རྒྱ་གཞུང་གིས་བོད་རིགས་ལས་བྱེད་ཚོར་བཙན་བྱོལ་བོད་པའི་སློབ་གྲྭ་དང་དགོན་སྡེ་ཁག་གི་བྱིས་པ་ཚོ་ཕྱིར་འཁྲིད་ཡོང་དགོས་ཞེས་བཙན་བཀའ་བཏང་ཡོད་པ་དེས། བོད་གཞིས་ཀྱི་ཕ་མ་ཚོའི་འཚོ་གནས་ལ་གནོན་ཤུགས་དང༌། བོད་བྱེས་ཀྱི་བུ་ཕྲུག་ཚོའི་སློབ་གཉེར་ལ་འགོག་རྐྱེན་འཕྲད་ཡོད་ཀྱང༌། བཙན་བྱོལ་ནང་གི་བྱིས་པ་ཚོས་ཕྱིར་མེས་རྒྱལ་དུ་ལོག་འདོད་མི་འདུག་ཟེར།
ཉེ་ཆར་བོད་རང་སྐྱོང་ལྗོངས་འབྲེལ་ཡོད་ཚན་པས། གུང་ཁྲན་ཏང་མི་དང་རྒྱལ་ཁབ་ཀྱི་སྤྱི་ཞབས་པའི་བུ་ཕྲུག་བཙན་བྱོལ་ཏཱ་ལའི་རུ་ཚོགས་ཀྱི་སློབ་གྲྭ་དང་དགོན་སྡེ་ཁག་ནས་ཕྱིར་འཁྲིད་ཡོང་དགོས་པའི་བཙན་བཀའ་དང༌། དེ་བཞིན་སྐྱབས་བཅོལ་ནང་བྱིས་པ་ཚོར་ཁ་བྲལ་དང་ལོག་སྤྱོད་ཀྱི་སློབ་གསོ་སྤྲོད་ཀྱིན་ཡོད་ཟེར་པ་སོགས་ཀྱི་ཐད། ཁ་སང་གཟའ་ཕུར་བུའི་ཉིན་འདི་གའི་གསར་འགོད་པ་ཆེད་དུ་དྷ་སྟེང་བོད་ཕྲུག་ཁྱིམ་སྡེ་རུ་སྐྱོད་དེ། བོད་ཁྱིམ་འགན་འཛིན་དང་སློབ་མ་ཚོར་དགོངས་འཆར་ཅི་ཡོད་རྒྱུས་ལོན་བྱས། ཉིན་འདི་འགར་རྒྱ་གར་གྱི་ཆར་དུས་ལ་འཁེལ་ཡོད་པའི་ཁར། དྷ་སྟེང་བོད་ཕྲུག་ཁྱིམ་སྡེ་ནི་ཧི་མ་ལ་ཡའི་རི་རྒྱུད་རྡོ་ལ་རྡར་གྱི་རྫ་སྐེད་དུ་ཆགས་ཡོད་སྟབས། དབྱར་དུས་ཆར་ཞོལ་ཆེ་ཞིང༌། དགུན་དུས་ཁ་ཆར་འབབ་པ་ནི་རྒྱུན་ལྡན་གྱི་སྣང་ཚུལ་ཞིག་ཡིན་པས་མི་རྣམས་ཀྱིས་སུན་སྣང་མི་བྱེད། ཁ་སང་ཞོགས་པ་ང་རང་ས་དེར་འབྱོར་སྐབས་ཀྱང༌། སློབ་གྲྭའི་ཕྱི་ནང་བར་གསུམ་ཀུན་ལ་བོད་པའི་ཁྱིམ་ཚང་དག་གི་བསང་དུད་དང༌། ཨ་མྱེས་རྡོ་ལ་རྡར་གྱི་སྨུག་སྤྲིན་གཉིས་དཀྱིས་གཅིག་ཏུ་འདྲེས་ཏེ། ཁོད་ཡངས་པའི་ཤེས་རིག་གི་ཁོར་ཡུག་དེ་ལ། ཁུ་སིམ་པའི་བསིལ་འཇམ་གྱི་མཁའ་དབུགས་ཤིག་བསྣམས་འདུག
