ད་ལོའི་བོད་ནང་དུ་བྱུང་བའི་དོན་རྐྱེན་གྱི་བྱུང་རབས་དེ་དག་བོད་ཀྱི་ལོ་རྒྱུས་ནང་ཆེས་གཟི་བརྗིད་ཆེ་ཞིང༌། གསེར་གྱི་ཡི་གེ་བྲིས་ཏེ་ལོ་རྒྱུས་དེབ་ཐེར་ནང་འགོད་དགོས་པ་ཞིག་ཆགས་ཡོད། ང་ཚོས་བྱུང་རབས་དེ་དག་ལ་བདག་ཉར་བྱ་རྒྱུ་གལ་ཆེན་ཆགས་ཡོད། སྤྱི་ལོ་ ༡༩༥༩ སྔོན་གྱི་ལོ་རྒྱུས་དེང་སྐབས་ལོ་རྒྱུས་སྨྲ་བ་མང་པོ་ཞིག་དོགས་གཞི་ཆགས་ཡོད། དེ་དག་སྐབས་སོ་སོར་ལོ་རྒྱུས་བྱུང་བ་ཡིག་ཚགས་དུ་འགོད་མ་ཐུབ་པའི་སྐྱོན་ཆ་རེད། ཐེངས་འདིར་མདོ་སྨད་བཙན་རྒོལ་བདེན་རྒྱབ་མནའ་འབྲེལ་ཚོགས་པས་གནས་ཚུལ་ཕྱོགས་སྒྲིག་བྱས་པ་འདིར་བསྔགས་བརྗོད་ཞུ་བཞིན་ཡོད་ཟེར།
ཕྱི་ཚེས་ ༢ ཉིན་གྱི་སྔ་དྲོ་ངྷ་ས་གངས་སྐྱིད་སྤྱི་ཐབ་ཐོག་ཁང་དུ་མདོ་སྨད་བཙན་རྒོལ་བདེན་རྒྱབ་མནའ་འབྲེལ་ཚོགས་པའི་གོ་སྒྲིག་འོག ས་བྱི་ཞི་རྒོལ་ཆེན་མོ། ཞེས་པའི་དཔེ་དེབ་དབུ་འབྱེད་ཀྱི་མཛད་སྒོ་འཚོགས་ཏེ་མཛད་སྒོའི་སྐུ་མགྲོན་གཙོ་བོ་བཀའ་ཟུར་རོང་ཆེན་ཀིརྟི་རིན་པོ་ཆེ་མཆོག་གིས་དཔེ་དེབ་དེ་དབུ་འབྱེད་གནང་ཡོད། ས་བྱི་ཞི་རྒོལ་ཆེན་མོའི་དཔེ་དེབ་དེ་ནི་ད་ལོ་བོད་ཡུལ་མདོ་དབུས་ཁམས་གསུམ་དུ་མི་དམངས་ཞི་རྒོལ་ཆེན་མོའི་དོན་རྐྱེན་བྱུང་མ་ཐག བཙན་བྱོལ་དུ་ཡོད་པའི་མདོ་སྨད་ཆོལ་ཁའི་ཤེས་ལྡན་མི་སྣ་སྐོར་ཅིག་རྩ་འཛུགས་བྱས་ཏེ། ད་ལྟའི་བར་གནས་ཚུལ་ཅི་བྱུང་བརྩད་གཅོད་དང་རྟོག་ཞིབ། བསྡུ་རུབ། རྒྱུ་ཆ་བདམ་གསེས་ཀྱིས་ཁོངས་ལྡན་ར་སྤྲོད་འཕེར་བའི་ཚུལ་རྣམས་ཕྱོགས་སྒྲིག་བྱས་ཏེ། ས་བྱི་ཞི་རྒོལ་ཆེན་མོ། ཞེས་པའི་དཔེ་དེབ་དེ་དཔར་སྐྲུན་བྱས་ཤིང༌། ཕྱི་ཚེས་ ༢ ཉིན་གྱི་སེམས་དཔའ་ཆེན་པོ་གྷན་དྷི་མཆོག་གི་འཁྲུངས་སྐར་དང་བསྟུན་ཏེ། བོད་པའི་སྤྱི་ཚོགས་སྟེང་འགྲེམས་སྤེལ་ཞུས་ཡོད། དཔེ་དེབ་དབུ་འབྱེད་མཛད་སྒོའི་སྟེང་བཀའ་ཟུར་ཀིརྟི་རིན་པོ་ཆེ་དང་བཀའ་ཟུར་ཨ་ལགས་འཇིགས་མེད། བོད་མི་མང་སྤྱི་འཐུས་རྒྱུན་ལས་རྣམ་པ་དང་བཀའ་དྲུང་། ཕྱི་དྲིལ་དྲུང་ཆེ། དེ་བཞིན་ཚོགས་པ་སྒྲིག་འཛུགས་ཁག་གི་མཛད་གཙོ་རྣམ་པ་བཅས་ཆེད་ཕེབས་གནང་ཡོད།
