རྒྱ་ནག་གིས་སྨད་ནས་བོད་དབུས་ཕྱོགས་སུ་ལྕགས་ལམ་འཕངས་པའི་ལན་ལྟ་བུར་རྒྱ་གར་གྱིས་ཀྱང་ཧི་མ་ཅལ་གྱི་མ་ན་ལི་ནས་རོང་ཐང་བརྒྱུད། སྟོད་ལ་དྭགས་བར་དུ་ལྕགས་ལམ་རིང་བོ་ཞིག་འཕེན་རྒྱུ་ཡིན་འདུག
ཧི་མ་ཅལ་མངའ་སྡེའི་བློན་ཆེན་ པུ་རེམ་ ཀུ་མར་ ཌུ་མལ་ Prem Kumar Dhumal གྱིས་གསར་ལམ་ཁག་ཏུ་གསུངས་པ་ལྟར་ན། ལ་དྭགས་ཁུལ་ལ་ལྕགས་ལམ་བཟོ་བསྐྲུན་བྱེད་རྒྱུའི་ལས་འཆར་དེར། རྒྱ་གར་དབུས་གཞུང་གི་སྲིད་བློན་ལས་ཁང་ནས་ཆོག་མཆན་ཐོབ་ཡོད་ཚུལ་གསུངས་འདུག
ཧི་མ་ཅལ་མངའ་སྡེ་བློན་ཆེན་གྱིས། རྒྱ་ནག་གིས་བོད་ཀྱི་ལྷ་ས་བར་དུ་ལྕགས་ལམ་བཟོས་རྗེས་ནས། རྒྱ་གར་གཞུང་གིས་ཀྱང༌། ལ་དྭགས་བར་དུ་ལྕགས་ལམ་བཟོ་བསྐྲུན་བྱེད་རྒྱུའི་བསམ་ཚུལ་ཡོད་ཀྱང༌། ད་ལྟ་བར་དུ་དེའི་སྒང་ལ་གླེང་གཞི་མ་བྱུང་བས། སྒེར་གྱིས་སྔ་རྗེས་འགལ་མེད་ཀྱི་ངང་ནས་ལ་དྭགས་བར་དུ་ལྕགས་ལམ་བཟོ་རྒྱུའི་གནད་དོན་འདི་བཏོན་པ་ཡིན་ཚུལ་དང༌། གནད་དོན་འདི་ནི་རྒྱལ་ཁབ་སྲུང་སྐྱོབ་ཀྱི་ཐད་ལ་གལ་འགངས་ཆེན་པོ་ཆགས་ཡོད་པ་དང༌། ཧི་མ་ཅལ་མངའ་སྡེ་ཡང་འདོད་པ་ཆེ་ཚུལ་གསུངས་འདུག ལྕགས་ལམ་བཟོས་ཚར་ན་རྒྱལ་ཁབ་ཀྱི་མཐའ་མཚམས་ཕྱོགས་སུ་གཏོང་དགོས་པའི་དམག་མི་དང༌། དམག་དོན་སྒྲིག་འཛུགས་སོགས་ཀྱི་ཐད་ལ་ཁེ་ཕན་ཆེ་བ་མ་ཟད། ཡོ་ཆས་དང་བཟའ་ཆས་གང་ཞིག་མཁོ་སྤྲོད་དགོས་ཀྱང༌། དམག་མིའི་རྩལ་སྦྱོང་སོགས་ལ་སྟབས་བདེ་བོ་ཡོང་ཚུལ་ཡང་གསུངས་ཡོད། ད་དུང་རི་ཁུལ་དུ་ཡོད་པའི་་དམག་མི་རྩལ་སྦྱོང་བ་ཚོའི་ཆེད་དུ། མཁོ་ཆས་གང་མང་རླངས་འཁོར་རྒྱུད་སྐྱེལ་འདྲེན་བྱེད་བཞིན་པའི་ལམ་བར་གྱི་དཀའ་ངལ་དེ་ཚོ་ཡང་ལྕགས་ལམ་བརྒྱུད་སེལ་འགྲོ་བ་སོགས་ཀྱི་གནས་ཚུལ་ངོ་སྤྲོད་ཞུས་འདུག
བོད་མི་ཚོས་ད་སྐབས་བོད་རང་དབང་གི་ལས་འགུལ་སྤེལ་བཞིན་པའི་སྐབས་འདིར། ཧི་མ་ལ་ཡའི་རི་བརྒྱུད་ཀྱི་མི་དམངས་ཚོས་ཀྱང་ཆོས་རིག་གི་རང་དབང་དང་རྩོད་ལེན་དང་། མཐའ་ན་བོད་རང་བཙན་གྱི་ལས་འགུལ་སྤེལ་རྒྱུའི་གྲ་སྒྲིག་ཡོད་སྐོར་བརྗོད་ཀྱི་ཡོད་པ་རེད།
