རྒྱ་གར་ནི་འཛམ་གླིང་གི་དབུལ་བོ་གསུམ་ཆའི་གཅིག་གི་ཡུལ་རེད། ཉིན་རེར་ཨ་སྒོར་གཉིས་ཀྱི་ཡོང་སྒོ་ལས་མེད་མཁན་གྱི་གྲངས་འབོར་ནི་ཨབ་རི་ཀའི་གླིང་ཆེན་དང་བསྡུར་ན་རྒྱ་གར་དུ་མཐོ་བ་འདུག
འདི་ནི་འཛམ་གླིང་དངུལ་ཁང་གིས་སའི་གོ་ལའི་སྟེང་གི་དབུལ་བོར་ཚོད་རྩིས་བརྒྱབས་པ་ལས་བྱུང་བའི་གནས་ཚུལ་མཐའ་མ་དེ་རེད། ཚོད་དཔག་གི་ཡིག་ཆ་འདིའི་ནང་བསྟན་པ་ལྟར་ན། རྒྱ་གར་དུ་དབུལ་བོའི་གྲངས་ཀ་འཕར་ཚད་དེ་ནི་ ༡༩༨༡ ལོ་ནས་ ༡༩༩༠ ལོའི་བར་དང་བསྡུར་ན་ ༡༩༩༠ ལོ་ནས་ ༢༠༠༥ ལོའི་བར་མགྱོགས་པ་ཡོད་འདུག འདི་ནི་ ༡༩༩༡ ལོ་ནས་བཟུང་མགོ་བཙུགས་ཤིང་ད་བར་དབུལ་བོའི་འཕེལ་ཚད་ཇེ་ཉུང་དུ་གཏོང་བར་ལམ་ལྷོང་མ་བྱུང་བའི་རྒྱ་གར་གྱི་དཔལ་འབྱོར་བཅོས་བསྒྱུར་བྱེད་མཁན་ཚོར་མཁོ་བའི་བསམ་གཞིགས་གསར་པ་ཞིག་རེད།
ཚོད་རྩིས་དེ་ལྟར་ན། རྒྱ་གར་ལ་རྒྱལ་སྤྱིའི་དབུལ་བོའི་ངོས་འཛིན་གསར་པ་སྟེ་ཉིན་རེར་ཨ་སྒོར་ ༡་༢༥ མན་གྱི་མི་འབོར་ས་ཡ་ ༤༥༦ དང་ཡང་ན། རྒྱལ་ཡོངས་ཀྱི་མི་འབོར་སྤྱིའི་བརྒྱ་ཆ་ ༤༢ ཟིན་ཡོད་པ་རེད། གྲངས་གནས་འདིས་རྒྱལ་སྤྱིའི་དབུལ་བོའི་གྲངས་འབོར་གྱི་བརྒྱ་ཆ་ ༣༣ ཟིན་ལ། འཛམ་གླིང་སྟེང་ད་སྐབས་དབུལ་བོ་དུང་ཕྱིར་ ༡་༤ ཡོད་པ་རེད།
རྒྱ་གར་ལ་ད་དུང་ཉིན་རེར་ཨ་སྒོར་ ༢ ཡོང་འབབ་མེད་མཁན་མི་འབོར་ས་ཡ་ ༨༢༨ ཡོད་ལ། རྒྱལ་ཡོངས་ཀྱི་མི་འབོར་སྤྱིའི་བརྒྱ་ཆ་ ༧༥་༦ ཡིན་འདུག ཨབ་རི་ཀའི་གླིང་ཆེན་ནི་འཛམ་གླིང་སྟེང་དབུལ་ཤོས་ཀྱི་མངའ་ཁུལ་ལ་ངོས་འཛིན་བྱེད་ཀྱི་ཡོད་ཀྱང་། དེར་ཉིན་རེར་ཨ་སྒོར་གཉིས་ཀྱི་ཡོང་འབབ་མན་ན་ཡོད་པའི་མི་གྲངས་ས་ཡ་ ༥༥༡ ཡོད་ལ། འདིས་མངའ་ཁུལ་དེའི་སྤྱིའི་མི་འབོར་གྱི་བརྒྱ་ཆ་ ༧༢་༢ ཟིན་ཡོད་པ་རེད།
རྒྱལ་སྤྱིའི་དབུལ་བོའི་ངོས་འཛིན་གྱི་མཚམས་ཐིག་སྟེ། ཉིན་རེར་ཨ་སྒོར་ ༡་༢༥ ཡོང་འབབ་ཅན་འདི་ནི་འཛམ་གླིང་གི་རྒྱལ་ཁབ་དབུལ་བོ་ ༡༠ ནས་ ༢༠ ནང་གི་ཆ་སྙོམས་ཀྱི་གྲངས་ཚད་ཡིན་པ་དང་། ཕྱོགས་གཞན་ནས་བཤད་ན། རྒྱ་གར་གྱི་མི་ ༡༠ ནང་གི་ ༤ ལྷག་ནི་འཛམ་གླིང་གི་དབུལ་བོའི་ངོས་འཛིན་གྱི་མཚམས་ཐིག་འདིའི་མན་དུ་ཡོད་པ་རེད།