ས་བྱི་ཞི་རྒོལ་ཆེན་མོ་དབུ་འབྱེད་མ་གནང་གོང་དུ་དཔེ་དེབ་འདིའི་ཐད་ཕྱག་ལས་གནང་མཁན་གཙོ་གྲས། སྤྱི་ཟུར་ཧོར་འཇིགས་མེད་ལགས་ཀྱིས་དཔེ་དེབ་ཀྱི་སྔོན་གླེང་དང་འབྲེལ་ཏེ། ཆོལ་ཁ་གསུམ་ཆིག་སྒྲིལ་གྱི་སྟོབས་ཤུགས་དང་༧གོང་ས་སྐུ་ཕྲེང་བཅུ་བཞི་བའི་རླབས་ཆེན་གྱི་མཛད་རྗེས་བཅས་ཀྱི་ཐད་གསུང་བཤད་གནང་དོན། དཔེ་དེབ་འདི་འཛམ་གླིང་མཉམ་འབྲེལ་རྒྱལ་ཚོགས་དང་ཡུ་རོབ་མཐུན་ཚོགས། བོད་དོན་རྒྱབ་སྐྱོར་ཚོགས་པ་སོགས་སུ་འགྲོ་བཞིན་ཡོད་སྟབས། ཁུངས་དག་ཅིག་ཡོང་དགོས་པ་གནད་འགག་ཆགས་ཡོད། སྔོན་ལ་མདོ་སྨད་ཕྱོགས་སུ་ང་ཚོར་རྒྱུས་ཡོད་སྟབས། མི་དམངས་ཀྱིས་རང་སྲོག་བློས་གཏོང་བྱས་པར་གདུང་སེམས་མཉམ་སྐྱེད་མཚོན་ཕྱིར་དང༌། རང་གཞུང་གི་ལས་དོན་ལའང་ཕན་ཐོགས་རེ་འབྱུང་ན་བསམས་ཏེ་དཔར་སྐྲུན་བྱས་པ་ཡིན་ལ། ཁུངས་བདེན་ར་སྤྲོད་འཕེར་བ་ཞིག་ཡོང་རྒྱུ་དཔེ་དེབ་འདིའི་ཐོག་མའི་དམ་བཅའ་ཡིན།
ད་ལོའི་ལས་འགུལ་ཆེན་མོས་རྒྱལ་ས་ལྷ་ས་ནས་ཁམས། མདོ་སྨད་ཀྱི་ཤར་མཐའི་བར་རི་མོ་གསར་བ་ཞིག་བྲིས་ཡོད། བོད་ཀྱི་ས་ཁྲར་ཞིབ་འཇུག་བྱ་མ་དགོས་པར་མི་མང་རང་ངོས་ནས་ང་ཚོའི་ས་ཆ་འདི་ཡིན་ཞེས་ལོ་རྒྱུས་ཀྱི་ས་ཁྲ་གསར་བ་ཞིག་བྲིས་ཡོད། འདི་བརྒྱུད་དེ་ལོ་སྟོང་ཕྲག་གསུམ་རིང་ཆིག་སྒྲིལ་ཡོང་མ་ཐུབ་པ་ཞིག ༧གོང་ས་སྐྱབས་མགོན་བཅུ་བཞི་བ་འདིའི་ནུས་སྟོབས་ཀྱིས་བྱུང་ཡོད། དེ་ནི་བོད་མི་ས་ཡ་དྲུག་གི་ཁྱད་ནོར་ཡིན། དེང་སང་བརྒྱུད་ལམ་ཁག་ཅིག་དང་མི་སྒེར་རེ་ཟུང་གིས་རྒྱལ་བ་རིན་པོ་ཆེའི་ཞི་མོལ་ལ་གྲུབ་འབྲས་མེད་པ་དང་དབུ་མའི་ལམ་ལ་ནུས་པ་མེད་པ། ཕལ་ཆེར་བོད་དོན་བདེན་མཐའ་སེལ་མ་ཐུབ་པ་༧རྒྱལ་བ་རིན་པོ་ཆེས་མ་འཇོན་པའི་བཟོ་འདྲ་བོ་བཤད་མཁན་འདུག དེ་རྩ་བ་ཉིད་ནས་བདེན་པ་མ་རེད། ལོ་ངོ་སྟོང་ཕྲག་གཅིག་རིང་བསགས་པའི་བྱས་ཉེས་ཡོངས་རྫོགས་དུས་རབས་ཉི་ཤུའི་དཀྱིལ་དུ་འཁྲུངས་པའི་རྒྱལ་བ་བསྟན་འཛིན་རྒྱ་མཚོ་སྐུ་རྐྱང་ལ་བཀལ་བ་ཡིན་ན་དྲང་བདེན་མ་རེད། ཅེས་དང༌། ངས་སྔོན་མ་ནས་ཟམ་གདོང་རིན་པོ་ཆེར་ཞུས་ཡོད། སྐྱབས་བཅོལ་དུ་ཡོང་སྟེ་གསོག་སྒར་སློབ་གྲྭ་དང་ལས་ཀ་མེད་པར་གང་སར་འཁྱམས་བསྡད་ཡོད་པའི་གསར་འབྱོར་དེ་ཚོར་བློ་ཕམ་འབྱུང་དུ་འཇུག་མི་རུང༌། དེ་ང་ཚོའི་ཆབ་སྲིད་ཀྱི་གནད་འགག་ཆེན་པོ་ཞིག་ཆགས་ཀྱིན་འདུག ད་ལོའི་ཞི་རྒོལ་སྣེ་ཁྲིད་མཁན་ཡང་མང་ཆེ་ཤོས་སྔོན་མ་འདི་ནས་ལས་ཀ་ཡང་མེད་པར་འཁྱམས་བསྡད་པ་ཚོ་རེད་ཅེས་གསུངས་བྱུང༌། 
