དབུས་ཕྲུག་ཚེ་རིང༌།
འདབ་གཤོགས་མ་རྒྱས་པའི་བྱེའུ་ཕྲུག་ཅིག་རླུང་རྩིའི་ནང་དུ་བཅུག་ནས་མི་ལོ་ཞེ་བརྒྱད་ལྷག་སོང་ཡོད། དེ་དག་ནི་བཙན་འཛུལ་དང་ཆེས་ཡ་ང་བའི་གདུག་རྩུབ་ཀྱི་ལོ་ཟླ་ཞིག་ཡིན་པར་སུས་ཀྱང་སྨྲ་མི་དགོས། འུ་ཐུག་བཟོད་བྲལ་གྱི་ན་ཟུག་སྐྱུར་མོ་དེས་སླར་ཡང་འདི་ལོའི་གསུམ་བཅུའི་དུས་དྲན་ཉིན་ནས་བཟུང༌། བཙན་པོའི་སྙིང་སྟོབས་དང་ལ་ཞེན་དེ་བོད་མདོ་དབུས་ཁམས་གསུམ་གྱི་གདོང་དམར་གྱི་ཚ་བོ་རྣམས་ལ་སྤྲད་དེ། དུས་རབས་ཕྱེད་ཙམ་རིང་གི་རྒྱ་ནག་གུང་ཁྲན་ཏང་གི་བསླུ་བྲིད་དང་གཡོ་ཇུས་རྣམས་རྒྱལ་སྤྱིའི་སྤྱི་ཚོགས་ཀྱི་མདུན་སར་ཁྲག་དྲོན་དང་ངུ་འབོད་ཀྱིས་བཤམས་སྟོན་བྱས། འོན་ཀྱང་བྱིའུ་ཕྲུག་དེ་ནི་མུན་ནག་གི་ལྕགས་དྲའི་ནང་སྔར་བས་ཀྱང་འཇིགས་སྐྲག་དང་ཉེན་ཚབས་ཀྱི་གནས་སུ་ལྷུང་ཡོད། ཉེ་སྔོན་བོད་རྒྱ་ཞི་མོལ་གྱི་སྐུ་ཚབ་ཐེངས་བདུན་པ་གྲང་འཁྱགས་ཀྱི་རླུང་རྩིའི་ནང་ནས་འདར་སིག་སིག་གིས་འ་ཆད་འུ་ཐུག་ངང་ཕྱིར་ལོག་གནང་སོང༌། ད་ཆ་ང་ཚོར་ལེགས་ཉེས་དང་རེ་སྒུག་གི་ཉིན་ཐ་མ་སྐུ་ཚབ་ཐེངས་མ་བརྒྱད་པ་སྟེ་སྤྱི་ཟླ་བཅུ་པ་དེ་ཡིན། དེ་སྐབས་ད་ལྟའི་གནས་ཚུལ་གྱི་འཕེལ་རིམ་གཞིར་བཟུང་དོན་དངོས་ལ་འཕེལ་རྒྱས་ཀྱི་སྒུལ་ཤུགས་མེད་ཕྱིན་རྒྱལ་སྤྱིའི་རྩ་ཁྲིམས་ནང་མི་རིགས་ཤིག་གི་སྤྱི་འབངས་ཀྱི་ཐོབ་ཐང་ལྟར་རང་ཐག་རང་གཅོད་ཀྱི་དམིགས་ཡུལ་ལམ། ཡང་ན་རྒྱལ་ཁབ་གསུམ་པ་ཞིག་གི་བར་དཔང་དང༌། སྐུ་ཚབ་ཚོགས་མི་བརྗེ་བསྒྱུར་བྱ་རྒྱུས་མཚོན་ཐབས་ལམ་གཞན་ཞིག་འཚོལ་སྒྲུབ་བྱེད་རྒྱུ་དུས་ལ་བབ་ཡོད། གཞུང་དང་ཚོགས་པ་བྱེ་བྲག་པ་སུ་ཡིན་ཀྱང་ཐབས་ལམ་ཕྱོགས་གཅིག་པུར་ཨུ་ཚུགས་བརྒྱབ་པ་ལས། མི་ཡི་ནུས་ཤུགས་དང་དཔལ་འབྱོར་འགྲོ་གྲོན་ཁ་ལོ་བསྒྱུར་ནས་བརྒྱུད་ལམ་གཞན་ཞིག་གཏོད་དགོས་ངེས་ཡིན། དེ་ཡང་ནུབ་ཕྱོགས་རྒྱལ་ཁབ་ཀྱི་སློབ་གྲྭ་ཁག་ཏུ་ཡོད་པའི་རྒྱ་མི་རིགས་དང༌། ཧོང་ཀོང༌། ཐའེ་ཝན་སོགས་ཀྱི་ནང་རྒྱ་ནག་སྐམ་ས་ནས་ཡོང་བའི་རྒྱ་མི་རིགས་ཀྱི་ཁྲོད། ང་ཚོས་དམངས་གཙོ་དང་འགྲོ་བ་མིའི་ཐོབ་ཐང་དང་འབྲེལ་བའི་བོད་ནང་གི་ཆེས་ཐལ་ཆར་གྱུར་པའི་ཕྱོགས་ལྷུང་དང་སྡུག་སྦྱོང༌། དེ་ལྟ་བུའི་སྐྱོ་གནས་ཀྱི་ཟུངས་ཁྲག་ཐིགས་པ་རེ་རེ་བཞིན་ཁོ་ཚོའི་དབང་རྩའི་ནང་དུ་སིམ་ཐུབ་པ་བྱེད་རྒྱུ་དེ་གཙོ་གནད་ཅིག་ཡིན། དེ་ལྟར་གོམ་པ་རེ་རེ་བཞིན་རླུང་རྩིའི་ནང་གི་བྱེའུ་ཕྲུག་ཅིག་སྲོག་ཉེན་ལས་སྐྱོབ་ཐབས་དང༌། དེ་ཉིད་ཀྱི་མངོན་འདོད་ཅི་ཡིན་རླུང་བུའི་ཁ་ཕྱོགས་དང་བསྟུན་རྒྱ་ནག་མི་དམངས་ཀྱི་སྤྱི་ཚོགས་ཁྲོད་འགྲེམས་སྤེལ་བྱས་ཏེ། རྒྱ་ནག་གཞུང་གི་སེང་རས་འོག་དམར་གསོད་ཀྱི་ཆུ་གྲི་རྣོན་མོ་དེ་དམར་རྗེན་དུ་ཕྱིར་འདོན་དགོས། དཔེར་ན་ཁྱིམ་གཞི་གཅིག་ལ་འགྲན་དགོས་ན། དང་པོར་རང་ཉིད་ཀྱི་སྟོབས་ཤུགས་ཀྱིས་འགྲན་བཟོད་དགོས་ལ། དེ་ལྟར་མིན་ན། ཕ་རྒན་དང་མཉམ་དུ་ནང་མོལ་བྱེད། དེས་ཀྱང་མི་འགྲིགས་ན་ཁྱིམ་མཚེས་ཀྱི་ཁོར་ཡུག་གཡར་ནས་ནང་མི་གཞན་རྣམས་ཀྱི་སེམས་ཁམས་དབང་བསྒྱུར་བྱེད་དགོས། དེ་རིང་བར་ང་ཚོས་རྒྱ་ནག་དབུས་གཞུང་དང་ནུབ་ཕྱོགས་རྒྱལ་ཁབ་ཁག་ལ་མ་གཏོགས་རྒྱ་ནག་མི་དམངས་ཀྱི་སེམས་ཁམས་ནང་སིམ་འཛུལ་བྱས་མེད། དེ་བཞིན་བོད་ནང་དུ་སྒྲིག་འཛུགས་ཤིག་ཆགས་ཐུབ་མེད་ལ། ང་ཚོས་ཀྱང་མི་སྣ་རེ་ཟུང་མ་གཏོགས་སྒྲིག་འཛུགས་ལྡན་པའི་གསང་བའི་ཚོགས་པ་ཞིག་ཀྱང་བོད་ནང་དུ་འཛུགས་ཐུབ་མེད། ལོ་རྒྱུས་ཀྱི་དུས་རིམ་ནང་རང་བཙན་ཐོབ་པའི་རྒྱལ་ཁབ་བརྒྱ་ཕྲག་ཡོད་ཀྱང༌། ཕྱི་ཕྱོགས་ནས་ལས་འགུལ་སྤེལ་ནས་ནང་དུ་རང་བཙན་ཐོབ་པའི་རྒྱལ་ཁབ་གཅིག་ཀྱང་མེད། དེས་ན་ང་ཚོས་མདུད་པ་དགུ་བཅིངས་ཀྱི་ལྕགས་སྒྲོག་དེ་གཏོར་ཆེད། བློ་རྩེ་གཅིག་སྒྲིམ་གྱིས་ཤེས་ཡོན་དང་དཔལ་འབྱོར་གོང་འཕེལ་བཏང་ཐོག་གོང་གི་ལམ་ཁ་དེ་མི་མྱུལ་ཐབས་མེད་དུ་གྱུར་ཡོད། དེ་ནི་ངར་ལྕགས་ལས་ཀྱང་མཁྲེགས་ཤིང་འབར་ཆོག་ཆོག་གི་རྒྱ་ནག་དམར་གཞུང་གི་ཕྱི་ཡི་ལྕགས་རི་གཏོར་བྱེད་ཀྱི་འབར་རྫས་ནུས་ལྡན་ཞིག་ཡིན།།