ང་ཞོགས་པ་དེར་ཐད་ཀར་སློབ་གྲྭའི་དབུ་འཛིན་མཆོག་གི་ཡིག་ཚང་དུ་བཅར་སྐབས། དབུ་འཛིན་ཕུན་ཚོགས་རྣམ་རྒྱལ་ལགས་ཀྱིས་གློག་ཀླད་ཅུང་རྙིང་པ་ཞིག་གི་མདུན་དུ་ཅི་ཞིག་བསྔོག་བཤེར་བྱེད་ཀྱིན་འདུག ཐོག་མར་ངས་ཁོ་ལ་འཚམས་འདྲི་དང་སྦྲགས། ཉེ་ཆར་བོད་རང་སྐྱོང་ལྗོངས་འབྲེལ་ཡོད་ཚན་པས། གུང་ཁྲན་ཏང་མི་དང་རྒྱལ་ཁབ་ཀྱི་སྤྱི་ཞབས་པའི་བུ་ཕྲུག་བཙན་བྱོལ་ནང་ཡོད་པ་དག་ཕྱིར་ཁྲིད་ཡོང་དགོས་པའི་བཙན་བཀའ་དང༌། དེ་བཞིན་རྒྱ་གར་ནང་བྱིས་པ་ཚོར་ཁ་བྲལ་དང་ལོག་སྤྱོད་ཀྱི་སློབ་གསོ་སྤྲོད་ཀྱིན་ཡོད་པ་རེད་ཟེར་པ་སོགས་ཀྱི་ཐད། དགོངས་ཚུལ་དང་གྲ་སྒྲིག་ཅི་ཡོད་བཀའ་འདྲི་ཞུས་པར་ཁོང་གིས་བརྗོད་རྒྱུར། ལོ་བཅུ་གྲངས་ཤིག་གི་གོང་དུའང་རྒྱ་ནག་གཞུང་གིས་ཐེམ་ཐོར་ཞིབ་བཤེར་བྱས་མཐར། བཙན་བྱོལ་ནང་གི་བྱིས་པ་ཕོན་ཆེན་ཞིག་ལ་གནས་ཚུལ་དེ་འབྱོར་ཡོད། འོན་ཀྱང༌། དངོས་སུ་ཕ་མ་འདིར་ཡོང་སྟེ་བུ་ཕྲུག་ཕྱིར་འཁྲིད་པ་ཉུང་ཤས་ཡིན། དེ་ལས་ཁག་ཅིག་གིས་ཐེམ་ཐོ་བརྒྱབས་ཏེ་ཕྱིར་རྒྱ་གར་དུ་བཏང་བའང་ཡོད། བོད་ཕྲུག་ཁྱིམ་སྡེའི་ངོས་ནས་བྱིས་པ་ཚོའི་མདུན་ལམ་དང་བདེ་རྩ། མ་འོངས་པར་རང་མགོ་འཐོན་པ་བཟོ་ཐབས་དང༌། བུ་ཕྲུག་ཚོའི་ཕ་མར་ཡང་རྡབ་གསིག་མི་ཡོང་བ་བྱ་རྒྱུ་གལ་ཆེན་དུ་རྩི་བཞིན་ཡོད། འོན་ཀྱང༌། གནས་ཚུལ་འགའ་རེར་ང་ཚོས་གང་ཡང་བྱེད་མ་ཐུབ་པ་དེ་འདྲ་འདུག ཐེངས་འདིར་ཆབ་སྲིད་དང་འབྲེལ་བ་ཡོད་སྟབས། ང་ཚོར་གདམས་ཀ་ཞེ་དྲག་མེད། བུ་ཕྲུག་ཕ་མར་ཤ་ཚ་མེད་མཁན་ཡོད་པ་མ་རེད། སོ་སོའི་ཕ་མར་དཀའ་ངལ་འཕྲད་ན། འདི་གའི་སློབ་གྲྭར་མཐུན་རྐྱེན་ཅི་ཙམ་བཟང་ཡང་བློས་གཏོང་བྱེད་གི་རེད། ང་ཚོའི་ངོས་ནས་གང་ཡོང་ཅི་ཡོང་གིས་བྱིས་པ་ཚོ་ཕྱིར་ལོག་མི་དགོས་པ་ཞིག་ལ་འབད་བརྩོན་བྱེད་ཀྱིན་ཡོད་ཅེས་བརྗོད་བྱུང༌། ཡང་ཁོང་གིས་རྒྱ་ནག་གིས་ཁ་བྲལ་དང་ལོག་སྤྱོད་ཀྱི་སློབ་གསོ་སྤྲོད་ཀྱིན་ཡོད་པ་རེད་ཟེར་བའི་ཐད་བརྗོད་དོན། ང་ཚོ་བོད་ཕྲུག་ཁྱིམ་སྡེ་འོག་གི་སློབ་གྲྭ་དག་ན། ༧གོང་ས་མཆོག་གི་དགོངས་གཞི་ལྟར། དབུ་མའི་ལམ་རྩ་འཛིན་བྱས་ཏེ། སློབ་ཕྲུག་ཚོར་རྒྱ་ནག་དང་ཁ་བྲལ་འདོད་མ་ཡིན་པར་ཞི་བདེ་མཉམ་གནས་ཡོང་ཐབས་ཀྱི་སློབ་གསོ་ཤུགས་ཆེན་སྤྲོད་ཀྱིན་ཡོད་ལ། ཐ་ན་བྱིས་པ་ཚོ་ལས་འགུལ་འདྲ་མིན་ནང་ཞུགས་སྐབས་ཀྱང༌། གཞུང་གི་བཀའ་ཁྱབ་ལས་མ་བརྒལ་བ་བྱེད་ཀྱིན་ཡོད་ཟེར།
དེ་ནས་ང་རང་འཛིན་ཁང་གི་ཕྱོགས་སུ་སོང་སྟེ་དགེ་རྒན་བུ་མོ་ཞིག་ལ། ཁྱེད་ཀྱི་འཛིན་གྲྭར་བོད་ནས་ཡོང་བའི་ཕ་མ་ལས་བྱེད་ཀྱི་བྱིས་པ་ཡོད་མེད་དང༌། ཡོད་ན་བཅར་འདྲི་ཞུ་ཆོག་མིན་དྲིས་པར་མོ་རང་འཛིན་ཁང་དུ་སོང་སྟེ། སློབ་ཕྲུག་ཚོར་ཐེངས་ཁ་ཤས་ལ་དྲིས་ཀྱང་ལན་སྟེར་མཁན་མ་བྱུང་སྟབས། ཕྱིར་ཡོང་སྟེ་ཁྱོད་ནང་དུ་ཕེབས་ཏེ་ཁོ་ཚོར་ཕྲིས་དང་ཟེར། ང་ཁྲིད་སྟེགས་ཀྱི་འཁྲིས་སུ་སོང་སྟེ། སློབ་གྲོགས་ཚོར་འཚམས་འདྲི་ཞིག་དང་མཉམ་དུ་བོད་ནས་ཡོང་བའི་བྱིས་པ་ཚོས་ལག་པ་རྐྱོངས་དང་ཞེས་བཤད་པར། འཛིན་ཁང་དེའི་ནང་བྱིས་པ་ཉི་ཤུ་ཡས་མས་ཡོད་པ་ལས་ ༡༢ ཀྱིས་ལག་པ་བརྐྱངས་སོང༌། ཡང་ཕ་མ་ལྷ་སར་ལས་བྱེད་ཡིན་པ་དེ་ཚོས་ལག་པ་རྐྱོངས་དང་ཞེས་བཤད་པར་ལག་པ་རྐྱོང་མཁན་གཅིག་ཀྱང་མ་བྱུང༌། དེ་ནས་ང་ཡོང་དོན་རགས་ཙམ་བཤད་རྗེས། གནས་ཚུལ་འདི་གོ་མྱོང་མཁན་ཡོད་མེད་དྲིས་པར་བུ་མོ་ཞིག་ཡར་ལངས་ཏེ། ངའི་གཉེན་ཉེ་ཞིག་སུ་ཇ་སློབ་གྲྭར་ཡོད་ལ། དེར་གནས་ཚུལ་འདི་འདྲ་ཞིེག་འབྱོར་ཡོད་པའི་སྐད་ཆ་འདུག་ཟེར།
