མཛད་པ་པོའི་རྣམ་ཐར་མདོར་བསྡུས།
དབྱངས་ལྡན་རིག་པའི་འདོད་འཇོ་ནི་རབ་བྱུང་བཅོ་ལྔ་པའི་ལྕགས་ཕོ་ཁྱི་ལོ་སྟེ་སྤྱི་ལོ་ ༡༩༡༠ ལོར་མདོ་སྨད་རྨ་ཆུའི་འགྲམ་གྱི་ཞུན་ཧྭ་རྫོང་དུ་སྐུ་འཁྲུངས། རབ་བྱུང་བཅུ་དྲུག་པའི་ཤིང་མོ་གླང་ལོ་སྟེ་སྤྱི་ལོ་༡༩༨༥ལའི་ཟླ་བ་དྲུག་པར་བླ་བྲང་བཀྲ་ཤིས་འཁྱིལ་དུ་སྐུ་གཤེགས། དགུང་ལོ་བདུན་པར་རབ་ཏུ་བྱུང་སྟེ་སངས་རྒྱས་ཀྱི་བསྟན་པའི་ཆོས་སྒོར་ཞུགས། ཁོང་གིས་འཇིགས་མེད་དམ་ཆོས་རྒྱ་མཚོ་གཙོ་མཛད་པའི་དགེ་བའི་བཤེས་གཉེན་རིག་པའི་དབང་ཕྱུག་མང་པོར་བསྟེན་ཏེ། ཐུན་མོང་གི་རིག་གནས་སྤྱི་དང༌། སྒོས་སུ་གཞུང་པོད་ལྔ་ལ་སྦྱངས་པ་མཛད་ནས། གཞུང་ལུགས་རྒྱ་མཚོའི་ཕ་རོལ་ཏུ་ཕྱིན་ཏེ་མཁས་པའི་གྲགས་པ་མདོ་དབུས་ཁམས་གསུམ་དུ་ཁྱབ། སྒྲ་རིག་པ་བསླབས་པའི་ཀུན་བཤད་ཀྱི་མཚན་ལ་དབྱངས་ལྡན་རིག་པའི་འདོད་འཇོ་ཞེས་གསོལ། དགུང་ལོ་ཞེ་གསུམ་པར་སྤྱི་ལོ་༡༩༥༣མཚོ་སྔོན་ཞིང་ཆེན་རྩོམ་བསྒྱུར་ཨུ་ཡོན་ལྷན་ཁང་གི་འགན་ཁུར་བཞེས་ཤིང་སྒྱུར་རྩོམ་གྱི་མཛད་པ་གནང་བ་མང༌། ཀྲོའུ་ཙུང་ལིས་སྒོས་སུ་ཆོག་མཆན་གནང་བའི་གོ་གནས་ཀྱི་ཡི་གེ་དང་བཅས་མཚོ་སྔོན་ཞིང་ཆེན་མི་དམངས་ཨུ་ཡོན་ལྷན་ཁང་གི་གཞུང་ལས་ཁང་གི་ཀྲུའུ་རིན་གཞོན་པའི་འགན་ཁུར་བཞེས། དགུང་ལོ་ཞེ་དགུ་ནས་ང་བཞི་བར་མཚོ་སྔོན་མི་རིགས་སློབ་གྲྭ་ཆེན་མོའི་དགེ་རྒན་མཛད་མྱངས། རིག་གནས་གསར་བརྗེའི་ནང་དུ་བཙོན་ལའང་བཞུགས་མྱོང༌། དགུང་ལོ་རེ་བརྒྱད་པར་སྤྱི་ལོ་༡༩༧༨ནུབ་བྱང་མི་རིགས་སློབ་གྲྭ་ཆེན་མོར་ཕེབས་ནས་དགེ་རྒན་མཛད། ཀན་སུའུ་ཞིང་ཆེན་ནང་བསྟན་མཐུན་ཚོགས་ཀྱི་ཧུའུ་ཀྲང་གཞོན་པ་དང༌། ཀན་སུའུ་ཞིང་ཆེན་སྲིད་གྲོས་ཨུ་ཡོན་ལྷན་ཁང་གི་ཨུ་ཡོན། ཀྲུང་གོ་མི་རིགས་སྐད་རིགས་སློབ་ཚོགས་ཀྱི་ལས་འཛིན་པ། ཀྲུང་གོ་ནང་བསྟན་མཐུན་ཚོགས་ཀྱི་ལས་འཛིན་པ་བཅས་ཀྱི་གོ་གནས་བཞེས་མྱོང༌། མདོར་ན་ཁོང་གི་སྐུ་ཚེ་གང་བོར་མི་རིགས་སློབ་གསོའི་ལས་འགན་མཛད་ནས་དུས་འདའ་བར་མཛད་དོ། ཁོང་གི་སློབ་མ་ནི་སྤྱི་གངས་ཅན་བོད་དང༌། སྒོས་སུ་མདོ་སྨད་ཀྱི་ལས་རིགས་སོ་སོའི་ཐོག་ཏུ་མ་ཁྱབ་པ་མེད། ཁོང་གི་གསུང་རྩོམ་ནི་རྣམ་ཐར་དང༌། ལོ་རྒྱུས། དམ་ཆོས། བསླབ་བྱ། སྐར་རྩིས། སྙན་ངག སུམ་རྟགས་དག་གསུམ། ཡིག་གཟུགས་འདྲ་མིན་གྱི་མ་ཕྱི་བཅས་ཆོས་ཚན་ལྔ་བཅུ་ལྷག་བཞུགས་སོ།།
༼ཀ༽
སྐར་མ་པ་སངས་དུང་གི་མདོག་ལྟར་དཀར། །སྐོར་ཚན་ཕྱེ་སྟེ་ཡུལ་གྲུའི་མཐའ་ལ་བསྐོར། །སྐུ་མཆོག་ཁྱོད་ཀྱི་ཕྱག་ནི་དཀུ་ལ་བརྟེན། །ཕག་ཏུ་བསྐུངས་ནས་རྐོང་བུའི་སྣོད་རྣམས་ཁྱེར། །ཐོབ་པའི་སྐལ་བ་བསྐལ་པའི་བར་དུ་བསགས། །སྲེད་པའི་བརྐམ་པ་ཉི་མས་བསྐམ་མི་འགྱུར། ། ་་་་་་་་་་་་་་་་་ འཕྲོས་འོག་གི་འབྲེལ་ཐག་ལ་བསྣུན་ཏེ་ཀློག་རོགས།
