མཛད་པ་པོའི་རྣམ་ཐར་མདོར་བསྡུས།
ཁོང་ནི་རབ་བྱུང་བཅུ་གསུམ་པའི་ས་མོ་ཡོས་ལོ་སྟེ་སྤྱི་ལོ་༡༧༥༩ལོར་མདོ་སྨད་ཨ་ལག་ཤར་སོག་པོའི་རིགས་སུ་སྐུ་འཁྲུངས། འདས་ལོ་མི་གསལ། ཁོང་གཞོན་དུའི་དུས་ནས་རིག་པའི་གནས་རྣམས་སྦྱོང་བ་ལ་དོན་གཉེར་ལྷག་པར་ཆེ་བས་དཀའ་ངལ་བརྒྱ་ཕྲག་ཁྱད་དུ་བསད་ནས་དབུས་སུ་ཕེབས་ཏེ་འབྲས་སྤུངས་སྒོ་མང་གྲྭ་ཚང་དུ་ཞུགས། དབུ་ཕར་འདུལ་མཛོད་ཚད་མ་བཅས་ཀྱི་གཞུང་བཀའ་པོད་ལྔར་གནས་བསམ་ནན་སྨིན་མཛད། ལྷ་ལྡན་སྨོན་ལམ་ཆེན་མོར་དམ་བཅའ་བཞག་ནས་དགེ་བཤེས་ལྷ་རམས་པའི་མཚན་བཏགས་བཞེས། ཀློང་རྡོལ་བླ་མ་ངག་དབང་བློ་བཟང་དང༌། དཀའ་ཆེན་ཡེ་ཤེས་རྒྱལ་མཚན་སོགས་ལས་དབང་ལུང་མན་ངག་མང་དུ་ཞུས་ཤིང༌། ཁྱད་པར་དུ་ཀློང་རྡོལ་བླ་མ་ལས་ཐ་སྙད་རིག་གནས་སྐོར་ལ་གནས་སྦྱོང་དཔྱིས་ཕྱིན་པ་མཛད། དེ་ནས་རང་ཡུལ་ཨ་ལག་ཤའི་གཡོན་དགོན་མི་ཕམ་ཆོས་གླིང་དུ་ཕེབས་ནས་འཆད་རྩོད་རྩོམ་གསུམ་གྱི་དུས་འདའ་བར་མཛད། དགུང་ལོ་ང་གཅིག་ཏུ་ཕེབས་སྐབས་བླ་བྲང་བཀྲ་ཤིས་འཁྱིལ་དུ་བྱོན་ཏེ་རྡོ་རམས་པ་ལྷ་ཞེ་ལས་ཁམས་སྡེ་དགེ་དཔལ་སྤུངས་ཀྱི་ཁྲིད་རྒྱུན་ལྟར་སྙན་ངག་ལེའུ་གསུམ་པོ་རྫོགས་པར་གསན་ཅིང་རྩོམ་རྒྱུགས་ཀྱང་ལེགས་པར་ཕུལ། དེ་ནས་པེ་ཅིང་ཡུང་དགོན་དུ་བྱོན་ནས་དད་ལྡན་སློབ་མ་རྣམས་ལ་ཆོས་ཀྱི་སྦྱིན་པ་ཅི་འདོད་བསྩལ། དགུང་ལོ་གྱ་གཅིག་པར་༼བློ་སྦྱོང་དོན་བདུན་མའི་གཏམ་ཐེག་མཆོག་ཉེ་ལམ༽བརྩམས། ཁོང་ནི་སོག་པོའི་རིགས་སུ་སྐུ་འཁྲུངས་ཀྱང་བོད་ཡུལ་དུ་ཐོས་བསམ་མཛད་ཅིང་བོད་ཀྱི་རིག་གནས་ཀུན་ལ་ཐུགས་དཔྱད་ཡུན་རིང་མཛད་པའི་རྐྱེན་གྱིས་བོད་ཀྱི་བརྡ་སྤྲོད་རིག་པ་དང་སྙན་ངག་སོགས་ས་མཁས་དབང་གོང་མ་རྣམས་ཀྱི་གསུང་རྩོམ་ལ་ཞིབ་བསྡུར་དང་དགག་སྒྲུབ་ཀྱི་སྒོ་ནས་ཚིག་ཉུང་ལ་དོན་འདུས་པ་མང་པོ་བརྩམས་ཡོད་པས་ཕྱི་རབས་བོད་ལ་མཛད་རྗེས་ཆེན་པོ་བཞག་ཡོད། ཁོང་གི་གསུང་རྩོམ་ནི་༼སུམ་རྟགས་འགྲེལ་བ་༽དང༌། ༼ཡི་གེའི་བཤད་པ༽། ༼བོད་ཀྱི་བརྡ་གསར་རྙིང་གི་ཁྱད་པར༽། ༼དག་ཡིག་གཅེས་བསྡུས༽། ༼སྙན་ངག་མེ་ལོང་གི་དཔེར་བརྗོད༽བཅས་ཆོས་ཚན་སུམ་ཅུ་སོབདུན་མཛད་ཡོད་པ་དེ་པོ་ཏི་གཉིས་སུ་བསྡུས་ཏེ་སྐུ་འབུམ་དགོན་དུ་ཤིང་པར་བརྐོས་ཡོད།
༄༅ ། །ཤིས་བརྗོད་ཀྱི་རྒྱན།རྒྱལ་ཀུན་འཕྲིན་ལས་མཛེས་སྡུག་ལྷ་མོ་ཡི། །རྣམ་པའི་གར་བསྒྱུར་རྗེ་བཙུན་སྒྲོལ་མ་དང༌། །གཉིས་མེད་ཀློང་རྡོལ་ངག་དབང་བློ་བཟང་ལ། །སྐྱབས་སུ་མཆེའི་ཀུན་ཏུ་ཤིས་གྱུར་ཅིག །ངོ་བསྟོད་ཀྱི་དཔེ།དུས་གསུམ་རྒྱལ་བ་མཚན་དཔེ་ཡོངས་སུ་རྫོགས། །བདག་གི་བཤེས་གཉེན་མགྲིན་པའི་མདུད་བཀྲོལ་ཙམ། །དེ་ལྟ་ན་ཡང་རྒྱལ་བ་ཀུན་དངོས་དང༌། །གཉིས་སུ་མེད་པར་ཤེས་ནས་དད་པས་བསྟེན། །ཡོངས་བརྗེས་ཀྱི་རྒྱན།ལུས་དང་ལོགས་སྤྱོད་དུས་གསུམ་དགེ་ཚོགས་སོགས། །བདག་ཅི་བདག་མཁྱེན་པའི་གཏེར་ལ་དབུལ། །དེས་ཀྱང་སྐུ་གསུང་ཐུགས་ཀྱི་དངོས་གྲུབ་མཆོག །ལུས་པ་མེད་པར་འགྱངས་མིན་སྩོལད་ཅིག་གུ། ། ་་་་་་་་་་་་་ འཕྲོས་གཤམ་གྱི་འབྲེལ་ཐག་ལ་བསྣུན་ཏེ་གཟིགས་རོགས།