དེ་ནས་ང་རང་འཛིན་ཁང་གཞན་ཞིག་གི་དགེ་རྒན་གྱི་གམ་དུ་སོང་སྟེ། སྔར་བཞིན་སྐད་ཆ་དྲིས་པར་ཁོས་སློབ་ཕྲུག་ཅིག་ཕྱི་ལ་སྐད་བཏང་སོང༌། ངས་ཁོ་ལ་མིང་དང་ཕ་མའི་ལས་ཀ་ཅི་ཡིན་ནས་མགོ་འཛུགས་ཀྱིས་གོང་གི་གནད་དོན་ཐད་བཅར་འདྲི་བྱས་པར་ཁོས། ངའི་ཨ་ཕ་ལྷ་སར་དགེ་རྒན་བྱེད་ཀྱིན་ཡོད་ཀྱང་གནས་ཚུལ་འདི་འདྲ་གང་ཡང་འབྱོར་མ་སོང༌། གལ་ཏེ་འབྱོར་ཡང་དང་ལེན་བྱ་ཁག་པོ་རེད། ཕྱིར་བོད་ནང་སོང་ན་གནས་ཚུལ་ཅི་འབྱུང་མི་ཤེས་ལ། རྒྱ་གར་ལྟ་བུའི་སློབ་སྦྱོང་གི་གོ་སྐབས་དང༌། སློབ་གྲྭ་འཐོན་རྗེས་ལས་ཀ་ཡང་ཁག་པོ་རེད། ངས་འཛིན་རིམ་དྲུག་པའི་བར་བོད་ནས་སློབ་སྦྱོང་བྱས་པ་ཡིན། དེ་དུས་ཤེས་ཡོན་གང་ཡང་འབྱོར་མ་སོང༌། ཐེངས་ཁ་ཤས་ལ་སློབ་གྲྭ་ནས་འགྲོ་དགོས་དྲན་མྱོང་ཟེར། ཡང་ཁོང་ལ་གལ་སྲིད་ནང་མི་ཁྱེད་རང་ལེན་དུ་ཡོང་ན་ཅི་བྱེད་རྒྱུ་ཡིན་ཞེས་དྲིས་པར་ཁོས། ངས་ནང་མི་ཚོར་ང་དང་ནང་མིའི་བར་འབྲེལ་བ་ཆད་ཡོད་ཅེས་རྒྱ་གཞུང་ལ་ཤོད་ཅེས་ལབ་ས་རེད། སེམས་ནང་ཕྱིར་ལོག་དགོས་དྲན་ཡང༌། སོ་སོའི་གནས་སྟངས་ལའང་བལྟ་དགོས། ངར་མཚོན་ན་འཛིན་རིམ་བཅུ་གཉིས་འཐོན་གྲབས་ཡོད་པས། ཕྱོགས་གཉིས་ཀའི་གནས་ཚུལ་ལ་བསམ་བློ་གཏོང་དགོས་ཟེར།
