༼ངས་བཀའ་བློན་སྦུག་ནས་ཁྱེད་རང་ཚོའི་ཚགས་པར་ཀློག་གི་ཡོད། ཡིན་ནའང་རྟག་པར་ཀློག་ཐུབ་གི་མི་འདུག ལས་ཀ་ཡག་པོ་རེད། ཁྱེད་རང་ཚོ་ཡོད་སར་ཅིག་བཅར་དགོས་བསམ་བསྡད་ཡོད།༽ སྐུའི་གཅེན་པོ་བཀའ་བློན་ཁྲི་ཟུར་རྒྱལ་ལོ་དོན་གྲུབ་མཆོག་ཕྱི་ཚེས་ ༢༧ ཉིན་གྱི་ཕྱི་དྲོ་བོད་ཀྱི་དུས་བབ་གསར་ཁང་དུ་ཕེབས་ཏེ་འདི་ལྟར་བཀའ་མོལ་གནང་བྱུང་།
༼ང་ཚོས་སྔོན་མ་བོད་མིའི་རང་དབང་གསར་ཤོག་བཏོན་པ་རེད། སྐབས་དེར་ཚགས་པར་ཆིག་སྟོང་ལྔ་བརྒྱ་ཞིག་དཔར་གི་ཡོད་པ་རེད། ཡིན་ནའང་དངུལ་རག་གི་ཡོད་པ་མ་རེད། ལས་ཀ་འདི་དཀའ་ལས་ཁག་པོ་ཡོད་པ་རེད། ༽ ཅེས་ཁོང་རྣམ་པ་ཐོག་མར་རྒྱ་གར་དུ་འབྱོར་རྗེས་བོད་མིའི་རང་དབང་གསར་ཤོག་ཐོག་མར་བཏོན་སྐབས་ཀྱི་ཉམས་མྱོང་སྐོར་ཡང་གསུངས་བྱུང་།
བཀའ་བློན་ཁྲི་ཟུར་རྒྱལ་ལོ་དོན་གྲུབ་མཆོག་གིས་གཙོ་བོ་ད་ལྟའི་བོད་ཀྱི་འཐབ་རྩོད་ཀྱི་རྒྱུ་རྐྱེན་དང་རྒྱབ་ལྗོངས། ད་ལྟའི་བོད་ཀྱི་ཆབ་སྲིད་ཀྱི་གནས་བབ་བཅས་ཕྱོགས་ཡོངས་ནས་བཀའ་མོལ་གནང་ཞིང་། ལྷག་པར་དུ་ད་ཆར་ཁོང་ཉིད་དགུང་ལོ་ ༨༠ ཕེབས་ཡོད་སྟབས་ད་ནི་ད་བར་ཞལ་མ་གསང་བར་ཉར་བའི་གནད་དོན་དེ་ཚོ་མ་བཤད་ན་ནམ་ཞིག་ལ་འགྲོ་དགོས་པ་ཤེས་ཐུབ་པ་ཡོད་པ་མ་རེད་གསུངས། ༼གཤིན་རྗེ་ཆོས་རྒྱལ་ཟེར་བ་ཞིག་ཡོད་པ་རེད་ཟེར། ཁོས་ང་སྐད་གཏོང་གི་འདུག༽ ཁོང་གིས་ལས་བྱེད་ཚོར་འདི་ལྟར་སྐུ་རྩེད་གནང་།
ཁོང་གིས་ད་ལྟའི་བོད་ཀྱི་འཐབ་རྩོད་ཀྱི་ཐད་ནས་གསུངས་དོན། ༼དབུ་མའི་ལམ་ལ་ཁྱེད་ཚོས་གོ་བ་ཅི་འདྲ་ཞིག་ལེན་གི་ཡོད་མེད་མི་ཤེས་ཏེ། ངས་ནི་དེ་གཉིས་ཕན་ལ་གོ་གི་ཡོད། གཉིས་ཕན་ཞེས་པ་འདི་ལས་སླ་བོ་ཞིག་མ་རེད། ཡིན་ནའང་སོ་སོའི་ཐོབ་ཐང་གློད་གི་ཡོད་པ་མ་རེད