སྦྲ་མེད་འབྲོག་སྡེ།

ཕྲག་པ་གཡར་ཡ་ལ་དཀའ་ལེ་ཡོད་པ་མ་རེད་དེ། ངའི་སྐྱེས་དམན་ལ་མ་མཐོང་བ་བྱེད་དགོས་ཀྱི་རེད་མ་གཏོགས་གློག་ཀླད་འདིའང་འཕྲོ་བརླག་ལ་གཏོང་བའི་ཉེན་ཁ་ཡོད་པ་རེད། ང་མཚོན་ན་དཔལ་ལྡན་བཀའ་ཤག་གི་བུད་མེད་གཙོར་བཟུང་གི་སྲིད་ཇུས་དེ་ལོ་མང་རབ་ཅིག་གི་ཡར་སྔོན་ནས་ལག་བསྟར་བྱས་དང་བྱེད་ཀྱིན་པས། དེང་སྐབས་དེ་སེ་ལག་མ་འཁེལ་བའི་བཟོ་འདྲ་བོ་ཐོན་གྱི་ཡོད་པ་རེད། གང་ལྟར་པཱ་ལེ་ཡག་པོ་འགྲིམས་སོང་ན། དཀའ་ངལ་སེལ་མ་ཐུབ་པ་དེ་འདྲའང་ཡོང་གི་མ་རེད། དེ་ཕྱོགས་གཅིག་ཡིན།

ཁྱོད་རང་ངའི་ཕྲག་པར་ཁེན་ནས་ངུ་དུས་སྐད་ཞེ་དྲག་ཆེན་པོ་རྒྱག་རུང་གི་མ་རེད་མ་གཏོགས། ཕྱི་གླིང་བ་དེ་ཚོས་ངེད་གཉིས་ཀྱང་ཕོ་དང་ཕོའི་བར་མོ་དང་མོའི་བར་དགའ་བོ་སྒྲིག་མཁན་དེ་འདྲ་ལ་ནོར་ཉེན་ཡོད་པ་རེད། མ་གཞི་བོད་པའི་སྤྱི་ཚོགས་ཀྱང་དེའི་སྒང་རྗེས་ལུས་ཐེབས་མེད་མོད། ཚུལ་འཆོས་གཏོར་རྒྱུའང་ལས་སླ་བོ་ཞིག་མ་རེད། འདི་ཕྱོགས་གཞན་དེ་ཡིན།

རང་ཚོ་སྨྱུ་གུའི་ཁ་ནས་མི་རིགས་འདིའི་གསོན་ལམ་འཚོལ་མཁན་ཤ་སྟག་རེད། ང་རང་པཱ་ལེ་བཙོང་ནས་རང་ཚོའི་ལུས་པོར་ཟུངས་བཅུད་བསྐྲུན་མཁན་འདྲ་བོ་ཞིག་གི་གྲས་རེད། དེ་བས། ངའི་ཕྲག་པ་དེ་ཞེ་དྲག་བརྟན་པོ་ཡོད་པ་མ་རེད་ལ། རང་ཚོ་ངུས་ཆོག་ཆོག་དེའང་ཡག་རྟགས་ཤིག་མ་རེད། དེ་ལས་མིག་ཆུའི་བཞུར་རྒྱུན་སྨྱུ་གུའི་འགྲོས་སུ་བསྐུལ་ནས་ཤོག་དཀར་སྒང་འགྲིམས་པ་ཡིན་ན། དེ་ནི་འཆི་མེད་རྒས་མེད་རེད། འདི་ཕྱོགས་གསུམ་པ་ཡིན།

ལཱ་རེད། ལོ་རྒྱུས་སྨྲ་མཁན་ཚོས་བཤད་ན། དེ་ནི་ཐུ་བྷོད་རྒྱལ་རབས་ཀྱི་བཤུལ་དངོས་སམ་བཤུལ་བཞག་ཤུགས་རྐྱེན་ལ་བཞི་ཤད་བཀོད་པ་རེད་ཟེར། ཆོས་པ་ཚོས་བཤད་ན། འཇིག་རྟེན་མི་རྟག་པ་ཡིན་པས། སྦྲ་ནག་ལ་རྟག་བརྟན་ཞིག་ག་བ་ཡོད། དེ་ནི་འདུས་བྱས་ཀྱི་རང་བཞིན་རེད་ཟེར། ང་གཙོར་བྱས་པཱ་ལེའམ་བག་ལེབ་བཙོང་མཁན་ཚོར་མཚོན་ན། བག་ཚོང་ཡག་པོ་ཆགས་སྲིད་པས། བག་ལེབ་བཙོང་གི་བོད་ནང་དུ་འགྲོ་དགོས་པ་མིན་འགྲོ་བསམ་གྱི་ཡོད། ཡིན་ནའི། པཱ་ལེ་ཉོ་བའི་པེ་ཤག་རྫོགས་ཟིན་པའི་ཉིན་མོ་དེར། ཁོང་ཚོས་གྱེན་ལངས་ད་ལོ་ལས་ཀྱང་གཞི་རྒྱ་ཆེ་བ་ཞིག་བྱེད་སྲིད་པས། ངའི་བག་ཚོང་རྡིབས་ས་རེད་བསམ་ན་སེམས་ཁྲལ་མེད་པའང་མ་རེད། འོ་རེད། བོད་མི་ཞིག་ཡིན་པའི་ཆ་ནས་བག་ལེབ་ཁ་ཤས་ཞལ་འདེབས་སུ་སྤྲད་ཆོག་ཀྱང་ཆ་ཚང་འཕྲོ་བརླག་ལ་ཕྱིན་ཚེ་མགོ་ལྗང་ཁུ་བའི་ལས་ག་རང་ཆགས་སོང་བ་མ་ཡིན་ནམ།