རེ་བྷས་ཞེས་པ་ནི་མཆེ་བ་དང་སྡེར་མོ་ཡོད་པའི་ནུ་གསོའི་སེམས་ཅན་ནང་ཕན་ཚུན་ལ་འགོ་བའི་སྲིན་བུའི་ནད་གཞི་ཞིག་ཡིན།
ཀ རེབྷས་ན་ཚ་ཞེས་པའི་ནད་འདི་ཅི་ཞིག་ཡིན་ནམ།
རེ་བྷས་ན་ཚ་ཞེས་པ་ནི་སྲིན་བུ་ལས་བྱུང་བའི་ཚེ་སྲོག་འཕྲོག་མཁན་གྱི་ནད་གཞི་ཞིག་ཡིན་པ་དང༌། དེས་ང་ཚོའི་དབང་རྩའི་མ་ལག་ལ་གནོད་སྐྱོན་གཏོང་གི་ཡོད། ནད་འབུ་དེ་བཞིན་མི་དང་དུད་འགྲོ་ལ་ནད་གཞི་ཡོད་པའི་དུད་འགྲོ་གཞན་གྱིས་རྨུག་པའམ་སོ་རྒྱག་དུས་ཁ་ཆུ་བརྒྱུད་ནས་འགོས་ཀྱི་ཡོད། མཚམས་རེ་ནད་གཞི་ཡོད་པའི་དུད་འགྲོའི་ཁ་ཆུ་མི་དང་དུད་འགྲོ་གཞན་གྱི་རྨ་ཁ་དང༌། མིག སྣ་བུག ཁ་བཅས་ལ་འཐོར་བ་དང་འགོ་བ་ལས་ཀྱང་ནད་གཞི་དེ་ཡོང་གི་ཡོད། ཕྱིར་ནད་རྟགས་འདོན་མཚམས་དཀའ་ངལ་ཆེན་པོར་གྱུར་ཟིན་པར་ངོས་འཛིན་གནང་དགོས།
ཁ། ནད་གཞི་འདི་མི་ལ་ཉེན་ཁ་ཇི་ཙམ་ཡོད་དམ།
༡ རྒྱ་གར་དུ་སྐར་མ་ ༣༠ ནང་ནད་གཞི་འདི་རྐྱེན་པས་མི་གཅིག་རྐྱེན་ལམ་དུ་འགྲོ་གི་ཡོད།
༢ ལོ་ལྟར་མི་ས་ཡ་ ༧ ཙམ་ལ་སྔོན་འགོག་ཁབ་རྒྱབ་དགོས་ཐུག་གི་ཡོད་པ་དང༌། རྒྱ་གར་ནང་ལོ་ལྟར་མི་ཉིས་ཁྲི་ ༢༠༠༠༠ ཙམ་ནད་གཞི་ འདིས་རྐྱེན་པས་འདས་གྲོངས་སུ་འགྲོ་གི་ཡོད།
༣ བྱིས་པ་ལོ་ ༡༥ མན་ལ་ཁྱི་ཡིས་སོ་རྒྱག་པ་ལས་ན་ཚ་འབྱུང་བ་མང་ཤོས་ཐོ་འགོད་བྱུང་བཞིན་ཡོད།
༤ ཡར་རྒྱས་འགྲོ་བཞིན་པའི་རྒྱལ་ཁབ་ནང་ཁྱི་འཁྱམས་མང་པོ་ཡོད་པར་སོང་ཁྱིས་སོ་རྒྱག་པ་ལ་བརྟེན་ནས་བྱུང་བའི་རིགས་མང་ཤོས་ཆས་ཡོད།
༥ ཉེ་ཆར་ཕ་ཝང་ངམ་ཙི་ཙི་སྐམ་པོ་དེ་ཡང་ནད་གཞི་འདིའི་འབྱུང་ཁུངས་གཙོ་བོ་ཞིག་ཡིན་པ་མངོན་གསལ་དོད་པོ་ཆགས་ཡོད།
ག དུད་འགྲོ་རིགས་གང་ལས་རེ་བྷས་ནད་ཡོང་གི་ཡོདདམ།
