ཡུལ་སྐོར་བས་ཁུར་ཡོང་བའི་ནད་རིགས།

ཚེས་ ༢༡ གི་ཕྱི་དྲོ་ཆུ་ཚོད་གསུམ་ཡས་མས་སུ་ངའི་ལས་གྲོགས་ཤིག་གིས་ང་འབོད་གིན་འདུག་ལ།  ཁོས་བཤད་ན་མི་ཞིག་གིས་ང་རང་འཚོལ་གི་འདུག་ཟེར།  ཁོང་ནི་ཉི་ཧོང་གི་པར་བ་ཞིག་སྟེ་རང་དབང་གསར་འགོད་པ་ཞིག་རེད་འདུག ཁོས་རང་ཉིད་ངོ་སྤྲོད་མདོར་བསྡུས་ཤིག་བྱས་རྗེས་མིང་བྱང་ཞིག་ང་ལ་སྤྲོད་བཞིན་བཅར་འདྲི་ཞིག་དང་ལེན་བྱེད་ཐུབ་མིན་དྲིས་བྱུང༌། སྤྱི་རབཏང་ནུབ་གླིང་གི་འགྲོ་སྟངས་ཡིན་ན་བཅར་འདྲི་བྱེད་སྐབས་ཆུ་ཚོད་ག་ཚོད་དང༌།  དེ་ལ་དཔག་པའི་རིན་གོང་སོགས་བཅར་འདྲི་མ་བྱས་སྔོན་དུ་གླེང་སྲོལ་ཡོད་མོད། ཡིན་ན་ཡང་འདི་རུ་དེ་འདྲའི་ལུགས་སྲོལ་མེད་པར་བོད་མི་ཚོས་བཅར་འདྲི་དང་ལེན་བྱེད་རྐྱང་བྱེད་བཞིན་ཡོད་པས། ངས་ཀྱང་ཕྱི་དྲོ་ལས་ཁུངས་གྲོལ་རྗེས་བཅར་འདྲི་དང་ལེན་བྱེད་རྒྱུ་བྱས།

དེ་རིང་གཟའ་ཟླ་བ་ཡིན་ལ་མར་མེ་ཁྲོམ་སྐོར་གྱི་ཉིན་ཡིན་པས་ཁྲོམ་ལམ་དུ་མི་དེ་འདྲའི་མང་པོ་མཐོང་རྒྱུ་མི་འདུག   ངས་ཁཱོ་ཧྥི་འཐུང་ས་ཞིག་ནས་གསར་འགོད་པ་དེར་སྒུག་ལ།  གསར་འགོད་པ་དེ་སྐར་མ་བདུན་བརྒྱད་ཙམ་གྱིས་རྗེས་ལུས་ཐེབས་སོང༌། འདི་ཡང་ཨེ་ཤ་ཡ་གླིང་གི་མི་རིགས་སྤྱི་ལ་ཡོད་པའི་གོམས་གཤིས་ཡིན་པར་སྣང༌། 

ཁོས་ངའི་མི་ཚེ་ཡི་རྒྱུད་རིམ་དང༌། བོད་ཕྱི་ནང་གི་འཚོ་བ་དང་རིག་གནས་ཀྱི་ལྟ་བའི་ཁྱད་པར། མིའི་བསམ་བློ་དང་སྤྱི་ཚོགས་ཀྱི་ཁྱད་པར། མི་དམངས་དང་གཞུང་གི་ལངས་ཕྱོགས་ཀྱི་འབྲེལ་བ། ལོ་རྒྱུས་ཁྲོད་ཀྱི་བོད་ཀྱི་བུད་མེད་དང་བོད་ཕྱི་ནང་གི་བུད་མེད་ཚོའི་གནས་སྟངས་ཀྱི་ཁྱད་པར། སློབ་གསོའི་ཁ་ཕྱོགས་ཀྱི་ཁྱད་པར་སོགས་རེ་རེ་བཞིན་དྲིས་བྱུང༌།  ཁོས་གློ་བུར་ཏུ་ང་ལ་ལྡི་ལི་དང་རྡ་སའི་ཁྲོམ་བར་དུ་བོད་རིགས་བུད་མེད་གཞང་བཙོང་མ་དང༌། ཐ་མག་ནག་པོ་དང་སྨན་རིགས་འདྲ་མིན་སྤྱོད་ཀྱིན་པའི་གཞོན་སྐྱེས་ཁ་ཤས་ཀྱང་མཐོང་ཐོས་བྱུང་བའི་ཐད་ལ་བསམ་ཚུལ་དྲིས་བྱུང༌། ངས་གཞི་ནས་འདི་དག་ནི་བོད་པའི་སྤྱི་ཚོགས་ཀྱི་འཕྲོད་བསྟེན་དང་འབྲེལ་བའི་གནད་དོན་གལ་ཆེན་ཅིག་གི་ངེས་ཤེས་འོག     ཁོ་དང་ལྷན་དུ་འདིའི་ཐད་ལ་གླེང་མོལ་བྱས་པ་ཡིན། ཁོས་ང་ལ་བརྗོད་དོན། འདི་ནི་བོད་ཀྱི་སྤྱི་ཚོགས་ཀྱི་བདེ་འཇགས་དང་འཕྲོད་བསྟེན་ལ་འབྲེལ་བ་དམ་ཟབ་ཡོད་པ་མ་ཟད། འཛམ་གླིང་གི་ནད་ཡམས་ཆེན་པོའི་རིགས་ད་དུང་ཆེས་ཆེར་འགོས་མེད་པའི་མི་རིགས་འདི། ད་ལྟ་འཛམ་གླིང་གི་ཆེས་འཇིགས་ཉེན་ཆེ་བའི་ནད་རིགས་གང་མང་འདྲེས་སླ་སའི་སྤྱི་ཚོགས་ཤིག་ཏུ་ཆགས་འདུག འདིར་འབྱོར་བཞིན་པའི་ཕྱི་གླིང་གི་ཡུལ་སྐོར་སྤྲོ་འཆམ་པ་བརྒྱ་ཆ་དྲུག་བཅུ་ཙམ་འཕྲོད་བསྟེན་དང༌། བྱ་སྤྱོད་སོགས་གང་ལྟར་ཚད་ལྡན་གྱི་ལག་ཁྱེར་མེད་པ་ཤ་སྟག་ཡིན་པས་འདིའི་རིགས་ཀྱིས་བོད་པའི་གཞོན་སྐྱེས་ཚོའི་ཀུན་སྤྱོད་དང༌། འཕྲོད་བསྟེན་ལ་ཤུགས་རྐྱེན་ཆེན་པོ་ཐེབས་བཞིན་འདུག དཔེར་ན་བོད་པའི་གཞང་བཙོང་མ་ཚོས་འཕྲོད་བསྟེན་ལ་དོ་སྣང་མི་བྱེད་པར་ལྐོག་ནས་ཡུལ་སྐོར་སྤྲོ་འཆམ་པ་ཚོ་དང་འབྲེལ་བ་བྱེད་བཞིན་པ་དང༌། གཞོན་སྐྱེས་མང་པོ་ཞིག་ལ་ཡུལ་སྐོར་བ་ཚོས་སྨན་རིགས་དང་ཐ་མག་ནག་པོ་འཐེན་རྒྱུ་སོགས་ཀྱི་གོམས་གཤིས་འཇོག་གིན་འདུག ཁྱེད་རང་གསར་འགོད་པ་ཞིག་ཡིན་པ་དང༌། རང་གི་སྤྱི་ཚོགས་ལ་ཤ་ཚ་མཁན་ཞིག་ཡིན་པའི་ཆ་ནས།   རང་གི་སྤྱི་ཚོགས་ཁྲོད་ཀྱི་གནད་དོན་འདི་འདྲའི་སྒང་ལ་རྟོགས་ཞིབ་བྱེད་འོས་པ་ཞིག་རེད། ཅེས་བཤད་བྱུང༌།   ཕྱི་མི་ཞིག་གིས་ང་ཚོ་བོད་པ་ཚོ་གནས་སྡོད་བྱེད་སའི་སྤྱི་ཚོགས་འདི་ལ་འདི་འདྲའི་དོ་ཁུར་དང༌། སེམས་འཚབ་ཀྱིས་བླང་བྱ་འདོན་སྐབས་ང་ལ་རང་བཞིན་གྱིས་སེམས་ཁྲལ་ཞིག་སླེབས་བྱུང༌། དེ་ཡང་བསམ་བློ་ཞིབ་མོར་བཏང་ན་ང་རྡ་ས་དང་ཁ་གྱེས་ཏེ་ལོ་ཁ་ཤས་འགོར་ཡོད་པ་དང་ཕྱིར་ཡོང་ནས་ཀྱང་ཟླ་གཉིས་གསུམ་ལས་འགོར་མེད་པ།  མ་གཞི་རྡ་སའི་སྤྱི་ཚོགས་ལ་རྒྱུས་ལོན་ཆུང་བས་ངའི་མིག་མདུན་དང་རྒྱབ་མདུན་ན་གནད་དོན་མང་པོ་ཅིག་ལྷག་འདུག འདི་ལྟ་བུའི་གནད་དོན་མང་པོ་ཞིག་ལ་ང་ཚོས་ངེས་པར་དུ་ཞིབ་འཇུག་དང་འགན་ལེན་བྱེད་དགོས་པའི་ཚད་ལ་སླེབས་འདུག  ང་ཚོས་མང་པོ་ཞིག་དང་ཆེན་པོ་ཞིག་བཤད་བཞིན་ཆུང་ཆུང་གི་གནད་དོན་མང་པོས་ང་ཚོའི་ཡོད་ཚད་འཐུས་ཤོར་དང་འཇིགས་ཉེན་ལ་འདེད་ཀྱིན་འདུག དེའི་རྐྱེན་གྱིས་འདི་ལྟ་བུའི་གནད་དོན་གྱིས་ང་ཚོ་རང་ཉིད་གནས་སྡོད་བྱེད་སའི་སྤྱི་ཚོགས་ཀྱི་འཕྲོད་བསྟེན་ལ་ཤུགས་རྐྱེན་ག་རེ་ཐེབས་བཞིན་པ་སོགས་ཀྱི་ཐད་ལ་བསམ་ཚུལ་ལྷུག་པོར་བརྗོད་རོགས། 

གསར་འགོད་པ། ཚེ་རིང་སྐྱིད།