དམངས་གཙོ་ནི་ཚང་མར་རྒྱུས་ཆེ་བའི་ཐ་སྙད་ཅིག་ཡིན་སྲིད། འོན་ཀྱང་། གཅིག་སྡུད་རིང་ལུགས་ཀྱི་གཞུང་དང་དམག་མིའི་དབང་བསྒྱུར་བ་དག་གིས་རང་ཉིད་ལ་རྒྱབ་སྐྱོར་རག་ཆེད་དམངས་གཙོ་ཞེས་པའི་དར་ཆ་མཐོན་པོར་འཕྱར་བཞིན་པའི་དུས་སྐབས་འདི་འདྲ་ཞིག་ཏུ། དམངས་གཙོ་ནི་ད་དུང་གོ་བ་ནོར་ཞིང་བེད་སྤྱོད་ལོག་པར་གཏོང་བཞིན་པའི་འདུ་ཤེས་ཤིག་ཡིན། དེ་ལྟར་ཡང་། དམངས་གཙོའི་བསམ་བློ་དག་གིས་ལོ་རྒྱུས་ཐོག་ཆེས་གཏིང་ཟབ་ཅིང་ཡིད་འགུལ་ཐེབས་པའི་འགྲོ་བ་མིའི་རིགས་ཀྱི་རྣམ་དཔྱོད་དང་མངོན་འདོད་ཀྱི་སྨྲ་བརྗོད་དག་འཁྱེར་ཡོང་ཡོད།
འཛམ་གླིང་དག་ཡིག་གི་ནང་དུ། དམངས་གཙོའི་མཚན་ཉིད་ནི། མི་དམངས་ཀྱིས་བཙུགས་པའི་སྲིད་གཞུང་གི་ནང་དུ་བླ་ན་མེད་པའི་དབང་ཤུགས་ནི་མི་དམངས་ལ་ཡོད་ཅིང་། མི་དམངས་ཀྱིས་ཐད་ཀར་རམ། ཡང་ན། རང་དབང་གི་འོས་བསྡུའི་ལམ་ནས་སླེབས་པའི་ཁོང་ཚོའི་འཐུས་ཚབ་བརྒྱུད་གཞུང་གི་ལས་དོན་ལག་བསྟར་བྱེད་པ་ཞིག་ཏུ་འགྲེལ་ཡོད། ཨབ་ར་ཧམ་ལིན་ཁོན་གྱི་གསུང་དུ། དམངས་གཙོ་ནི་མི་དམངས་ཀྱི་ཆེད་དུ། མི་དམངས་ཀྱིས་བཙུགས་པའི། མི་དམངས་ཀྱི་གཞུང་ཞིག་ཡིན་པར་བསྟན་ཡོད།
ནམ་རྒྱུན་དམངས་གཙོ་དང་རང་དབང་གཉིས་ནི་གཅིག་གིས་ཅིག་ཤོས་ཀྱི་ཚབ་ལྟ་བུར་སྤྱོད་ཀྱི་ཡོད། ཡིན་ནའང་འདི་གཉིས་ནི་དོན་གཅིག་མིང་གི་རྣམ་གྲངས་མིན། དམངས་གཙོ་ནི་དོན་དངོས་ཐོག་རང་དབང་གི་སྐོར་གྱི་རྩ་དོན་དང་བསམ་བློའི་རྣམ་གྲངས་ཤིག་ཡིན། དེའི་ཁར། འདིའི་ནང་དུ་ལོ་རྒྱུས་ཀྱི་དུས་ཡུན་རིང་པོ་དང་ནམ་རྒྱུན་ཀྱག་ཀྱོག་གི་ལམ་ནས་བཟོ་སྣོན་བྱས་པའི་ལག་ལེན་དང་བརྒྱུད་རིམ་ཁག་ཀྱང་འདུ། མདོར་བསྡུས་ནས་བཤད་ན། དམངས་གཙོ་ནི་རང་དབང་གི་སྒྲིག་འཛུགས་རང་བཞིན་ཞིག་ཡིན། འདིའི་རྐྱེན་གྱིས། སྤྱི་ཚོགས་གང་ཞིག་གི་ནང་དུ་ཡོད་པའི་སྲིད་གཞུང་གི་གཞི་རྩའི་རྩ་ཁྲིམས་དང་འགྲོ་བ་མིའི་ཐོབ་ཐང་། ཁྲིམས་ཐོག་གི་འདྲ་མཉམ་བཅས་ནི་གོ་དོན་མ་ནོར་བར་དམངས་གཙོ་ངོ་བོར་གནས་རྒྱུ་གལ་ཆེན་པོ་ཡིན།
