རྩོམ་ཡིག་འབྲི་བ་ནི། རང་གི་སྙན་གྲགས་ཀྱི་ཆེད་དུ་མིན་ལ། རང་ཉིད་ལ་དངུལ་སྒོར་མང་བོ་ཞིག་ཐོབ་ཆེད་དུའང་གཏན་ནས་མིན། དེ་ན་གང་ཡིན་ཟེར་ན་ནི། རྩོམ་ཡིག་འབྲི་བ་ནི་མི་མང་ལ་ཞབས་ཞུ་ཞིག་བྱེད་ཆེད་དུ་ཡིན་ལ། ཞབས་ཞུ་དེ་ཡང་མི་མང་ལ་རང་གི་སེམས་གཏིང་གི་མི་ཟེར་བ་འདི་ལ་དགོས་པའི་བདེ་ཐང་གི་ཆེད་དུ་སྐད་ཆ་རེ་བཤད་པ་དེ་ཡིན། རྩོམ་ཡིག་དེ་ལྟར་འབྲི་དུས། ང་རང་ལ་མི་ཟེར་བ་འདི་ལ་འགན་ཞིག་ཡོད་པ་དང་མི་ཟེར་བ་འདི་ལ་མི་ཚང་མ་འདྲ་མཉམ་གྱི་འདོད་ཕྱོགས་ཤིག་ཡོད་པ་ངོས་ཟིན་ཐོབ་དུ་འཇུག་པའི་ལམ་ཞིག་བསྐྲུན་ཆེད་དུ་ཡིན། ལམ་ཁ་དེ་ནས་ཐུང་ཐུང་ཞིག་མིན་ལ། ལམ་དེའི་ནང་དུ་འགྲོ་རྒྱུ་ལ་ཡང་མི་རང་རང་ནས་འགན་ལེན་དང་དང་ལེན་ངང་འབད་བརྩོན་བྱེད་དགོས་པའི་གནས་ལུགས་དང་རྒྱུ་མཚན་གང་མང་མང་ཞིག་མི་རང་རང་གི་བློ་ངོར་ཡོད་པ་དེ་དག་ཕན་ཚུན་ལ་གསལ་འདེབས་དང་གྲོས་མོལ་བྱེད་པའི་ཆེད་དུ་ཡིན། དེང་སང་མི་མང་བོ་ཞིག་གི་རྩོམ་ཡིག་ཟེར་བ་ནི་གོ་རྒྱུ་མེད་པ་དང་སྙན་ངག་ཟེར་བ་དེ་བས་ཀྱང་རིན་ཐང་མེད་པ་ཞིག་ལ་ངོས་འཛིན་བྱེད་བཞིན་ཡོད་པ་རེད། དེ་འདྲ་ཞིག་གཏན་ནས་མ་ཡིན་པར་ངེད་ཅག་སྨྱུ་གུ་འཛིན་མཁན་ས་སྟེང་འདི་ན་གང་ཡོད་པ་ཚང་མས་ངོས་ཟིན་ཐོབ་དགོས་པ་ལས། སྐུར་འདེབས་དང་དམའ་འབེབས་རྐྱང་རྐྱང་གི་ཁྲོད་ནས་རྩོམ་ཡིག་སྤེལ་བ་ནི་ཡར་རྒྱས་ཤིག་མ་ཡིན་པར་མིའི་རིགས་ཀྱི་སེམས་ནང་དུ་ནག་ཐིགས་ཤིག་ཕབ་པ་ལས་གང་ཡང་མིན་པ་ཤེས་དགོས། ངེད་ཅག་རྩོམ་ཡིག་འབྲི་མཁན་སུ་ཞིག་ལ་མཚོན་ན་ཡང་རང་གི་འབྲི་བཞིན་པ་དེ་དག་རང་ཉིད་ལ་མིང་དང་གོ་གནས་ཐོབ་ཆེད་དུ་བེད་སྤྱོད་གཏོང་མི་འོས་པ་ལ། དེ་ལྟར་བེད་སྤྱོད་བཏང་བ་ཡིན་ན། དེའི་རིགས་ཀྱི་རང་གི་མིང་དང་གོ་གནས་ཀྱི་ཆེད་དུ་བདེན་པ་དང་བརྩི་བཀུར་དང་ཤ་ཞེན། ཁྲེལ་གཞུང་བཅས་ལ་རིན་ཐང་མི་འཇོག་པ་ཡིན།