སྐབས་དེར་བཀའ་ཟུར་ཀིརྟི་རིན་པོ་ཆེ་མཆོག་གིས་དཔེ་དེབ་དབུ་འབྱེད་དང་འབྲེལ་ཏེ། བོད་མིའི་ལས་འགུལ་མུ་མཐུད་མཇུག་སྐྱོང་གནང་དགོས་པ་དང་བོད་པའི་ཆོས་དང་རིག་གཞུང་འཛིན་སྐྱོང་སྤེལ་གསུམ་གྱི་གལ་ཆེའི་རང་བཞིན་གསུངས་དོན། རྒྱ་ནག་གཞུང་གིས་མི་ལ་མིའི་འདུ་ཤེས་མེད་པའི་ཐོག་ནས་བོད་པར་བརྙས་བཅོས་བྱས་ཡོད་ལ། བོད་ཆོལ་ཁ་གསུམ་རྡོག་རྩ་གཅིག་ཏུ་སྒྲིལ་ཏེ་རྒྱལ་བ་རིན་པོ་ཆེའི་དབུ་ཁྲིད་འོག་ཕེབས་ཀྱིན་ཡོད་པ་ད་རེབ་གསལ་བོ་བསྟན་ཡོད། རྒྱ་ནག་གཞུང་ལ་མཛུབ་མོ་བཙུགས་ཏེ་ལན་བརྒྱབས་སོང༌། ད་ལྟ་ང་ཚོའི་ལས་འགུལ་མཇུག་རྫོགས་པ་མ་རེད། མགོ་བཙུགས་པ་རེད། བོད་གཞིས་བྱེས་གཉིས་ཀྱི་མི་དམངས་ཚོས་ལས་འགུལ་མུ་མཐུད་དགོས། ལས་འགུལ་མཇུག་སྐྱོང་བྱ་དགོས་པ་རེད། མཇུག་སྐྱོང་བྱེད་པར་སྔར་ལས་ལྷག་པའི་དཀའ་ངལ་འཕྲད་སྲིད་ལ། སྔར་ལས་ལྷག་པའི་མི་མང་པོའི་ཚེ་སྲོག་ཤོར་སྲིད། འོན་ཀྱང༌། ཡིན་གཅིག་མིན་གཉིས་འཚེ་མེད་ཞི་བའི་ཐོག་ནས་ལས་འགུལ་མཇུག་སྐྱོང་གནང་རོགས་ཞེས་ཞུ་འདོད་བྱུང༌། ལས་འགུལ་སྤེལ་བར་དོན་དག་གཙོ་བོ་ཆོས་དང་རིག་གཞུང་མི་ཉམས་རྒྱུན་འཛིན་བྱ་རྒྱུ་དེ་རེད། བོད་པའི་སྐད་རླག་པ་ཡིན་ན་གོམས་གཤིས་རླག་འགྲོ། གོམ་གཤིས་རླག་ན་བོད་མི་རིགས་ཀྱི་འདུ་ཤེས་རླག་འགྲོ། བསམ་བློ་གཏོང་སྟངས་རླག་འགྲོ་བ་རེད། དེ་དག་རླག་སོང་ན་ཕན་ཐོགས་གང་ཡང་མེད་སོང་བ་རེད། དེ་རིང་གི་གོ་སྐབས་འདི་བཟུང་སྟེ་ཞུ་རྒྱུ་ཞིག་ལ། ད་ལོའི་བོད་ནང་གི་དོན་རྐྱེན་ཐད། གསར་འགོད་པ་རྣམ་པས་ཧུར་བརྩོན་ཆེན་པོ་གནང་སོང༌། དེ་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་བྱུང༌།