ནད་གཞི་འདི་བཞིན་ནུ་གསོ་སེམས་ཅན་རིགས་ཚང་མ་ལ་ཡོང་གི་ཡོད་པ་མ་གཏོགས་གཞན་ཉྭ་དང་འདབ་ཆགས། ལྟོ་འགྲོའི་རིགས། སྐམ་གཤེར་གཉིས་གནས་ཀྱི་སྲོག་ཆགས་རིགས་སོགས་ལས་ཡོང་གི་མེད། བདག་མེད་སེམས་ཅན་རིགས་ལ་ནད་གཞི་འདི་མང་ཤོས་ཡོད། དེ་ཡང་སྲེ་མོང་སྐང་ཀ་དང་ཙི་ཙི་སྣམ་པོ། དོམ་ཁྲ་རྔ་རིང༌། སྤྱང་ཀི ཝ་མོ་སོགས་ལ་ཡོང་གི་ཡོད། དེའི་ནང་ནས་ཕ་ཝང་ངམ་ཙི་ཙི་སྐམ་པོ་ནི་ནད་གཞི་འདིའི་འབྱུང་ཁུངས་གཙོ་བོ་ཞིག་ཆགས་ཡོད།
ང༌། རེ་བྷས་ན་ཚ་ཡོད་པའི་དུད་འགྲོའི་རྟགས་མཚན།
རེ་བྷས་ན་ཚའི་ནད་འབུ་གཟུགས་པོའི་ནང་ལན་གཅིག་འཛུལ་སོང་ན། དེས་ལུས་ཀྱི་རྩ་ཕྲན་བརྒྱུད་དེ་ཀླད་པར་འགྲོ་བ་དང༌། དེ་ནས་གཟུགས་པོའི་ཕུང་གྲུབ་རྩ་ཕྲན་གཞན་དང་དབང་པོ་ཆ་ཚང་ལ་ཁྱབ་འགྲོ་གི་ཡོད་ལ། དེ་ནས་མཆིལ་མའི་ནང་གསོག་གིན་ཡོད། ནད་ཡོད་དུད་འགྲོས་སོ་རྒྱབ་ནས་སྤྱིར་བཏང་བདུན་གཉིས་ནས་བརྒྱད་བར་ནད་རྟགས་མངོན་དུ་འགྱུར་གྱི་ཡོད་ཀྱང༌། སྐབས་རེར་ནད་རྟགས་མངོན་དུ་འགྱུར་རྒྱུར་ལོ་དང་དེ་ལས་ལྷག་པར་ཡང་འགོར་སྲིད་ཀྱི་རེད། ཁྱུ་དང་ཞི་མི་སོགས་ནད་གཞི་ཕོག་པའི་དུད་འགྲོ་རྣམས་ལ་ཕྱི་རུ་ནད་རྟགས་སྣ་ཚོགས་ཡོད་པ། དེ་ཡང༌། ཞེད་སྣང་ཆེ་མདོག་ཁ་བོ། དྲག་ཤུལ་ཅན། ཁ་ཆུ་ཆེས་མང་པོ་འཛག་པ། ཁྱུར་མིད་གཏོང་རྒྱུར་དཀའ་ངལ་ཡོད་པ། ཁྱར་ཁྱོར་བྱས་ནས་འགྲོ་བ༌། མ་འགལ་ཐུར་དུ་དཔྱང་བ། དངོས་པོ་ཅི་རིགས་ལ་སོ་ར་རྒྱབ་པ་སོགས་ཀྱི་ནད་རྟགས་ཐོན་གྱིན་ཡོད། བདག་མེད་དུད་འགྲོ་ནད་གཞི་ཕོག་པའི་རིགས་རྣམས་ནམ་རྒྱུན་དང་མི་འདྲ་བའི་སྤྱོད་པ་སྟོན་པ། དཔེར་ན། མཚན་ལ་འགྲོ་མཁན་གྱི་རིགས་རྣམས་ཉིན་མོར་འཁྱམས་ཉུལ་བྱེད་པ་དང༌། རྟ་དང་བ་ཕྱུགས། ལུག