བུ་ལོན་ནས་ལངས་ཐབས་བྱེད་བཞིན་པའི་ཨི་རག་གཞུང༌།

མཉམ་འབྲེལ་རྒྱལ་ཚོགས་ཀྱི་ཚོགས་གཙོ་སོགས་རྒྱལ་ཁབ་བརྒྱ་ལྷག་གི་ཆེས་མཐོའི་དཔོན་རིགས་ཁག་ཟླ་ ༥ བའི་ནང་སི་ཝིས་ཌན་ནང་མཉམ་འཛོམས་ཀྱིས་ཨི་རག་འཛུགས་སྐྲུན་བསྐྱར་གསོའི་ཐད་གྲོས་མོལ་གནང་ཡོད། ཨ་རིའི་དམག་མིས་ཨི་རག་ལ་བཙན་འཛུལ་བྱས་པ་ནས་བཟུང་དྲག་སྤྱོད་དང་ནང་ཁུལ་འཁྲུག་འཛིང་སོགས་ཀྱིས་རྒྱལ་ཁབ་ཀྱི་རྒྱུ་ནོར་དང་འཛུགས་སྐྲུན་ཐད་ཚབས་ཆེའི་གྱོང་གུད་ཐེབས་ཡོད་ལ། འཛམ་གླིང་ནང་ཨི་རག་ནི་རྡོ་སྣུམ་ཐོན་ཁུངས་ཆེ་ཤོས་གྲས་སུ་ཡོད་ཀྱང་རྒྱལ་ཁབ་གཞན་ལ་སྤྲོད་དགོས་པའི་བུ་ལོན་ནི་ཨ་སྒོར་ཐེར་འབུམ་བདུན་ཅུ་ལྷག་ཟིན་ཡོད། ཚོགས་ཆེན་དེའི་སྟེང་ཨི་རག་གཞུང་གིས་རྒྱལ་ཁབ་ཁག་ལ་ཆད་པའི་བུ་ལོན་དེ་དག་ཆག་ཡངས་གཏོང་རྒྱུ་དང་ཨི་རག་ནང་རྒྱལ་ཁབ་དེ་དག་གི་གཞུང་ཚབ་བསྐྱར་གསོ་ཞུ་རྒྱུའི་འབོད་སྐུལ་ཤུགས་ཆེན་བྱས་ཡོད་ལ། ཉེ་ཆར་ཨི་རག་སྲིད་བློན་ཨ་རབ་ཨེར་མེ་མཉམ་འབྲེལ་རྒྱལ་ཁབ་ལ་གཟིགས་སྐོར་དུ་ཕེབས་པའི་གོ་སྐབས་དང་བསྟུན། ཨ་རབ་ཚོ་ཁག་མཉམ་འབྲེལ་རྒྱལ་ཁབ་ཀྱིས་ཨི་རག་གཞུང་གིས་སྤྲོད་དགོས་པའི་ཨ་སྒོར་ཐེར་འབུམ་༧ལྷག་ཆག་ཡངས་བཏང་ཡོད་པ་མ་ཟད་ཨི་རག་ནང་གཞུང་ཚབ་ཁང་བསྐྱར་གསོ་བྱ་རྒྱུའི་གསལ་བསྒྲགས་ཀྱང་གནང་ཡོད། འདི་ནི་ཨི་རག་དང་ཨ་རི་གཉིས་དགའ་འོས་པའི་དོན་དག་ཞིག་ཡིན་ལ། ཨ་རིའི་དམག་འཐབ་རྗེས་སུ་ཨི་རག་རྒྱབ་སྐྱོར་ཐོབ་ཀྱི་མེད་པར་ཁེར་རྐྱང་དུ་ཕུད་བཞིན་པའི་རྣམ་པ་གསལ་བོར་ཐོན་ཡོད་པས། ཨ་རིའི་ཕྱོགས་ནས་ཨ་རབ་མཐུན་ཕྱོགས་རྒྱལ་ཁབ་ཁག་ལ་ཨི་རན་ནང་གཞུང་ཚབ་བསྐྱར་གསོ་དགོས་པའི་འབོད་སྐུལ་བྱས་ཡོད།