དྲ་རྒྱའི་སྟངས་འཛིན།

ཕྱི་ཚེས་ ༢༨ ཉིན་ངས་ཟི་ལིང་ན་ཡོད་པའི་གྲོགས་པོ་ཞིག་དང་མཉམ་དུ་སྐད་ཆ་བཤད་སྐབས། ཁོས་བོད་ཀྱི་དུས་བབ་དྲ་རྒྱ་ཁ་ཕྱེ་ཐུབ་ཀྱི་མི་འདུག་ཟེར། དེ་བཞིན་བཙན་བྱོལ་ནང་གི་དྲ་བྱང་ཁག་ཅིག་སྤྲད་མོད། དེ་དག་གི་གཅིག་ཀྱང་ཁ་ཕྱེ་ཐུབ་ཀྱི་མི་འདུག་ཟེར།

རྒྱ་ནག་གིས་བདུན་ཕྲག་གཅིག་གི་རྗེས་ནས་ཨོ་ལིམ་པིག་རྩེད་འགྲན་དེ་སྐོང་གི་ཡོད་ལ། སྐབས་འདིར་ཁོང་ཚོས་བོད་ཀྱི་ས་ཁུལ་ཁག་ཡོངས་སུ་སྒོ་བརྒྱབས་པ་དང་། གནས་ཚུལ་གྱི་བརྒྱུད་ལམ་ཕལ་ཆེ་བ་བཀག་ཡོད་པ་རེད། འདིའི་རྐྱེན་གྱིས་ད་སྐབས་རྒྱ་ནག་ལ་སྐྱོན་བརྗོད་རིམ་པར་བྱེད་ཀྱིན་ནང་གི་གལ་ཆེ་ཤོས་གཅིག་ནི་སྨྲ་བརྗོད་རང་དབང་དང་། གནས་ཚུལ་ཤེས་རྟོགས་ཀྱི་རང་དབང་ཡིན།

འདི་ལྟའི་སྐྱོན་བརྗོད་དང་གནོན་ཤུགས་ཀྱི་འོག་ནས་ད་སྐབས་རྒྱ་ནག་ནང་གི་དྲ་རྒྱའི་འགོག་སྡོམ་དེ་ཅུང་ཇེ་ལྷོད་དུ་བཏང་ཡོད་ཚུལ་འདུག ཕྱི་ཚེས་ ༣༡ ཉིན་ཨོ་ལིམ་པིག་རྩེད་འགྲན་ཚོགས་ཆུང་གི་མགོ་ཁྲིད་ཚོ་དང་རྒྱ་ནག་གི་འབྲེལ་ཡོད་དཔོན་རིགས་ཚོས་གྲོས་མོལ་བྱས་མཐར། རྒྱ་ནག་གིས་དྲ་རྒྱའི་འགོག་སྡོམ་ཇེ་ལྷོད་དུ་གཏོང་གི་ཡིན་པའི་ཁས་ལེན་བྱས་ཡོད་ཅིང་། ད་ཆར་གསར་འགོད་པ་དག་གིས་རྒྱལ་སྤྱིའི་ཉེས་ཡངས་ཚོགས་པ་དང་། འགྲོ་བ་མིའི་ཐོབ་ཐང་ལྟ་རྟོགས་ཚོགས་པ། བྷི་བྷི་སི་ཡི་རྒྱ་སྐད་སྡེ་ཚན་བཅས་བརྒྱུད་ནས་གནས་ཚུལ་བསྡུ་ལེན་བྱེད་ཐུབ་གི་ཡོད་འདུག

