ཆབ་བྲག་ལྷ་མོ་སྐྱབས།
ཉེ་ལམ་ནུབ་བོད་རང་སྐྱོང་ལྗོངས་ནས་བཏོན་པའི་ཏཱ་ལའི་རུ་ཚོགས་ཀྱི་ནམ་མཁར་མི་ཤོང་བའི་སྡིག་ཉེས་ཞེས་པའི་བོད་རྒྱ་ཤན་སྦྱར་གྱི་དེབ་དེར། སང་འཆི་གནངས་འཆི་ལ་སླེབས་པའི་ང་ཕོད་ལྟ་བུའི་ལོ་བརྒྱ་བུད་ཀྱང་བསམ་གཅིག་མ་ཤེས་པའི་གུང་ཁྲན་གྱི་རྒྱུག་ཁྱི་ང་ཕོད་དང༌། རག་སྡིས། བྱམས་པ་ཕུན་ཚོགས། འཕགས་པ་ལྷ་སོགས་བོད་ཀྱི་དཔོན་ཆེན་དང་བླ་ཆེན་གྱི་མིང་འཛིན་པ་ཁག་ཅིག་གིས། ༣།༡༤ ལྷ་སའི་དོན་རྐྱེན་ཞེས་པ་འདི། ཏཱ་ལའི་རུ་ཚོགས་ཀྱིས་སྒྲིག་འཛུགས་ཡོད་པ་དང༌། འཆར་གཞི་ཡོད་པ། ངན་བསྐུལ་བྱས་པ་བཅས་ཀྱིས་མེས་རྒྱལ་ཁ་བྲལ་དང་སྤྱི་ཚོགས་ཟིང་ལོང་བཟོས་པའི་ཆེད་བཟོས་ནག་ཉེས་ཆེན་པོ་ཞིག་ཡིན་ཚུལ་གྱི་ཁ་རྡུང་དྲག་པོ་བྱས་པ་དེ་དག་ལ་བསམ་ན་རང་གི་མི་རིགས་ནང་ནའང་འདི་འདྲའི་ཐོག་མཐའ་བར་གསུམ་དུ་ཇེ་དགར་འགྱུར་རྒྱུ་མེད་པའི་ངན་རུལ་པ། ལོ་བརྒྱར་བུད་ཀྱང་བསམ་གཅིག་མི་ཤེས་པའི་རྨོངས་རྒན་པ། ལྟོ་དོན་ཁོ་ནར་སྲེད་པའི་གུང་ཁྲན་གྱི་རྒྱུག་ཁྱི་གཏུམ་པོ། ཆོས་ཀྱི་རྒྱལ་པོར་རྒྱབ་ཀྱིས་པྱོགས་པའི་ནག་ཕྱོགས་གཤེད་མ་འདི་རིགས་ཨ་བསམས་ན་ཡིད་སེམས་གཏིང་ནས་སྐྱོ་པ་ཞིག་དང་ལྷན་དུ་དེ་དག་གི་མགོ་ལྕེ་དུམ་བུར་ཆད་ན་ཅི་མ་རུང་སྙམ་པའི་སྡང་སེམས་ཤིག་ཀྱང་སྐྱེ་ངེས།
འོན་ཀྱང༌། ཁ་སང་བོད་ཀྱི་དུས་བབ་འདོན་ཐེངས་༤༢༩ ནང་ལ་ཉེ་ཆར་མཚོ་སྔོན་ཞིང་ཆེན་ཏང་གི་སློབ་གྲྭར་འཚོགས་པའི་རྨ་ལྷོ་ཁུལ་གྱི་དགོན་སྡེ་སོ་དྲུག་གི་མི་སྣ་དང་མགོ་ཁྲིད་མང་པོ་ཕེབས་པའི་ཐོག