བཙན་བྱོལ་བོད་མིའི་སྤྱི་ཚོགས་ནང་དུ་གློ་ནད་ཕོག་མཁན་གྱི་གྲངས་འབོར་ཉུང་དུ་ཕྱིན་ཡོད་ཀྱང་། གློ་ནད་་ཅན་མང་པོ་ཞིག་ལོ་ ༡༥ ནས་ ༣༠ བར་ཡིན་པས། མི་རིགས་ཞིག་གི་ངོས་ནས་བཤད་ན་དེ་ནི་ཧ་ཅང་ཚབས་ཆེན་ཡིན་ལ། ད་ལྟ་བདེ་ལེགས་སྨན་ཁང་གིས་ཧིན་སྒོར་འབུམ་ལྔ་བརྒྱ་ལྷག་སྤྱད་དེ་ན་ཚ་འདིར་གདོང་ལེན་བྱ་རྒྱུ་ཡིན་འདུག
ཕྱི་ཚེས་ ༣ ཉིན་བོད་གཞུང་བདེ་ལེགས་སྨན་ཁང་ནས་གློ་ནད་ TB ཐད་གསར་འགོད་གསལ་བསྒྲགས་ཤིག་སྤེལ་པར། ཨ་རི་ནས་ཕེབས་པའི་ཆེད་མཁས་པ་རྫོར་བྷ་པ་སི་ཐར（ZORBA PASTER）དང༌། རིས་ཆར་ཌི་ཆས་ཟོན་（RICHARD CHAISSON）རྣམ་གཉིས་ཀྱིས་བཙན་བྱོལ་སྤྱི་ཚོགས་ནང་གློ་ནད་འདི་ཁྱབ་བརྡལ་ཆེ་བ་དང་དེའི་རྒྱུ་རྐྱེན། ནུབ་ཕྱོགས་རྒྱལ་ཁབ་ཁག་དང་བསྡུར་ན་བོད་པའི་སྤྱི་ཚོགས་ལ་ཤུགས་ཆེ་བ། བོད་གཞུང་དང་སྒྲིག་འཛུགས་ཁག མི་དམངས་བཅས་ནས་གློ་ནད་སྔོན་འགོག་བྱེད་ཐབས་ཀྱི་ལསའགུལ་སོགས་ལ་རྒྱབ་སྐྱོར་དང་མཐུན་འགྱུར་གནང་དགོས་པའི་རེ་བ་ནན་ཞུ་བྱས་སོང་ལ། ཁོང་རྣམ་གཉིས་ཕེབས་དོན་ཡང་དཔལ་འབྱོར་གྱི་མཐུན་རྐྱེན་ཁོ་ན་གནང་ཆེད་མ་ཡིན་པར་གློ་ནད་སྨན་བཅོས་ཐད། ཞིབ་འཇུག་གིས་གློ་ནད་སྔོན་འགོག་དང་སྨན་བཅོས་བྱེད་ཕྱོགས་ལ་ཕྱག་ལས་གནང་འཆར་ཡོད་འདུག
ད་ཐེངས་ཁོང་ཚོ་ཆེད་བཅར་གྱིས་༧གོང་ས་མཆོག་ལ་གཟིམ་ཆུང་མཇལ་ཁ་ཞུས་ཏེ་ལས་འགུལ་འདི་ལ་རྒྱབ་སྐྱོར་ཞུ་དགོས་བ་ཞུས་པའི་ལན་དུ་༧གོང་ས་མཆོག་གིས་་རྒྱབ་སྐྱོར་ཤུགས་ཆེན་གནང་་ཡོད་ལ། ཁོང་ཚོ་བཀའ་བློན་ཁྲི་པ་ཟམ་གདོང་རིན་པོ་ཆེ་གཙོ་བྱས་པའི་གཞུང་འབྲེལ་མི་སྣ་དང་ཆོས་ལུགས་ཁག་གི་དབུ་ཁྲིད་བཅས་ཁྱོན་སྡོམ་མི་སྣ་༣༠ལྷག་གི་མདུན་ལ་བཅར་ཏེ་གློ་ནད་སྔོན་འགག་གི་ལས་འགུལ་གང་རུང་ལ་རྒྱབ་སྐྱོར་ཞུ་དགོས་པའི་དགོས་འདུན་བཏོན་པར་ཚང་མས་རྒྱབ་སྐྱོར་ཤུགས་ཆེན་ཐོབ་ཡོད་པ་རེད། ཁོང་གཉིས་ཀྱིས་གསུངས་དོན། གློ་ནད་འདི་སྔོན་འགོག་བྱེད་པར་སྨན་ལ་བསྟེན་དགོས་བ་གལ་ཆེན་པོ་ཡིན་ཡང་དེ་ལས་ཀྱང་གལ་ཆེ་བ་ནི་སྤྱི་ཚོགས་ཀྱི་འཕྲོད་བསྟེན་ལ་ཡིད་གཟབ་དང་སྔོན་འགོག་གི་ལས་འགུལ་སྤེལ་དགོས་པ་དེ་ཡིན། བོད་མི་མང་པོ་ཞིག་ལ་གློ་ནད་ཕོག་དོན་ནི་སྐྱབས་བཅོལ་བ་ཡིན་པའི་སེམས་ཁུར་དང་གྲྭ་ས་དང་སློབ་གྲྭ་ཁག་མང་པོའི་འཚོ་བའི་ཆ་རྐྱེན་བཟང་རྒྱུ་མེད་རྐྱེན་མི་མང་པོ་མཉམ་སྡོད་བྱེད་དགོས་པས་གློ་ནད་འགོས་སླ་བ་སོགས་ལས་འབྱུང་གིན་ཡོད་པ་རེད་ཅེས་གསུངས་བྱུང༌།
བོད་གཞུང་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་ཀྱིས་བདེ་ལེགས་སྨན་ཁང་གི་གློ་ནད་ཐད་གསུངས་དོན། ལོ་སྔོན་མ་ནས་ད་ལོའི་སྤྱི་ཟླ་བརྒྱད་པ་བར་ཨི་ཊ་ལི་ཡི་མངའ་སྡེ་ཅིག་གིས་དངུལ་སྒོར་འབུམ་ ༤༦ལྷག་གི་རོགས་དངུལ་གནང་ཡོད་པ་དེས་ད་ལྟ་བར་ཏུ་གློ་ནད་ཀྱི་དཀའ་ངལ་ཡོད་པའི་མི་དམངས་ལ་ཞབས་འདེགས་གང་ཐུབ་གནང་ཡོད་པ་དང༌། ད་ལོའི་སྤྱི་ཟླ་བརྒྱད་པ་ནས་ཨི་ཊ་ལི་གཞུང་ནས་ཨི་ཊ་ལི་ཕྱི་སྲིད་ལས་ཁུངས་བརྒྱུད་ཧིན་སྒོར་འབུམ་ ༥༥༠ ཡི་རོགས་དངུལ་གནང་འཆར་ཡོད་པས་འདི་ཟླའི་ཚེས་བདུན་ཉིན་ཁོང་དང་འཕྲོད་བསྟེན་བཀའ་བློན་སོགས་ཨི་ཊ་ལི་ལ་ཕེབས་ཏེ་འབྱུང་འགྱུར་གྱི་ལོ་ངོ་གསུམ་གྱི་ལས་འཆར་སོགས་ལ་གྲོས་མོལ་བྱ་རྩིས་ཡོད་འདུག ཁོང་གིས་མུ་མཐུད་གསུངས་དོན། ད་ལྟ་གློ་ནད་ཕོག་མཁན་ཉུང་དུ་ཕྱིན་ཡོད་ཀྱང་ན་ཚ་ཅན་་མང་ཤོས་གཞོན་སྐྱེས་ཡིན་པ་དང་བོད་ཀྱི་སྤྱི་ཚོགས་སུ་འབྱུང་བཞིན་པའི་གློ་ནད་་ཅན་མང་པོ་ཞིག་ལོ་ ༡༥ ནས་ ༣༠ བར་ཡིན་པས། མི་རིགས་ཞིག་གི་ངོས་ནས་བཤད་ན་དེ་ནི་ཧ་ཅང་ཚབས་ཆེན་ཡིན་པར་གསུངས་སོང༌།
