འགྲོ་བ་མིའི་ཐོབ་ཐང་ཆེད་གཟེངས་རྟགས་ཕུལ་བ།

པེ་ཅིང་ཨོ་ལིམ་པིག་རྩེད་འགྲན་སླེབས་ལ་ཉེ་སྐབས་འདིར། ནེའུ་ཛི་ལན་ཌི་ནས་ཨ་རིའི་བར་གྱི་ཤར་ཨེ་ཤ་ཡའི་འགྲོ་བ་མིའི་ཐོབ་ཐང་ལྷན་ཚོགས་ནས་ཐེངས་གསུམ་པའི་འགྲོ་བ་མིའི་ཐོབ་ཐང་དོན་གཉེར་བ་རྣམས་ལ་གཟེངས་རྟགས་འབུལ་བའི་མཛད་སྒོ་དེ། ཟླ་ ༨ པའི་ཚེས་ ༢ ཉིན་ཨ་རིའི་ཁ་ལེ་ཧྥོར་ནི་ཡའི་མངའ་སྡེ་ས་ཁུལ་གྱི་ལོ་སི་ཨན་ཇི་ལི་རུ་འཚོགས་ཡོད་འདུག  ༧གོང་ས་མཆོག་གཙོས།  ཝེ་ཅིན་ཧྲིན་དང༌། ཨ་རིའི་གྲོས་ཚོགས་ཀྱི་ཚོགས་མི་ལའོ་ལཱ་པཱ་ཁུ། རྒྱ་ནག་དུ་བཙོན་འཇུག་བྱས་ཡོད་པའི་ཝང་པེན་ཀྲང་སོགས་མི་དྲུག་ལ་ཐེངས་འདིའི་གཟེངས་རྟགས་བྱ་དགའ་ཕུལ་ཡོད་པ་རེད། དེ་དང་མཉམ་དུ་རྒྱ་ནག་གིས་ཆབ་སྲིད་དང་ཆོས་ལུགས་བཙོན་མ་གློད་གྲོལ་དང༌། གསར་འགོད་རང་དབང༌། འགྲོ་བ་མིའི་ཐོབ་ཐང་ཡར་རྒྱས་གཏོང་རྒྱུ་བཅས་ཨོ་ལིམ་པིག་རྩེད་འགྲན་མགྲོན་གཉེར་གནང་སྐབས་ཀྱི་སྔར་ཕུལ་དམ་ཚིགས་རྣམས་བརྩི་སྲུང་བྱེད་དགོས་ཞེས་འབོད་སྐུལ་ཡང་གནང་འདུག

༧གོང་ས་མཆོག་ནས་ཁོང་གི་ཚབ་ཏུ་བཙན་བྱོལ་བོད་གཞུང་གི་བདེ་སྲུང་བཀའ་བློན་ཟུར་པ་པདྨ་ཆོས་འབྱོར་ལགས་ཆེད་མངགས་གནང་སྟེ་གཟེངས་རྟགས་བཞེས་ཡོད་པ་རེད། ༧གོང་ས་མཆོག་ནས་ཕྱག་འཕྲིན་གནང་སྟེ། ངོས་ནས་ཀྲུང་གོའི་སྤུན་ཟླ་མི་རིགས་ནས་ཡང་བསྐྱར་ང་ལ་རེ་སྐུལ་ཞུས་པ་འདིས།  ངོས་རང་རྒྱ་ནག་གཞུང་འབྲེལ་མི་སྣས་བརྗོད་བཞིན་པ་ལྟར་གྱི་ཁ་བྲལ་རིང་ལུགས་པ་ཞིག་མིན་པ་གསལ་སྟོན་བྱས་ཡོད་པ་རེད་ཅེས་དང༌། ངོས་ནས་པེ་ཅིང་ཨོ་ལིམ་པིག་ལ་རྒྱབ་སྐྱོར་བྱེད་བཞིན་ཡོད་ལ། བོད་རང་བཙན་རྩོད་གི་མེད། ངོས་ཀྱི་རེ་བ་ནི་ཕན་ཚུན་གྲོས་མོལ་བརྒྱུད་ཞི་བའི་ཐག་གཅོད་གནང་ཐུབ་རྒྱུ་དང༌། བོད་མི་རིགས་ཀྱི་རིག་གཞུང་དང་ཆོས་ལུགས་མུ་མཐུད་སྲུང་སྐྱོབ་གནང་ཐུབ་རྒྱུ་དེ་ཡིན་ཞེས་གསུངས་ཡོད་པ་དང༌། དེ་མིན་ཁོང་གི་ཕྱག་འཕྲིན་ནང་ཀྲུང་གོས་རང་ཉིད་ལ་རྒྱལ་སྤྱིའི་སྟེང་གི་བརྩི་མཐོང་ཐོབ་ཆེད། ཁྲིམས་མཐུན་གྱི་དབང་སྒྱུར་དང༌། ཁ་ཡོད་ལག་ཡོད་ཀྱི་རང་དབང་ལྡན་པའི་སྤྱི་ཚོགས་ཤིག་འཛུགས་སྐྲུན་གནང་དགོས་པར་བསྟན་ཡོད།

