༧གོང་ས་མཆོག་གི་དམིགས་གསལ་གསུང་འཕྲིན་གྱི་དགོངས་དོན་ལྟར། བོད་ཀྱི་རྒྱལ་ཡོངས་དམིགས་གསལ་ཚོགས་ཆེན་དེ་ཕྱི་ཟླ་ ༡༡ ཚེས་ ༡༧ ཉིན་ནས་ཚེས་ ༢༢ བར་འཚོགས་རྒྱུའི་ཐག་གཅོད་གནང་ཡོད་པ་རེད། ༧གོང་ས་མཆོག་གི་གསུང་འཕྲིན་དང༌། བཀའ་སྤྱི་གཉིས་ནས་ཚོགས་མི་གོ་སྒྲིག་བྱེད་སྟངས། གཞིས་ལུས་རྒྱ་ཆེའི་མི་མང་བྱེད་སྟངས། དེ་བཞིན་ཚོགས་ཆེན་འདིའི་མཐའ་མའི་གྲུབ་འབྲས་གང་འདྲ་ཞིག་འབྱུང་མིན་སོགས་ཀྱི་ཐད་བཞུགས་སྒར་གྱི་མི་སྣ་རེ་ཟུང་དང་གཞུང་འབྲེལ་མ་ཡིན་པའི་ཚོགས་གཙོ་འགའི་བསམ་ཚུལ་བླངས་པ་ཡིན།
བོད་ཀྱི་རང་བཙན་འཐབ་རྩོད་པ་ལྷ་བཟང་ཚེ་རིང་ལགས་ཀྱིས། “༧གོང་ས་མཆོག་གི་དམིགས་གསལ་གསུང་འཕྲིན་བཞིན་རྒྱལ་ཡོངས་ཚོགས་ཆེན་ཞིག་འཚོགས་ཀྱི་ཡོད་པ་རེད་ཟེར་ནས་རྒྱ་གར་ཚགས་པར་སོགས་ནས་མཐོང་བྱུང༌། ཡིན་ན་ཡང་ང་ལྟ་བུ་ཡིན་ན་ཚོགས་ཆེན་དེའི་དམིགས་ཡུལ་གསལ་བོ་ཞིག་ཤེས་མ་སོང༌། སྲིད་བྱུས་གཏན་འབེབས་བྱེད་རྒྱུ་ཡིན་ནམ་ཡང་ན། བོད་མི་མང་གི་རེ་བ་དང་འདོད་པ་ག་རེ་རེད་ཟེར་ནས་འཚོགས་རྒྱུ་རེད་དམ། ཡིན་ན་ཡང་བོད་མི་མང་གི་རེ་བ་དང་འདོད་པ་ངོ་མ་དེ་ད་དུང་ཡང་བོད་གཞུང་གིས་མ་ཤེས་ན་དེ་ཁྱད་མཚར་རེད། བོད་མི་མང་པོ་ག་རེ་བྱེད་ནས་ཤི་སོང་བ་རེད། ལོ་རེ་རེ་དགའ་ཉེ་སྤུན་མཆེད་བཞག་སྟེ་རང་སྲོག་མེ་མདར་གཏད་ནས་སྐྱབས་བཅོལ་ལ་ཡོང་དོན་ག་རེ་རེད། འདི་ཚང་མ་བོད་མི་ཚོ་རྒྱ་མི་དང་མཉམ་དུ་འདུག་འདོད་མེད་པས་རེད། བཙན་དབང་འོག་གི་མི་མང་གི་རེ་བ་དེ་གཞུང་གིས་མ་ཤེས་ན་དེ་ཡ་མཚར་རེད། གལ་ཏེ་ཚོགས་ཆེན་འདི་ལས་འགུལ་སྤེལ་ཕྱོགས་སྒང་ལ་ཡིན་ན། ང་ཚོར་དམིགས་ཡུལ་གཏན་འབེབས་མེད་པར་ལས་འགུལ་སྤེལ་ནས་ག་རེ་བྱེད་དགོས་པ་རེད། ཉམ་ཆུང་གི་ང་ལྟ་བུ་ཡིན་ན་ཚོགས་ཆེན་དེའི་དམིགས་ཡུལ་གསལ་བོ་ཤེས་མ་སོང༌། ང་ལྟ་བུ་ཡིན་ན་གཞུང་ཞབས་ཚོས་གཞུང་གི་ཐག་གཅོད་ཀྱི་བཀའ་ལ་ཉན་དགོས་དུས་གཞུང་ཞབས་གཅིག་གཉིས་ཀྱི་ཚབ་ལ་མི་མང་གཅིག་གཉིས་རེ་ཕེབས་ཐུབ་ན་ཡག་པོ་རེད་བསམ་གྱིན་ཡོད། ངས་དང་པོ་ནས་དབུ་མའི་ལམ་འའདི་འགྲིག་གི་མི་འདུག་ལབ་དགོས་པའི་རྒྱུ་མཚན་གཙོ་བོ་ནི། གཞིས་ལུས་མི་མང་གིས་རང་བཙན་གྱི་ཆེད་དུ་རང་སྲོག་བློས་གཏོང་གི་ཡོད་བའི་རྐྱེན་གྱིས་ཡིན། ང་ཚོས་འོས་སྒམ་ནང་ལ་ཤོག་བུ་རེ་བླུགས་ནས་ཐག་གཅོད་རེ་བྱེད་ཀྱི་ཡོད་པ་རེད། གཞིས་ལུས་མི་མང་གིས་སྲོག་གི་འགྲོ་སོང་བཏང་ནས་རང་བཙན་དགོས་ཟེར་གྱི་ཡོད་པ་རེད། ཐོག་དང་པོ་བཙན་བྱོལ་ལ་ཡོང་དུས་རང་བཙན་བསམ་ནས་ཡོང་བ་རེད། དམིགས་ཡུལ་འདི་འགྱུར་བ་གཏོང་མཁན་༧རྒྱལ་བ་རིན་པོ་ཆེ་རེད། འགྱུར་བ་བཏང་བ་འདི་ལ་ཡང་བསྐྱར་འགྱུར་བ་གཏོང་མཁན་ཡང་༧རྒྱལ་བ་རིན་པོ་ཡིན་དགོས་ཀྱི་ཡོད་པ་རེད། དེ་ཡིན་དུས་ང་རང་གི་བསམ་ཚུལ་ཡིན་ན་མཐའ་མ་ཐུག་ས་དེ་༧རྒྱལ་བ་རིན་པོ་ཆེ་རེད་བསམ་གྱི་ཡོད། དབང་ཚད་དང་འགན་གཉིས་ཀ་༧རྒྱལ་བ་རིན་པོ་ཆེ་ལ་འདུག ངས་ད་སྐབས་བོད་དོན་སྒང་ལ་ག་རེ་བསམ་གྱི་ཡོད་པ་དེ་དྲང་པོ་བཤད་ཀྱི་ཡོད། མི་མང་དགའ་བོ་ཡོང་ཐབས་དང༌། རང་གི་ཁེ་ཕན་གྱི་ཆེད་དུ་སྙན་པོ་ཞུ་ཤེས་པ་མི་འདུག ངས་ག་རེ་བསམ་པ་དེ་སྡུག་པ་ལས་ཡག་པོ་མ་རེད། དེ་ཡིན་དུས་ངས་ག་དུས་ཡིན་ཡང་ངའི་བསམ་ཚུལ་ནོར་བར་ཤོག་ལབ་ཀྱི་ཡོད། ཚོགས་འདུ་ཚོགས་ནས་འདུག་ཁོམ་ཡོད་པ་མ་རེད། བོད་མི་མང་གི་མངོན་འདོད་ག་རེ་ཡིན་མིན་གསལ་བོ་ཤེས་ཡོད་པ་རེད། དུས་ཚོད་རྫོགས་འགྲོ་གི་ཡོད་པ་རེད། བོད་གཞུང་དང་༧རྒྱལ་བ་རིན་པོ་ཆེ་ཡིས་དངོས་ཡོད་གནས་ཚུལ་ལ་དགོངས་བཞེས་གནང་རོགས།” ཞེས་གསུངས་སོང༌།
གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཀྱིས། “ང་ཚོས་གནད་དོན་འདིའི་སྒང་ལ་དོ་སྣང་བྱེད་བཞིན་ཡོད་ལ། བོད་ནང་གི་གནས་སྟངས་ལ་བསམ་བློ་བཏང་ཚེ་ཚོགས་འདུ་འདི་ཧ་ཅང་གལ་ཆེན་པོ་རེད། ༧གོང་ས་མཆོག་གིས་དབུ་མའི་ལམ་ནས་ཐབས་ཤེས་ཡོད་རྒུ་གནང་ཡོད་པ་རེད། ཡིན་ན་ཡང་མི་མང་གི་མངོན་འདོན་ངོ་མ་ཅོག་ཙེ་སྒང་ལ་སྤུངས་ཏེ་གོ་བསྡུར་བྱེད་གལ་ཆེ་བ་དགོངས་ནས་གསུང་འཕྲིན་འདི་གནང་ཡོད་པ་རེད། ད་ལོའི་སྒེར་ལངས་ཁྲོད་ནས་བོད་ནང་གི་གཞིས་ལུས་མི་མང་གི་མངོན་འདོན་ག་རེ་ཡིན་མིན་གསལ་བོ་ཆགས་བསྡད་ཡོད་པ་རེད། གཞིས་ལུས་མི་མང་གི་འབོད་སྒྲ་དེ་རང་བཙན་དང་༧གོང་ས་མཆོག་བོད་དུ་གདན་འདྲེན་ཞུ་དགོས་པ་དེ་རེད། དེ་ཡིན་དུས་ཚོགས་ཞུགས་པ་དེ་ཚོས་མི་མང་གི་མངོན་འདོན་ག་རེ་ཡིན་མིན་ཤེས་དགོས་ལ། མངོན་འདོན་དེ་ཁྱེར་ནས་ཚོགས་འདུའི་ཐོག་ལ་མི་མང་གི་ངོ་ཚབ་བྱས་ནས་ཞུགས་དགོས་པ་གལ་ཆེན་པོ་རེད།” ཅེས་གསུངས་བྱུང༌།
བུད་མེད་ཚོགས་པའི་ཚོགས་གཙོ་བུ་མོ་ཚེ་རིང་ལགས་ཀྱིས། “མི་མང་གིས་༧གོང་ས་མཆོག་ལ་སྐུ་དབང་ཕུལ་བས་ད་ལྟ་བར་ང་ཚོའི་གཞུང་འདི་དབུ་མའི་ལམ་ལ་ཞུགས་ཡོད་པ་རེད། ༧གོང་ས་མཆོག་གིས་དབུ་མའི་ལམ་ནས་གང་ཡོང་གནང་ཡོད་པ་རེད། ཡིན་ན་ཡང་ད་ལྟའི་ཆར་༧གོང་ས་མཆོག་གིས་བོད་ནང་གི་ཛ་དྲག་གི་གནས་སྟངས་ལ་དགོངས་བཞེས་གནང་ནས་འགན་འདི་མི་མང་ལ་སྤྲད་དེ་གསུང་འཕྲིན་གནང་ཡོད་པ་རེད། ཚོགས་མི་གོ་སྒྲིག་བྱེད་སྟངས་ལ་གང་ཡོང་གནང་ཡོད་པ་རེད། ཡིན་ན་ཡང་ཚོགས་པ་ཆེ་ཆུང་གི་ངོས་ནས་ཚོགས་མི་གོ་སྒྲིག་བྱེད་ན་ཡག་པོ་འདུག་བསམ་གི་ཡོད། མི་མང་ལ་༧གོང་ས་མཆོག་གིས་འགན་འདི་གནང་ཡོང་བའི་སྐབས་སུ། མི་མང་གིས་འགན་དེ་ལྷག་བསམ་རྣམ་དག་གིས་ལེན་དགོས་པ་རེད་ལ། ཚོགས་ཞུགས་པ་ཚོས་ཀྱང་ད་ལྟ་ནས་རང་རང་གི་ཚོགས་མི་དང་བགྲོ་གླེང་བྱས་ཏེ། ཚོགས་ཐོག་ལ་རང་གི་བསམ་ཚུལ་མ་ཡིན་པར། མི་མང་གི་བསམ་ཚུལ་འཁྱེར་ཡོང་དགོས་པ་གལ་ཆེན་པོ་རེད། བོད་ནང་གི་གཞིས་ལུས་མི་མང་གི་བསམ་ཚུལ་གྱི་ཆ་ཤས་ལེན་སྟངས་དེ་བོད་གཞུང་གིས་ད་ལྟ་ནས་དྲ་ལམ་དང་རླུང་འཕྲིན་སོགས་བརྒྱུད་ནས་འབྲེལ་ལམ་ཅིག་འཚོལ་དགོས་ཀྱི་ཡོད་པ་རེད། ཡིན་ན་ཡང་གཞིས་ལུས་མི་མང་གི་རེ་བ་དང་མངོན་འདོད་དེ་ད་ལོའི་སྒེར་ལངས་ཀྱི་འབོད་སྒྲ་ལས་གསལ་བོ་བྱས་ཡོད་པ་རེད་ལ། གཞིས་ལུས་མི་མང་དང་བཙན་བྱོལ་མི་མང་ལ་ཐུན་མོང་གི་མངོན་འདོད་ཅིག་ཡོད་པ་ནི་༧གོང་ས་མཆོག་བོད་ལ་གདན་འདྲེན་གནང་དགོས་པ་དེ་རེད༌། གང་ལྟར་ཚོགས་ཆེན་འདིའི་རྗེས་ནས་བོད་ཀྱི་མ་འོངས་པའི་རྩ་དོན་འཐབ་རྩོད་ཀྱི་ལམ་ཀ་ལ་གསལ་ཁ་ཞིག་འགྲོ་གིན་རེད་བསམ་གྱི་ཡོད་ལ་འགྲོ་དགོས་པ་ཡང་རེད།” ཅེས་གསུངས་བྱུང༌།
རྒྱལ་ཡོངས་དམངས་གཙོ་ཚོགས་པའི་ཚོགས་གཙོ་འཆི་མེད་གཡུང་དྲུང་གིས། “ང་རང་གི་བསམ་ཚུལ་ཡིན་ན་ཚོགས་ཆེན་འདི་རྒྱུད་ནས་བོད་གཞུང་གི་ལངས་ཕྱོགས་ལ་འགྱུར་བ་ཅིག་འགྲོ་ན་བསམ་གྱི་ཡོད་ལ། འགྲོ་དགོས་པ་ཡང་རེད་བསམ་གི་ཡོད།་ ད་ལྟ་ནས་བརྒྱུད་ལམ་གང་རུང་གིས་བསམ་ཚུལ་བསྡུ་བར་མགོ་བརྩམས་དགོས་མོད། མ་གཞི་གཞིས་ལུས་མི་མང་གི་མངོན་འདོད་དེ་ད་ལོའི་སྒེར་ལངས་སྐབས་སུ་གསལ་བོ་ཆགས་ཡོད། རང་བཙན་གྱི་འབོད་སྒྲ་ཤུགས་ཆེན་པོ་རེད། ༧གོང་ས་མཆོག་བོད་དུ་རྒྱལ་ཁའི་ངང་གདན་འདྲེན་ཞུ་ཐབས་ཀྱང་རང་བཙན་ལས་ལྷག་པ་ཡོད་པ་མ་རེད། དམངས་གཙོ་ཡི་ཆ་ནས་བོད་ནང་གི་གཞིས་ལུས་མི་མང་གི་མངོན་འདོད་གལ་ཆེན་རེད་བསམ་གྱི་ཡོད་ལ་བཙན་བྱོལ་བོད་མིས་ནར་ནར་འགྱངས་འགྱངས་བྱས་ནས་མུ་མཐུད་དུ་འདུག་མི་རུང་བསམ་ཀྱི་ཡོད། གང་ལྟར་ཚོགས་ཆེན་འདིའི་འཇུག་འབྲས་ལ་འགྱུར་བ་ཞིག་ཡོང་བའི་རེ་བ་ཡོད།” ཅེས་གསུངས་བྱུང༌།
བོད་རང་དབང་སློབ་ཕྲུག་ཚོགས་པའི་ཚོགས་གཙོ་བསྟན་འཛིན་ཆོས་དབྱིངས་ཀྱིས། “ཚོགས་ཆེན་འདིའི་སྒང་ལ་དམིགས་གསལ་བོད་དོན་འཐབ་རྩོད་པ་སོགས་གདན་འདྲེན་ཞུ་དགོས་པ་གལ་ཆེན་པོ་རེད་ལ། བོད་མི་ཡོད་དོ་ཅག་གིས་ཚོགས་ཆེན་འདིའི་སྒང་ལ་ཆ་ཤས་ལེན་དགོས་པ་རེད་བསམ་གི་ཡོད། ཚོགས་ཆེན་འདི་གཞིས་ལུས་མི་མང་གི་བདེ་སྡུག་ལ་བསམ་བློ་བཏང་ནས་ཚོགས་དགོས་ལ། ད་ལོའི་སྒེར་ལངས་ཀྱིས་གཞིས་ལུས་མི་མང་གི་མངོན་འདོད་གསལ་བོ་བྱས་ཡོད་པ་རེད། གཞིས་ལུས་མི་མང་གི་སེམས་ཁོང་གི་རྨ་ཁ་དེ་གསར་བ་གསར་རྐྱང་རེད། བཙན་བྱོལ་བོད་མིའི་རྨ་ཁ་དེ་རྙིང་པར་གྱུར་ཡོད། ང་ཚོས་རྨ་ཁ་རྙིང་པ་འདིའི་ཚོར་བའི་ཐོག་ནས་བོད་ནང་གི་བོད་མིའི་སེམས་ཀྱི་རྨ་ཁ་གསར་བར་ཐག་གཅོད་བྱེད་མི་འོས་པས། ང་ཚོའི་ཚོགས་ཞུགས་པ་དེ་ཚོས་ངེས་པར་དུ་བོད་ནང་གི་བོད་མིའི་སེམས་ཀྱི་རྨ་ཁ་དང་ན་ཟུག་ལ་བསམ་བློ་བཏང་ནས། གཞིས་ལུས་མི་མང་གི་མངོན་འདོད་ངོ་མ་དེ་ཚོགས་ཆེན་སྒང་ལ་ཡོང་དགོས་པ་གལ་ཆེན་རེད།
དགུ་བཅུ་གསུམ་གྱི་ཚོགས་གཙོ་ངག་དབང་འོད་འབར་ལགས་ཀྱིས། “༧གོང་ས་མཆོག་གི་དམིགས་གསལ་གསུང་འཕྲིན་འདིས་ང་ཚོས་ནམ་རྒྱུན་ཁོང་གི་བཀའ་ལ་ལྷོད་གཡེང་ཤོར་གྱི་ཡོད་པའི་ཚོར་བ་བྱུང་སོང༌། ད་ཐེངས་མི་མང་གི་ངོས་ནས་འགན་ཆེན་པོ་ལེན་དགོས་ཀྱི་ཡོད་པ་རེད། ཚོགས་འདུ་འདིའི་སྒང་ལ་བོད་མི་མི་རེ་ངོ་རེ་ཡི་བསམ་ཚུལ་སླེབས་དགོས་པ་གལ་ཆེན་རེད་ལ། ཚོགས་འདུ་འདི་ཡང་གོང་འོག་གཉིས་ཀྱི་ཐོག་ནས་ཚོགས་ཏེ་བསམ་ཚུལ་མང་པོ་ཞིག་བསྡུ་ལེན་བྱེད་དགོས་པ་རེད་བསམ་གྱི་ཡོད། མི་མང་གང་མང་མཉམ་ཞུགས་བྱེད་ཐུབ་ན་རྗེས་ཕྱོགས་ཐག་གཅོད་ག་རེ་བྱེད་ཀྱང་ཟབ་སྦྱོང་སྤྲད་ནས་དུས་ཚོད་འཕྲོ་བརླག་གཏོང་དགོས་ཀྱི་ཡོད་པ་མ་རེད། གསར་འགྱུར་རྒྱུད་ལམ་ཁག་ནས་ཚོགས་ཆེན་འདིའི་དམིགས་ཡུལ་སོགས་གང་ཐུབ་ཁྱབ་བསྒྲགས་བྱེད་དགོས་པ་གལ་ཆེན་པོ་རེད་བསམ་གྱི་ཡོད། རྩ་དོན་ཐད་ནས་མ་འོངས་ལངས་ཕྱོགས་སོགས་ཀྱི་ཐད་ལ་གྲོས་བསྡུར་བྱེད་ཀྱི་ཡིན་ན། ༧གོང་ས་མཆོག་གིས་གསུངས་པ་བཞིན་བོད་ཀྱི་མ་འོངས་པའི་བདག་དབང་ངོ་མ་དེ་བོད་གཞིས་ལུས་མི་མང་གི་ལག་ན་ཡོད་པས། གཞིས་ལུས་མི་མང་གི་བསམ་ཚུལ་དམིགས་བསལ་དང་རྒྱ་ནག་གི་འོག་ན་ཕྱག་ལས་གནང་བཞིན་པའི་བོད་མི་དང༌། གཞོན་སྐྱེས་དེ་ཚོའི་བསམ་ཚུལ་གལ་ཆེན་རེད་བསམ་གི་ཡོད། གྲུབ་འབྲས་ཐོན་མིན་མི་ཤེས་ཀྱང་རེ་བ་ཆེན་པོ་བརྒྱབ་ཡོད།” ཅེས་གསུངས་བྱུང༌།