ཏཱ་ལའི་རུ་ཚོགས་ཀྱི་བཟོ་ལྟ་ངོ་མར་དགག་རྒྱག་གིས་སྤྱི་ཚོགས་འཆམ་མཐུན་ལ་སློབ་སྦྱོང་བྱེད་དགོས། ཞེས་པའི་བརྗོད་གཞིའི་ཐོག་ལ། གྲྭ་བ་ཞིག་གིས། ཏག་ཏག་དེའི་ལྡོག་པྱོགས་ཀྱི་བསམ་ཚུལ་གནས་ལུགས་རྒྱུ་མཚན་དང་བཅས་ངར་ཤུགས་ཆེན་པོས་གླེང་སློང་བྱས་ཚུལ་དེ་མཐོང་ནས། ཨ་ཨ། ཅི་འདྲའི་མི་རིགས་ཀྱི་དཔའ་བོ། ཅི་འདྲའི་ལྷག་བསམ་རྣམ་དག་ཅན། ཅི་འདྲའི་དྲང་བདེན་སྨྲ་མཁན་ཞིག་ཨང་སྙམ་ནས་དགའ་སྤོབས་ཚད་མེད་ཅིག་སྐྱེས།
བོད་མི་ཚོས་འདི་ལྟར་ཚོགས་ཐོག་ནས་མགྲིན་པ་གཟེངས་སུ་བསྟད་དེ་སོ་སོའི་བསམ་ཚུལ་ངོ་མའམ་དྲང་བདེན་གྱི་སྐད་ཆ་ཤོད་པ་འདི་ནི་ཁྲོམ་ལམ་དུ་སྐད་འབོད་བྱས་པ་དག་ལས་ནུས་པ་ཧ་ཅང་ཆེ་བར་མ་ཟད། རང་ཉིད་ཀྱི་བདེ་འཇགས་ལའང་ཉེན་ཁ་ཆུང༌། གལ་ཏེ་ཁོང་ལ་རྗེས་སུ་རྩད་གཅོད་དོ་དམ་གང་ཡང་མེད་པ་ཞིག་བྱུང་ན། འདི་ནི་དོན་ངོ་མའི་དམངས་གཙོའི་སྨྲ་བརྗོད་རང་དབང་ཞིག་ཏུ་བརྩི་ཆོག ད་དུང་ཚོགས་འདུ་དེར། རང་སྐྱོང་ལྗོངས་ཀྱི་བདག་དབང་གི་སྐོར་ལའང་གླེང་སློང་བྱས་པ་དེ་ཡང་ཁ་ཚ་དགོས་གཏུགས་ཀྱི་བརྗོད་གཞི་ཞིག་ཡིན་པས། མུ་མཐུད་དེ་མི་རིགས་ཀྱི་ཁེ་ཕན་དངོས་དང་འབྲེལ་བའི་དམངས་གཙོའི་རྣམ་པ་དེ་རིགས་སྤེལ་རྒྱུ་ནི་དོན་ངོ་མའི་སྤྱི་ཚོགས་རིང་ལུགས་ཀྱི་དམངས་གཙོ་གསར་པའི་རྟགས་མཚན་ཞིག་རེད་ལ། མི་རིགས་རང་གི་བདག་པོ་ངོ་མ་ཞིག་ཀྱང་རེད། དེ་བས་ང་ཚོས་ཚོགས་འདུ་དེའི་གཙོ་སྐྱོང་གི་བློ་ཁོག་ཡངས་པའི་མགོ་ཁྲིད་རྣམ་པ་དང་མི་རིགས་ཀྱི་མགྲིན་ཚབ་ངོ་མ་དག་ལ་སྙིང་ནས་ཡི་རངས྄་དང་བསྔགས་བརྗོད་ཞུ་འོས།
སྤུན་ཟླ་རྣམ་པ། བོད་ཤར་ནུབ་གཉིས་ཀྱི་བར་ལ་འདི་འདྲའི་གནམ་སའི་ཁྱད་པར་ཞིག་བྱུང་དོན་ཅི་ཡིན་ནམ། རྒྱུ་རྐྱེན་མི་འདྲ་བ་རེ་ཡོད་ཀྱང༌། གཙོ་བོ་མི་རང་ཉིད་ལ་ཐུག་པའི་གནད་དོན་ཞིག་མ་རེད་དམ།