ར་སོགས་ལ་ཁྱི་དང་ཞི་མི་ལ་ཡོད་པའི་ནད་རྟགས་དེ་དག་གི་ཐོག་ལ་ད་དུང༌། སྐད་གདངས་རིང་པོ་འབྱིན་པ་དང༌། སོ་སོར་རྨས་སྐྱོན་གཏོང་གི་ཡོད་པ་མ་ཟད། འོད་རིགས་ལ་ཞེས་སྣང་བྱེད་ཀྱི་ཡོད། ནད་གཞི་ཕོག་པའི་དུད་འགྲོ་ནད་རྟགས་མངོན་དུ་འགྱུར་བ་རྣམས་ཉིན་བཅུའི་ནང་དབུགས་འབྱིན་རྔུབ་ཀྱི་དཀའ་ངལ་རྐྱེན་པས་འདས་གྲོངས་འགྲོ་གི་ཡོད།
ཅ། རེ་བྷས་ན་ཚ་བཀག་འགོག་ཇི་ལྟར་གནང་དགོས་སམ།
༡ ཕྱོགས་ཀུན་ནས་རེ་བྷས་ནད་གཞི་སྔོན་འགོག་ཐབས་ལམ་ཆ་ཚང་བ་ཞིག་བསྟེ་དགོས།
༢ སྔོན་འགོག་ཁབ། དུད་འགྲོའི་སྨན་པ་ཚད་ལྡན་གྱི་དྲུང་ནས་ཁྱི་དང༌། ཞི་མི། གཞན་ཡང་སྒོ་ཕྱུགས་སེམས་ཅན་རྣམས་ལ་ངེས་པར་སྔོན་འགོག་ཁབ་རྒྱབ་གནང་དགོས་པ་ཡིན། གཅེས་ཉར་སྲོག་ཆགས་ཆུང་དུས་ཉིད་ནས་སྔོན་འགོག་ཁབ་རྒྱབ་དགོས་པ་ཡིན། དེ་ཡང་ཟླ་བ་གསུམ་ལོན་པ་དང་སྔོན་འགོག་ཁབ་དང་པོ་དང༌། གཉིས་པ་ཟླ་དྲུག དེ་ནས་ལོ་གཅིག དེའི་རྗེས་སུ་ལོ་ལྟར་སྔོན་འགོག་ཁབ་རྒྱབ་དགོས་པ་ཡིན།
༣ སོ་རྒྱག་པའི་རྗེས་སུ་ཉིན་དེ་རང་ལ་སྔོན་འགོག་ཁབ་རྒྱབ་དགོས། དེ་ནས་ཉིན་གསུམ་པ་དང༌། བདུན་པ། བཅུ་བཞི། ཉི་ཤུ་རྩ་བརྒྱད། དགུ་ བཅུ་བཅས་ལ་ཁབ་རྒྱབ་དགོསཔ་ཡིན།
༥ ནད་གཞི་སྔོན་འགོག་ཡོང་ཐབས་སུ་གཅེས་ཉར་སྲོག་ཆགས་བདག་མེད་གང་བྱུང་འཁྱམས་བཅུག་རྒྱུ་མེད། ཞི་མི་རྣམས་ནང་དུ་ཉར་འཇོག་དགོས་པ་དང༌། ཁྱི་སོགས་ཕྱི་ལོག་འཁྲིད་སྐབས་བལྟ་རྟོག་ཡག་པོ་གནང་དགོས།
༦ ནང་གི་གད་སྙིགས་རྣམས་འཇོག་ཡུལ་ཡག་པོ་བཟོ་དགོས་པ་དང༌། གད་སྙིགས་དེ་དག་གང་བྱུང་གཡུག་ན་བདག་མེད་ཁྱི་འཁྱམས་རིགས་ འཁོར་ཡུལ་དང་ཁྱི་ཕྲུག་སྐྱེས་ཡུལ་ཞིག་ཏུ་འགྱུར་སྲིད།
༧ ཕྲུ་གུ་ཆུང་ཆུང་རྣམས་ངོ་མ་ཤེས་པའི་བདག་མེད་དུད་འགྲོའི་རིགས་འདྲིས་མདོག་ཁ་བོ་བྱེད་ཀྱང་ལག་པ་འཆང་བཅུག་རྒྱུ་མེད།