དམངས་གཙོ་ནི་རྩ་བའི་ཆ་ནས་རིགས་གཉིས་ཀྱི་ནང་དུ་འདུ། ཐད་ཀའི་དམངས་གཙོ་དང་འཐུས་མིའི་དམངས་གཙོ་ཡིན། ཐད་ཀའི་དམངས་གཙོའི་ནང་དུ། འོས་འདེམ་བརྒྱུད་སླེབས་པའམ་བསྐོ་འཇོག་བྱས་པའི་ལས་བྱེད་ཀྱི་བར་འདུམ་མེད་པར་མི་སེར་ཚང་མ་སྤྱི་ཚོགས་ཀྱི་ལས་དོན་ཐག་གཅོད་བྱེད་པའི་ཁྲོད་མཉམ་ཞུགས་བྱེད་ཆོག འདི་ལྟའི་ལམ་ལུགས་ནི་སྤྱི་ཚོགས་ཀྱི་སྒྲིག་འཛུགས་དང་ཚོ་ཁག་གི་ཚོགས་འདུ་ལྟ་བུ། ངལ་རྩོལ་མཐུན་ཚོགས་དང་ས་གནས་མཉམ་ལས་ཀྱི་ཚོགས་མི་དག་ཁང་བ་གཅིག་གི་ནང་འཛོམས་ནས་གྲོས་བྱས་ཤིང་སྤྱི་མོས་དང་མང་མོས་འོས་བསྡུའི་ལམ་ནས་ལས་དོན་ཐག་གཅོད་བྱེད་པ་ལྟ་བུ་མི་འབོར་ཉུང་བའི་རིགས་ལ་མ་གཏོགས་ལག་ལེན་བསྟར་མི་ཐུབ་པ་མངོན་གསལ་ཡིན། གནའ་བོའི་ཨ་ཐན་དུ། འཛམ་གླིང་གི་དམངས་གཙོ་ཐོག་མ་དེ་ཚུགས་སྐབས་མི་ ༥༠༠༠ ནས་ ༦༠༠༠ བར་འཛོམས་ཏེ་ལས་དོན་ཐག་གཅོད་བྱས་པ་རེད།
དེང་དུས་ཀྱི་སྤྱི་ཚོགས་ནི་ཁོའི་རྒྱ་ཁྱོན་དང་དཀའ་རྙོག་སྣ་མང་གི་དབང་གིས་ཐད་ཀའི་དམངས་གཙོའི་ལམ་ནས་ཡོང་ཁག་པར་གྱུར་ཡོད། སྤྱི་ཚོགས་ཕལ་ཆེ་བ་ནི་མུ་མཐུད་དུ་མི་འབོར་ཇེ་མང་དང་རྒྱ་ཆེ་རུ་འགྲོ་གི་ཡོད་སྟབས་ས་གནས་གཅིག་ལ་འཛོམས་ནས་སོ་སོའི་མི་ཚེ་དང་འཚོ་བ་ལ་འབྲེལ་བའི་གནད་དོན་ཐག་གཅོད་པའི་ཕྱིར་ཐད་ཀར་འོས་འཕེན་ཐུབ་རྒྱུའི་གོ་སྐབས་ཇེ་ཕྲར་གྱུར་ཡོད།
ད་སྐབས་རྒྱལ་ཁབ་ཅིག་གི་མི་འབོར་ས་ཡ་ ༥༠ ཡིན་ནའང་འདྲ། གྲོང་བརྡལ་ཞིག་གི་མི་འབོར་ ༥༠༠༠༠ ཡིན་ནའང་འདྲ། འདི་དག་གི་ཡོངས་ཁྱབ་ཀྱི་དམངས་གཙོའི་རྣམ་པ་ནི་འཐུས་མིའི་དམངས་གཙོའི་ལམ་ལུགས་ཡིན། དེར་མི་སེར་རྣམས་ཀྱིས་རང་རང་གི་ངོ་ཚབ་ལས་བྱེད་བདམས་ཤིང་། ངོ་ཚབ་དེས་ཆབ་སྲིད་ཀྱི་ལས་དོན་ཐག་གཅོད་དང་། ཁྲིམས་བཟོ་བ། མང་ཚོགས་ཀྱི་ཆེད་དུ་གཞུང་གི་ལས་རིམ་སྒྲིག་པ་སོགས་བྱེད་ཀྱི་ཡོད།
རང་དབང་ཚེ་རིང་།