༧གོང་ས་མཆོག་གི་སྐུ་ཚབ་ཏུ་ཕེབས་པའི་བཀའ་ཟུར་པདྨ་ཆོས་འབྱོར་ལགས་ཀྱིས་ཚོགས་ཐོག་ཏུ་བརྗོད་དོན།  ༧གོང་ས་ཏཱ་ལའི་བླ་མ་མཆོག་གིས་གསུངས་རྒྱུར། ཀྲུང་གོའི་གསར་འགྱུར་བརྒྱུད་ལམ་ཁག་གིས་ངོས་ཀྱི་བསམ་ཚུལ་ངོ་མ་དེ་མི་དམངས་ལ་ཤེས་རྟོགས་བྱེད་དུ་འཇུག་ཐུབ་ཡོད་པ་མ་རེད། དོན་དངོས་ཀྱིས་ངོས་ནས་པེ་ཅིང་ཨོ་ལིམ་པིག་ལ་རྒྱབ་སྐྱོར་དང་བོད་རང་བཙན་རྩོད་ལེན་བྱེད་ཀྱིན་མེད་ཅེས་གསུངས་བྱུང༌། ཞེས་འགྲེལ་བརྗོད་གནང་ཡོད་འདུག

གཟེངས་རྟགས་བཞེས་མཁན་སྐུ་ཞབས་ཝེ་ཅིན་ཧྲིན་ལགས་ཨ་རིའི་ཤར་མཐའ་ནས་གནམ་གྲུར་བསྡད་དེ་ལོ་སི་ཨན་ཇིལ་ལི་རུ་གཟེངས་རྟགས་བཞེས་པར་ཆེད་ཕེབས་གནང་ཡོད་པ་རེད།  ཁོང་གིས་བརྗོད་རྒྱུར། ཀྲུང་གོའི་མི་རྣམས་ཀྱིས་རང་ཉིད་ལ་གཟེངས་རྟགས་འབུལ་རྒྱུ་དེ་ཆེས་གལ་འགངས་ཆེན་པོ་ཞིག་རེད། སྤྱིར་ན་ང་ལ་རྒྱལ་སྤྱིའི་སྟེང་གི་གཟེངས་རྟགས་མང་པོ་ཞིག་ཐོབ་མྱོང་ཡོད། དེ་བས་གཟེངས་རྟགས་འདི་ཐོབ་པར་དེ་འདྲའི་སྣང་འཇོག་གནང་དགོས་མེད་མོད། ཡིན་ནའང་ངོས་ནས་བརྩི་མཐོང་ཚད་མེད་གནང་གི་ཡོད། འདས་པའི་ལོ་ངོ་བརྒྱའི་རིང་ལ་རྒྱ་ནག་མི་དམངས་ལ་རང་དབང་དམངས་གཙོ་ཐོབ་ཆེད་མི་མང་པོས་སྔར་རྗེས་བར་གསུམ་དུ་གཅེས་པའི་ཚེ་སྲོག་བློས་གཏོང་བྱས་ཡོད་པ་རེད། ཡིན་ནའང་དུས་རྒྱུན་ཕྱི་རྒྱལ་བ་རྣམས་ནས་ཁོ་ཚོའི་ལས་དོན་ལ་གཟེངས་བསྟོད་བྱ་དགའ་ཕུལ་བ་ལས་ཀྲུང་གོ་བའི་ངོས་ནས་ཕུལ་བ་ཤིན་ཏུ་ཉུང༌། ངའི་བསམ་ཚུལ་ལྟར་ན་ཀྲུང་གོ་བས་རང་ཉིད་ཀྱི་ལས་དོན་འདི་དག་གི་ཐད་རང་གིས་རང་ལ་གཟེངས་རྟགས་འབུལ་རྒྱུ་དེ་ཧ་ཅང་གལ་ཆེན་རེད་ཅེས་བརྗོད་ཡོད་པ་རེད།

