མི་མང་ཚོགས་ཆེན་བསུ་བ།

འཇིགས་མེད་ཚེ་རིང༌།

སུན་ཀྲུང་ཧྲན་གྱི་ལྕགས་ཕག་ལོའི་གསར་བརྗེ་ལྟ་བུའི་ཚ་ཚ་འུར་འུར་ཅན་གྱི་ལས་འགུལ་ལོ་རྒྱུས་ཀྱི་གོ་ཐོས་ཀྱིས་ང་ལ་རྒྱུན་པར་འཚུབ་ཆ་རེ་སྤྲོད་ཀྱིན་ཡོད་པ་དང༌། “ལུང་ཤར་ལུགས་བསྒྱུར” གྱི་གསར་བརྗེའི་དམིགས་ཡུལ་ལ་ངོས་ཟིན་ཐོབ་མིན་ལ་མ་བལྟས་པར་ལོ་ངོ་དུ་མའི་སྔོན་ནས་ཞེན་ཁོག་ཆེ་ཙམ་ཡོད། ཡིན་ནའང༌། ད་ནི་དེ་ལས་གྱུར་ཏེ་ལོ་རྒྱུས་སྨྲ་བའི་བཤད་སྟབས་དེ་ལ་ཧ་ཅང་ངོ་མཚར་གྱི་ལྟ་ཚུལ་འཛིན་གྱི་ཡོད། གང་ཡིན་ཟེར་ན། ངས་རང་དང་འབྲེལ་བ་ཡོད་པའི་ལོ་ངོ་བཞི་བཅུ་ཞེ་དགུའི་རིང་གི་འུར་ཟིང་ཆེ་བའི་ཁ་དབྱངས་ལ་ཕྱིར་རྟོག་བྱེད་ཀྱིན་ཡོད་ཅིང༌། དེའི་ཁྲོད་དུ་བོད་མི་དཀྱུས་མིའི་རིགས་སུ་སྐྱེས་པ་སྲིད་སྟེགས་མཐོ་ཤས་སུ་འགྱིང་བའི་ལོ་རྒྱུས་ལེགས་བཅོས་ཀྱི་རྣམ་པ་དེའང་ཚོར་བྱུང༌། རྣམ་པ་འདི་ཡི་རྐྱེན་གྱིས་མི་མང་ལ་ཐོབ་ཐང་ཞིག་རེག་ཡོད། ཐོབ་ཐང་དེ་ལ་བརྟེན་པའི་ངོས་འཛིན་ལྟ་ཚུལ་ནི་”ཆབ་སྲིད་ལྟ་ཚུལ་གྱིས་ཐོབ་ཐང་བེད་སྤྱོད་བྱེད་པ་”དང༌། “མི་སྣའི་འབྲེལ་ལམ་གྱིས་ཐོབ་ཐང་བེད་སྤྱོད་བྱེད་པ་”གཉིས་སུ་དབྱེ་ཆོག ངའི་བསམ་པར་ཆབ་སྲིད་ལངས་ཕྱོགས་མ་འདྲ་བའི་ཁྲོད་གཅིག་ལ་མི་དམངས་ཀྱིས་རྒྱབ་སྐྱོར་ཐོབ་པ་ནི་རང་རེའི་གནས་ཚུལ་ལ་བལྟས་ན་བཟོད་བསྲན་བྱེད་དགོས་པའི་ངེས་བ་མེད་ཅིང༌། དེ་སྔོན་ཆབ་སྲིད་རྩ་དོན་བརྗེ་བསྒྱུར་སྐབས་བཙན་བྱོལ་བའི་སྤྱི་ཚོགས་ཤིག་ལྷིང་འཇགས་ཀྱིས་གནས་བ་ནི་ཟང་ཟིང་མི་འདོད་པའི་རིག་གནས་ཤིག་ཉམས་ལེན་བྱས་པ་མིན་ན་ཡིད་ཚིམ་ཐུབ་པ་ཞིག་མིན། ལྟ་ཚུལ་འདི་ཡི་ངོས་ནས་རང་རེའི་སྤྱི་ཚོགས་ཁྲོད་ཆབ་སྲིད་ཀྱི་ལངས་ཕྱོགས་གཉིས་སམ། ཡང་ན་དུ་མ་ཡོད་པར་ངོས་འཛིན་གནང་མཁན་ཡོད་ཀྱང༌། དེ་ནི་ཆབ་སྲིད་ལངས་ཕྱོགས་ཤིག་ཡིན་པ་དང༌། ལངས་ཕྱོགས་བཟོ་བར་ཁྱབ་བསྒྲགས་བྱས་པ་ཞིག་ཡིན་པ་གཉིས་ལས་ཕྱི་མར་ཤུགས་ཆེ་ཞིང༌། མང་གཙོ་སྨྲ་བ་ཚོས་ལྷག་པར་དེ་ལྟར་མཐོང་བར་བརྗོད་ཐུབ། གནད་དོན་འདི་ཅུང་ཙམ་སྤྲོས་པ་བྱས་ན། མང་མོས་ཀྱིས་ཐག་གཅོད་གནང་བའི་”མི་རིགས་ས་གནས་རང་སྐྱོང་”གི་ལངས་ཕྱོགས་ལ་ཕྱི་ལོ་ ༡༩༩༧ ཟླ་ ༩ ཚེས་ ༡༨ ནས་དམིགས་བསལ་གྱིས་བསམ་གཞིགས་བྱེད་ཡུལ་ཡིན་ཆོག་ནའང༌། བོད་མི་མང་ཆེ་བའི་སེམས་སུ་ཞེན་ཁོག་གི་ངར་ཤུགས་ལས་མཐོང་དཀའ། འདི་དང་འདྲ་བར་གཞོན་ནུའི་ལངས་ཕྱོགས་དེའང་མི་མང་གི་ཚོར་ཤུགས་སྤེལ་བའི་བྱེད་ཐབས་ལྟ་བུར་གྱུར་ཡོད་པ་ལས་གཞན་ཁྱབ་བསྒྲགས་ཀྱི་ནུས་པ་གཙོར་འདོན་བྱས་པ་དེ་ནི་གཞོན་ནུ་ལྷན་ཚོགས་ཀྱི་ལོ་ངོ་བཞི་བཅུ་ལྷག་གི་ལངས་ཕྱོགས་སུ་མཐོང་ཐུབ།

ང་ཚོས་བོད་རིགས་གཞོན་ནུ་ལྷན་ཚོགས་དང་རྒྱའི་གསར་ཤོག་<<ན་གཞོན་གསར་བ>> གཉིས་ཀྱི་ལངས་ཕྱོགས་ལ་བསྡུར་བ་བྱས་ཚེ་<<ན་གཞོན་གསར་བ་>> ནི་གཞོན་ལྷན་དང་མི་འདྲ་བར་”མི་སྒེར་གྱི་བསམ་བློའིསྤུས་ཚད་”ལ་དོ་སྣང་དང་སྐུལ་མ་གཏོང་གི་ཡོད་པ་དང༌། འདི་ལ་གདེང་འཇོག་བྱེད་མཁན་རྣམས་ཀྱིས་དམངས་བྱིངས་སམ་སྤྱི་ཚོགས་ཀྱི་བསམ་བློའི་སྤུས་ཚད་མཐོར་འདེགས་ཀྱི་ཕྱོགས་ལ་པེ་ཅིན་སློབ་ཆེན་ལས་ཀྱང་ནུས་པ་ཐོན་པར་ངོས་འཛིན་གནང་མཁན་བྱུང་མྱོང་འདུག བོད་རིགས་མང་ཆེ་ཤོས་ནི་སྤྱི་ཚོགས་ཀྱི་བསམ་སྤྱོད་ལ་བརྟེན་པ་ལས་མི་སྒེར་རེ་རེའི་གནས་ཚུལ་ཧ་ཅང་སྐྱོ་བོ་ཡིན་པ་མ་ཟད། དེ་ལས་ཀྱང་མང་པོར་ཆབ་སྲིད་གནད་དོན་གྱི་ཕྱོགས་ལ་རང་ཉིད་ཀྱི་བསམ་ཚུལ་མེད་པའི་ཉེན་ཁ་ཡོད། ཡིན་ནའང༌། རང་རེས