ཡང་བཀའ་དྲུང་མི་འགྱུར་རྡོ་རྗེས་ལགས་ཀྱིས་ས་བྱི་ཞི་རྒོལ་ཆེན་མོའི་དཔེ་དེབ་བཏོན་པར་བསྔགས་བརྗོད་དང་འབྲེལ་དཔེ་དེབ་དེ་གལ་གནད་ཆེ་ཚུལ་གསུངས་དོན། ད་ལོའི་བོད་ནང་དུ་བྱུང་བའི་དོན་རྐྱེན་གྱི་བྱུང་རབས་དེ་དག་བོད་ཀྱི་ལོ་རྒྱུས་ནང་ཆེས་གཟི་བརྗིད་ཆེ་ཞིང༌། གསེར་གྱི་ཡི་གེ་བྲིས་ཏེ་ལོ་རྒྱུས་དེབ་ཐེར་ནང་འགོད་དགོས་པ་ཞིག་ཆགས་ཡོད། ང་ཚོས་བྱུང་རབས་དེ་དག་ལ་བདག་ཉར་བྱ་རྒྱུ་གལ་ཆེན་ཆགས་ཡོད། སྤྱི་ལོ་ ༡༩༥༩ སྔོན་གྱི་ལོ་རྒྱུས་ལ་དེང་སྐབས་ལོ་རྒྱུ་སྨྲ་བ་མང་པོ་ཞིག་དོགས་གཞི་ཆགས་ཡོད། དེ་དག་སྐབས་སོ་སོར་ལོ་རྒྱུས་བྱུང་བ་ཡིག་ཚགས་དུ་འགོད་མ་ཐུབ་པའི་སྐྱོན་ཆ་རེད། མདོ་སྨད་བཙན་རྒོལ་བདེན་རྒྱབ་མནའ་འབྲེལ་ཚོགས་པས་གནས་ཚུལ་ཕྱོགས་སྒྲིག་བྱས་པ་འདིར་བསྔགས་བརྗོད་ཞུ་བཞིན་ཡོད། ལས་གཞི་འདི་ཐོག་མར་མགོ་འཛུགས་དུས་བཀའ་ཤག་ལ་ཞུས་ཡོད་ལ། བཀའ་ཤག་ནས་ཀྱང་ཕྱག་ལས་འདིར་ཐུགས་རྒྱས་ཚོར་ཆེན་པོ་གནང་ཡོད། འབྱུང་འགྱུར་ཡང་ཕྱག་ལས་འདིའི་ཐད་དགོངས་བཞེས་གནང་གི་རེད། ཅེས་དང༌། སྤྱིར་རྒྱལ་དབང་སྐུ་ཕྲེང་ན་རིམ་བོད་ལ་བཀའ་དྲིན་ཆེན་པོ་རེད། ལྷག་པར་ལོ་རྒྱུས་སྨྲ་བ་ཞིག་གིས་བལྟས་ན། ༧རྒྱལ་དབང་སྐུ་ཕྲེང་བཅུ་བཞི་བ་འདི། སྲིད་ཕྱོགས་ནས་བོད་ཆོལ་ཁ་གསུམ་ཆིག་སྒྲིལ་གྱི་ནུས་པ་ཐོན་པ། ཆོས་ཕྱོགས་ནས་འཛམ་གླིང་གི་རླབས་ཆེན་གྱི་དབུ་ཁྲིད་ཆགས་པའི་མཛད་འཕྲིན་ལོ་རྒྱུས་དེབ་ཐེར་ནང་ཤིན་ཏུ་གལ་ཆེན་དོན་ཆེན་ཆགས་ཡོད། ཅེས་གསུངས་བྱུང༌།
མཇུག་མཐར། ལོ་སྔ་ཕྱི་འདིར་རྒྱ་ནག་གཞུང་གིས་༧གོང་ས་མཆོག་ལ་སྐྱོན་བརྗོད་ཚད་མེད་བྱེད་ཀྱིན་ཡོད་པའི་ཐད། བཀའ་ཟུར་ཨ་ལགས་འཇིགས་མེད་མཆོག་གིས་ཐུགས་ཚོར་ཤུགས་ཆེན་པོས་གཞུང་སྒེར་གང་གིས་ཀྱང་ལན་འདེབས་མ་གནང་བར་བློ་ཕམ་ཡོད་པ་དང༌། དེ་ལ་བོད་གཞུང་དམངས་གཉིས་ནས་ངེས་པར་དུ་ངོ་རྒོལ་གྱི་རྣམ་འགྱུར་ཅིག་སྟོན་དགོས་པའི་འབོད་སྐུལ་ཞུས་དོན། བར་སྐབས་ཤིག་ནས་རྒྱ་གཞུང་གིས་༧རྒྱལ་བ་རིན་པོ་ཆེ་ལ་མཚམས་ཚོད་མེད་པའི་སྐྱོན་བརྗོད་ཤུགས་ཆེན་བྱེད་ཀྱིན་འདུག ཆབ་སྲིད་ཐོག་ནས་ལོག་སྤྱོད་པ། ཆོས་ལུགས་ཐོག་ནས་གཡོ་ཁྲམ་པ། སྤྱི་ཚོགས་ཐོག་ནས་མགོ་སྐོར་བ། ལྷག་པར་དུ་ཉེ་ཆར་ཆོས་གོས་གྱོན་པའི་ཁྱུ་སྤྱང༌། མིའི་གདོང་ལ་གཅན་གཟན་གྱི་སེམས་ལྡན་པ་སོགས་ལབ་ཀྱིན་འདུག སྐྱོན་བརྗོད་འདི་དག་ལ་༧གོང་ས་མཆོག་ཀྱང་ཐུགས་ཕམ་ཞེ་དྲག་གནང་གིན་འདུག ང་ཚོ་ཁ་རོགས་གེར་འདུག་ཚོད་རྩ་བ་ནས་མ་རེད། གཞུང་དང་མི་དམངས། སྤྱི་འཐུས་ལྷན་ཚོགས། ཚོགས་པ་སྒྲིག་འཛུགས། མི་སྒེར་སུ་འདྲ་ཞིག་གིས་ཀྱང་ད་བར་ལན་འདེབས་གནང་བ་མཐོང་མ་སོང༌། དེ་ལ་བློ་ཕམ་ཆེན་པོ་ཡོད། བཀའ་ཤག་ལ་སྙན་སེང་ཞུས་ཡོད། དེ་རིང་འདིར་ཚོགས་པ་སྐྱིད་སྡུག་ཁག་འཛོམས་ཡོད། ང་ཚོ་ཚང་མ་འཛོམས་ཏེ་ངུ་ཆ་དང༌། བུད་མེད་ཚོའི་བང་གདན་བརྡབས་རྒྱུ་ཙམ་ལས་མེད་ཀྱང་བྱ་ཚད་རེད། འཛམ་གླིང་མཉམ་འབྲེལ་རྒྱལ་ཚོགས་དང༌། རྒྱ་གར་དུ་ཡོད་པའི་རྒྱལ་ཁབ་ཁག་གི་གཞུང་ཚབ་ལ་ཞུ་གཏུགས་བྱས་ཏེ། ཆེན་པོ་མ་འཇོན་ཡང་རྣམ་འགྱུར་ཅིག་ངེས་པར་དུ་སྟོན་དགོས་པ་རེད། ཅེས་གསུངས་བྱུང༌།
ལས་གྲོགས་དོན་གྲུབ་བཀྲ་ཤིས་ལགས། གསལ་བཤད་གནང་བར་ཐུགས་རྗེ་ཆེ། ངས་འདི་ལྟར་བརྗོད་དོན་ནི། ང་ཚོས་བོད་གཞུང་དང་། རྒྱལ་བ་རིན་པོ་ཆེ། གཞིས་ལུས་མི་མང་བཅས་ཀྱིས་དུས་དང་རྣམ་པ་ཀུན་ཏུ་ཆིག་སྒྲིལ་གནང་བཞིན་པའི་རྒྱུ་མཚན་ལ་འགན་ཁུར་བའི་ཐོག་ནས་བྱ་བ་རྩོམ་དགོས་པ་དེ་དྲན་གསོ་ཞུས་པ་ཙམ་ཡིན།
ལས་གྲོགས་འཇིགས་བྲལ་བསྟན་འཛིན་ལགས། ལྷོ་ཕྱོགས་ཀྱི་ང་ཚོའི་ལས་དོན་དེའི་ཐད། ཉིད་ཀྱིས་ཧུར་ཐག་བྱས་པ་ཐོས་བྱུང་། ཐུགས་རྗེས་ཆེ་ཞུ་རྒྱུ་ཡིན།
ས་བྱི་ཞི་རྒོལ་ཆེན་མོ། ཞེས་པའི་ཁ་བྱང་ལ་ཕྲན་བཤད་ཅིག་བྱ་འདོད་བྱུང་།
༼ ས་བྱི་ ༽ རྒྱུ་མཚན་ཅིའི་ཕྱིར་བྱུང་བ་ཕལ་པར་བཞག་སྟེ། དུས་ཚོད་ནམ་ཞིག་ལ་བྱུང་བ་གནད་དུ་བདམས་ཡོད། འདིར་ཆེད་བརྗོད་དང་དཔྱད་རྩོམ་ལྟ་བུའི་རྩོམ་པ་པོ་སྒེར་གྱི་ལྟ་བ་དང་བསམ་ཚུལ་རིགས་ཀྱི་བསྲེས་ལྷད་བཀག་སྟེ། ལོ་རྒྱུས་དངོས་གཙོ་སྨྲ་བའི་འབྲི་ཐབས་སྤྱད་ཡོད།
༼ ཞི་རྒོལ་ཆེན་མོ་ ༽ ས་གནས་གང་དུ་བྱུང་བ་ཕལ་བར་བཞག་སྟེ། གནས་ཚུལ་ཅི་ཞིག་བྱུང་བ་གཙོར་འདོན་བྱས་ཡོད། འདིར་ཆོལ་ཁ་དང་ཆོས་ལུགས་ལྟ་བུའི་ལུང་ཚན་བྱེ་བྲག་པ་དམིགས་སུ་བགར་བའི་ཞེན་ཕྱོགས་དོར་ཏེ། གནད་དོན་དངོས་ལ་གདེང་འཇོག་དང་གུས་འདུད་མཚོན་པའི་འབྲི་ཐབས་སྤྱད་ཡོད།