རྒྱ་ནག་གི་པེ་ཅིན་ཨོ་ལིམ་པིག་རྩེད་འགྲན་གོ་སྒྲིག་ཚོགས་ཆུང་གི་མགྲིན་ཚབ་པ་ སན་ཝེ་ཏུག་ གིས་བརྗོད་དོན། པེ་ཅིན་གྱི་ཚོགས་ཆུང་གིས་ཨོ་ལིམ་པིག་རྩེད་འགྲན་ཚོགས་ཆུང་ལ་གནས་ཚུལ་གྱི་བརྒྱུད་ལམ་འདང་ངེས་གཏོང་གི་ཡིན་པའི་ཁས་ལེན་བྱས་པ་ཚིག་དོན་ལ་གནས་པར་བྱེད་ཀྱི་ཡིན་ལ། ད་ལྟ་གསར་འགོད་པ་དག་གིས་གནས་ཚུལ་བསྡུ་ལེན་བྱེད་པ་ལ་དྲ་རྒྱ་མཐུན་རྐྱེན་ཚ་ཚང་བར་སྦྱར་ཡོད་ཅེས་བཤད་ཡོད་པ་རེད།
ཕྱི་ཟླ་བདུན་པའི་ཚེས་ ༡༧ ཉིན་ཨོ་ལིམ་པིག་རྩེད་འགྲན་ཚོགས་ཆུང་གི་ཚོགས་གཙོ་ཇག་ཁེ་སུ་ རོག་གྷེ་ ཡིས་པེ་ཅིན་གྱི་ཨོ་ལིམ་པིག་རྩེད་འགྲན་སྐབས་སུ་དྲ་རྒྱ་ལ་འགོག་སྡོམ་བྱེད་གི་མ་རེད་ཅེས་གསུངས་ཡོད་པ་རེད། ཡིན་ནའང་། བདུན་ཕྲག་འདིའི་མགོ་སྟོད་དུ། རྒྱ་ནག་གཞུང་གིས་རྒྱལ་སྤྱིའི་ཉེས་ཡངས་ཚོགས་པ་དང་། དྲ་བྱང་གི་ནང་དུ་ tibet ཞེས་བོད་མིང་འའཁོད་ཚད་འགོག་སྡོམ་བྱེད་རྒྱུ་ཐག་བཅད་ཡོད་པ་རེད། རྒྱ་ནག་གིས་བཤད་ན། དྲ་ཚིགས་འདི་དག་གིས་སྲིད་དོན་གྱི་སྐུལ་སློང་ཡོད་པའི་གནས་ཚུལ་འཁོད་ཀྱི་ཡོད་ཟེར།
ད་སྐབས་དྲ་ཚིགས་འགོག་སྡོམ་ཅུང་ཇེ་ལྷོད་དུ་བཏང་ཡོད་ནའང་། བོད་རང་དབང་སྟེ། Free Tibet སོགས་འཁོད་པའི་དྲ་ཚིགས་རིགས་མུ་མཐུད་དུ་བཀག་འདུག་ཟེར།

ཕྱི་ཚེས་ ༡ ཉིན་ཧུའུ་ཅིན་ཐའོ་ཡིས་ཐེངས་དང་པོར་པེ་ཅིན་ནས་ཕྱི་རྒྱལ་གྱིས་གསར་འགོད་པ་ཐུག་འཕྲད་བྱས་ཏེ། ང་ཚོའི་རེ་བ་ལ་ཁྱེད་ཚོས་འདི་ནས་ཅི་ཞིག་གསལ་བོར་མཐོང་བ་དེ་དག་ཡང་དག་པ་དང་མ་ནོར་བཀོད་དེ། རྒྱ་ནག་མི་དམངས་དང་འཛམ་གླིང་མི་དམངས་བར་གྱི་འབྲེལ་བ་དང་གོ་རྟོགས་ཡར་རྒྱས་གཏོང་རྒྱུའི་རེ་བ་བྱེད་ཀྱི་ཡོད། ཅེས་བརྗོད་ཡོད་པ་རེད།

ཧུའུ་ཅིན་ཐའོ་གློ་བུར་དུ་ཕྱི་རྒྱལ་གྱི་གསར་འགོད་པ་དག་ལ་ཐུག་པ་འདི་ནི་འདས་པའི་ལོ་དྲུག་གི་རིང་། ཁོས་པེ་ཅིན་ནས་ཕྱི་རྒྱལ་གྱི་གསར་འགོད་པར་ཐུག་འཕྲད་བྱས་པ་ཐེངས་དང་པོ་ཆགས་ཡོད་འདུག ཡིན་ནའང་ཁོས་གསར་ཁང་ ༢༥ ཡི་གསར་འགོད་པར་ཐུག་ཡོད་ནའང་། ནེའུ་ཡོག་དུས་བབ་ཀྱི་གསར་འགོད་པ་སོགས་དེའི་ནང་ཚུད་མེད་ལ། རྗེས་སུ་སྐད་ཆ་དྲིས་སྐབས་ལས་དོན་ལ་བྲེལ་བའི་དབང་གིས་ཁོང་ཚོ་དུས་ཐོག་ཏུ་སྐད་གཏོང་ཐུབ་མ་སོང་ཞེས་བརྗོད་ཡོད་འདུག

ད་ཆར་རྒྱ་ནག་གིས་དྲ་ཚིགས་ཁག་འགའ་སྒོ་ཕྱེ་རུ་བཅུག་པ་དེ་པེ་ཅིན་གཅིག་པུ་ཡིན་མིན་དང་། བོད་དང་རྒྱ་ནག་གི་ཞིང་ཆེན་གཞན་པ་ཚང་མའི་ནང་སྒོ་ཕྱེ་ཡོད་མེད་གསལ་ཁ་བཏོད་མི་འདུག