དམངས་གཙོའི་ལམ་ལུགས་གང་དུའང་མི་སེར་ཡོངས་ཀྱིས་རང་དབང་གི་ཆ་ཤས་བླངས་ཏེ་མང་མོས་ཀྱི་ཐོག་ནས་ཆབ་སྲིད་ཀྱི་ལས་དོན་ཐག་གཅོད་ཀྱི་ཡོད། ཡིན་ནའང་མང་སྣའི་དབང་སྒྱུར་ནི་ངེས་པར་དུ་དམངས་གཙོ་ཡིན་པའི་ངེས་པ་མེད། དཔེར་ན། མང་སྣ་ཞེས་པའི་མིང་ཐོག་ནས་མི་བརྒྱ་ཆ་ ༥༡ གིས་ལྷག་འཕྲོས་ཀྱི་བརྒྱ་ཆ་ ༤༩ དེར་གཉའ་གནོན་བྱེད་པ་ནི་སུས་ཀྱང་དམངས་གཙོ་ལ་ངོས་འཛིན་བྱེད་མི་སྲིད། དམངས་གཙོའི་སྤྱི་ཚོགས་ཤིག་ལ་མཚོན་ན། མང་སྣའི་དབང་བསྒྱུར་ནི་གང་ཟག་སྒེར་གྱི་ཐོབ་ཐང་དང་། ཆོས་ལུགས་དང་རིགས་རུས། ཆབ་སྲིད། དེ་བཞིན་ཁྲིམས་དོན་གྱི་རྩོད་གཞི་ཕལ་བ་ཞིག་གི་ཐོག་བགྲོ་གླེང་བྱས་པ་ལས་ཕམ་མཁན་བཅས་ལ་མ་ལྟོས་གྲངས་ཉུང་མང་ཚོགས་ཀྱི་ཐོབ་ཐང་ལ་སྲུང་སྐྱོབ་བྱེད་པ་བཅས་ལ་མཉམ་དུ་སྦྱར་ནས་ཡོང་གི་ཡོད། ཉུང་སྣའི་ཐོབ་ཐང་ནི་མང་སྣའི་མངོན་འདོད་ལ་བསྟུན་མི་དགོས་ལ་མང་སྣའི་འོས་གྲངས་ཀྱིས་རྡོག་རོལ་གཏོང་མི་ཆོག ཉུང་སྣའི་ཐོབ་ཐང་ལ་སྲུང་སྐྱོབ་ཡོད་པ་ནི་དམངས་གཙོའི་ཁྲིམས་དང་སྒྲིག་འཛུགས་ཁག་གིས་མི་སེར་ཡོངས་ཀྱི་ཐོབ་ཐང་འདྲ་མཉམ་གྱིས་སྲུང་སྐྱོབ་བྱས་ཡོད་པའི་དབང་གིས་ཡིན།
ཨ་རིའི་ཤེས་རིག་དྲུང་ཆེའི་ལས་རོགས་སྐུ་ཞབས་ Diane Ravitch ལགས་ནི་ཤེས་ཡོན་པ་དང་རྩོམ་པ་པོ་ཞིག་ཡིན་ལ། ཁོང་གིས་པོ་ལན་ཌིར་ཤེས་ཡོན་སྐོར་གྱི་གཏམ་བཤད་ཅིག་གནང་སྐབས་བརྗོད་དོན། འཐུས་མིའི་དམངས་གཙོའི་ལམ་ལུགས་དེ་རྩ་ཁྲིམས་ཀྱིས་སྲིད་གཞུང་གི་དབང་ཤུགས་ལ་ཚད་འཛིན་ཡོད་ཅིང་། མི་སེར་ཚང་མའི་གཞི་རྩའི་ཐོབ་ཐང་ལ་ཁག་ཐེག་ཡོད་པ་ཞིག་དང་མཉམ་དུ་འཁོར་སྐྱོད་བྱེད་ཀྱི་ཡོད་དུས། སྲིད་གཞུང་འདི་ནི་རྩ་ཁྲིམས་དམངས་གཙོ་ཅན་རེད། འདི་ལྟའི་སྤྱི་ཚོགས་ཤིག་ལ་མཚོན་ན། མང་སྣའི་དབང་བསྒྱུར་དང་ཉུང་སྣའི་ཐོབ་ཐང་ནི་ཁྲིམས་ལུགས་དང་རྩ་ཁྲིམས་ཀྱིས་སྲུང་སྐྱོབ་བྱས་ཡོད་པ་རེད། ཟེར།
ལོ་རྒྱུས་དང་རིག་གཞུང་། དཔལ་འབྱོར་བཅས་ཅི་ཙམ་གྱིས་མི་འདྲ་ནའང་། གྲུབ་ཆ་འདི་དག་གིས་དེང་རབས་དམངས་གཙོའི་གཞི་རྩའི་གྲུབ་ཆ་དག་གི་མཚན་ཉིད་བསྟན་ཡོད། མི་རིགས་དང་སྤྱི་ཚོགས་ཀྱི་ངོ་བོར་མི་འདྲ་ས་ཅི་ཙམ་ཡོད་པར་མ་ལྟོས་པར། རྩ་ཁྲིམས་དམངས་གཙོ་རང་བཞིན་གྱི་གཞི་རྩའི་གྲུབ་ཆ་ཁག་སྟེ། མང་སྣའི་དབང་བསྒྱུར་དེ་མི་སྒེར་དང་ཉུང་སྣའི་ཐོབ་ཐང་དང་། ཁྲིམས་ཀྱི་དབང་སྒྱུར་མཉམ་དུ་སླེབ་པ་ནི་ཨ་རི་དང་། ཁེ་ན་ཌ། ཁོ་སི་ཊ་རི་ཁ། ཧྥ་རན་སི། བྷོ་ཙི་ཝ་ན། ཉི་ཧོང་། རྒྱ་གར་བཅས་གང་དུའང་ཡོད།
