ཐེངས་འདིར་པེ་ཅིན་ཨོ་ལིམ་པིག་རྩེད་འགྲན་ར་བའི་ཕྱི་ལོགས་སུ་བོད་དོན་གྱི་ལས་འགུལ་སྤེལ་བ་འདི་ ༢༠༠༨ ལོར་རྒྱ་ནག་ནང་སྤེལ་བའི་ལས་འགུལ་ཐེངས་དང་པོ་ཡིན་ལ། མུ་མཐུད་ཨོ་ལིམ་རྩེད་འགྲན་གྱི་མགོ་མཇུག་བར་གསུམ་དུ་ལས་འགུལ་འདྲ་མིན་སྣ་ཚོགས་སྤེལ་རྒྱུ་ཡིན་ཟེར།
དེ་རིང་ཞོགས་པར་བོད་རང་དབང་སློབ་ཕྲུག་ཚོགས་པའི་ཚོགས་མི་བཞིས་པེ་ཅིན་ཨོ་ལིམ་པིག་རྩེད་འགྲན་ར་བའི་ཕྱི་ལོགས་ཀྱི་གློག་སྡོང་གཉིས་སྟེང་འཛེགས་ཏེ། རྒྱ་ནག་གིས་སྒྲོག་བཞིན་པའི་འབོད་ཚིག་ཅིག་སྟེ། འཛམ་གླིང་གཅིག རྨི་ལམ་གཅིག ཅེས་པའི་གཤམ་དུ་བོད་རང་དབང་ཞེས་བྲིས་པའི་འཕྲེད་དར་ཞིག་དང༌། བོད་ལ་རང་དབང་འཐོབ་གི་རེད་ཅེས་པའི་འཕྲད་དར་ཞིག བོད་ཀྱི་རྒྱལ་དར་བཅས་འཕྱར་སྟེ། ཆུ་ཚོད་གཅིག་ཙམ་རིང་ཞི་བའི་ངོ་རྒོལ་གྱི་ལས་འགུལ་སྤེལ་རྗེས། ཉེན་རྟོག་པ་དང་པེ་ཅིན་བདེ་སྲུང་མི་སྣས་ཁོང་ཚོ་འཛིན་བཟུང་བྱས་ཡོད།
འདིའི་ཐད་འདི་གའི་གསར་འགོད་པས་ངྷ་སར་ཡོད་པའི་བོད་རང་དབང་སློབ་ཕྲུག་ཚོགས་པའི་འགན་འཛིན་བསྟན་འཛིན་ཆོས་དབྱངས་ལགས་སུ་བཅར་འདྲི་ཞུས་པར་ཁོང་གིས་གསུངས་དོན། སྤྱིར་ལོ་སྔོན་མ་ནས་ང་ཚོས་རྒྱལ་ཁབ་གཞན་གྱི་སྐྱབས་བཅོལ་ལག་འཁྱེར་ཡོད་མཁན་བོད་རིགས་དེ་འདྲ་རྒྱ་ནག་ཨོ་ལིམ་པིག་རྩེད་འགྲན་སྟེང་འགྲོ་རྒྱུར་ལག་འཁྱེར་རག་ཚེ། བོད་མི་རང་གི་ངོས་ནས་ངོ་རྒོལ་གྱི་ལས་འགུལ་སྤེལ་བ་ཡིན་སྟབས་ནུས་པ་ཤུགས་ཆེ་བ་འཐོན་གི་རེད་བསམ་ནས་ཐབས་ཤེས་མང་བོ་བྱས་ནའང༌། ཕྱི་རྒྱལ་གྱི་རྒྱལ་ཁབ་གང་འདྲ་ཞིག་གི་མི་སེར་ལག་འཁྱེར་ཡོད་མེད་ལ་མ་ལྟོས་པར་བོད་མི་ཡིན་ཚུད་ལ་ལག་འཁྱེར་སྤྲོད་ཀྱི་མེད་པར་བརྟེན་འགྲོ་ཐུབ་ཀྱི་མི་འདུག་མོད། བོད་རང་དབང་སློབ་ཕྲུག་ཚོགས་པར་མཚོན་ན་ཕྱིའི་རྒྱལ་ཁབ་འདྲ་མིན་གྱི་ཚོགས་མི་མང་བོ་ཡོད་སྟབས་ཁོང་ཚོས་སྔོན་མ་ནས་ཨོ་ལིམ་པིག་རྩེད་འགྲན་ནི་གོ་སྐབས་ཤིག་རེད་ལ། རྩེད་འགྲན་འདིའི་སྟེང་ལས་འགུལ་གང་འདྲ་ཞིག་སྤེལ་ཐུབ་ནའང་སྤེལ་གྱི་ཡིན་ཞེས་བརྗོད་བསྡད་ཡོད་པ་རེད། དེར་བརྟེན་ང་ཚོས་ལོ་སྔོན་མར་ལས་འགུལ་སྤེལ་སྐབས་ཞི་བའི་སྒོ་ནས་ལས་འགུལ་སྤེལ་ཐུབ་རྒྱུར་ཟབ་སྦྱོང་ཡང་མང་བོ་སྤྲད་ཡོད་ལ། དེ་རིང་ཞོགས་པར་འཕྲེད་དར་འཕྱར་ཏེ་ལས་འགུལ་སྤེལ་བ་དེ་ལྟ་བུའི་ལས་འགུལ་ཞིག་ལོ་སྔོན་མའི་ཟླ་ ༨ ཚེས་ ༨ ལ་སྤེལ་ཡོད་པ་རེད།
