རང་ཐག་རང་གཅོད་ལས་ལྷག་མི་འདུག

ཉིན་ཤས་སྔོན་ནས་བཀའ་བློན་ཟུར་པ་རྣམས་ཀྱི་ཚོགས་འདུ་ཞིག་བཞུགས་སྒར་དུ་འཚོགས་ཡོད་པ་དང་། སྐབས་དེ་དང་བསྟུན་ཕྱི་ཚེས་ ༢༤ ཉིན་འདི་ག་གསར་ཁང་གིས་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་ལ་ཁོང་གིས་རྒྱུན་རིང་པོ་ཞིག་ལ་གསུང་བསྡད་པའི་བོད་མིའི་རང་ཐག་རང་གཅོད་ཀྱི་ལྟ་བ་དང་ལག་ལེན། མ་འོངས་པའི་བོད་དོན་གྱི་ཁ་ཕྱོགས་བཅས་ཀྱི་ཐད་བཅར་འདྲི་ཞུས་པ་ཡིན།

དྲི་བ། སྐུ་ངོ་ལགས་ད་རེབ་ཚུར་ཕེབས་སྐབས་ངྷ་རམ་ས་ལར་ཚོགས་འདུ་མང་པོ་དང་སྲིད་དོན་གྱི་ལབ་གླེང་མཐོ་བའི་སྐབས་ཤིག་རེད། ལོ་མང་པོ་ཞིག་གི་རྗེས་ལ་སླར་ཡང་རི་ངོགས་འདིར་སླེབས་དུས་བོད་དོན་ཐོག་ཚོར་སྣང་གང་འདྲ་ཞིག་བྱུང་།

ལན། ཚོར་སྣང་ཡག་པོ་འདུག ལྷག་པར་དུ་ད་ལོ་གསུམ་བཅུའི་དུས་དྲན་ནས་བཟུང་བོད་ཀྱི་ས་ཆ་མང་པོར་བོད་མི་དམངས་ཀྱིས་ངོ་རྒོལ་བྱས། བོད་པའི་རྣམ་འགྱུར་ཤུགས་ཆེན་པོར་བསྟན་པ་རེད། དེའི་སྐབས་ལ་ཕྱི་ལོགས་ལ་ཡོད་པའི་བོད་མི་ཚོས་ཀྱང་གཅིག་མཚུངས་ཀྱི་རྣམ་འགྱུར་བསྟན་པ་རེད། རྒྱ་གར་དང་ཕྱི་རྒྱལ་ལུང་པ་མང་པོར་ངོ་རྒོལ་བྱས་འདུག ད་ནི་བོད་ཀྱི་རྩ་དོན་ཐོག་བོད་པ་ཟེར་བ་འདི་ཕྱི་ནང་གཉིས་ཀ་ནས་གཅིག་པ་རེད་སྙམ་པའི་ཚོར་སྣང་ཤུགས་ཆེན་པོ་བྱུང་།

དྲི་བ། སྐུ་ངོ་མཆོག་གིས་བོད་ལ་རང་ཐག་རང་གཅོད་ཀྱི་ཐབས་ལམ་ཞིག་གསུང་བསྡད་ཡོད་པ་རེད། ད་ལྟའི་ཆར་དགོངས་ཚུལ་དེར་སྔར་ལས་ལྷག་པའི་ཡིད་ཆེས་དང་ངེས་ཤེས་གང་འདྲ་ཞིག་ཡོད།

