བྷི་ཧར་ལ་རོགས་རམ།

ཕྱི་ཟླ་ ༨ པའི་ ཚེས་ ༡༨ ཉིན་རྒྱ་གར་གྱི་བྷི་ཧར་མངའ་སྡེ་དང་བལ་ཡུལ་ལྷོ་ཕྱོགས་ཀྱི་ས་མཚམས་སུ་གནས་པའི་ཁོ་ཞི་གཙང་བོ་དེ་ཁ་ཤོར་ཏེ། བྷི་ཧར་མངའ་སྡེའི་ས་ཁོངས་དྲུག་གི་མི་ ༨༠ ལྷག་ཤི་ཡོད་པ་དང་མི་མང་འབུམ་ ༢ ལྷག་གི་ཟ་འཐུང་དང༌། སྡོད་གནས་སོགས་ལ་དཀའ་ངལ་འཕྲད་བཞིན་ཡོད་འདུག་ལ། འབྲེལ་ཡོད་མི་སྣའི་བརྗོད་པ་ལྟར་ན། འདི་ལྟར་དུས་ཡུན་རིང་བོར་མི་མང་པོ་མཉམ་སྡོད་ཀྱིས་སྡོད་གནས་ལ་དཀའ་ངལ་འཕྲད་ཚེ་རྒྱ་གར་ནང་ནད་ཡམས་གང་མང་ཞིག་ཁྱབ་བརྡལ་དུ་འགྲོ་རྒྱུའི་ཉེན་ཁ་ཡོད་ཚུལ་བརྗོད་འདུག 

ཕྱི་ཟླ་ ༨ པའི་ཚེ་ ༢༩ ཉིན་༧གོང་ས་མཆོག་གིས་ཐེངས་འདིའི་ཆུ་ལོག་གནོད་སྐྱོན་ས་ཁུལ་གྱི་མངའ་སྡེའི་བློན་ཆེན་མཆོག་ལ་ཐུགས་གསོའི་འཚམས་འཕྲིན་ཅིག་དང་ཆབས་ཅིག་རོགས་དངུལ་ཞལ་འདེབས་ཧིན་སྒོར་འབུམ་ ༡༠ ཕུལ་ཡོད་པ་དང༌། བཙན་བྱོལ་བོད་གཞུང་གིས་ཀྱང་རྒྱ་གར་ཏུ་གནས་སྡོད་བོད་མི་ཡོངས་ལ་ཞལ་འདེབས་བསྡུ་སློང་བྱེད་དགོས་པའི་འབོད་སྐུལ་གནང་ཡོད་པ་རེད།  གཞན། བཙན་བྱོལ་བོད་གཞུང་བཀའ་དྲུང་ཡིག་ཚང་ནས་བཙན་བྱོལ་བོད་གཞུང་གི་བོད་མི་འདུས་སྡོད་ཀྱི་ས་གནས་ཁག་དང༌། དེ་མིན་ཕྱི་གླིང་གི་ཡུལ་གྲུ་ཁག་ཏུ་གནས་པའི་བོད་མི་ཡོངས་ལ་ཐེངས་འདིའི་རང་བྱུང་གནོད་འཚེ་ཐེབས་པའི་ས་ཁུལ་ལ་རོགས་སྐྱོར་བྱེད་དགོས་པའི་གསལ་བསྒྲགས་ཤིག་ཀྱང་སྤེལ་ཡོད་པ་དང༌། བོད་མི་ཚོ་བཙན་བྱོལ་བ་ཆགས་ནས་མི་ལོ་ ༤༠ རིང་རྒྱ་གར་གཞུང་དང་མི་མང་གི་མཐུན་འགྱུར་རོགས་རམ་གནང་བར་བཀའ་དྲིན་དང༌། གནོད་འཚེ་ས་ཁུལ་གྱི་མི་མང་ལ་གདུང་སེམས་མཉམ་སྐྱེད་དང་མཐུན་སྒྲིལ་མཉམ་གནས་མཚོན་ཕྱིར་ཕྱི་ཚེས་ ༣༠ མ་འགྱངས་པར་བོད་གཞུང་ལྡི་ལི་སྐུ་ཚབ་དོན་གཅོད་ཁང་དུ་རོགས་དངུལ་འབྱོར་དགོས་པའི་རེ་སྐུལ་གནང་ཡོད་པ་རེད།
 
ཐེངས་འདིའི་རང་བྱུང་ཆུ་ལོག་གི་གནོད་འཚེས་རྒྱ་གར་གྱི་མི་མང་ས་ཡ་ ༣ ལྷག་ལ་གནོད་འཚེ་བྱུང་ཡོད་པ་མ་ཟད། བལ་ཡུལ་ལྷོ་ཕྱོགས་ས་ཁུལ་གྱི་མི་མང་ཁྲི་ ༦ ལྷག་ལ་སྡོད་གནས་སོགས་ཀྱི་དཀའ་ངལ་འཕྲད་ཀྱིན་ཡོད་པ་རེད།