ཁ་སང་ངྷ་རམ་ཤྰ་ལའི་མི་རྒན་པ་ཁ་ཤས་སྐད་ཆ་བཤད་རྒྱུ་བྱུང་། ཁོང་ཚོས་གསུངས་པ་ལྟར་ན། གོང་ས་མཆོག་གིས་བོད་མི་ཚོར་བརྡ་ཞིག་བསྟན་ཡོད་པ་རེད་ལ། བརྡ་དེ་ནི་དབུ་མའི་ལམ་ཁོ་ནར་འགྱུར་བ་གཏོང་དགོས་མིན་ཙམ་མིན་པར་དེའི་ནང་དུ་དམིགས་བསལ་སྐུ་ཚབ་བརྗེ་བོ་རྒྱག་དགོས་མིན་ཡང་འདུས་ཡོད་ཟེར། ཡིན་ནའི། བོད་མི་ཚོ་ལྐུགས་དྲག་ནས་ཁོང་གི་དགོངས་པ་དངོས་ཤེས་ཀྱི་མེད་པ་འདྲ། དེ་བས། དབུ་མའི་ལམ་འགྲིག་གི་མེད་པ་རེད་དམ་དམིགས་བསལ་སྐུ་ཚབ་འཇོན་གྱི་མེད་རེད། འདིའི་ཐད་བོད་ནང་གི་བོད་མི་ཚོས་སྐུ་ཚབ་ཚོ་ག་དུས་ཡིན་ནའང་མགོ་བསྐོར་འོག་ཤོར་གྱི་འདུག་ཅེས་སྐུ་ཚབ་མ་འཇོན་པར་མཐོང་གི་ཡོད་ན།
ཕྱི་སྡོད་བོད་མི་ཚོས་གོང་ས་མཆོག་མ་འགྲིག་པར་མཐོང་གི་ཡོད་དམ་སྐུ་ཚབ་མ་འཇོན་པར་མཐོང་འདུག་གམ།
དེང་སྐབས་མི་ཚང་མས་ནམ་ལངས་ན་ས་རུབ་ན་འགྱུར་བ་ཞིག་དགོས་སྐོར་བཤད་གི་འདུག ཡིན་ནའང་འགྱུར་བ་གང་འདྲ་ཞིག་དགོས་སྐོར་སུས་ཀྱང་བཤད་གི་མི་འདུག ད་ནི་ཚང་མར་འགྱུར་བ་ཞིག་དགོས་པ་ཁ་མཐུན་གི་ཡོད་ན་གོམ་པ་གཉིས་པ་དེར་ཁ་མཐུན་མིན་ལྟ་དགོས་པར་འདོད།
ངའི་བསམ་ཚུལ་ཡིན་ན་ལམ་དབུ་མ་ནས་རང་བཙན་གྱི་ལམ་དུ་འགྲོ་གི་ཡིན་ལབ་ན་བྱབ་ཆུང་གི་སྐད་ཆ་ཆགས་གི་རེད། དེ་འདྲ་ཡིན་ན་དང་པོ་ནས་རང་བཙན་དོར་རྒྱུ་ཡོད་པ་མ་རེད། ལམ་དབུ་མ་འདི་༧གོང་ས་མཆོག་གིས་བཏོན་གནང་བ་བདེན་པ་རེད། ད་ནི་མི་དམངས་ཀྱིས་ཁར་ཉན་གི་མི་འདུག