༨ ཁྱི་དང་སེམས་ཅན་གཞན་གྱིས་ཕྲུ་གུ་ལ་སོ་རྒྱབ་པ་ཡིན་ན་ལམ་སེང་རང་གི་ཕ་མའམ་ཡང་ན་རང་ལས་རྒན་པ་རྣམས་ལ་གནས་ཚུལ་དེ་བཤད་ངེས་པར་བཤད་དགོས་པའི་ལམ་སྟོན་བྱེད་དགོས།
༩ སོ་སོའི་ནང་དང་ཁོར་ཡུག་ལ་ཕ་ཝང་ངམ་ཙི་ཙི་སྐམ་པོའི་ཚང་བཟོ་བཅུག་རྒྱུ་མེད་པ་བཅས།
དུད་འགྲོའི་སྐྱེས་འགོག་ལས་འཆར། ཁྱི་འཁྱམས་རིགས་ཀྱི་སྐྱེ་འགོག་བྱ་རྒྱུར་སྐུལ་འདེད་བྱེད་དགོས་པ་དང༌། དེ་བཞིན་ཁྱི་འཁྱམས་རིགས་ཉུང་དུ་གཏོང་རྒྱུ། དགོས་མེད་ཁྱི་ཕྲུག་མང་པོ་སྤེལ་རྒྱུར་བཀག་འགོག་གནང་དགོས་རྒྱུ། སྔོན་འགོག་ཁབ་རྒྱབ་རྒྱུའི་ལས་གཞི་སྤེལ་རྒྱུ་དང༌། ཁྱི་འཁྱམས་དང་བདག་མེད་དུད་འགྲོ་རིགས་བཀག་འགོག་ཐུབ་ཚེ་ནད་གཞི་སྔོན་འགོག་ཡག་ཤོས་ཆགས་ཡོད།
ཆ། རང་གི་གཅེས་ཉར་སེམས་ཅན་ལ་སོ་རྒྱབ་པ་ཡིན་ན་ཇི་ལྟར་གནང་དགོས་སམ།
༡ རྨས་སྐྱོན་ཕོག་པའི་གནས་སུ་འདག་རྫས་ཀྱིས་ཡག་པོ་བཀྲུས་ནས་གཉན་འཇོམས་སྨན་བྱུགས་དགོས།
༢ དུད་འགྲོའི་སྨན་པར་འཕྲལ་མར་བསྟེན་གཏུགས་གནང་དགོས་པ་ཡིན།
༣ རྨ་ལ་རྨ་དཀྲིས་བརྒྱབ་མི་རུང༌།
༤ སྔོན་འགོག་ཁབ་རྒྱབ་ཟིན་པའི་གཅེས་ཉར་སེམས་ཅན་ཡིན་ནའང་སྔོན་འགོག་ཁབ་བསྐྱར་དུ་བརྒྱབ་གནང་དགོས་པ་དང༌། ཉིན་ ༤༥ རིང་རྟོག་ཞིབ་འོག་ཉར་གནང་དགོས་པ་ཡིན།
༥ སྔོན་འགོག་ཁབ་རྒྱབ་མྱོང་མེད་པའི་གཅེས་ཉར་སེམས་ཅན་ལ་རེབྷས་ཡོད་པའི་སེམས་ཅན་གཞན་གྱིས་སོ་བརྒྱབ་པ་ཡིན་ན་ཟླ་བ་དྲུག་ཙམ་རིང་དོ་དམ་འོག་ལོགས་སུ་ཉར་འཇོག་གནང་དགོས་རྒྱུ།
ཇ། ཁྱེད་རང་ལ་སོ་རྒྱབ་པ་ཡིན་ན་ཇི་ལྟར་གནང་དགོས་སམ།
༡ ཞེད་སྣང་གནང་མི་དགོས་ཀྱང་སྣང་མེད་འཇོག་མི་རུང༌། རྨ་ཁ་ལ་འདག་རྫས་ཡག་པོ་བརྒྱབ་ནས་ཆུ་མང་པོ་བེད་སྤྱོད་བཏང་ནས་འཁྲུས་གནང་དགོས་པ་ཡིན།
