གནས་ཚུལ་དང་གསལ་བཤད།

བོད་ཀྱི་དུས་བབ་སྤྱིའི་འདོན་ཐེངས་ ༤༢༣ པའི་སྟེང་གི་རྩོམ་སྒྲིག་པའི་གཏམ།

ཨོ་ལིམ་པིག་མཇུག་སྒྲིལ་ཏེ་བདུན་ཕྲག་གཅིག་འགོར་བའི་སྐབས་འདིར་བོད་མི་རྣམས་ཟས་བཅད་ངོ་རྒོལ་དུ་བསྡད་སོང་ལ། ༧གོང་ས་མཆོག་ཀྱང་ཐེངས་དང་པོར་ཡོངས་གྲགས་ཐོག་ཉིན་གཅིག་རིང་གི་ཟས་བཅད་ལས་རིམ་འདིའི་ནང་མཉམ་བཞུགས་གནང་ཡོད། འོན་ཀྱང་། ད་ལྟ་རྩོད་གཞི་མེད་ལ་གསལ་ཁའང་བྱུང་མེད་པ་ནི་ལས་འགུལ་འདིའི་གཞི་རྒྱ་ལ་དཔག་པའི་ཤུགས་རྐྱེན་ཞིག་འབྱུང་རྒྱུ་ཡིན་མིན་དེ་ཡིན།

ལས་རིམ་འདི་ནི་དུས་མཚམས་ཧ་ཅང་གལ་ཆེན་ཞིག་ལ་འཁེལ་ཡོད་ནའང་འདི་ལ་དམིགས་བསལ་གྱི་དགོས་འདུན་མི་འདུག འདིའི་ཕུགས་ཀྱི་རེ་ལྟོས་ནི་ཨོ་ལིམ་པིག་མཇུག་སྒྲིལ་བ་དང་མཉམ་དུ་བོད་དོན་གྱི་དོ་སྣང་གཏན་དུ་མི་ཡལ་བའི་ཆེད་དུ་རྒྱལ་སྤྱིའི་སྤྱི་ཚོགས་ཀྱི་དོ་སྣང་མུ་མཐུད་འཛིན་ཐབས་དང་། བོད་མིའི་ནང་ཁུལ་ལ་ལོ་འདིར་སྔར་མ་བྱུང་བའི་ཆིག་སྒྲིལ་དང་ཆོད་སེམས་ཅིག་བྱུང་བ་དེ་མི་ཉམས་པའི་ཆེད་དུ་ཡིན་པར་འདོད། འོན་ཀྱང་། ལས་འགུལ་འདིའི་དམིགས་ཡུལ་དང་དགེ་མཚན་བསྒྲགས་སྐབས་བཀའ་ཁྲི་མཆོག་གིས། བོད་རིགས་ཡོངས་ཀྱིས་ཡིད་དང་ངག་གི་འཚེ་བ་གཏན་སྤོངས་མ་ཐུབ་པའི་དབང་གིས་ང་ཚོའི་ད་བར་གྱི་འབད་རྩོལ་མཐའ་དག་ཟོ་ཆེན་གྱི་ཁྱུད་མོ་ལྟར་འཁོར་བ་ལས་ནུས་པ་ཐོན་ཏེ་དོན་དམ་གྱི་གྲུབ་འབྲས་ཐོབ་མེད། བོད་རིགས་ཡོངས་ལ་བོད་དོན་བདེན་མཐའ་གསལ་བའི་མངོན་འདོད་དང་ལྷག་བསམ་རྣམ་དག་ཞིག་ཡོད་ན་ང་ཚོའི་འཚེ་བ་མེད་པའི་ནུས་ཤུགས་འདི་གོང་མཐོར་གཏོང་དགོས། བོད་མི་རྣམས་ཀྱི་ཡིད་ཀྱི་འཚེ་བ་མངོན་གྱུར་བ་མགོ་ནོན་ཙམ་ཞིག་མ་བྱུང་གི་བར་བོད་དོན་བདེན་མཐའ་གསལ་རེ་ཤིན་ཏུ་དཀའ། ཞེས་གསུངས་ཡོད།

