ས་མཐའི་རྣམ་དབྱེ།

མཛད་པ་པོའི་རྣམ་ཐར་མདོར་བསྡུས།
   
    འཇུ་མི་ཕམ་པ་ནི་རབ་བྱུང་བཅུ་བཞི་པའི་མེ་ཕོ་རྟ་ལོ་སྟེ་སྤྱི་ལོ་༡༨༤༦ལོར་ཁམས་སྡེ་དགེ་ཟླ་ཆུའི་ཉེ་འདབས་ཡ་ཆུ་དིང་ཆུང་གི་ས་ཆར་ཡབ་མགོན་པོ་དར་རྒྱས་དང་ཡུམ་སྲིང་ཆུང་གཉིས་ཀྱི་སྲས་སུ་སྐུ་འཁྲུངས། རབ་བྱུང་བཅོ་ལྔ་པའི་ཆུ་མོ་བྱི་ལོ་སྟེ་སྤྱི་ལོ་༡༩༡༢ལོར་འཇུ་རི་ཁྲོད་དུ་སྐུ་གཤེགས། ཁོང་དགུང་ལོ་དྲུག་པའི་སྟེང་ནས་ཡབ་དང་ཞང་པོའི་དྲུང་དུ་ཡི་གེའི་འབྲི་ཀློག་དང་རྩིས་དཀར་ནག་གི་སྔོན་འགྲོ་བཅས་ལ་སྦྱངས། དགུང་ལོ་བཅུ་གཉིས་སྟེང་ནས་རྙིང་མའི་དགོན་པ་གསང་སྔགས་ཆོས་གླིང་དགོན་དུ་ཕེབས་ཏེ་གྲྭ་བཙུན་མཛད། དགུང་ལོ་བཅོ་བརྒྱད་པའི་དུས་སུ་ཞང་པོ་དང་འགྲོགས་དབུས་ལྷ་གདན་དུ་གནས་སྐོར་ལ་ཕེབས། ལོ་གཅིག་ཙམ་གྱི་རྗེས་ནས་ཕྱིར་སྡེ་དགེ་ལ་ལོག་སྟེ་འཇམ་དབྱངས་མཁྱེན་བརྩེ་དབང་པོ་དང༌། དབང་ཆེན་དགྱེས་རབ་རྡོ་རྗེ། དཔལ་སྤྲུལ་འཇིགས་མེད་ཆོས་དབང་སོགས་མཁས་ཆེན་དུ་མ་སློབ་དཔོན་དུ་བསྟེན་ནས། ཐུན་མོང་དང་མཐུན་མོང་མ་ཡིན་པའི་གཙུག་ལག་བརྒྱ་ཕྲག་མང་པོར་སྦྱངས་པ་མཐར་ཕྱིན་པར་མཛད་ཅིང༌། བཅུ་ཕྲག་རིག་པའི་གནས་ཀྱི་བདག་པོར་གྱུར། ཁོང་གི་གསུང་རྩོམ་ནི་པོ་ཏི་སུམ་ཅུ་སོ་གཉིས་ཙམ་ད་ལྟ་སྡེ་དགེའི་པར་ཁང་དུ་བཞུགས་ཡོད། དེ་དག་གི་ཁྲོད་ནས་༼རྒྱལ་པོ་ལུགས་ཀྱི་བསྟན་བཅོས༽དང༌། ༼སྙན་འགྲེལ་དབྱངས་ཅན་དགྱེས་པའི་རོལ་མཚོ༽། ༼མཁས་འཇུག༽༼ས་མཐའི་རྣམ་གྲངས་མདོ་མཚོན༽སོགས་པར་སྐྲུན་བྱས་ཡོད་པས་སློབ་གྲྭའི་རིམ་པ་ཁག་གི་སློབ་དེབ་ཏུ་གྱུར་འདུག ཁོང་གི་སྐུ་ཚེ་ཧྲིལ་བོར་འཆད་རྩོད་རྩོམ་གསུམ་གྱི་བྱ་བས་བསྟན་འགྲོ་ལ་ཕན་པའི་དོན་རྒྱ་ཆེན་པོ་བསྒྲུབས་ཡོད་ཅིང༌། ཁྱད་པར་དུ་བཟོ་དང་གསོ་བ། རྩིས་རིག་བཅས་ལ་སྔ་ན་མེད་པའི་མཛད་རྗེས་ཡོད་གཤིས། གངས་ཅན་མཁས་པ་ཡོངས་ཀྱིས་སྤྱི་བོའི་གཙུག་ཏུ་བཀུར་བ་དང༌། བསྔགས་བརྗོད་ཀྱི་མེ་ཏོག་ཕྱོགས་ཀྱི་བུ་མོའི་རྣ་བར་འཕྱང་འཕྲུལ་ཉིད་དུ་གྱུར། ཁོང་གི་སློབ་མ་གྲགས་ཆེ་བ་ནི་རྡོ་སྤྲུལ་རྡོ་རྗེ་དང༌། གཏེར་སྟོན་བསོད་རྒྱལ། ཀཿཐོག་སི་ཏུ་ཆོས་ཀྱི་རྒྱ་མཚོ་སོགས་མཁས་གྲུབ་དམ་པ་མང་དུ་མཆིས་སོ།།

འཇམ་དཔལ་དབྱངས་དང་དབྱངས་ཅན་ངག་གི་ལྟར། །བཏུད་ནས་ས་མཐའི་སྦྱོར་ཚུལ་མདོ་ཙམ་བརྗོད། །ན་ར་ལ་གསུམརྗེས་སུ་ད་དྲག་དང༌། །དེ་ལྷག་ད་འ་ས་གསུམ་མ་གཏོགས་པའི། །ག་ང་བ་མ་བཞི་ཡི་རྗེས་རྣམས་ལ། །མི་ནོར་ཕྱིར་དུ་ས་མཐའ་འདི་ལྟར་མཛད། །དུས་ཀྱི་དབང་དུ་འདས་པའི་ཚིག་རྣམས་དང༌། །སྐུལ་ཚིག་རྣམས་ལ་ས་མཐའ་རྟག་ཏུ་ཐོབ། །  ་་་་་་་་ འཕྲོས་གཤམ་གྱི་འབྲེལ་ཐག་ལ་བསྣུན་ཏེ་གཟིགས་རོགས།

tibettimes.tibethosting.com/upload/articles/10.pdf