ང་ཚོ་ཕྱིར་རང་བཙན་གྱི་སྟེང་འགྲོ་གི་ཡིན་ཅེས་གསུང་སྲོལ་ཡོད་པ་མ་རེད་ལ། གསུང་གིའང་མ་རེད་སྙམ། བོད་ཀྱི་གནད་དོན་འདི་དུས་ཡུན་རིང་པོ་ཞིག་ལ་སེལ་མི་ཐུབ་པ་འདྲ་བས། ང་ཚོས་ཀྱང་ཕུགས་རྒྱང་རིང་པོར་བསམ་སྟེ། བོད་དོན་འདི་རྒྱལ་སྤྱིའི་གནད་དོན་ཞིག་ལ་བསྒྱུར་རྒྱུ་ནི་ཐེངས་འདིའི་ཚོགས་ཆེན་གྱི་དམིགས་ཡུལ་དུ་འཛིན་དགོས་པ་རེད། ང་ཚོས་བོད་ཀྱི་གནད་དོན་འདི་པེ་ཅིན་དང་གངས་སྐྱིད་གཉིས་བར་གྱི་གྲོས་མོལ་གྱི་ལམ་ནས་ཐག་ཆོད་པ་མི་འདུག་སྟབས། ད་ནི་བོད་མི་རིགས་ཀྱི་མང་མོས་འོས་བསྡུ་ཆེན་མོ་ཞིག་ཚུགས་རྒྱུའི་དགོས་འདུན་བཏོན་ན་འགྲིག་གི་རེད། ད་ལོའི་བོད་ནང་གི་ཡར་ལངས་ནི་ཐབས་ལམ་འདིའི་རྨང་གཞི་རེད། ད་ནི་ང་ཚོས་ཨུ་ཚུགས་བརྒྱབ་ནས་གཞིས་ལུས་མི་དམངས་ཀྱི་བསམ་ཚུལ་འདི་རྒྱལ་སྤྱིའི་སྟེང་ནས་བདག་རྒྱག་དགོས་པ་དང་། འདི་ལ་ཞིབ་འཇུག་བྱེད་དགོས་པ་བཤད་དགོས་པ་རེད། འདི་དང་མཉམ་དུ་བོད་ནང་གི་སྲིད་བྱུས་མཁྲེགས་པོ་དེ་དག་གུ་ཡངས་སུ་གཏོང་རྒྱུར་དམིགས་དགོས་པ་རེད། ང་ཚོས་བཤད་ཀྱིན་པའི་དབུ་མའི་ལམ་གྱི་རང་སྲིད་རང་སྐྱོང་དེ་རག་གི་མེད་སྟབས། ད་ལྟ་རྒྱ་ནག་གི་རྩ་ཁྲིམས་ནང་ཡོད་བསྡད་པའི་རང་སྲིད་རང་སྐྱོང་འདི་ལག་བསྟར་དོན་འཁྱོལ་ཡོང་ཐབས་ནི་ཐེངས་འདིའི་ཚོགས་ཆེན་གྱི་དམིགས་ཡུལ་གཉིས་པ་ཡིན་དགོས་པ་རེད། གོང་གི་བསམ་ཚུལ་འདི་ནི་གོ་རིམ་ཅན་དང་གཏན་ཚིགས་ཅན་ཞིག་ཏུ་ཕབ་ནས་བཤད་མེད་པར། གློ་བུར་ཐོལ་བྱུང་ལྟ་བུར་བྲིས་པ་ཡིན། ཡིན་ནའང་ངའི་བསམ་ཚུལ་གྱི་རྨང་རྡོ་ལྟ་བུ་ཞིག་ཡིན་སྟབས། རིམ་བཞིན་གོ་རིམ་སྒྲིག་ཅིང་ལུང་རིགས་དང་གཏན་ཚིགས་ཀྱི་རིམ་པར་ཕབ་ནས་འབྲི་བར་འབད་བརྩོན་བྱེད་གི་ཡིན། རྣམ་པ་ཚོས་ཀྱང་བསམ་ཚུལ་འདོན་པའི་རེ་བ་ཡོད།
ལམ་དབུ་མ་ལ་བརྟེན་ནས་བོད་ཀྱི་གནད་དོན་འདི་རྒྱལ་སྤྱི་གནད་དོན་ཅིག་ཏུ་གྱུར་བ་མ་ཟད། སྲིད་ཇུས་འདི་ལ་བརྟེན་ནས་ཕྱི་ནང་གཉིས་ཀྱི་བོད་མི་ཚོ་སླར་ཡང་ཆིལ་སྒྲིལ་གོ་སྐབས་ལྷོད་ལྷོད་བྱུང་བ་སོགས། མདོར་ན་དེང་སྐབས་ང་ཚོ་ལ་ནུས་པ་ཕྲན་བུ་ཡོད་པའང་དབུ་མའི་ལམ་ནས་བྱུང་བ་བརྗོད་མེད་རེད། མ་ཟད་ལོ་རབས་བདུན་ཅུའི་ནང་ཏིང་གི་སྲིད་ཇུས་ལ་གཟས་པའི་དབུ་མའི་ལམ་འདི་མ་བཏོན་པར་རང་བཙན་གཙང་མ་དགོས་ཞེས་ཨུ་ཚུགས་བརྒྱབ་ཡོད་ན། དེང་སང་མི་ཚོས་༧གོང་ས་མཆོག་གིས་གོ་སྐབས་ཆེན་པོ་ཞིག་ལེན་མ་གནང་བར་འཕྲོ་བརླག་བཏང་བ་རེད་ཟེར་ནས་སྐྱོན་བརྗོད་ཚད་མེད་བྱེད་ངེས་པ་མ་ཟད། གལ་སྲིད་༧གོང་ས་མཆོག་གིས་གནང་སྟངས་འགྲིག་ཡོད་ན་བོད་ཀྱི་གནད་དོན་འདི་ཏིང་གི་སྐབས་ནས་སེལ་ཚར་བ་འདྲ་བོ་ཞིག་བཤད་ཀྱི་ཡོད་པ་གསལ་བོ་རེད། དཔེར་ན་༧གོང་ས་མཆོག་པཎ་ཆེན་རིན་པོ་ཆེའི་དགོངས་གཤེགས་ཀྱི་མྱ་ངན་ཚོགས་འདུ་ལ་མགྲོན་འབོད་ཞུས་པ་ལྟར་ཕེབས་མ་གནང་བ་གོ་སྐབས་ཆེན་པོ་ཞིག་ཤོར་བ་འདྲ་བོ་བཤད་མཁན་ཡོད་ཀྱང་། དོན་དངོས་སུ་སྐབས་དེར་ཁོང་མ་ཕེབས་པ་རྒྱ་ནག་གི་མ་རུང་ཁོག་བཅངས་ཀྱི་གཡོ་ཇུས་ཚབས་ཆེན་ཞིག་གི་འོག་ཏུ་མ་ཚུད་པའི་རྒྱལ་ཁ་ཞིག་རེད་བསམ།
འོན་ཀྱང་ད་ནས་རྒྱ་ནག་གི་ཆེས་མཁྲེགས་བཟུང་གི་སྲིད་ཇུས་འདི་ལ་གཟས་པའི་སྲིད་ཇུས་གསར་བ་ཞིག་མ་བཏིང་ན་ནོར་འཁྲུལ་ཤོར་རྒྱུ་ཡིན་པ་གཟིགས་ནས་༧གོང་ས་མཆོག་གིས་འཆར་ཟླའི་ནང་དམིགས་བསལ་གྱི་ཚོགས་འདུ་ཞིག་ཚོགས་དགོས་པའི་བཀའ་སྐུལ་གནང་ནང་བཞིན་དབུ་མའི་ལམ་ལ་འགྱུར་བ་གཏོང་དགོས་པ་རེད།
འདིར་དམིགས་གསལ་གསལ་བཤད་གལ་ཆེན་ཞིག་ལ། དབུ་མའི་ལམ་འདི་ཐོག་མར་འདོན་གནང་མཁན་༧གོང་ས་མཆོག་ཡིན་པ་དང་། དེ་ལ་འགྱུར་མ་གཏོང་མ་འདོད་པར་ཉར་འདུག་མཁན་དེ་བཀའ་སྤྱིས་དབུ་ཁྲིད་པའི་བོད་གཞུང་རེད། གོང་ས་མཆོག་གིས་དབུ་མའི་ལམ་ལ་འགྱུར་བ་གཏོང་རྒྱུར་གོ་སྐབས་ཡང་ཡང་གནང་གི་ཡོད་པ་ལས། དབུ་མའི་ལམ་ལ་འགྱུར་གཏོང་རྒྱུར་བཀག་འགོག་གང་ཡང་གནང་གི་མེད་པ་མ་ཟད། གལ་སྲིད་བཀའ་སྤྱིས་དབུ་ཁྲིད་པའི་བོད་མི་དམངས་ཀྱི་འགྱུར་བ་བཏང་ནས། དེ་ལས་ལྷག་པའི་སྲིད་ཇུས་ཤིག་བཏོན་པ་ཡིན་ན་༧གོང་ས་མཆོག་དེ་བས་ཀྱང་ཐུགས་མཉེས་པོ་དང་རེ་བ་ཆེན་པོ་གནང་གི་རེད།