རྩོམ་ཡིག་འབྲི་བ་ནི་མིའི་རིགས་ཀྱི་འཚོ་བའི་ནང་དུ་དགོས་འཁོ་ཞིག་སྐོང་ཆེད་དུ་ཡིན་ལ། དགོས་འཁོ་དེ་ཡང་དྲང་ཕྱོགས་ཤིག་ལས་ཀྱོག་ཕྱོགས་ནས་ནམ་ཡང་སྤེལ་མི་རུང་བ་ཡིན། དེ་ལྟར་རྩོམ་ཡིག་འབྲི་བ་དག་ནི་མིའི་རིགས་ཀྱི་ནག་ཉེས་བྱེད་མཁན་ཞིག་ལས་གང་ཡང་མེད་པར་ཆགས་བཞིན་ཡོད། དེའི་ཕྱིར་ངས་དུས་རྟག་དུ་རྩོམ་ཡིག་འབྲི་བ་ནི་རང་གི་སྲོག་ལས་རྩ་ཆེན་དང་རང་གི་འཚོ་བ་ལས་གལ་ཆེན་དུ་འཛིན་གྱི་ཡོད། ཡིན་ཡང་། ང་རང་གི་གང་བྲིས་པ་ཡོད་ཚད་དེ་ཡང་ཕུལ་བྱུང་ཤ་སྟག་ཞིག་ཡིན་པར་ཡང་འདོད་མ་མྱོང་ལ། ངས་ཤེས་ཀྱི་ཡོད། ངས་འཇོན་གྱི་ཡོད། ཡང་ན་ང་རང་ལ་ཤེས་ཡོན་ཚད་ལྡན་ཞིག་ཡོད་ཅེས་རང་རློམ་ཞིག་ནམ་ཡང་བྱེད་མྱོང་མེད་ལ། ངས་རྟག་དུ་རང་གི་ཨེ་ཤེས་ཨེ་འཇོན་ལ་བལྟ་བཞིན་ཡོད་པ་དེ་ལས་ང་རང་གི་ཤེས་ཡོན་གྱི་ཚད་གཞི་གོང་མཐོར་བཏང་ནས་མིའི་རིགས་ཀྱི་སེམས་ནང་གི་དགའ་སྐྱོ་ཆགས་སྡང་ལ་དབང་བསྒྱུར་བ་དེ་ནི་དོན་དངོས་སུ་གང་ཞིག་ལ་ངོས་འཛིན་བྱེད་དགོས་པ་ནས་དེ་ཉིད་ལ་གོ་དོན་ཟབ་མོ་ཞིག་ཐོབ་པར་འབད་འབུངས་ཉིན་མཚན་མེད་པར་བྱེད་བཞིན་ཡོད་ལ་སྨྱུག་ཐོག་པ་ཚོ་ལ་ཡང་དེ་ལྟར་སྐུལ་ལོངས་དང་འབོད་སྐུལ་བྱེད་ཀྱི་ཡོད།