ལན། ངས་སྔོན་མ་ནས་ང་ཚོས་རང་ཐག་རང་གཅོད་ཀྱི་སྐད་ཆ་བཤད་དགོས་པ་རེད་ཅེས་པ་དེ་ད་དུང་ཡིན་ན་བསམ་ཚུལ་དེ་ག་རང་ཡིན། ལོ་ ༥༠ རིང་ལ་རྒྱ་མིས་བོད་འདི་རང་བཙན་ཡིན་པ་དང་རྒྱ་ནག་དང་ཁ་ཁ་ཡིན་པ་ངོས་འཛིན་བྱེད་གི་ཡོད་པ་མ་རེད། མི་ཚོས་བོད་ཀྱི་རིག་གཞུང་དང་མི་རིགས་རྩོད་སྐབས་ཁོ་ཚོས་བོད་རང་སྐྱོང་ལྗོངས་ལ་མཛུབ་མོ་འཛུགས་པ་དང་། ཁམས་དང་ཨ་མདོ་ལ་བོད་ཀྱི་མིང་ཡང་འདོགས་གི་ཡོད་པ་མ་རེད། སི་ཁྲོན་དང་མཚོ་སྔོན་བཅས་ཀྱི་ས་གནས་བོད་མི་རྣམས་བོད་པའི་ཁོངས་སུ་རྩི་གིན་མེད་པར། ཁོང་ཚོ་ནི་ཞིང་ཆེན་དེ་དག་ནང་གི་གྲངས་ཉུང་མི་རིགས་ཙམ་ཡིན་ཚུལ་བཤད་གི་ཡོད་པ་རེད། ད་རེབ་བོད་ཀྱི་ས་ཁུལ་ཚང་མའི་ནང་ངོ་རྒོལ་བྱས། ལྷག་པར་དུ་མདོ་སྨད་ཁུལ་དུ་ངོ་རྒོལ་བྱས་ཏེ། ང་ཚོ་བོད་པ་ཡིན། ང་ཚོ་བོད་མིའི་བསམ་ཚུལ་གཅིག་པ་ཡིན་ཅེས་བཤད་པ་དེས་ཕལ་ཆེར་འཛམ་གླིང་ནང་ནུས་པ་ཞིག་ཐོན་ཡོད་པ་རེད། རྒྱ་ནག་ལའང་གནོན་ཤུགས་ཆེན་པོ་ཞིག་སྤྲད་པ་རེད། བོད་ཀྱི་གནད་དོན་འདི་བོད་མིས་ཐག་གཅོད་བྱེད་དགོས་ཀྱི་ཡོད་ཅེས་ལབ་པ་རེད། འདི་ནི་བོད་མིའི་རྩ་དོན་ལ་ཕན་གི་རེད་བསམ་གྱི་འདུག རང་ཐག་རང་གཅོད་ཀྱི་ལྟ་བ་ལའང་འགྲོ་གི་ཡོད་པ་རེད། འདི་འདྲའི་མི་དམངས་ཀྱི་རྣམ་འགྱུར་སྟོན་དུས་འཛམ་གླིང་གི་མི་སུ་གཅིག་གིས་ཀྱང་དེ་ཆོག་གི་མ་རེད་ཅེས་ལབ་ཐུབ་གི་མ་རེད། ངས་འདི་རང་ཐག་རང་གཅོད་ལ་འབྲེལ་བ་ཡོད་པ་ཞིག་མཐོང་གི་འདུག

དྲི་བ། བོད་པ་རང་སྟེང་ན་རང་ཐག་རང་གཅོད་ཀྱི་ལམ་དུ་འགྲོ་ཐུབ་པའི་ཆ་རྐྱེན་དང་ཐབས་ལམ་གང་མཐོང་གི་ཡོད།

ལན། ཐབས་ལམ་ནི་གཅིག་ནས་རང་ཐག་རང་གཅོད་ཅེས་པ་འདི་རྒྱལ་སྤྱིའི་ཁྲིམས་ཀྱི་གནད་དོན་ཡིན་པ་དང་འདི་ཕུགས་ལ་ང་ཚོར་ཕན་ཐོགས་ཡོད་པ་དེར་ང་ཚོར་ངོས་འཛིན་ཞིག་དགོས་པ་རེད། གཉིས་ནས། ང་ཚོས་འདི་ལག་ཆ་ལྟ་བུ་ཞིག་ལ་བེད་སྤྱད་ནས་མུ་མཐུད་དེ་འཛམ་གླིང་སྟེང་བེད་སྤྱོད་གཏོང་དགོས་པ་རེད། དཔེར་ན་ང་ཚོར་རྒྱབ་སྐྱོར་བྱེད་མཁན་ཨ་རིའི་གཞུང་། རྒྱ་གར་གཞུང་། ཡུ་རོབ་གཞུང་བཅས་ཀྱི་རྒྱབ་སྐྱོར་འཚོལ་དགོས་པ་རེད། གང་ཡིན་ཅེ་ན། ཉེ་བའི་ཆ་ལ་གཞུང་མང་པོ་ཞིག་གིས་རྒྱབ་སྐྱོར་བྱེད་ཀྱི་ཡོད་པ་རེད་དེ། རྒྱལ་བ་རིན་པོ་ཆེའི་མཚན་སྙན་གྲགས་དང་། རྒྱལ་བ་རིན་པོ་ཆེ་ལ་ནུས་པ་ཆེ་ནས་རྒྱབ་སྐྱོར་བྱེད་གི་ཡོད་པ་རེད། རྒྱ་ནག་གིས་རྒྱལ་བ་རིན་པོ་ཆེ་མཉམ་དུ་བཀའ་མོལ་ཞུ་དགོས་པ་རེད་ཟེར་བ་ཙམ་ལས་ལག་པས་འཇུ་ས་ཡོད་པ་མ་རེད། ལག་པས་འཇུ་ས་གང་དགོས་པ་རེད་ཅེ་ན་བོད་མི་དམངས་ལ་རྒྱལ་སྤྱིའི་ཁྲིམས་ཀྱི་ཐོག་ནས་རང་ཐག་རང་གཅོད་ཀྱི་ཐོབ་ཐང་འདུག ང་ཚོས་རྒྱབ་སྐྱོར་བྱེད་གི་ཡིན་ལབ་ན་རྒྱལ་ཁབ་སོ་སོར་ཡིན་ནའང་འཇུ་ས་ཞིག་ཆགས་གི་ཡོད་པ་རེད། དེ་བཞིན་རྒྱལ་སྤྱིའི་སྒྲིག་འཛུགས་མཉམ་འབྲེལ་རྒྱལ་ཚོགས་སོགས་མང་པོ་ཡོད་པ་དེ་ཚོའི་ནང་ལའང་ང་ཚོས་རང་བཙན་དགོས་ཀྱི་ཡོད་ལབ་ན། ང་ཚོར་སྤྲོད་རྒྱུ་མེད་ཟེར་གི་རེད། ང་ཚོར་འགྲོ་བ་མིའི་ཐོབ་ཐང་དགོས། ང་རང་ཚོའི་དོན་དག་ང་ཚོས་ཐག་གཅོད་གི་ཡིན་ལབ་ན་དེ་ཡོད་མ་རེད་ཟེར་ཐུབ་གི་མ་རེད། ང་ཚོས་མི་རིགས་ཀྱི་ངོ་བོ་མ་བརླག་པ་བྱས་ཏེ་དགོས་འདུན་ཁག་ཨུ་ཚུགས་བརྒྱབ་ནས་བཏོན་པ་ཡིན་ན་བསམ་བློ་གཏོང་བ་དང་གོམ་པ་སྤོ་སའི་ལམ་ཁ་ཞིག་ཆགས་གི་ཡོད་པ་རེད།

དྲི་བ། སྐུ་ངོ་ནས་རྒྱུན་རིང་པོ་ཞིག་ལ་དགོངས་ཚུལ་འདི་བཟུང་ཡོད་སྟབས། བོད་མི་རིགས་ལ་ལམ་ཁ་འདི་གསལ་བོ་ཞིག་སྟོན་རྒྱུའི་འཆར་གཞི་འདྲ་མེད་དམ།

ལན། ལོ་ཤས་རིང་ལ་ངས་གང་ཐུབ་ཐུབ་འབད་བརྩོན་བྱས་པ་ཡིན། གསར་འགོད་པ་ཚོར་ཐུག་ནའང་རེད། བོད་པ་ཚོ་འཚོགས་ས་དང་ཚོགས་འདུ་དེ་འདྲར་ཐེངས་ཁ་ཤས་ལ་སྐད་བཏང་སོང་། དེ་འདྲའི་ཐོག་ལའང་ངས་འགྲེལ་བཤད་རྒྱག་གི་ཡོད། ང་རང་གིས་རྩོམ་འབྲི་ཆུང་ཆུང་དེ་འདྲ་བྱས་ནས་བཤད་གི་ཡོད། བོད་གཞུང་གི་བཀའ་བློན་རེད། འབྲེལ་ཡོད་དང་གནད་ཡོད་མི་སྣ་དེ་འདྲ་ལ་ང་རང་གི་བསམ་ཚུལ་ཕུལ་ཡོད། རྒྱལ་བ་རིན་པོ་ཆེའི་སྙན་སེང་ལའང་ཕུལ་ཡོད། གང་ཐུབ་ཐུབ་ཅིག་བྱེད་གི་ཡོད།