ཟླ་ ༧ པའི་ཚེས་ ༢༩  ཉིན་སྲིད་འཛིན་བྷུ་ཤུས་ཕོ་བྲང་དཀར་པོའི་ནང་ཝེ་ཅིན་ཧྲིན་དང་ངལ་རྩོལ་བཙོན་མའི་ལྷན་ཚོགས་ཀྱི་ཚོགས་མི་ཝའོ་ཤི་ཏཱ་བཅས་ལ་མཇལ་ཕྲན་གནང་སྐབས་ཀྱང༌། ཝེ་ཅིན་ཧྲིན་གྱིས་སྲིད་འཛིན་བྷུ་ཤུར་ཞུ་རྒྱུར། ཁྱེད་རང་ཨོ་ལིམ་པིག་རྩེད་འགྲན་མཛད་སྒོར་ཕེབས་རྒྱུར་ང་ལ་མོས་མཐུན་མེད་ཅེས་དང༌། ངའི་རེ་བར་ཁྱེད་ནས་ཀྲུང་གོའི་མཐོ་རིམ་མགོ་ཁྲིད་རྣམས་ལ་འགྲོ་བ་མིའི་ཐོབ་ཐང་ཡར་རྒྱས་གཏོང་དགོས་སྐོར་གྱི་གླེང་མོལ་གནང་རོགས་ཞེས་ནན་སྐུལ་ཞུས་ཡོད་པ་རེད།

ཝེ་ཅན་ཧྲིན་གྱིས་གཟེངས་རྟགས་འབུལ་བའི་མཛད་སྒོའི་ཚོགས་ཐོག་ཏུ་གསུངས་རྒྱུར། ཉིན་འགའི་སྔོན་ལ་ཕོ་བྲང་དཀར་པོར་ང་ཚོ་སྲིད་འཛིན་བྷུ་ཤུ་དང་མཇལ་འཕྲད་གནང་བ་ཡིན། དེ་ནི་ཨ་རིའི་སྲིད་གཞུང་ནས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་བཟོད་བསྲན་བྱེད་ཐབས་བྲལ་བའི་རྣམ་པ་ཙམ་བསྟན་པ་རེད་ཅེས་འགྲེལ་བརྗོད་གནང༌།

དེ་མིན་གཟེངས་རྟགས་ཐོབ་པའི་ཨ་རིའི་ཁ་ལེ་ཧྥོར་ནི་ཡའི་ས་ཁུལ་གྱི་གྲོས་ཚོགས་ཚོགས་མི་ ཌོ་ཎ་ རོ་རཱ་བྷ་ཆེར་ (Dana Rohrabacher)དང༌། ཀྲུང་གོའི་དཔྱིད་ཀ་ཅེས་པའི་དུས་དེབ་ཐོག་མར་གསར་འདོན་ཞུ་མཁན་སྐུ་ཞབས་ཝང་པེན་ཀྲང༌། གཞན་ཡང་སྲས་མོ་ཇོ་ཌེ་ཁྲིན་དང༌། ལོ་སི་ཨན་ཇི་ལི་ས་ཁུལ་དུ་ལོ་ངོ་ ༢༠  རིང་ལ་ཀྲུང་གོའི་དམངས་གཙོའི་ལས་འགུལ་ལ་རྒྱབ་སྐྱོར་གནང་མཁན་ཨ་རིའི་ནུབ་ཕྱོགས་ཚོགས་པའི་ཚོགས་གཙོ་མོའོ་ཧྥུན་ཅེ་བཅས་ཡིན་པ་དང༌།  སྐུ་ཞབས་ལོ་ལ་ཁི་ལས་བྲེལ་གྱི་དབང་གིས་ཐེངས་འདིར་དངོས་སུ་ཚོགས་བཅར་གནང་ཐུབ་མེད་ནའང༌། འདས་པའི་ཟླ་ ༤ པའི་ནང་གི་འགྲོ་བ་མིའི་ཐོབ་ཐང་དཔལ་འབར་གྱི་མཛད་སྒོའི་སྟེང་ཁོང་ཆེད་ཕེབས་གནང་མྱོང་ཡོད་པ་རེད། དེ་མིན་སྐུ་ཞབས་མོ་ཧྥིནཅེ་ཡིས་ཉེ་ལམ་ཉིན་རྒྱུན་ཨ་རིའི་གནམ་ཐང་དུ་སོང་ནས། པེ་ཅིང་ཨོ་ལིམ་པིག་རྩེད་འགྲན་ལ་གཟིགས་མོར་འགྲོ་མཁན་རྣམས་ལ་རང་དབང་ལྷ་མོའི་འདྲ་རིས་ཕབ་པའི་སྟོད་ཐུང་ལག་སྐྱེས་སུ་ཕུལ་ཏེ་འགྲོ་བ་མའི་ཐོབ་ཐང་དང་རང་དབང་དམངས་གཙོའི་བརྡ་འཕྲིན་ཀྲུང་གོར་འབྱོར་ཐུབ་པའི་རེ་བ་གནང་བཞིན་ཡོད།