ང་རང་ལ་རྩོམ་པ་པོ་ཞེས་པའི་མིང་ཡང་ཐོབ་འདོད་མེད་ལ། སྙན་ངག་པ་ཞེས་པའི་ཆོ་ལོ་དེ་ཡང་དེ་བས་ཀྱང་དགོས་དོན་མེད་ལ། མཁས་པ་དང་དབུ་ཁྲིད་ཟེར་བའི་གོ་མིང་དེ་འདྲ་བརྫིག་པ་ཞིག་ཀྱང་ང་རང་གི་རྨི་ལམ་ནང་དུ་ཡང་ཐོབ་དགོས་ཀྱི་མེད། ང་རང་གི་རྩོམ་ཡིག་གང་འབྲི་འདོད་པ་དང་གང་ཞིག་ལ་བསམ་བློ་གཏོང་བཞིན་པ་དེ་དག་གི་མཐར་གཏུག་གི་དམིགས་ཡུལ་ནི། མིའི་རིགས་ཀྱི་ཕན་ཚུན་ལ་བསམ་ཤེས་དང་བརྩི་བཀུར། ཁྲེལ་གཞུང་དང་དྲང་བདེན་ཡོད་མཁན་ཞིག་ཆགས་རྒྱུ་དེ་ཡིན། དེ་ལྟར་ཆགས་ཉིན་གྱི་མིའི་རིགས་ཀྱི་སྤྱི་ཚོགས་ཤིག་ག་དུས་བྱུང་ན་དེ་དུས་ང་རང་གི་རྩོམ་ཡིག་ཆ་ཆོར་འདི་དག་འབྲི་མཚམས་ཀྱང་འཇོག་ངེས་ཡིན་ལ། ཉིན་མཚན་མེད་པར་མི་ཟེར་བ་འདི་ལ་དགོས་པའི་འདོད་ཞེན་ལྕི་མོ་དེ་དག་ག་བསྐོར་ལ་བསམ་བློ་ཡང་གཏོང་མཚམས་འཇོག་ཁོ་ཐག་ཡིན། ཡིན་ཡང་། ང་རང་ལྟ་བུ་མི་མང་བོ་ཞིག་ལ་རྨི་ལམ་དང་རེ་བ། ཡང་ན་ཡིད་ཆེས་འདི་འདྲ་མང་བོ་ཞིག་ཡོད་ངེས་ཡིན་ལ། དེ་དག་གི་ཆེད་དུ་ངེད་ཅག་གི་རང་རང་གི་གང་ནས་བསྡད་ཀྱང་གང་ཞིག་བྱེད་ཀྱི་ཡོད་པ་དེའི་ཁོར་ཡུག་ནས་མགོ་འཛུགས་དང་ལག་ལེན་ལ་འདེབས་རྒྱུར་སང་ཉིན་ལས་དེ་རིང་གལ་ཆེན་དུ་འཛིན་པ་དང་ཆུ་ཚོད་གཅིག་གི་རྗེས་སུ་ལས་ཆུ་ཚོད་གཅིག་གི་སྔོན་མ་དེ་གལ་ཆེན་དུ་འཛིན་པ་དང་། སྐར་ཆ་གཅིག་གི་སྔ་ཕྱི་ལས་སྔ་མ་འདེམས་ནས་འགུལ་བསྐྱོད་ཆུང་ས་ནས་བརྩམས་ནས་ཆེན་པོར་ཆགས་པར་བརྩོན་རྒྱུ་དེ་ནི་ང་རང་གི་དུས་ཚོད་ཡོད་མེད་དང་རང་གི་ཤེས་མིན་ལ་མ་བལྟས་པར་འབད་ཀྱི་ཡོད།
མི་སུས་ཀྱང་རྩོམ་ཡིག་འབྲི་ཆོག་ན་ཡང་། མི་སུས་ཀྱང་རྩོམ་ཡིག་འབྲི་བ་ལ་དམིགས་ཡུལ་བཟང་ཕྱོགས་ནས་འཛིན་དགོས་པ་དང་སྐད་ཆ་ཡག་སྡུག་གང་ཞིག་བཤད་འདོད་ཀྱང་དེ་དག་ལ་འགན་འཁུར་ཡོད་པ་དང་རྒྱུ་མཚན་ཡོད་པ། བསམ་ཤེས་ཡོད་པ། རང་ཚུགས་ཡོད་པ་བཅས་ཡིན་དགོས་པར་འདོད་ཀྱི་ཡོད།