དྲི་བ། བཙན་བྱོལ་བོད་གཞུང་གིས་བོད་རྒྱའི་དཀའ་རྙོག་སེལ་ཐབས་སུ་དབུ་མའི་ལམ་ལས་ཡག་པོ་ཞིག་མཐོང་གི་ཡོད་པ་མ་རེད། སྐུ་ངོ་ལགས་ནས་རང་ཐག་རང་གཅོད་ཀྱི་ཐབས་ལམ་ནི་དབུ་མའི་ལམ་ལས་ཀྱང་ཡག་པོར་མཐོང་གི་ཡོད་དམ།

ལན། ངས་དབུ་མའི་ལམ་ལ་ག་རེ་གོ་གི་ཡོད་པ་རེད་ཅེ་ན། རྒྱལ་བ་རིན་པོ་ཆེས་བོད་དང་རྒྱ་ཡི་ཆབ་སྲིད་ཀྱི་དཀའ་རྙོག བོད་མི་དམངས་ཀྱི་དཀའ་ངལ་ཚང་མ་སེལ་བ་དང་། བོད་ཀྱི་རིག་གཞུང་གནས་ཐུབ་པ་བཅས་ལ་ཐབས་ཤེས་ཟེར་ན་འདྲ། འཆར་གཞི་ཞིག་བཏོན་གནང་བ་རེད། འདི་ལ་རྒྱ་ནག་གིས་ཡ་བྱེད་ཀྱི་ཡོད་པ་མ་རེད། འཆར་གཞི་འདི་བཏོན་གནང་སྐབས་རྒྱལ་བ་རིན་པོ་ཆེས་གང་གསུངས་ཡོད་པ་རེད་ཅེ་ན། འཆར་གཞི་འདི་ལ་རྒྱ་མིས་བདག་པོ་བརྒྱབས་པ་ཡིན་ནའང་མཐའ་མའི་ཐག་གཅོད་དེ་བོད་མིས་བྱེད་གི་རེད་གསུངས་ཡོད་པ་རེད། འདི་ལྟར་གསུངས་དུས་བོད་ཀྱི་གནད་དོན་འདི་སུས་ཐག་གཅོད་གི་རེད་ཟེར་ན་བོད་མི་རིགས་ཀྱིས་ཐག་གཅོད་གི་རེད། འདི་ནི་རང་ཐག་རང་གཅོད་རེད་པཱ། མི་རིགས་རང་གི་དོན་དེ་རང་གིས་ཐག་བཅད་ཡོང་དུས་རང་ཐག་རང་གཅོད་ཀྱི་ལྟ་བ་དང་མཐུན་གི་ཡོད་པ་རེད། འདི་ལབ་པ་ཡིན་ན་དབུ་མའི་ལམ་ལའང་ནུས་པ་ཞིག་ཡོད་པ་རེད་བསམ་གི་འདུག གང་ཡིན་ཅེ་ན། རྒྱལ་སྤྱིའི་ཁྲིམས་ཀྱི་ལྟ་བའི་ཆ་ནས་ཀྱང་འགྲོ་གི་ཡོད་པ་རེད། མཚམས་རེར་ང་ཚོས་རྒྱལ་སྤྱིའི་ཁྲིམས་ཞེས་མང་པོ་བཤད་ཡོང་དུས་ཁ་ཤས་ཀྱིས་རྒྱལ་སྤྱིའི་ཁྲིམས་ནི་སུ་གཅིག་གིས་ཀྱང་རྩོད་ཐུབ་གི་མ་རེད་ཟེར་ནས་ལབ་གི་ཡོད་པ་རེད། དངོས་གནས་རེད། འདས་པའི་ལོ་ཉིས་བརྒྱ་ལྷག་གི་རིང་རྒྱལ་སྤྱིའི་ཁྲིམས་ཀྱི་ལྟ་བ་ཡག་པོ་ཡོད་ནའང་ལག་ལེན་ལ་སུས་བསྟར་གི་ཡོད་པ་རེད་ཅེ་ན། ནུས་ཤུགས་ཡོད་མཁན་དང་རྒྱལ་ཁ་ཐོབ་པའི་ལུང་པ་དག་གིས་བསྟར་གི་ཡོད་པ་རེད། ཡིན་ནའང་ད་ནི་འཛམ་གླིང་ལའང་འགྱུར་བ་འགྲོ་གི་ཡོད་པ་རེད། ཚོང་དང་དཔལ་འབྱོར། ཁོར་ཡུག་བཅས་ཕྱོགས་གང་ཐད་ནས་འགྱུར་བ་འགྲོ་གི་ཡོད་པ་རེད། དེ་བྱས་དུས་ད་ནི་རྒྱལ་ཁབ་སོ་སོ་ཡིན་ནའང་རང་ཉིད་གཅིག་པུའི་ཁེ་ཕན་མིན་པར། ཁྱིམ་མཚེས་རྒྱལ་ཁབ་ཀྱི་ཐོག་ནས་ཀྱང་ཁྱད་པར་འགྲོ་གི་ཡོད་པ་རེད། རྒྱལ་ཁབ་མང་པོ་བརྟན་པོ་ཡོང་བ་ལ་དམངས་གཙོའི་ལམ་སྲོལ་འདི་དགོས་གི་ཡོད་པ་རེད། དེ་ལྟར་ཕུགས་རྒྱང་རིང་པོ་ལ་དམངས་གཙོ་ཟེར་བ་དང་རྒྱལ་སྤྱིའི་ཁྲིམས་ཟེར་བ་དེ་རྒྱལ་ཁབ་ཆེ་ཆུང་གང་དུའང་ངོས་འཛིན་ཆེ་ནས་ཆེ་རུ་འགྲོ་དུས། ཁྲིམས་ལ་རིན་ཐང་སླེབས་གི་ཡོད་པ་རེད། དེ་ཡིན་དུས་བོད་ཀྱི་གནད་དོན་འདི་ལའང་དུས་ཚོད་རིང་པོ་རེད་དེ། ང་ཚོས་རྒྱལ་སྤྱིའི་ཁྲིམས་ཀྱི་སྒང་ལ་གཞི་འཇོག་ཐུབ་པ་ཡིན་ན་ག་དུས་ཡིན་ནའང་ལག་པས་འཇུ་ས་ཞིག་ཡོད་པ་རེད།