འོན་ཀྱང་། ང་ཚོར་ད་བར་གྲུབ་འབྲས་ཤིག་མ་བྱུང་བའི་སྐྱོན་སྣེ་རང་སྟེང་ལ་འདེད་ཀྱི་ཡོད་ཚེ། དེ་ནི་ང་ཚོས་ཁ་ཡོད་ལག་ཡོད་ཀྱི་ལས་འགུལ་ཞིག་སྤེལ་མ་ཐུབ་པ་དང་། ལས་འགུལ་དེ་དག་ལ་ཁ་ཡོད་ལག་ཡོད་ཀྱི་གསལ་བཤད་ཅིག་བྱེད་མ་ཐུབ་པའི་དབང་གིས་ཡིན་པར་འདོད། ཐེངས་འདིའི་ལས་འགུལ་ཡང་རང་བཞིན་དེ་ལས་མ་འདས་ཏེ། བཀའ་ཁྲི་མཆོག་གིས་བོད་མི་ཚོའི་སེམས་ཀྱི་འཚེ་བ་མངོན་གྱུར་བ་ཞིག་གསུང་གི་ཡོད་པ་དང་། བོད་དོན་ད་བར་དུ་སེལ་མ་ཐུབ་པ་དང་། མུ་མཐུད་སེལ་མི་ཐུབ་པའི་རྒྱུ་རྐྱེན་ཡང་འདི་ལ་ཐུག་ཡོད་སྐོར་དང་། ཐེངས་འདིའི་སྨྱུང་གནས་དང་གསོལ་སྨོན་གྱི་ལས་རིམ་འདི་བོད་མིའི་འཚེ་བ་མེད་པའི་ལས་འགུལ་གྱི་གོམ་རིམ་གསར་པ་ཞིག་གི་ནང་བསྐྱོད་རྒྱུའི་སྒོ་དབྱེ་ལྟ་བུ་ཞིག་ཏུ་འགྱུར་ཐུབ་རྒྱུའི་འབོད་སྐུལ་ཞུས་ཡོད།

དམངས་གཙོའི་མི་སེར་ལ་མེད་དུ་མི་རུང་བ་ནི་གནས་ཚུལ་ (Information) ཡིན། འདི་ནི་གསར་འགྱུར་བརྒྱུད་ལམ་ཁག་ནས་ཁྱབ་འགྲོ་གི་རེད། དེ་ལས་ཀྱང་གལ་ཆེ་བ་ནི་གསལ་བཤད་ (explanation) ཡིན། མི་སེར་གྱིས་གནས་ཚུལ་འདི་དག་གསལ་བོ་ཞིག་རྟོགས་པའི་ཆེད་དུ་ཁ་གསལ་གཏིང་གསལ་གྱི་བསྒྲགས་གཏམ་སྤེལ་རྒྱུ་དང་། དུས་ནས་དུས་སུ་གཞུང་དང་འབྲེལ་ཡོད་ནས་གསལ་བཤད་བྱེད་དགོས་པ་རེད། འདི་ནི་ང་ཚོའི་སྤྱི་ཚོགས་ལ་འབྱོར་མེད་པའི་གཤིས་ཀ་དང་། ད་ལྟའི་བཙན་བྱོལ་བོད་གཞུང་གི་སྲིད་བྱུས་ཀྱི་ཞན་ཆ་དེ་ཡིན་པར་འདོད། དེར་བརྟེན་ཐེངས་འདིའི་ལས་འགུལ་ལའང་གཞི་རྒྱ་ལ་དཔག་པའི་གྲུབ་འབྲས་ཤིག་ཐོན་མིན་ནི་ཐེ་ཚོམ་གྱི་གཞི་ཡིན་ལ། ལྷག་པར་དུ་༧གོང་ས་མཆོག་སྨན་ཁང་ནས་སྙུང་གནས་ལ་བཞུགས་ཡོད་སྟབས། ལས་འགུལ་འདིར་ཤུགས་རྐྱེན་བཙན་པོ་དང་ཕུགས་རྒྱང་རིང་བོ་ཞིག་མེད་ཚེ་བསམ་ཞིབ་བྱེད་དགོས་པ་ཞིག་ཅི་ནས་ཀྱང་ཡིན་པར་འདོད།

རྗེས་ཕྱོགས་ལས་འགུལ་གང་འདྲ་ཞིག་སྤེལ་ཡང་། མངོན་གསལ་དང་དངོས་ཡོད་ལ་བསྟུན་ནས་སྤེལ་རྒྱུ་དང་། དེའི་སྲིད་བྱུས་དང་བསྒྲགས་གཏམ་ཡང་བདེན་པ་དང་གནས་ལུགས་ལས་མ་འགོང་བ་ཞིག་དགོས་རྒྱུ་ནི་གནད་དམ་པ་རེད་སྙམ་མོ།།