རེད་ཡ། མི་རིགས་ཀྱི་དཔའ་བོ་ངོ་མ་དང༌། མི་རིགས་ཀྱི་མགྲིན་ཚབ་པ་ངོ་མ། མི་རིགས་ཀྱི་ཞབས་འདེགས་པ་ངོ་མ་དེ་མི་དམངས་རང་གི་ཁྲོད་ན་ཡོད་པ་ལས། གུང་ཁྲན་གྱི་གསོས་པྲུག་ཧབ་སོ་སྣ་ཉག་དག་ནི་མི་རིགས་ཀྱི་ཞབས་འདྲེན་པ་ཙམ་དུ་མ་ཟད། མི་རིགས་ཀྱི་དགྲ་བོར་གྱུར་པའང་ཅི་ལ་མིན་ཏེ། ཁོ་ཚོས་ཏཱ་ལའི་རུ་ཚོགས་ལ་རྒོལ་བ་ནི་དོན་དམ་པར་འཛམ་གླིང་གི་ཞི་བདེའི་དེད་དཔོན་ཆེན་མོ་དང་བོད་མི་རིགས་ཀྱི་ཆོས་སྲིད་ལུགས་གཉིས་ཀྱི་རླབས་ཆེན་གཙོ་འཛིན་གྱིས་གཙོས་བཙན་བྱོལ་བོད་རིགས་སྤུན་ཟླ་དང་དེ་དག་གི་རླབས་ཆེན་གྱི་འགན་འཁྲི་དང་དམིགས་ཡུལ་བཅས་པའི་དགྲ་ཟླར་ལངས་པ་ཞིག་ཡིན་པས་སོ། །
རྩོམ་པ་པོ་ཆབ་བྲག་ལགས།ཕྱོགས་གཅིག་ནས་བལྟས་ན་ཁྱེད་ཀྱི་དགོངས་ཚུལ་ལ་མོས་མཐུན་ཡོད། སྐབས་རེ་བསམ་བློ་བཏང་དུས།ཕྱི་དགྲ་ལྕགས་ནག་གི་སེར་བས་བརྙས་ན་བརྙས་པའི་དབང་དུ་བཏང་ཆོག་ཀྱང༌། ནང་དགྲ་ཁང་རྒན་གྱི་ཐིགས་པས་བརྙས་ན་བརྙས་པའི་དབང་དུ་མི་གཏོང་སེམས་ཐག་ཡིན་བསམ་པའང་དྲན་མྱོང༌། འོན་ཀྱང་སྤྱི་ཡོངས་ནས་བསམ་བློ་བཏང་ན།ང་ཚོ་བོད་པ་ཚང་གི་གཤིས་ཀ་སྡུག་ཤོས་དེ་ཁ་རོ་ལ་འཁོར་ནས་མི་ངུ་བར་གྱང་ལ་འཁོར་ནས་ངུ་བ་འདི་རེད། གོང་དུ་ཁྱེད་ཀྱིས་མིང་འདྲེན་བྱས་པ་འདི་དག་ལ་མཚོན་ནའང༌།ཝ་མི་བརྒྱལ་ཀ་མེད་འདྲེ་ཡི་འགྲམ་ལྕགས་དང༌། ཁྱི་མི་ཟུག་ཀ་མེད་རྐུན་མས་ནག་འབུར་ཟེར་བའི་དཔེ་ལྟར་གྱུར་ཡོད་པ་དངོས་ཡོད་གནས་ཚུལ་རེད། དེར་བརྟེན་ང་ཚོས་ཁ་རྡུང་དགོས་ས་དེ་ལ་གཏོང་མ་ཐུབ་པར་ནང་ལོག་ལ་ཚུར་གཏོང་འདུག་པ་འདི་ལ་བསམ་བློ་ངེས་པར་དུ་གཏོང་དགོས་པ་ཞིག་རེད་བསམ་གྱི་འདུག གལ་སྲིད་རྒྱ་ནག་གཞུང་གིས་འདི་ལྟ་བུའི་རྒྱུད་སྐུལ་དང་ངན་གཡོ།འཇིགས་སྐུལ་བཅས་བྱེད་ཀྱི་མེད་ན། ཁོང་རྣམ་པར་མཚོན་ནའང་དེ་ལྟར་བྱེད་མི་སྲིད་པ་ཁ་ཚོན་བཅད་ནས་བཤད་ཐུབ་པ་ཞིག་རེད། དེར་བརྟེན་གཉོམ་ཆུང་ཁོང་ཁྲོ་ནང་ལ་ཟ།ཕོ་ངན་ཁ་སྤུ་ནང་ལ་སྐྱེས་ཟེར་བཞིན་མི་གནང་བར་རྗེས་སུ་དགོངས་པ་ངེས་པར་དུ་བཞེས་དགོས་པ་གལ་ཆེ་བར་སྣང༌།