༢ སྨན་པ་བསྟེན་གཏུགས་ཀྱིས་ཇི་ལྟར་སོ་རྒྱབ་པའི་སྐོར་འགྲེལ་བརྗོད་གསལ་བོར་གནང་དགོས། སྨན་པས་ལམ་སྟོན་ཇི་གནང་ལ་ལག་བར་གནང་དགོས། དགོས་མཁོ་འགྱུར་ཚེ་སོ་རྒྱབ་པ་ལ་བརྟེན་ནས་ནད་གཞི་གཞན་མི་འགོ་བའི་ཆེད་དུ་སྨན་པས་སྨན་བཅོས་རྗེས་ལ་སྨན་གཞན་བསྟེན་དགོས་པའི་ལམ་སྟོན་ཡང་གནང་སྲིད།
༣ བྱུང་ཚེ་དུད་འགྲོ་དེ་བཞིན་འཛིན་བཟུང་གིས་དྲ་སྒམ་ཆེད་པོ་ཞིག་ནང་བཅུག་ནས་འཇོག་དགོས་པ་དང༌། འཛིན་བཟུང་བྱས་ཟིན་རྗེས་དུད་འགྲོ་ཡར་བླང་བའམ་འཇུ་བཟུང་བྱེད་མི་རུང༌། ས་གནས་དུད་འགྲོ་རྟོག་ཞིབ་ལས་བྱེད་སྐད་བཏང་དགོས་པ་ཡིན། གལ་ཏེ་འཛིན་བཟུ ང་མ་ཐུབ་ཚེ་དུད་འགྲོའི་ཁ་དོག་དང་ཆེ་ཆུང་སོགས་ཡིད་ལ་འཛིན་དགོས་པ་དང༌། ཁྱེད་རང་ལ་སོ་རྒྱབ་ཟིན་རྗེས་གང་དུ་ཕྱིན་ཡོད་མེད་དོ་སྣང་གནང་དགོས།
༤ ནང་ནས་བཟོས་པའི་སྨན་རིགས་དང་ཇའི་ལོ་མ། ཤིང་ཏོག་ཁུ་བ། སྨན་སྣ་སོགས་བེད་སྤྱོད་གཏོང་མི་རུང༌།
༥ སྨན་པ་རྫུན་མ་དང༌། རྨོངས་དད་ཀྱི་ཆོ་ག་ཙམ་ལ་ཡིད་ཆེས་ཀྱིས་རང་གི་ཚེ་སྲོག་ལ་སྣང་ཆུང་བྱེད་མི་རུང༌།
ཉ། ཁྱེད་ཀྱི་གཅེས་ཉར་སེམས་ཅན་གྱིས་གཞན་ལ་སོ་བརྒྱབ་ན་ཇི་ལྟར་གནང་དགོས་སམ།
༡ རྨ་ཁ་ལ་འདག་རྫས་རྒྱབ་ནས་ཆུ་ཡིས་ཡང་ཡང་འཁྲུ་དགོས།
༢ གནོད་འཚེ་ཕོག་པའི་མིའམ་སེམས་ཅན་དེ་སྨན་པར་བསྟེན་གཏུགས་བྱ་དགོས།
༣ གཅེས་ཉར་སེམས་ཅན་ལ་སྔོན་འགོག་ཁབ་དུས་ལྟར་བརྒྱབ་ཡོད་མེད་དུད་འགྲོའི་སྨན་པར་གཏུགས་ནས་བརྟག་དཔྱད་བྱེད་དགོས།
༤ སོ་བརྒྱབ་པའི་གནས་ཚུལ་དང༌། སོ་བརྒྱབ་རྗེས་སུ་རང་གི་གཅེས་ཉར་སེམས་ཅན་གྱི་སྤྱོད་པར་འགྱུར་ལྡོག་འདུག་ན་དུད་འགྲོའི་སྨན་པར་ཡར་ཞུ་བྱ་དགོས།
