ལོ་གསར་མ་རེད་དོམ་གསར་རེད།།
དོམ་ལན་ཐོན་པ་དགའ་རྒྱུ་མེད།།
གསར་ལ་ཉེ་བའི་ལོ་ནག་འདི།།
བྱས་དང་མ་བྱས་གོང་གི་བཀའ།།
རང་དབང་ཁ་ལ་སྒོ་ལྕགས་ཡོད།།
བསྡོད་འདུག་གང་ཡིན་ཁྲིམས་ལུགས་ལྟར།།
མི་བྱེད་ཟེར་མཁན་ཁག་པོ་རེད།།
དམར་པོའི་ཁྲག་ཞིག་མཐོང་མི་འདོད།།
དབུགས་མེད་བེམ་པོ་བརྩིགས་མི་རུང་།།
ཚེ་སྲོག་སྲུང་བར་གལ་ཆེ་བས།།
གོང་གི་ཅི་གསུང་བྱེད་རྒྱུ་ཡིན།།
མི་རིགས་སེམས་པ་ནང་དུ་ཡོད།།
ནང་གི་བཙན་ས་སུ་ལ་ཡང་།།
དབང་ཐབས་མེད་པའི་ཆོས་ཉིད་དེ།།
བཤད་དགོས་མི་འདུག་སེམས་སུ་ཡོད།།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
དོམ་གསར་དེ་ལ་སྙིང་ནས་སྡིགས་མོ་བྱེད། །
ལོ་གསར་དེ་ལ་སེམས་ནས་དམོད་མོ་གཏོང། །
ཐོག་མར་དྲ་གྲོགས་བསེ་རུ་ལགས་ཁྱེད་རང་ལ་དགོངས་དག་ཞུ། ཉིན་མ་ཁ་ཤས་ཀྱི་རིང་དུ་ང་རང་གུང་གསེང་ཞིག་ལ་སོང་དེ་ལན་དུས་ཐོག་དུ་འདེམས་མ་ཐེབས་པ་དེར།
རིགས་མཐུན་སེམས་ཀྱི་དབུས་ན་གནས་པ་ཡི།།
ཕན་ཚུན་དུངས་པ་ཟབ་མོའི་གླེང་མོལ་འདིས།།
སེམས་ཀྱི་ངལ་གསོ་སྤྲོད་ལ་ཕན་པ་དང་།།
རང་རང་བསམ་ཚུལ་གླེང་ལ་བཟང་བས་ན།།
ཉིད་ཀྱིས་བྲིས་པའི་རྩོམ་ཡིག་ཀློག་དུས་སུ།།
རང་དབང་མེད་པར་སེམས་ལ་དགའ་ཚོར་ཞིག།
གང་ནས་ཡོང་བ་རྩ་གཅོད་བྱས་དུས་སུ།།
རིགས་རུས་གཅིག་ལ་དུངས་པའི་ཞེན་ཁོག་དེས།།
ང་ཚོ་གཅིག་དུ་སྤྲེལ་བ་གཞི་ནས་རྟོགས།།
ད་ལོ་ལོ་གསར་མེད་པའི་ཁ་བརྡ་ཡིས།།
ང་ཚོས་རང་རང་སེམས་ཀྱི་བསམ་ཚུལ་དག།
དྲ་ཚིགས་གང་སར་གླེང་བས་འབྲས་རྟགས་སུ།།
ད་ནི་བཙན་བྱོལ་བོད་མི་ཡོངས་རྫོགས་ཀྱི།།
ལོ་གསར་མི་གཏོང་ཟེར་བས་བརྡ་འཕྲིན་དག།
དྲ་ཚིགས་འདི་ཡི་གོང་འོག་ཡོད་ཚད་ཁྱབ།།
ཡིན་ཡང་མྱ་ངན་ཞུ་ལུགས་གང་འདྲ་ཞིག།
བྱེད་མིན་ད་དུང་ཐག་གཅོད་མི་འདུག་ན།།
དེའི་ཐད་དུ་བསམ་ཚུལ་ལྷུག་པོར་སྩོལ།།
ལོ་གསར་ལོ་གསར་ཚུར་ལ་སླེབས།།
མི་རྙིང་དོན་རྙིང་ཕར་ལ་སོང་།།
གསར་རྙིང་གཉིས་ཀྱི་བར་དོ་ནས།།
ད་ནི་ཅི་ཞིག་བྱས་ན་བསམ།།
ད་ལོའི་ལོ་གསར་བརྩི་ལུགས་འདི།།
ལོ་ནག་མྱ་ངན་ལོ་རུ་བརྩི།།
ང་དགུ་དྲན་གསོའི་ལོ་རུ་བརྩི།།
ལོ་རྒྱུས་ནང་གི་བརྗེད་ཐོ་ཞིག།
ལོ་གསར་ཚེས་གཅིག་མྱ་ངན་བྱེད།།
ཆུ་ཕུད་ཇ་ཕུད་ཟས་ཕུད་སོགས།།
ཚེ་སྲོག་འབུམ་གྱི་རྣམ་ཤེས་ལ།།
མྱ་ངན་མཆོད་པའི་ཚུལ་དུ་འབུལ།།
ཕྱག་དང་མཆོད་པ་བསངས་གསོལ་རྣམས།།
འདས་ཟིན་དཔའ་བོ་དཔའ་མོ་ཡི།།
རྣམ་ཤེས་ཚུར་ལ་འགུག་བཞིན་དུ།།
དྲིན་བྱས་དྲིན་གཟོའི་སླད་དུ་འབུལ།།
ཕྱོགས་བཞི་མཚམས་བརྒྱད་བཞུགས་པ་ཡི།།
བོད་རིགས་མགོ་ནག་རྩམ་གཟན་རྣམས།།
ཡིད་གདུང་མཆི་མས་བརླན་བཞིན་དུ།།
ཉིས་སྟོང་དགུ་ཡི་ལོ་གསར་བསུ།།
མི་རབས་ཇི་སྲིད་ནམ་གནས་བར།།
མྱ་ངན་ལོ་འདིའི་རྒྱབ་ལྗོངས་རྣམས།།
རང་ཅག་བོད་ཀྱི་ལོ་རྒྱུས་ཀྱི།།
མེ་ལོང་ནང་དུ་ཅིས་མི་འཇོག།