ཤར་ཨེ་ཤ་ཡའི་འགྲོ་བ་མིའི་ཐོབ་ཐང་ལྷན་ཚོགས་དེ་ནི་ཕྱི་ལོ་ ༢༠༠༥ ལོར་ནེའུ་ཛི་ལན་ཌིར་གསར་བཙུགས་གནང་བ་དང༌། ཚོགས་པ་འདིས་སྔ་རྗེས་སུ་ཀྲུང་གོའི་ནང་ཁུལ་གྱི་འགྲོ་བ་མིའི་ཐོབ་ཐང་དོན་གཅེར་བ་རྣམས་གཙོས།  ཀོ་ཀྲུ་པེ་དང༌།  ཁྲུན་ཀང་ཁྲུན། ཀོའུ་ཧྥེ་ཞུང༌། ཡཱང་ཅན་ལེའུ། ཡཱང་ཁྲོན་ལིན། ལུག་ཁྲུན་ཅོན།  དེ་མིན་ཁེ་ན་ཌའི་ཀྲུང་གོའི་དམངས་གཙོ་ལས་འགུལ་རྒྱབ་སྐྱོར་བ་ཏ་བེ་ཆོའོ་ཀོ་སོགས་མི་མང་པོར་གཟེངས་རྟགས་འདི་ཕུལ་མྱོང་ཡོད་པ་རེད།

ཤར་ཨེ་ཤ་ཡའི་འགྲོ་བ་མའི་ཐོབ་ཐང་ལྷན་ཚོགས་དབུ་འཛུགས་གནང་མཁན་གྱི་གྲས་སྐུ་ཞབས་པོ་ཆིན་གྱིས་མཛད་སྒོའི་སྟེང་བརྗོད་རྒྱུར། དང་ཐོག་ཚོགས་པ་འདི་དབུ་འཛུགས་གནང་སྐབས་ང་ཚོ་སྤྱི་མོས་ཀྱི་སེམས་འདུན་ནི་ཤར་ཨེ་ཤ་ཡའི་ས་ཁུལ་གྱི་འགྲོ་བ་མིའི་ཐོབ་ཐང་ཡར་རྒྱས་དང༌། དབང་སྒྱུར་ལམ་ལུགས་ཀྱི་མུན་ཁྲོད་དུ་ལུས་པའི་ཀྲུང་གོ་དེ་བདེན་ལུགས་སྐྱོང་བའི་རྒྱལ་ཁབ་ཅིག་ཏུ་སྒྱུར་རྒྱུ། གཞན་ཡང་འགྲོ་བ་མིའི་ཐོབ་ཐང་དང་དམངས་གཙོ་སོགས་འཛམ་གླིང་གི་སྔོན་ཐོན་ཤེས་རིག་གི་རིན་ཐང་དེ་རྒྱལ་ནང་དུ་བསུ་རྒྱུ་ཐུབ་པ་བྱེད་རྒྱུ་དེ་ཡིན་ཞེས་བརྗོད་ཡོད་པ་རེད།