ད་དུང་ཉིད་ཀྱི་བསམ་ཚུལ་ལྟར་༼ མདོ་སྨད་ས་བྱི་ཞི་རྒོལ་ཆེན་མོ ༽ ཞེས་བཏགས་ན། ས་བྱི་ཞི་རྒོལ་ཆེན་མོ་དེ་མདོ་སྨད་ཁོ་ནར་དབང་འགྲོ་ལྟ་བུའི་སྐྱོན་གནད་འབྱུང་སྲིད། དེར་བརྟེན། བདག་གིས་དེབ་དེ་ཐོག་མར་མཐོང་མ་ཐག་ནས། ས་བྱི་ཞི་རྒོལ་ཆེན་མོའི་རྩོམ་པ་པོ་དག་གིས་དེབ་ཀྱི་ཁ་བྱང་ཐད། དགོངས་པ་རྒྱ་ཆེན་བཞེས་འདུག་བསམ་པ་བྱུང་སོང་
ཨོ་ཡ། བསམ་ཚུལ་ཡག་པོ་རེད། ལས་ཀའང་གཟི་བརྗིད་རེད། འོན་ཀྱང་། ད་ལོ་དེབ་འདི་ངོ་མ་འདི་ལྟར་འབྲི་སྲོལ་ཡོད་པ་མ་རེད། ཨ་ལགས་འཇིགས་མེད་དང་འདི་ཚོར་བཅའ་རྒྱུ་ལས་རྒྱུ་མང་གི ངས་ནམ་རྒྱུན་ཁམས་ཕྱོགས་ཀྱི་དཔའ་བོ་དཔའ་མོ་དེ་ཚོར་རྗེས་སུ་ཡི་རངས་ཞུ་གི་ཡོད། ལྷག་པར་དུ་ད་ལོ་ངོ་མ་རང་གི་རེ་བ་དང་སྨོན་ལམ་ལྟར་བོད་མི་ཚོ་གཅིག་གི་རྒྱབ་ལ་གཅིག་ལངས་ཏེ་སྲོག་བློས་གཏོང་བྱས་པ་རེད། ད་བཙན་བྱོལ་གྱི་མི་འདི་དག་གིས་དོན་མེད་ལ་རྨ་ཁ་ཞིག་གཏོད་པ་རེད། ཧོར་གཙང་འདི་མི་དྲང་པོ་ཞིག་ཡིན། ཡིན་ནའང་མིག་རྒྱ་ཧ་ཅང་ཐུང་།
ས་བྱི་ཞི་རྒོལ་ཆེན་མོ་ཟེར་བའི་དེབ་གཅིག་བཏོན་ཡོད་འདུག དེབ་བཏོན་པར་དགའ་བསུ་ཡོད། ཡིན་ནའང་དེབ་དེའི་ཁ་བྱང་གི་མགོར་《མདོ་སྨད་》བྲིས་ཡོད་ན་མིང་དོན་གཉིས་མཚུངས་ཤིག་བྱུང་ཡོད་པ་ལ་དེ་མ་བྲིས་པ་དེ་ནང་དོན་དང་ཏག་ཏག་བསྡད་མེད་པར་མཐོང། གསལ་པོ་བཤད་ན་འདི་ལྟར་བྱས་ཏེ་ངའི་ལུང་པ་དང་། ངའི་ཆོལ་ཁ་ཟེར་བའི་ན་ཚ་རེག་དུག་ལས་ཀྱང་འཇིགས་སུ་རུང་བ་འདི་བྱུང་བ་རེད།
གྲོགས་པོ་ཚོ། ངའི་བསམ་ཚུལ་འདིའི་ཐོག་ལ་ལམ་སེང་ངར་མ་ལངས་རོགས། དོན་ངོ་མར་བཤད་ན། ངས་ད་བར་དུ་ཐོས་རྒྱུ་མཐོང་རྒྱུ་མང་དྲག་སོང་། མི་ཁག་ཅིག་གིས་ཁ་གྲག་དུས་ནས་ངས་ཁོ་ཚོའི་ཁོག་པ་རིག་གི་འདུག རྒྱུ་མའི་རིང་ཐུང་དང་སྦོམ་ཕྲའང་མཐོང་གི་འདུག ངས་སྐད་ཆ་སྡུག་ཤོས་རིགས་ད་དུང་བཤད་མེད། ད་ལོའི་གཞིས་སྡོད་བོད་མི་ཚོའི་གནས་སྟངས་ལ་བསམ་སྐབས་སེམས་ཞེ་དྲག་ཅིག་སྡུག་གི་འདུག སེམས་སྐྱོ་ནས་ཤི་ལ་ཁལ་རེད། ལྷག་པར་དུ་ངའི་སེམས་ཆུང་ཆུང་ཡིན། འོན་ཀྱང་། ངའི་སྐད་ཆ་འདི་དེབ་མ་བཏོན་གོང་ནས་ངས་མདོ་སྨད་ཀྱི་མི་བསམ་ཤེས་རེ་ཟུང་ལ་བཤད་མྱོང་། ད་ནི་དེབ་བཏོན་ཚར་པ་རེད། ཡག་པོ་རེད། ཡིན་ནའང་འདིའི་རྗེས་ནས་ཁ དབང་བརྩད་མི་ཆོག ཁེ་ཕན་འཚོལ་མི་ཆོག ང་མི་འདི་ཚོ་ཚང་མར་རྒྱུས་མངའ་ཡོད། ཁོ་ཚོའི་རྒྱུ་མཐིལ་དང་རྐང་མཐིལ་ཚང་མ་ངས་རིག་ཡོད།
