ཆུ་བཞི་སྒང་དྲུག་གི་ཚོགས་ཐོག་ནས་སྤྱི་འཐུས་ཚོགས་གཙོ་ཀརྨ་ཆོས་འཕེལ་ལགས་ཀྱིས་ཚོགས་པ་ཁག་གིས་ཆོས་ཀྱི་བྱེད་སྒོ་རྒྱ་ཆེན་པོ་སྤེལ་ན་རྒྱབ་སྐྱོར་དང་དཔལ་འབྱོར་གྱིས་ཕོངས་མི་སྲིད་པ་དང༌། བོད་རང་དབང་ཤོར་བ་སྔོན་མའི་ལས་རེད་ལ་ཐོབ་རྒྱུ་དེ་ཡང་སྔོན་མའི་ལས་རེད་ཞེས་གསུངས་བྱུང༌།
མདོ་ཁམས་ཆུ་བཞི་སྒང་དྲུག་དབུས་རྒྱུན་ལས་ཀྱིས་ཚེས་ ༡༦ ཉིན་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དབུ་བརྙེས་ནས་མི་ལོ་ཧྲིལ་པོ་ ༥༠ འཁོར་བའི་དུས་དྲན་སྲུང་གཙི་བྱས་ཤིང་། སྐུ་མགྲོན་གཙོ་བོར་སྤྱི་འཐུས་ཚོགས་གཙོ་ཀརྨ་ཆོས་འཕེལ་ལགས་དང་དཔལ་འབྱོར་བཀའ་བློན། ཆོས་རིག་བཀའ་བློན། ཆེས་མཐོའི་ཁྲིམས་ཞིབ་པ་རྣམ་པ། དྲུང་ཆེ་རྣམ་པ་སོགས་དང་ལྷན་དུ་གངས་སྐྱིད་སྤྱི་ཐབ་ཁང་དུ་ཚོགས་ཡོད་པ་རེད། ཆུ་བཞི་སྒང་དྲུག་དབུས་རྒྱུན་ལས་ཁང་གི་ཚོགས་གཞོན་དགེ་བཤེས་གཡུང་དྲུང་རྒྱལ་མཚན་ལགས་ཀྱིས་ཆུ་སྒང་དབུས་རྒྱུན་གྱི་ཡོངས་ཁྱབ་གསལ་བསྒྲགས་སྒྲོག་སྦྱང་བྱས་དོན། ཆུ་སྒང་དང་བླངས་དམག་གི་ལོ་ངོ་ ༥༠ འཁོར་བའི་དུས་དྲན་དང་ཡང་ན་ལོ་རེ་རེ་ལ་དུས་དྲན་སྲུང་གཙི་བྱེད་སྟངས་ཡིན་ན་གཟབ་རྒྱས་གནང་འཆར་ཡོད་ཀྱང་། ད་ཐེངས་བྱུང་བའི་བོད་ཀྱི་གནད་དོན་འདིའི་ཆེད་དུ་མཛད་སྒོ་གྲ་རྒྱས་པོ་བྱེད་ཀྱི་མེད་པ་དང་། གལ་ཏེ་མ་འོངས་པར་གནས་སྟངས་ཡག་པོར་གྱུར་ན་སླར་ཡང་གྲ་རྒྱས་པོའི་མཛད་སྒོ་འཚོགས་འཆར་ཡོད་ཚུལ་འགྲེལ་བརྗོད་གནང་སོང་བ་མ་ཟད། མི་རབས་རྗེས་མ་རྣམས་ཀྱིས་རྒན་རབས་བྱས་རྗེས་ཅན་དེ་དག་གི་དམིགས་ཡུལ་གཞིར་བཟུང་གྲུབ་འབྲས་ཐོན་མིན་ཇི་ལྟར་ཡང་མི་རབས་ཀྱི་ལོ་རྒྱུས་ནང་ནག་ཐིག་མ་ཕོག་པར་མཇུག་སྐྱོང་བྱ་རྒྱུའི་འགན་ཆེན་པོ་ཡོད་པར་གསུངས།
ཚོགས་ཐོག་ནས་ཀརྨ་ཆོས་འཕེལ་ལགས་ཀྱིས་སྤྱི་འཐུས་རྒྱུན་ལས་ཀྱི་གསུང་བཤད་དང་བཀའ་སློབ་གནང་ཡོད། ཁོང་གིས་ཆུ་བཞི་སྒང་དྲུག་གིས་བོད་དོན་ལ་སྐུ་སྲོག་ཤོར་བའི་དཔའ་བོ་དཔའ་མོ་ཚོར་གུས་བརྩི་བྱེད་བཞིན་ཡོད་པ་དང་། ༧གོང་ས་མཆོག་ས་མཚམས་བར་བསུ་སྐྱེལ་བྱས་པ་སོགས་རླབས་ཆེན་གྱི་མཛད་རྗེས་མང་པོ་ཡོད་པར་གསུངས་སོང༌། དེ་བཞིན་ཆུ་སྒང་ནི་གཞུང་འབྲེལ་མ་ཡིན་པའི་ཚོགས་པ་ཞིག་ཡིན་ཡང་རྩ་ཁྲིམས་གཞིར་བཟུང་སྒོས་༧གོང་ས་མཆོག་ལ་གློ་སྙིང་མཆིན་གསུམ་སྟོན་བཞིན་ཡོད་པ་དང༌། དེ་ལྟ་བུའི་འདུ་ཤེས་ཀྱང་བོད་མོ་ཚོར་འཇོག་དགོས་པ་མ་ཟད་བོད་ནང་གི་གཞིས་ལུས་མི་དམངས་ཚོར་བློ་ཕམ་སྐྱེས་སུ་མི་འཇུག་ཆེད་ང་ཚོས་འཐེན་ཁྱེར་དང༌། ཆོལ་ཁའི་དབྱེ་འབྱེད་ཀྱི་ཤུགས་རྐྱེན་ཡོད་པའི་ལས་ཀ་སོགས་བྱེད་མི་ཉན་པར་གསུངས།
ཀརྨ་ཆོས་འཕེལ་ལགས་ཀྱིས་མུ་མཐུད་དུ་གསུངས་དོན། ང་སྒེར་གྱི་ངོས་ནས་བཤད་ན་གཞུང་མང་ཛ་དྲག་ཚོགས་པའི་ཚོགས་གཙོ་ཡིན་པ་དང༌། དེའི་ཕྱོགས་ལ་སྤྱི་ཚོགས་ནང་བཤད་ཡམས་ཡོད་པས་ངས་འདིར་ཞུ་འདོད་པ་ནི་གཞུང་མང་ཛ་དྲག་ཚོགས་པས་དམིགས་ཡུལ་གཉིས་ཀྱི་སྒང་ནས་ལས་ཀ་བྱེད་བཞིན་པ་སྟེ། རྒྱ་མིས་བོད་ནང་ལ་དྲག་གནོན་བྱེད་བཞིན་པ་དེ་སྐྱོབ་ཆེད་རྒྱལ་སྤྱི་ལ་འབོད་སྐུལ་ཞུ་བཞིན་པ་དང་། གཞིས་ལུས་མི་དམངས་ཀྱི་ལས་འགུལ་ལ་རྒྱབ་སྐྱོར་བྱེད་རྒྱུ་འདི་གཉིས་ཡིན་ཅེས་འགྲེལ་བརྗོད་གནང་སོང༌། ད་དུང་ཁོང་གིས་གསུངས་དོན། ང་ཚོས་ད་ལྟ་བྱེད་ཐུབ་པ་ནི་ཆོས་ཀྱི་སྒང་ནས་བྱེད་སྒོ་སྤེལ་རྒྱུ་དེ་ཡིན་པ་དང༌། ཆོས་ཕྱོགས་ནས་བྱེད་སྒོ་སྤེལ་ན་རྒྱབ་སྐྱོར་དང་དཔལ་འབྱོར་གྱིས་ཕོངས་མི་སྲིད་པས། ངའི་རེ་བ་ལ་ཆུ་སྒང་དང་ཆོལ་གསུམ་གཅིག་སྒྲིལ་སོགས་གཙོ་བྱས་པའི་གཞུང་འབྲེལ་མིན་པའི་ཚོགས་པ་དག་གིས་ཆོས་ཀྱི་བྱེད་སྒོ་སྤེལ་ན་ལེགས་པ་མ་ཟད། བོད་རང་དབང་ཤོར་བ་སྔོན་མའི་ལས་རེད་བསམ་གྱིན་ཡོད་ལ་ཐོབ་རྒྱུ་དེ་ཡང་སྔོན་མའི་ལས་རེད་བསམ་གྱིན་ཡོད་ཞེས་གསུངས་བྱུང༌།