རྫོར་བྷ་པ་སི་ཐར་ནི་ཨ་རིའི་བིས་སི་ཁོང་ཟིན་（WISCONSIN）གསོ་རིག་སློབ་གྲྭ་ཆེན་མོའི་དགེ་རྒན་དང་སྤྱི་ཚོགས་འཕྲོད་བསྟེན་ཁང་གི་ཆེད་མཁས་པ་ཡིན་ཞིང༌། ཁོང་གིས་བདེ་ལེགས་སྨན་ཁང་དུ་གྲོགས་པོའི་ཚོགས་པ་ཞེས་བའི་ཚོགས་པ་ཞིག་བཙུགས་ཡོད་པ་དང་ཁོང་ཉིད་དེའི་ཚོགས་གཙོ་ཡིན་པ་མ་ཟད། ཚོགས་མི་ཕལ་ཆེ་བ་ནི་བདེ་ལེགས་སྨན་ཁང་གི་སྨན་པ་ཡིན་འདུག སྐུ་ཞབས་རིས་ཆར་ཌི་ཆས་ཟོན་ནི་ཇོན་སི་ཧོབ་ཁིན（JOHNS HOPKINS）གསོ་རིག་སློབ་གྲ་ཆེན་མོའི་དགེ་རྒན་ཆེན་་མོ་དང་གློ་ནད་ཞིབ་འཇུག་ཚོགས་པ་སོགས་སུ་ཕྱག་ལས་གནང་གིན་ཡོད། ཁོང་ཉིད་རྒྱལ་སྤྱིའི་གློ་ནད་ངོ་རྒོལ་ཚོགས་པ་ཡི་གཙོ་་འཛིན་གཙོ་བོ་ཡང་ཡིན།
སྐབས་དེར་འདི་ག་གསར་ཁང་གི་གསར་འགོད་པས་འབྲེལ་ཡོད་ལས་བྱེད་ལ་ལོ་འདི་འགར་བརྡ་རིམ་ས་ལ་ཁུལ་དུ་གློ་ནད་ཀྱི་གནས་སྟངས་གང་འདྲ་ཡོད་མེད་ཐད་བཅར་འདྲི་བྱེད་པར། གློ་ནད་ཅན་ཕལ་ཆེ་ཤོས་འགོས་ནད་ཡིན་པ་དང་ལོ་རེར་ནད་པའི་གྲངས་འབོར་ལ་འགྱུར་ལྡོག་ཆེན་པོ་འདུག སྤྱི་ལོ་༢༠༠༠ནས་༢༠༠༧བར་ཧི་མ་ཅལ་མངའ་ཁུལ་ནས་བདེ་ལེགས་སྨན་ཁང་ལ་འབྱོར་བའི་བོད་རིགས་གློ་ནད་ཅན་གྱི་གྲངས་འབོར། ༢༠༠༠ལོར་མི་༢༤༢་དང་༢༠༠༡ལོར་མི་༢༠༡། ༢༠༠༢་ལོརམི་༢༥༧། ༢༠༠༣ལོར་མི་༢༦༧། ༢༠༠༤་ལོར་མི་༢༥༤། ༢༠༠༥ལོར་མི་༢༥༨། ༢༠༠༦ལོར་མི་༢༥༡། ༢༠༠༧ ལོརམི་༤༧༩བཅས་ཡིན་ཚུལ་བརྗོད་བྱུང༌། དེའི་ཁྲོད་ནས་མི་གྲངས་༢༩་གློ་ནད་ཀྱིས་འདས་གྲོངས་སུ་གྱུར་ཡོད་འདུག
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།