ལས་འགུལ་འདི་ད་ལོའི་ལོ་འདིར་རྒྱ་ནག་ནང་སྤེལ་བའི་ལས་འགུལ་ཐེངས་དང་པོ་དེ་རེད་མོད། ང་ཚོས་ཨོ་ལིམ་པིག་རྩེད་འགྲན་གྱི་མགོ་མཇུག་བར་གསུམ་དུ་མུ་མཐུད་ལས་འགུལ་སྤེལ་རྒྱུ་ཡིན་ཞེས་དང༌། ཨོ་ལིམ་རྩེད་འགྲན་རིང་བོད་དོན་འདི་བཞིན་རྒྱལ་སྤྱིའི་སྡིངས་ཆའི་སྟེང་ཤེས་རྟོགས་ཐུབ་པ་བྱ་རྒྱུ་དང༌། རྒྱ་ནག་གིས་བོད་ནང་ལ་འགྲོ་བ་མིའི་ཐོབ་ཐང་དང་རང་དབང་ཡོད་སྐོར་བརྗོད་བསྡད་པ་དེ་རྒྱལ་སྤྱིའི་སྤྱི་ཚོགས་ཀྱིས་ཤེས་རྟོགས་བྱ་ཆེད་ལས་འགུལ་སྤེལ་རྒྱུར་གོ་སྐབས་ཡག་ཤོས་ཤིག་ཏུ་མཐོང་གི་ཡོད་ཅེས་བརྗོད་བྱུང༌།
ཁོང་ལ་འཛིན་བཟུང་བྱས་པའི་ཚོགས་མི་བཞི་ལ་རྒྱ་ནག་ཉེན་རྟོག་པས་འདྲི་རྩད་ནན་མོ་བྱ་སྲིད་པའི་བློ་འཚབ་ཡོང་གི་ཡོད་མེད་སྐོར་དྲིས་པར། ཁོང་གིས་ང་ཚོའི་ཚོགས་མི་བཞི་དེ་འཛིན་བཟུང་བྱས་པར་བློ་འཚབ་གང་ཡང་མི་འདུག གང་ཡིན་ཟེར་ན་ཁོང་ཚོ་ཚང་མ་ཕྱི་རྒྱལ་གྱི་མི་རེད། མི་སེར་ལག་འཁྱེར་དང་འགྲིམ་འགྲུལ་ལག་འཁྱེར་ཡོད་ཡོད་པ་རེད། འོན་ཀྱང་ཁོང་ཚོ་འཛིན་བཟུང་སྐབས་རྒྱ་ནག་གིས་ཨོ་ལིམ་པིག་སྟེང་ངོ་རྒོལ་གྱི་ལས་འགུལ་སྤེལ་རྒྱུར་རང་དབང་ཡོད་སྐོར་བརྗོད་ཀྱིན་པར། བདེན་རྫུན་གང་ཡིན་ཐེངས་འདིར་གསལ་བོ་མངོན་ཡོང་གི་རེད་ལ། ང་ཚོས་ལྟ་ཆོག་གི་རེད་ཅེས་བརྗོད་སོང༌།
ལས་འགུལ་སྤེལ་མཁན་མི་སྣ་བཞི་ནི་སི་ཁོ་ཊི་ལན་ཌིའི་རང་ལོ་ ༢༤ ཡིན་པའི་ཨ་ཡེན་ཐོམ་ Iain Thom དང་དབྱིན་ཡུལ་གྱི་རང་ལོ་ ༢༣ ཡིན་པའི་ལུ་སེ་མཱ་རོན Lucy Marion ། ཨ་རིའི་ནེའུ་ཇེར་སེའི་རང་ལོ་ ༣༤ ཡིན་པའི་ བྷུ་རེ་ཇུ་ཝ་ཊར Bridgewater ། ཨོ་རིའི་ཨོ་རི་གྷན་གྱི་རང་ལོ་ ༣༢ ཡིན་པའི་ཊའ་རེན་མེན་ཁུ་ and Tirian Mink བཅས་ཡིན་འདུག
སྐྱོ་བ་ལ། ཕལ་ཆེར་བོད་དོན་ལས་འགུལ་སྐད་གྲགས་ཆོད་པ་ཞིག་བྱེད་པ་ལ་བོད་མི་མིན་པ་ཞིག་དགོས་ཀྱི་ཡོད་པ་འདྲ།