། གཉིས་ཕན་ལབ་དུས་ཕན་ཚུན་སྐད་ཆ་བཤད་ནས་འགྲིག་དགོས་གི་ཡོད་དུས། ཡར་འཛེགས་མར་འབབ་ཡོད་གི་རེད། ༽ཅེས་ལམ་དབུ་མ་ནི་དགོངས་པ་བཞེས་ཕྱོགས་ཤིག་ཡིན་པ་ལས་མཐའ་གཅིག་ཏུ་འགྱུར་དུ་མེད་པའི་ཆབ་སྲིད་ཀྱི་དགོས་འདུན་ལྟ་བུ་ཞིག་མིན་ཚུལ་གསུངས་པ་དང་། ཡིན་ནའང་ཁོང་ཉིད་ནས་དམིགས་བསལ་རང་བཙན་དང་རང་སྐྱོང་གི་ལངས་ཕྱོགས་གསུང་གི་མེད་པར། རང་དབང་དང་བོད་མི་རིགས་ཀྱི་ཐོབ་ཐང་གསུང་གི་ཡོད་ཅེས་གསུངས་བྱུང་།
ཡང་ཁོང་གིས། ད་ཆར་བཙན་བྱོལ་བོད་གཞུང་གིས་རྒྱ་ནག་གི་མི་རིགས་ས་གནས་རང་སྐྱོང་བཅའ་ཁྲིམས་ཀྱི་འོག་ནས་བོད་མིའི་རྩ་དོན་རྩོད་བཞིན་པའི་ཐད། ༼ཁ་སང་བཀའ་ཤག་བ་བཅར་བ་ཡིན། ངས་ཁོང་ཚོར་ཁྱེད་ཚོས་མི་རིགས་ས་གནས་རང་སྐྱོང་ཞེས་པ་དེ་ཡག་པོ་ཞིག་མཁྱེན་གི་ཡོད་དམ་ཅེས་དྲིས་པ་ཡིན། མཁྱེན་གི་མི་འདུག མི་རིགས་ས་གནས་རང་སྐྱོང་ཞེས་པ་དེ་གུང་ཁྲན་ཏང་གི་སྒྱུ་འཕྲུལ་རེད། དེ་ལ་མགོ་འཁོར་རྒྱུ་ཡོད་པ་མ་རེད། རྒྱ་མིས་ཞགས་པ་ཞིག་བཙུགས་པ་དེའི་ནང་ཡིན་གཅིག་མིན་གཅིག་འཛུལ་དགོས་དོན་ཡོད་པ་མ་རེད་པཱ། ཅེས་གསུངས།
གཞན་ཡང་ཁོང་གིས་ལོ་མཇུག་འདིའི་ཚོགས་ཆེན་དེར་རྒྱལ་བ་རིན་པོ་ཆེས་བོད་མི་གང་མང་མང་ཞིག་འཛོམས་ནས་གོ་བསྡུར་ཅིག་གནང་རྒྱུའི་ཐུགས་རེ་བཅངས་ཡོད་པ་རེད་དེ། བཀའ་སྤྱི་གཉིས་ནས་ད་ཆར་འདི་ལ་ཁོ་རང་ཚོས་གྲོས་ཆོད་འདྲ་བོ་ཞིག་བཞག ཚོགས་ཞུགས་བྱེད་མཁན་ཚོར་མིའི་གྲངས་ཀ་འདྲ་བ་ཞིག་གཏན་འབེབས་བྱས་འདུག