གྲོགས་པོ་དགྲ་འདུལ་ལགས། ཁྱོད་རང་ལ་ལྷག་བསམ་དང་འཇོན་ཐང་ཡོད་ན། ཧོར་འཇིགས་ཀྱི་སྐད་ཆར་ཡིད་ཆེས་མིན་བྱེད་མི་དགོས་པར་ཁྱོད་རང་གི་ངོས་ནས་བོད་ཆོལ་ཁ་གསུམ་པོ་ཚང་བའི་དེབ་ཅིག་བཟོ་རོགས་གྱིས་དང༌། མི་ཞིག་གིས་ལྷག་བསམ་རྣམ་དག་གིས་དཀའ་ལས་བརྒྱབས་ཏེ་འདི་འདྲའི་མིག་མཐོང་ལག་ཟིན་གྱི་གྲུབ་འབྲས་རེ་བསྟན་ཡོང་དུས། དེ་ལ་ཁ་དྲོ་ཞེས་བསྟོད་པ་ཞིག་བྱེད་མ་ཐུབ་ཀྱང༌། འདི་ལྟར་ལོག་འགྲེལ་དང་ཕྱོགས་ལྷུང་གི་ལྟ་ཚུལ་མ་བཟུང་ན་ལེགས་པར་མཐོང༌། གལ་སྲིད་ཁྱོད་ཀྱིས་དངོས་གནས་དྲང་བདེན་དང་གཟུ་བོར་གནས་པའི་སྐད་ཆ་ཞིག་བཤད་འདོད་ན། དང་པོ་དཔེ་དེབ་དེ་ཚར་གཅིག་ཀློགས། དེ་ནས་ཡང་དག་ཡིན་མིན་བལྟས། གཞི་ནས་དགེ་ཕན་གྱི་དབྱེ་བ་འབྱེད་དགོས་པ་ལས་གློས་བཤད་དང་གཡམ་རྒྱུག་གི་སྐད་ཆ་འདི་ཁྱོད་རང་ངལ་བའི་རྒྱུ་ལས་མ་འདས།
འདི་ཕྱོགས་ང་ཡང་ཀླུ་མཁར་བྱམས་དང་ལྟ་ཚུལ་གཅིག་པ་ཡིན། མི་ལ་སྐྱོན་མེད་པ་མིན་པའི་སྤྱི་དོན་ལ་གང་གིས་ཕན་གྱི་འདུག་ལྟ་དགོས། མི་ལ་མ་ལྟ་ཆོས་ལ་ལྟོས་གསུང་པ་བདེན་པ་ཡིན།
ང་ཚོས་དོན་རྐྱེན་རེ་བྱུང་རྗེས་དེ་ལ་དེབ་རེ་འབྲི་ཐུབ་པ་དང་། དེ་དག་བྱུང་རབས་ནང་འགོད་ཐུབ་ན་ཡག་པོ་རེད། ཡིན་ནའང་། ལས་དཀའ་རེ་བྱས་པའི་རྗེས་སུ་བཤད་ཚགས་གཏམ་ཉེས་རེ་བྱུང་ན་དེར་ཆོད་ཅི་ཡང་ཡོད་ནི་མ་རེད། ངས་བལྟས་ན། ཚོགས་པ་དེའི་ཚོགས་གཙོ་ཚོགས་མི་སུ་ཡིན་གལ་མི་ཆེ་བར། སྤྱི་དོན་ལ་ཅིག་ཕན་སོང་ན་དེ་གས་འགྲིག་སོང་བ་རེད།
ཧོར་གཙང་གིས་དོགས་སེལ་དང་གསལ་བཤད་བྱས་སྟབས་ཉིད་ཀྱི་དོགས་པ་ཡོངས་སུ་སངས་འདུག སྲིད་དོན་པ་ཚོར་མཚོན་ན་མང་ཚོགས་ཀྱི་དོགས་པ་སེལ་རྒྱུ་ནི་ལས་སླ་བོ་རེད། ཡིན་ནའང་ཁོའི་སྐད་ཆ་དེ་དག་གིས་ངའི་དོགས་པ་སེལ་ཐུབ་མ་སོང་། ལྷག་པར་དུ་ཡུལ་མདོ་སྨད་ཀྱི་མིང་ཐོག་ནས་ཐེངས་འདིར་མདོ་སྨད་བཙན་རྒོལ་བདེན་རྒྱབ་མནའ་འབྲེལ་ཚོགས་པ་ཞེས་པ་ཞིག་བཙུགས་འདུག འདིའི་ཚོགས་གཙོ་དང་ཚོགས་མི་ཚོ་སུ་དག་རེད།