ཡང་འཛིན་གྲྭ་དེའི་ནང་གི་བུ་མོ་ཞིག་ལ་གནད་དོན་འདིའི་ཐད་བསམ་ཚུལ་ཅི་ཡོད་དང༌། རྒྱ་གཞུང་གིས་སྐྱབས་བཅོལ་བོད་པར་ཆ་རྐྱེན་དང༌། སློབ་སྦྱོང་བྱེད་ས་ཡག་པོ་ཡོད་པ་མ་རེད་ཟེར་གྱིན་ཡོད་པས། ཁྱོད་ཚོ་སློབ་གྲྭའི་ཆ་རྐྱེན་དང་ཤེས་ཡོན་སྤྲོད་སྟངས་ལ་འདོད་པ་ཚིམ་གྱིན་འདུག་གམ་ཞེས་དྲིས་པར་ཁོ་མོས། གནས་ཚུལ་དེ་ཐོག་མ་ཨ་རིའི་རླུང་འཕྲིན་བརྒྱུད་དེ་ཐོས་སྐབས་ཞེད་སྣང་སྐྱེས་སོང༌། ང་བོད་ནས་འཛིན་རིམ་གསུམ་པ་བར་སོང་མྱོང༌། ང་སྔོན་མ་འགྲོ་སའི་སློབ་གྲྭ་དང་ད་ལྟའི་སློབ་གྲྭ་འདི་གཉིས་ལས། མཐུན་རྐྱེན་དང་ཤེས་ཡོན་སྤྲོད་སྟངས། ཕྱོགས་གང་ཐད་ནས་ད་ལྟའི་སློབ་གྲྭ་འདི་ཡག་པོ་འདུག་ཟེར།
མཇུག་མཐར་ང་རང་ཡང་བསྐྱར་སྤྱི་ཁྱབ་ཡིག་ཚང་དུ་སོང་སྟེ། འབྲེལ་མཐུད་པ་ལེགས་བཤད་བསྟན་པ་ལགས་སུ་བོད་ཕྲུག་ཁྱིམ་སྡེ་འོག་གི་སློབ་ཕྲུག་རེ་ཟུང་ཕ་མས་ཕྱིར་བོས་ཡོད་པའི་སྐད་ཆ་འདུག་པས། དེའི་སྐོར་མཁྱེན་རྟོགས་ཡོད་མེད་དྲིས་པར་ཁོང་གིས། ད་སྔ་བོད་ཕྲུག་ཁྱིམ་སྡེ་འོག་གི་སློབ་གྲྭ་དག་ལ་དེ་འདྲའི་གནས་ཚུལ་གཅིག་ཀྱང་འབྱོར་མ་སོང༌། གལ་ཏེ་དེ་འདྲ་བྱུང་བ་ཡིན་ན། གཙོ་ཆེ་ཤོས་བུ་ཕྲུག་ཚོར་འདོད་པ་ཡོད་མེད་ལ་བལྟ་དགོས་པ་རེད། འཛིན་སྐྱོང་ངོས་ནས་ཀྱང་བགྲོ་གླེང་གོ་བསྡུར་ཡོང་གི་རེད། ཉིན་འདི་འགར་བོད་དུ་ལོག་མཁན་སློབ་ཕྲུག་རེ་ཟུང་འདུག་ཀྱང༌། ཁོ་ཚོ་འགྲོ་ཁར་སྐད་ཆ་དྲིས་པར་རྒྱ་ནག་གི་སྲིད་ཇུས་དེའི་འོག་ནས་ཕ་མས་སྐད་བཏང་བ་དེ་འདྲ་མིན་པ་འདྲ་ཅེས་བརྗོད་བྱུང༌།
ངས་བལྟས་ན་བོད་གཞུང་ལ་ནུས་པ་ཡོད་པ་མ་རེད་བསམ། གཙོ་བོ་བྱིས་པ་དང་ཕ་མ་ཚོར་ཐུག་འདུག སྔོན་མ་སྐད་གཏོང་སྐབས་ཀྱང་ལྷ་སར་ཡོད་པའི་ཕ་མ་ཚོ་འབྲེལ་ཡོད་ལས་ཁུངས་ཁག་ལ་སོང་ནས་བྱིས་པ་ཚོ་ཚུར་ཁྲིད་ཡོང་ཆོག