འདི་འདྲ་བྱེད་རྒྱུ་ཡོད་པ་མ་རེད། མི་མང་པོ་འཛོམས་དགོས་པ་རེད། ནམ་རྒྱུན་བོད་དོན་ཐོག་སྐད་ཆ་བཤད་མཁན་དང་ཤེས་ཡོན་ཅན། སེམས་ཤུགས་ཅན་ཚང་མ་དང་བླངས་གིས་ཕེབས་འཇུག་དགོས་པ་རེད། ཕེབས་རོགས་ཞེས་ཞུ་དགོས་པ་རེད། མི་འདི་འདྲའི་མང་པོ་ཞིག་ལ་བཀའ་ཤག་གིས་འགྲོ་སོང་དགོས་ན་ཐུགས་ཁག་ཡོད་པ་མ་རེད། དངུལ་ཡོད་པ་མ་རེད། ༽ཅེས་དང་། འདིའི་ཐད་ད་དུང་ཚོགས་ཆེན་རྒྱ་ཆེ་རུ་གཏོང་དགོས་སྐོར་ཞུ་རྒྱུ་བྱུང་ཞེས་གསུངས་བྱུང་།
ཁོང་གིས་ད་ལྟའི་བོད་མི་རིགས་ཀྱི་འཐབ་རྩོད་ཀྱི་ནུས་ཤུགས་སྐོར་ལ་གསུངས་དོན། ༼མི་ཞིག་ལ་བླ་གསུམ་ཡོད་པ་རེད་ཟེར། ངས་བླ་གཅིག་ཤེས་གི་ཡོད། ༡༩༤༩ ལོ་ནས་ ༡༩༧༩ ལོའི་བར་གྱི་ལོ་ ༣༠ རིང་རྒྱ་མིས་བོད་མི་ཚོ་གང་བྱུང་གིས་བསད་ནས་གཏུབས་ཏེ་བོད་མི་རིགས་ཀྱི་བླ་མེད་པ་བཟོས་འདུག ཞེད་ནས་བླ་མི་འདུག ད་ནི་བླ་འདི་གསོ་དགོས་པ་རེད། ཅེས་གསུངས་སོགས་གསུངས་བྱུང་།
ཐེངས་འདིར་སྐུའི་གཅེན་པོ་བཀའ་བློན་ཁྲི་ཟུར་རྒྱལ་ལོ་དོན་གྲུབ་མཆོག་གིས་བཙན་བྱོལ་བོད་གཞུང་གི་བཀའ་བློན་ཟུར་པ་རྣམ་པ་དང་མཉམ་དུ་ཉིན་ ༧ རིང་བོད་ཀྱི་རྩ་དོན་དང་འབྲེལ་བའི་བཀའ་མོལ་གནང་བ་དང་། དེ་རྗེས་རྒྱལ་བ་རིན་པོ་ཆེར་མཇལ་ཁ་ཞུས་པ་དང་། བཀའ་ཤག་ནས་བཀའ་བློན་རྣམ་པ་ཚོར་མཇལ་འཕྲད། བཞུགས་སྒར་ཁུལ་གྱིགཞུང་འབྲེལ་མ་ཡིན་པའི་ཚོགས་པ་ཁག་ལ་བཅར་ཏེ་བཀའ་མོལ་གནང་ཡོད་པ་རེད།
དངོས་ཡོད་ཀྱི་ཕྱོགས་སུ་ལངས་ནས་བཤད་ན་དེའདྲ་ཅིག་རེད། དྲང་བདེན་གྱི་ལམ་ཁ་དེད་ནས་སོང་ན་དེ་འདྲ་ཅིག་རེད། སྐུུ་ངོ་རྒྱལ་ལོ་མཆོག་གིས་གསུང་བའི་ཚིག་དུམ་ཁ་ཤས་དེས་ནམ་ཡང་བསམ་གཞིག་ལྕི་མོ་ཞིག་གི་དུར་ཁྲོད་ན་རེ་སྨོན་སྟོང་ཕྲུག་ཅིག་གི་སྣེ་ལ་འཇུས་པའི་བློ་ཁ་འདིར་མཁའ་དབུགས་གསར་བ་ཞིག་རྔུབ་ཀྱི་བཅུག་སོང༌། ཡིན་ན་འང་བློ་ཕམ་པ་ཞིག་ལ་ཁོང་དགུང་ལོ་རྒན་པ་མ་ཟད་ད་དུང་བོད་གཞུང་གི་དོན་དག་ལ་ཁ་གྲགས་ཀྱང་དབང་ཡོད་པ་མ་རེད་ཟེར།