གྲོགས་གནས་ཚང་ལགས། ངོ་སོ་བསྟོད། ཕྱོགས་ཞེན་བྲལ་བའི་དཀྱེལ་ཡངས་ཀྱི་ལྟ་ཚུལ་འདི་ལ་ངོ་སོ་སྟོད། ང་ལའང་ཐོག་མར་དེ་ལྟ་བའི་བསམ་ཚུལ་ཞིག་སླེབས་སོང་། འོན་ཀྱང་། ཉིན་དེར་དཔེ་དེབ་དབུ་འབྱེད་ཀྱི་སྔོན་གླེང་གསུང་བཤད་སྐབས། རྩོམ་པ་པོ་ཧོར་གཙང་འཇིགས་མེད་ལགས་ཀྱིས་དོགས་སེལ་དང་གསལ་བཤད་འདི་ལྟར་བྱས་སོང་། ད་ལོ་མདོ་དབུས་ཁམས་གསུམ་ནང་ལོ་ངོ་བརྒྱ་ཕྲག་རིང་བྱུང་མ་མྱོང་བའི་ཞི་བའི་གྱེན་ལངས་ཆེན་མོ་ཞིག་དང་། ལོ་ངོ་སྟོང་ཕྲག་རིང་བྱུང་མ་མྱོང་བའི་ཆོལ་གསུམ་ཆིག་སྒྲིལ་གྱི་སྟོབས་ཤུགས་གསར་བ་ཞིག་བསྐྲུན་སོང་། རབ་བྱུང་ན། དེ་དག་ཐམས་ཅད་ཕྱོགས་སྒྲིག་གིས་ལོ་རྒྱུས་དེབ་ཐེར་དུ་བཀོད་དེ། མ་འོངས་པའི་མི་རབས་ལ་དྲན་རྟེན་དུ་འཇོག་གལ་ཆེ་མོད། ཐེངས་འདིའི་དོན་རྒྱེན་དེ་ཧ་ཅང་གི་བློ་བུར་བ་དང་། ཤིན་ཏུ་ནས་གནད་འགག་ཆེན་པོ་ཆགས་ཡོད་སྟབས། མི་བསད་པ་དང་། རྨས་བ། བཟུང་བ་སོགས་ཀྱི་གནས་ཚུལ་ཁ་གསལ་ཁུངས་ཐུབ་ཞིག་ཡོང་རྒྱུ་དེ་བས་གལ་ཆེན་ཡིན། དེར་བརྟེན། དུས་རྒྱུན་མཉམ་འཛོམས་བྱེད་པའི་ང་ཚོ་མི་ཁག་ཅིག་གིས་གྲོས་བསྡུར་བྱས་ཏེ། རྒྱུས་མངའ་ཆེ་བའི་སོ་སོའི་ཕ་ཡུལ་གྱི་བྱུང་རྐྱེན་དག་ཕྱོགས་སྒྲིག་བྱས་ཏེ་དཔེ་དེབ་འདི་བཟོས་པ་ཡིན། ཞེས་གསུངས་སོང་བས་བདག་གི་ཐོག་མའི་དོགས་པ་ཡོངས་སུ་སངས་སོང་ལ། དེ་དང་མཉམ་དུ་ལས་ལ་བརྩོན་ཞིང་ཕུགས་རྒྱང་རིང་བའི་ཁོང་ཅག་གི་ལྷག་བསམ་དང་ཕྱག་རྗེས་འདི་ལ་ངང་ངམ་ཤུགས་ཀྱིས་ཡིད་འགུལ་ཐེབས་སོང་།
ངོ་སོ་བསྟོད། སྤྱིར་ཡག་པོ་རེད་དེ། ཡིན་ནའི། གྱེན་ལངས་བོད་ཡོངས་ནས་བྱུང་ཙང་། རབ་ཡིན་ན་ཆོལ་གསུམ་གཅིག་ཏུ་བསྡུས་པའི་དེབ་ཅིག་འདོན་དགོས་ཀྱི་ཡོད་པའི་ཁར། མདོ་སྨད་ཁོ་ནས་དེབ་ཅིག་བཏོན་པ་ཡིན་ན། བོད་ནང་གི་ཆིག་སྒྲིལ་དེར་གཏོར་བཤིག་གཏོང་གི་མེད་པའང་མིན། དེ་བས། བཀའ་ཟུར་དང་སྤྱི་ཟུར་རྣམ་པས་ཆོལ་ཁ་གཞན་གཉིས་ལའང་བསམ་བློ་གཏོང་རན་ཡོད་པར་འདོད།