དྲི་བ། ཕྱི་ཟླ་ ༡༡ པའི་ནང་བོད་ཀྱི་རྩ་དོན་ཐོག་གོ་བསྡུར་བྱེད་གི་ཡོད་པ་རེད། སྐུ་ངོ་ནས་རང་ཐག་རང་གཅོད་ཀྱི་གདམ་ཀ་འདི་ཚོགས་ཆེན་སྟེང་འཁྱེར་ཡོང་འཆར་ཡོད་དམ།

ལན། ངས་དམིགས་བསལ་གྱི་འབད་བརྩོན་གང་ཡང་བྱེད་གི་མེད། ཡིན་ནའང་ངའི་རང་ཐག་རང་གཅོད་ཀྱི་ལྟ་བ་དང་གནས་ཚུལ་དེས་གཅིག་བྱས་ན་ཚོགས་ཆེན་ལའང་ཕན་ཐོགས་གི་རེད་བསམ་གི་ཡོད། ང་ཚོས་རྒྱལ་སྤྱིའི་སྒང་ལ་བོད་ཀྱི་རྩ་དོན་ཡིན་ཅེས་ལབ་དགོས་པ་རེད། རྩ་དོན་ག་རེ་རེད། རྩ་དོན་ལབ་ཐུབ་དགོས་པ་རེད་པཱ། རྒྱལ་སྤྱིའི་སྒང་ལ་ཁ་ཤས་ཀྱིས་རང་བཙན་ཡིན་ཅེས་ལབ་ན་རང་བཙན་ཁྱེད་རང་ཚོར་དགོས་ཀྱི་ཡོད་པ་རེད་དེ་ང་ཚོར་སྤྲོད་རྒྱུ་མེད་ཟེར་གི་རེད། རང་བཙན་སྤྲོད་པའི་ནུས་པ་ཡོད་པ་མ་རེད། ང་ཚོར་རང་སྐྱོང་དགོས་ཀྱི་ཡོད་ལབ་ན་ཕྱི་རྒྱལ་ཚོས་རང་སྐྱོང་གི་ཚད་ཆེ་ཆུང་དེ་རྒྱ་མིའི་མཉམ་དུ་སྐད་ཆ་བཤད་ན་མ་གཏོགས་ང་ཚོར་ཡོད་པ་མ་རེད་ཟེར་གི་རེད། ང་ཚོའི་རྩ་དོན་དེ་བོད་མིའི་རང་དབང་། བོད་མི་དམངས་ཀྱི་བདེ་དོན། དེ་གཞི་ལ་བཞག་སྟེ་བོད་མི་རིགས་འདི་འཛམ་གླིང་འདིའི་ནང་གི་མི་རིགས་གཅིག་རེད། དེ་ཡིན་དུས་སྤྱི་ལ་ཐོབ་ཐང་ག་རེ་ཡོད་པ་རེད། དེ་བས་ཀྱང་ཁྲིམས་ཀྱི་ཐོག་ནས་མི་རིགས་གཅིག་པ། རིག་གཞུང་གཅིག་པ། སྐད་ཡིག་གཅིག་པ་ཡིན་པའི་མི་རིགས་དེ་དག་ལ་ཁོ་རང་ཚོའི་སྤྱི་ཚོགས་དེ་གང་འདྲ་འགྲོ་མི་འགྲོ་ཁོ་རང་ཚོར་ཐག་གཅོད་པའི་ཐོབ་ཐང་ཡོད་པ་རེད་ཅེས་ངོས་འཛིན་ཡོད་པ་རེད། འདི་ང་ཚོས་འཛིན་ཐུབ་ན་ཕན་ཐོགས་ཡོད་པ་རེད་བསམ་གི་འདུག

༡༢། གལ་སྲིད་རང་ཐག་རང་གཅོད་ཀྱི་དགོངས་ཚུལ་ཐོག་མ་འོངས་པའི་བཙན་བྱོལ་བོད་མིའི་ཆབ་སྲིད་ཀྱི་ལས་སྣེ་ལ་འབོད་འགུག་གནང་བ་ཡིན་ན་ཕེབས་ཐུབ་གི་རེད་དམ།
ལན། དེ་འདྲའི་འཆར་གཞི་གང་ཡང་མེད། གང་ཡིན་ཅེ་ན། ང་རང་ལོ་ཆུང་ཆུང་ནས་བཙན་བྱོལ་སྤྱི་ཚོགས་ནང་ལས་ཀ་བྱས་པ་རེད། གཙོ་བོ་དེ་ང་རང་ལས་ཀ་ལ་མགོ་འཁོར། ང་རང་བོད་པ་ཞིག་ཡིན་བསམ་པའི་བསམ་བློ་དེ་ཤུགས་ཆེན་པོ་བྱས་ནས་ལོ་མང་པོར་བསྡད་པ་རེད་མ་གཏོགས། རིམ་པ་བྱས་ནས་ངས་ཅིག་བྱེད་གི་ཡིན་ཟེར་བའི་དམིགས་ཡུལ་མེད། འདིའི་ཐོག་ལ་སྔོན་མ་ནས་ང་རང་གི་བསམ་ཚུལ་ལ་བོད་སྤྱི་བར་ཕན་པ་ལ་ངྷ་རམ་ས་ལ་དང་བཙན་བྱོལ་གཞུང་གི་ཞབས་ཞུ་ཞུ་ཐུབ་ན་ཞེ་དྲག་ཡག་པོ་རེད། ཞུ་མ་ཐུབ་ན་གཞུང་གི་སྒྲིག་འཛུགས་གི་ཕྱི་ལོགས་ན་ཡོད་ནའང་སྤྱི་བར་ཕན་པའི་ལས་ཀ་མང་པོ་བྱེད་རྒྱུ་ཡོད་པ་རེད། ད་ལྟ་ཡིན་ནའང་ང་རང་གིས་ཕྱི་ལོགས་ནས་གང་ཐུབ་ཐུབ་བྱེད་གི་ཡོད།