ཡིན་ནའང་ཕར་ཕྱོགས་ནས་སློབ་སྦྱོང་གི་མཐུན་རྐྱེན་ཅི་ཞིག་རག་གི་ཡོད་པ་དེ་འདི་ནས་ཀྱང་རག་དགོས་ཀྱི་ཡོད་ཅེས་བཤད་པར་བརྟེན་ཁུ་སིམ་མེར་གྱུར་བ་རེད། འདི་ནི་ཐབས་ཤེས་ཡག་པོ་ཞིག་རེད། དེ་བཞིན་བྱིས་པ་ཚོའི་ངོས་ནས་ཀྱང་ད་རེབ་པེ་ཅིན་ལ་ལན་གང་འཚམ་ཞིག་སྤྲད་འདུག་ག ངོ་མ་བཤད་ན། འཛམ་གླིང་མི་དམངས་ཀྱིས་ཐོས་པར་བྱས་ཏེ་འདི་ལས་ལྷག་པའི་ཉེས་འགེལ་ཞིག་ཕར་བྱས་ཆོག་གི་རེད། བྱིས་པ་ཚོར་ཆབ་སྲིད་ཀྱི་ལོ་ཚོད་སྨིན་མི་འདུག་ག དེའི་ཁར་རྒྱ་ནག་གིས་ད་དུང་ཚུར་བྱིས་པ་ཚོའི་དཔྲལ་བ་ལ་ཏཱ་ལའི་རུ་ཚོགས་ཀྱི་མིང་བྲིས་ནས་གླེང་གི་འདུག འདི་ལྟར་གླེང་ཆོག་གི་ཡོད་ན། གནད་དོན་འདིའི་རིགས་ཆབ་སྲིད་ལས་ཀྱང་སློབ་གསོ་དང་བྱིས་པའི་ཐོབ་ཐང་གི་ཐོག་ནས་གླེང་ན་ཡག་གི་རེད་འདོད།
གལ་སྲིད་མེས་རྒྱལ་ཞེས་ལབ་ཀྱི་ཡོད་ན། ལོག་དགོས་ཀྱི་རེད་མ་གཏོགས་ཉེས་ཅན་པ་རང་ཡིན་པ་མཁྱེན་གསལ་རེད། བོད་གཞུང་ལ་ག་རེ་གསུང་རྒྱུ་འདུག་གམ། བཀའ་ཁྲི་དབུས་མ་སླེབས་གོང་ནས་དབུས་སྲིད་གཞུང་ཞེས་མགོ་འདོགས་ཞུས་ཚར་བ་མིན་ནམ།
འདི་བྱིས་པ་དང་ཕ་མ་ཚོའི་ཆོད་སེམས་དང་བཟོད་བསྲན་གྱི་གནད་དོན་ཙམ་མ་རེད་ལ། སློབ་གྲྭ་དང་སློབ་ཕྲུག་གི་གནད་དོན་ཙམ་ཡང་མ་རེད། འདི་ཆབ་སྲིད་དང་འབྲེལ་བ་ཆགས་ཡོད་སྟབས་བོད་གཞུང་གིས་ཀྱང་གསུང་ཞིག་གནང་དགོས་པར་འདོད།
བྱིས་པ་ཚོར་ཅི་འདྲའི་ཆོད་སེམས་ཞིག་འདུག ཡིན་ནའང་ཕ་མ་ཚོར་དེ་འདྲའི་བཟོད་བསྲན་ཅིག་ཨེ་ཡོད་བསམ་གི།
མ་གཞི་སློབ་ཕྲུག་ཚོས་ལན་ཡག་པོ་བསྐྱོན་འདུག
ཡིན་ན་འང་། སློབ་ཕྲུག་དེ་ཚོས་དོན་དངོས་ཀྱི་བོད་དོན་ལ་བློ་ཁ་ཕྱོགས་ཀྱིན་ཡོད་ན།
མ་འོངས་པར་བོད་སྐད་ཡིག་གི་དུར་འདེབས་པ་མི་ཆགས་པར་མཁྱེན།