བོད་མི་ཚང་མས་བསམ་ཕྱོགས་གཅིག་ལ་ཕྱོགས་དགོས།

དམིགས་ཡུལ་གཅིག བསམ་ཕྱོགས་གཅིག རེ་བ་གཅིག ཁ་ཕྱོགས་གཅིག རྩོད་གཞི་གཅིག རྨི་ལམ་གཅིག སྐྱིད་སྡུག་གཅིག ལས་དབང་གཅིག མི་རིགས་གཅིག འདི་དག་གི་ཆེད་དུ་ངེད་ཅག་ལ་མི་རིགས་གཞན་ལ་མེད་པའི་སྙིང་སྟོབས་དང་སྤོབས་པ། རང་གི་རིགས་ལ་སྲི་ཞུ་བྱེད་འདོད་ཀྱི་ཆོད་སེམས་ཆིག་སྒྲུལ་བྱེད་དགོས་པ་དང་།
རང་རང་ནས་འགོ་འཛུགས་ཀྱི་སྐད་ཆ་བཤད་པ་དང་ལས་འགུལ་སྤེལ་བ་སོགས་གང་ཞིག་ཡིན་ཡང་། བོད་ཟེར་བ་དེའི་ཆེད་དུ་བྱེད་ཀྱི་ཡོད་བསམ་པ་ཞིག་དྲན་ཐུབ་པ་དགོས་ཀྱི་འདུག་པ་མ་ཟད། བོད་ཟེར་བ་དེ་ཁ་ནས་གླེང་ཤེས་པ་ཙམ་ཞིག་མ་ཡིན་པར་དོན་དངོས་སུ་རང་ཉིད་བོད་པ་ཟེར་བའི་མི་རིགས་ཤིག་ཡིན་པ་སེམས་གཏིང་དུ་ཚོར་བ་ལྷད་མེད་ཅིག་དགོས་པ་ལས་སྐར་ཆ་རེ་ཟུང་དུ་སྐད་འབོད་བྱེད་ས་དང་ཚོགས་འདུ་ཚོགས་ས་སོགས་ནས་འདྲ་ཆགས་པོ་དང་གཏམ་བརྫིག་པོ་ཁ་ཤས་ཤིག་བཤད་པས་ཅི་ཡང་མི་ཡོང་། ཐ་ན་རང་གི་བུ་ཕྲུག་ལ་ཡང་བོད་ཟེར་བའི་མི་རིགས་ཤིག་གི་བླ་སྲོག་དངོས་དེ་ཡོད་པ་བྱེད་པའི་འགན་འཁུར་རང་ཉིད་ལས་གཞན་སུ་ལ་མེད་པའི་བསམ་བློ་ཡང་དག་ཞིག་ཡོད་པ་དེ་ལ་ངེས་ཤེས་ཟབ་མོ་ཡོད་དགོས་པ་ཡིན་ལ། བུ་ཕྲུག་ཚོ་སྐད་ཆ་བཤད་པ་དང་བསླབ་བྱ་རྒྱག་དུས་སུ་ཡང་། བོད་པ་ཟེར་བ་ནི་གཅིག་ལས་གཉིས་མེད་པ་དང་བོད་ཟེར་བ་འདིའི་བདེ་སྡུག་ཡང་གཅིག་ལས་གཉིས་མེད་པ་དེ་དག་གསལ་བོ་སེམས་རྒྱུད་དུ་འཇོག་ཐུབ་དགོས་ཀྱི་ཡོད། དེ་ལྟར་འགན་མ་ཆགས་པ་ཡིན་ན་རང་ཉིད་ཚོ་བོད་ལ་སྐྱེ་བའི་དོན་གོ་མ་བྱུང་བ་ཡིན། ངེད་ཅག་ནི་མི་རྟག་གཉེར་མའི་བཟུང་དེ་འཆི་བའི་ཕྱོགས་སུ་ཐག་མི་རིང་མཁན་རྐྱང་རྐྱང་ཡིན་དུས་སུ། ངེད་ཅག་འདས་པ་དང་ལྷན་དུ་ངེད་ཅག་གི་བུ་ཕྲུག་ཚོས་བོད་མི་རིགས་ཤིག་འཛམ་གླིང་འདིར་གནས་ཡོད་པ་ལས་བོད་ཟེར་བ་དེ་ལ་ཐུན་མོང་མིན་པའི་ཁྱད་ཆོས་ཤིག་དང་། གཞན་གྱིས་བཙན་འཛུལ་ཐེབས་ནས་མི་ཡུལ་དུ་འཚོ་བ་རོལ་ནས་བསྡད་ཡོད་པ་དེ་ཤེས་མི་ཐུབ་པ་ཡིན། དེ་ལྟར་མ་ཤེས་པའི་ཉིན་མོ་དེ། བོད་ཟེར་བ་ནི་ལ་ཁའི་ཉི་མ་ལྟ་བུ་ཆགས་པ་རེད་ལ། མེས་པོ་དག་གི་ངེད་ཅག་གི་ལག་ཏུ་བཞག་པའི་མཛད་མཐའ་མེད་པའི་ཐུན་མོང་མ་ཡིན་པའི་རིག་གཞུང་དེ་འཛམ་གླིང་འདིར་གནས་མ་ཐུབ་པ་དང་ངེད་ཅག་གི་རང་གི་མེས་པོ་དེ་དག་གི་ཤ་ཁྲག་གི་ཉོས་པའི་གསེར་དངུལ་གྱི་མི་ཁུགས་པའི་རིག་གཞུང་དེ་ཉམས་དུ་བཅུགས་པ་ཡིན་ན། བསྐལ་བའི་མཐའ་ལ་ཐུག་ཀྱངངེད་ཅག་གི་ཉེས་པ་འདག་ཐབས་མེད་པ་ཡིན། དེའི་ཕྱིར་ངེད་ཅག་སེམས་བསམ་པའི་གཏིང་ལ་བཅོས་མ་མེད་པར་འདི་ལ་བརྩོན་པ་བྱེད་དགོས་སོ།