སུ་ཞིག་མི་རིགས་ཀྱི་དགྲ་བོ་ཡིན་ནམ། བོད་ལ་བོད་མི་དགོས་པ་དེ་ཚོ་མི་རིགས་ཀྱི་དགྲ་བོ་རེད། སུ་ཞིག་མི་རིགས་ཀྱི་གྲོགས་པོ་ཡིན་ནམ། རང་ཉིད་ལ་རང་ཉིད་དགོས་མཁན་དེ་ཚོ་མི་རིགས་ཀྱི་གྲོགས་པོ་ཡིན། དགྲ་གྲོགས་ཀྱི་རྣམ་དབྱེ་ཤེས་མཁན་དེ་ཚོ་མཁས་པའམ་ཡང་ན་རྣམ་དཔྱོད་ལྡན་པ་ཟེར། དེ་ལྟར་མི་ཤེས་པར་ཚིག་རེ་ གཉིས་རེ་བཤད་ཤེས་མཁན་དང་ཡིག་འབྲུ་རེ་གཉིས་རེ་འབྲི་ཤེས་པ་ཙམ་དང་གསར་ཤོག་ཐོག་གང་བྱུང་འགོད་མཁན་དེ་རིགས་ལ། བླུན་པོ་སྨྲ་བ་ལ་དགའ་བ་དང༌།།བསྟན་བཅོས་མི་ཤེས་རྩོམ་ལ་དགའ།།ཞེས་པའི་ལེགས་བཤད་དེའི་ལུང་གིས་ཟིན་པ་རང་རེད།
དྲ་གྲོགས་ཆབ་བྲག་ལྷ་མོ་སྐྱབས་ལགས། སྤྱིུར་བཏང་གིས་མི་ཟེར་བ་འདི་ལ་བཟང་ངན་གཉིས་ཡོད་པ་བདེན་མོད། འོན་ཀྱང་། བོད་ནང་གི་མི་སྣ་དེ་དག་གི་བྱེད་སྟངས་ཕྱོགས་གཅིག་ལ་སྡུག་དམོད་བྱེད་པ་དང་ཕྱོགས་གཅིག་ལ་བསྟོད་པ་བྱས་པ་དེ་ཡང་། བསམ་བློ་ཞིབ་མོ་ཞིག་བཏང་ནས་བཤད་ཡོད་ན་ཅི་མ་རུང་། བོད་ནང་ལོག་གི་བོད་མི་ལས་བྱེད་མི་སྣ་དེ་དག་གི་གནས་སྐབས་རང་རང་གི་ལས་སྣེ་གཅིག་བུ་མ་ཡིན་པར་ཕྱོགས་གང་ས་ཞིག་ལ་བསམ་བློ་བཏང་ནས་སྐད་ཆ་རེ་ཟུང་ལ་ཐད་ཆ་ཤོས་སྲིད་ཀྱང་། ང་ཚོས་ཁོང་ཚོ་ལ་ཡང་བོད་མི་རིགས་ཀྱི་བླ་སྲོག་གནས་ཡོད་པ་ཡིད་ཆེས་བྱས་ཆོག་པ་ཡིན། དེས་ན་རྗེས་ཕྱོགས་སུ་བོད་ནང་གི་བོད་མི་ལས་བྱེད་དག་ལ་འཕྱ་དམོད་དང་སྡུག་དམོད་བྱེད་རྒྱུས་ཕྱོགས་ལ་འགན་འཁུར་ཡོད་པས་སྐད་ཆ་རེ་བཤད་ཐུབ་ན་ཡག་པོ་འདུག དེ་མིན་རང་དབང་ཡོད་ས་ནས་ཁ་མཁས་བོ་བཤད་ཤེས་པ་ཙམ་གྱིས་གང་ཡང་མི་ཕན།
འདི་ངས་མི་གཞན་པ་ཞིག་ལ་བཏང་ཡང་ནོར་ནས་འདིར་ཤོར་དགོངས་དྭངས།
གྲོགས་པོ་སྐུ་བདེ་མོ།སྐད་ཆ་ལབ་ན་ཆོག་གམ།