉིན་ཨི་སི་རེལ་ནས་ཆེད་དུ་དྷ་རམ་ས་ལར་གླིང་ཚའི་ཨ་མ་སྡོམ་པོ་སྐྱིད་ལགས་དང་སྲིང་མོ་ལྷ་མོ་སྐྱིད་གཉིས་ལ་ངོ་ཐུག་པར་ཡོང་བ་ཞིག་ཡིན་པ་དང་། ཕྱི་རྒྱལ་དུ་སྡོད་པའི་བོད་པ་ཁག་ཅིག་གིས་སྣེ་འཁྲིད་ནས་ཞལ་འདེབས་བསྡུས་ཏེ་ཐེངས་འདིའི་འགྲོ་སོང་ཆ་ཚང་ནར་གཏོང་བྱེད་བཞིན་ཡོད་འདུག

གླིང་ཚ་ཚེ་བརྟན་རྡོ་རྗེ་ལགས་ཀྱི་སྐྱེས་དམན་ལྕམ་ཡཱེལ་ཕཱཧྥིརེ་(Yael Pferrer)ལགས་ནི། ཨི་སི་རེལ་ (Israel) རྒྱལ་ཁབ་ཀྱི་རྒྱལ་ས་ (Jerusalem)ཞེས་པར་སྤྱི་ཚོགས་ཞབས་ཞུའི་ཕྱག་ལས་གནང་མཁན་ཞིག་ཡིན་པ་དང་། ཁོང་མོའི་བུ་མོ་ཐར་མ་མཚོ་(Tamari) ད་ལྟ་རང་ལོ་ ༧ དང་། བུ་ཁ་བའི་ལྷ་སྲས་(Ereli)ད་ལྟ་རང་ལོ་ ༤ ཡིན་འདུག

གླིང་ཚ་ཚེ་བརྟན་རྡོ་རྗེ་ལགས་ཐོག་མ་ཕྱི་ལོ་ ༢༠༡༢ ཟླ་ ༣ ཚེས་ ༣ ཉིན་ཨི་སི་རེལ་ནས་ཁོང་མ་སྨད་གསུམ་ལ་ཁ་གྱེས་ཏེ། རྒྱ་གར་ལ་བོད་དོན་ལས་འགུལ་སྤེལ་བར་ཡོང་སྐབས་བུ་མོ་ཐར་མ་མཚོ་རང་ལོ་ ༣ དང་བུ་ཁ་བའི་ལྷ་སྲས་ཟླ་ངོ་ ༦ ལས་སོན་མེད། གླིང་ཚ་ཚེ་བརྟན་རྡོ་རྗེ་ལགས་ཀྱིས་བོད་དོན་ཞི་བའི་གོམ་བགྲོད་གནང་སྟེ་ ༢༠༡༣ ཟླ་ ༦ ཚེས་ ༨ ཉིན་རྒྱ་གར་གྱི་ནུབ་བྷང་གྷིལ་མངའ་སྡེའི་ཀ་ལོན་སྦུག་ནས་བོར་བརླག་ཏུ་ཕྱིན་ཏེ་ད་བར་ལོ་ ༣ དང་ཟླ་ ༣ ལྷག་རིང་གར་སོང་ཆ་མེད་ཆགས་ཡོད་པ་རེད།

འབྲེལ་ཡོད་གསར་གནས།

༡ ༽  གླིང་ཚ་ཚེ་བརྟན་རྡོ་རྗེ་ལགས་ཀྱི་ཆུང་མ་དང་ཕྲུ་གུ་གཉིས་དྷ་རམ་ས་ལར་འབྱོར།

༢ ༽   ཨ་ཕ་བོད་དོན་དུ་བོར་ནས་ལོ་གཉིས་ཕྱིན་ཐལ།