་མི་སྒེར་གྱི་”བསམ་བློའི་འཕེལ་འགྱུར་”ལ་གཙིགས་ཆེན་བྱེད་པ་འཐུས་ཚང་མིན་ལ་སྤྱི་ཚོགས་ཀྱི་རྒྱུན་གཤིས་ངོས་སུའང་མིའི་”མིའི་ཤེས་རབ་ཀྱི་རང་དབང་”ཆ་ཚང་གཙོ་སྐྱོང་བྱེད་ཐུབ་པའི་མཐུན་རྐྱེན་ཧ་ཅང་ཁེགས། བོད་ཀྱི་གཉན་འཕྲང་གི་དུས་ཚོད་ནི་འདི་ལྟ་བུ་ལ་ངོས་འཛིན་དགོས། འོན་ཀྱང་འདིའི་ཐད་བསམ་བློ་གཏོང་ས་གཞན་ཞིག་ཡོད་པ་ད་ལོའི་”གསུམ་གཅིག་བཞིའི་རང་དབང་ལས་འགུལ་”གྱི་སྔ་ཕྱིའི་བྱུང་བ་ཡིན། གསུམ་གཅིག་བཞིའི་རང་དབང་ལས་འགུལ་གྱི་བརྗིད་ཉམས་ཡུན་གྱིས་ལྷིང་འཇགས་སུ་སོང་ཞིང༌། རྒྱལ་སྤྱིའི་མཚན་མཐོང་ཅན་གྱི་མི་སྣ་དང་གསར་འགྱུང་བརྒྱུད་ལམ་ཁག་གིས་བོད་དོན་ལ་ཁ་དབྱངས་བསྒྲགས་རྗེས་ཟུར་ལྟ་བྱེད་ཀྱིན་པའི་སྐབས་འདིར། བཙན་བྱོལ་བོད་མིའི་མི་མང་ཚོགས་ཆེན་ཞིག་བསྡུ་རྒྱུ་ཐག་བཅད་པ་འདི་ལོ་རྒྱུས་ཀྱི་དཀྱོགས་མཚམས་ཆེན་པོ་ཞིག་ཏུ་འགྱུར་ཐུབ་མིན་དང༌། ཆབ་སྲིད་ལངས་ཕྱོགས་ཀྱི་དབྱེ་མཚམས་ཤིག་ཏུ་ཐག་གཅོད་གནང་རྒྱུ་ཡིན་མིན་ཐད་འབྲེལ་བ་ཡོད་པ་ཞིག་རེད། གལ་སྲིད་ལོ་རྒྱུས་ཀྱི་དཀྱོགས་མཚམས་ཤིག་ལ་ཚོད་དཔག་བྱས་ཏེ་ཆབ་སྲིད་ལངས་ཕྱོགས་ལ་འགྱུར་བ་བཏང་ཚེ་བོད་རྒྱ་ཞི་མོལ་ཐེངས་བརྒྱད་ཀྱི་ཉམས་མྱོང་དང༌། བཀའ་ཤག་གི་མི་རིགས་ས་གནས་རང་སྐྱོང་གི་སྲིད་བྱུས་ཚན་རིག་བློས་གཏོང་གིས་ལོ་རྒྱུས་ཀྱི་དུམ་མཚམས་འདི་མཇུག་སྒྲིལ་རྒྱུ་དེ་རེད།

འུ་ཚོས་ལོ་རྒྱུས་དུམ་མཚམས་འདི་མཇུག་བསྡུས་ཏེ། ཧུའུ་ཅིན་ཐའོ་རྒྱ་གར་སྲིད་བློན་དང་མཇལ་འཕྲད་སྐབས་ས་མཚམས་ཀྱི་གནད་དོན་ཐད་ལ་ཕྱོགས་གཉིས་ཀའི་དབུ་མའི་ལམ་ཞིག་འདེམས་དགོས་པའི་དགོངས་འཆར་གནང་བ་བོད་རྒྱའི་གནད་དོན་ཐད་ཚུར་ལེན་ཐུབ་པ་བྱུང་ན། རང་བཙན་ལངས་ཕྱོགས་ཀྱི་ཐོག་ནས་”ཕར་སྤྲོད་ཚུར་ལེན་”བྱེད་དམ། མི་རིགས་ས་གནས་རང་སྐྱོང་གི་གླེང་གཞིའི་སྟེང་ནས་བོད་རྒྱ་གཉིས་མོས་ཀྱི་དབུ་མའི་ལམ་ཞིག་འདེམས། བཙན་བྱོལ་བོད་གཞུང་གི་”དབུ་མའི་ལམ་གྱི་སྲིད་བྱུས་”ནི་ཕྱི་སྲིད་དང་རྒྱལ་སྲུང་དོར་ཞིང༌། ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་འོག་མི་རིགས་ས་གནས་རང་སྐྱོང་གི་མངོན་འདོད་བརྗོད་དེ་ཀྲུང་གོའི་སྤྱི་དམངས་ཀྱི་ཐོབ་ཐང་ལྟ་བུ་ཞིག་བརྗོད་ཀྱི་ཡོད་པ་དང༌། གཞོན་ལྷན་གྱི་རང་བཙན་ལྟ་བ་དེར་ཡང་ཤར་གླིང་ཨེ་ཤ་ཡར་ཟུར་དོད་ཀྱི་རྣམ་པ་གསལ་བའི་རྒྱལ་ཁབ་ཅིག་གླེང་བའི་འགྲེལ་བཤད་གསལ་བོ་ཡོང་ཐུབ་མེད།

༧གོང་ས་སྐྱབས་མགོན་ཆེན་པོ་མཆོག་གིས་སི་ཊ་སི་སྦག་གི་གྲོས་འཆར་བཏོན་ནས་ལོ་གསུམ་གྱི་རྗེས་སུ་ཕྱི་སྲིད་དང་རྒྱལ་སྲུང་ལ་རྒྱ་ནག་གིས་བལྟ་རྒྱུ་ཞེས་པ་དེ་གུ་ཡངས་ཤོར་བ་དང༌། དེ་ལ་བསྒྱུར་བཅོས་གཏོང་རྒྱུའི་དུས་ཚོད་རན་པོ་ཡིན་པའི་དགོངས་བཞེས་གནང་ཡོད་པ་དང༌། བོད་རྒྱ་གཉིས་རང་དབང་ཐོབ་ཐང་འདྲ་མཉམ་ཡོད་པའི་ཐོག་ནས་སྤྱིའི་ཐུན་མོང་གི་ཁེ་ཕན་དོན་དུ་ཐུན་མོང་མ་ཡིན་པའི་མཉམ་འབྲེལ་གྱི་དབུ་མའི་ལམ་ཞིག་འཛིན་པའི་དགོངས་བཞེས་གནང་མྱོང༌། འདི་ནི་༧གོང་ས་སྐྱབས་མགོན་ཆེན་པོ་མཆོག་གིས་ཡུ་རོབ་ཛ་དྲག་ཆེ་བའི་ལོ་རྒྱུས་ཀྱི་སྐྱོ་གནས་ནས་འདྲ་མཉམ་གྱི་སྤྱི་མཐུན་རྒྱལ་ཚོགས་ཤིག་ཏུ་གྲུབ་པའི་ཐུན་མོང་གི་ཁེ་ཕན་ལ་ལྟ་ཚུལ་དང༌། འཛམ་གླིང་ཆབ་སྲིད་ཀྱི་གནས་སྟངས་གཅིག་ལ་གཅིག་བརྟེན་གྱི་གནས་བབ་ལ་མིག་དཔེ་ལྟ་དགོས་ཚུལ་གྱི་དགོངས་བཞེད་ལའང་ཧ་ཅང་འབྲེལ་བ་ཆེའོ།།
མྱུར་འཕྲིན་ཁ་བྱང༌། reepa1111@yahoo.co.in ཁ་པར་ཨང༌། 9816952613